Mateo 8

IV. ESUSËN NADATIAMBOCQUIN NABANAID

(8.1—9.38)

Esusën daicsaid bëdanmiaid

(Madc. 1.40-45; Duc. 5.12-16)

1Ambobi macuësh poctse tsadquin ënquin chuibantanequien Esus macuësh budpanëdash. Adec budanec nidsho issun matses dadpenshun tsibanampanëdash.

2Adnubien dada aton dada daush daushpambo yec daicsaidquio choquin Esus ismec dannëshën tinquebudec shuebudshun chiec: Ubi bëdanmete bunquin mimbi ubi bëdanmetsiaque. Ubi bëdanme, Icbo, caquien 3Esus: Ai, mibi bëdanmete bunebi, quequin mishtemaidquiobi mishnubi badedquio bëdampanëdash daicsaid nibëdquio yanec. 4Aden bëdanmetanquin Esusën: Umbi mibi bëdanmebued utsibo chuibanenda. Adenquio icquin nëish iua cuessunneshun pichicaquid yacno nidshun min dada ismeta. Adembidi Moisesën chiampicpadombuen nanuen Nuquin Papa ismetequid buanec nidta. Ma adosho issun nëish iua pichicaquidon: Aton dada daush daushpambo yec daicsaidquio icbuedi bëdanmiaid nec, quequin ma tantiapanu, quequin Esusën chuipanëdash.#8.4 Moisesën aden dada uapampic. Aid iste bunquin chotaquën onqueten dada uaid D.N.Ch. 14.1-32 isbanta.

Doma yacnocquidon sondadon chuiquid tapan iua Esusën bëdanmiaid

(Duc. 7.1-10; Uan 4.43-54)

5Shubu dadpen icquid Capednaun yacno nidash Esus tabadpanëdash. Adnubien Doma yacnoquid sondadon chuiquid tapa capitan caidën naden Esus chuituidpanëdash: 6Icbo, cun shubun icquid cun iua natiambo yec shëquëquenquio iccosh, 7quesho tantiashun: Ai, bëdanmec nidnunid, caquien 8sondadon chuiquid capitanën: Padi, Icbo. Mibi bëdamboshë icquidquio nec. Ubi icsambocquid icquin mibi cun shubun puduedmetiapimbo iquebique. Nidenquio icquin nëshunquiobi mimbi tantiacpadombuen chuiquin: Bëdanta, cac cun iua bëdantsiashe, Bëdanmeta. 9Ubibic cun chuiquid tapan namiaid icquin sondado utsibo namequid nebi. Umbi: Baded nid, cac badedi nidec. Umbi: Baded cho, cac badedquio choec. Cun iuan umbi: Nata, cac umbi chiacpadombuen naic. Mibi adquidquiobidi neque. Cun iua bëdanmeta, quepanëdash sondadon chuiquid tapa.

10Adsho tantiashun Esusën abi tsibambëquido naden chuipanëdash: Bëdambuen tantiaquin nëidën chuipec. Nëidën: Chuiquinuidtsëqui cun iua bëdanmetsiash, quequin ubi bëdambuen tantiaquid nec. Aidpadquid isadaidbo nibëdec. 11Tantia. Chuinu. Matses utsi icquimbi sondadon chuiquid tapan ubi tantiec. Adec nidaid utsi utsiec yacnocquido isadaidpembo ubi tantiaquido yanash uëshë choacmiuësh choec Nuquin Papan namiacno puduedtequid iquendac. Adecbidi uëshë nidacmiuësh choec puduedtequid icuaindac.#8.11 Aden chiacbimbuen cuëdënte dada uapampic. Aid isnuen chotaquën onqueten dada uaid Cuëd. 107.23 isbanta. Adash isadaidbon tsusedpabo Abadauan yec Isac yec Acobo yec quec aidobëd pec tabadendac. 12Padnuen isadaidbo dadpenquio Nuquin Papan namiacno tabadtiadquidi puduedtiapimbo iquendac. Aido abi tantiesabo icsho chian annëdënquiacno nësecac mëyadec shëta chëquëdëshquec natiaquiec shubiquiendac, quequin Esusën chuipanëdash. 13Adshumbic sondadon chuiquid tapa chuiquin: Min shubuno nidec nid. Mimbi tantiacpadquiequi min iua bëdanaque, cac nidshun Esusën chuibocpadënquio aton iua bëdanacsho istuidpanëdash.

Petedon nachi Esusën bëdanmiaid

(Madc. 1.29-31; Duc. 4.38-39)

14Adtanec Esus Petedon shubu yacno nidec puduedpanëdash. Puduedshun isaquien Petedon nachi nëncuenash chumbo yec ueten uepec. 15Adec uesho istuidshun mëdante mëmishquin Esusën bëdanmepanëdash. Aden bëdanmiac dauebudec bëdanshun Esus pemequin nashumpanëdash.

Esusën matses dadpen bëdanmiaid

(Madc. 1.32-34; Duc. 4.40-41)

16Adnubien aid inchëshbudtsëqui: Esus ismenu, quequin podobitsi icsa dapuduedaido dadpen bëbëshobien podobitsi icsa dapuduedaido caic: Dapuduen, quequin dapuduenmebanshumbic daicsaidobëta nënquidotsen Esusën bëdanmebampanëdash. 17Daicsaidobëta nënquido bëdanmendac, quequin ëndenquimboshë Nuquin Papan Esusën nate chuiquin ambi oncamiaid Isayas dada uamepampicpadombuen napanëdash Esusën. Naden chuipampic:

Nuqui daicsaidbëta nuqui nënaid

bedshunquin bëdanmendac,

quequin chuipampic Isayasën.#8.17 Isa. 53.4 tantiaquin nëid dada uapanëdash.

Abëd icte bunquido Esusën chiaid

(Duc. 9.57-62)

18Adashic abi isnuec chochoash matses dadpenquio datsidadsho isash abëd icquido chiec: Chian potec nidnunid, quianec chian yacno nidec Esus puduampanëdash. 19Puduanec nidanneshobien Moisesën chiampid tantiamequidën Esus chinunshun naden chuipanëdash: Tantiamequid, mibi nidacnombobi nidec mibëd nidebi, caquien 20Esusën: Tantia. Mibi chuinu. Bëdi chëshë aton shëcuën ushquid. Uicchun aton shubu uash abuc ushquid. Padnueni Matsesën Tishaid yequi cun shubu nibëdnuc ubi ushte nibëdec, capanëdash.

21Adshobien abëd capucuennequid utsin: Chiatacqui, Icbo. Cun pa uënësaccoshe. Chococatambono, caquien: 22Padi icnuna. Ma uënësacbimbuen ubi tantienquio icquidon ma uënësaid chococanu. Mibi ubëd iquec cho, cabidanec Esus chian yacno nidannepanëdash.

Natiambo cunquenuc acte bocquequid Esusën ënëdmiaid

(Madc. 4.35-41; Duc. 8.22-25)

23Adec chian budash Esus abëd icquidobëd cano antabëdtoanec nidpanëdash. 24Aden potec nidec nënantanquio yannubi cunquequid tapa cumapenec cunquetuidnuc acte cumapenec bocquiampanëdash. Adec acte bocquenuc cano acte ancushad ancushadquiec yannuc cano mentoadtiadtsëcquio icpanëdash. Adsho issun Esus chiec nidshun abëd icquidon: Dacuëdampambo iquec, quetanquin isaquien Esus ushpec.

25Adshobien tinquin: Nuqui mentoadeque. Isucunshun ubitedi acten mentomenda, Icbo, caquien: 26¿Atotsi quiash natiec dacuëdcuedede? Ubi bëdiactsëc tantiaquido mibitedi nec, quetanec nidtoshon cunquequidbëtabi acte chiec: Padi. Ënëd, caquien natiambo cunquebuedi badedquio ënëdpanëdash. Adecbidi actetsen bocquenquio yampanëdash. 27Adsho isashien tantiadempambo yec tabadec: ¿Mitsipadquidënquio nac ambi chiacpadec actebëd cunquequid badedquio ënëdposhba? quecuededpanëdash abëd icquido.

Dada daëd podobitsi icsabo dapuduedaid Esusën dapuduenmiaid

(Madc. 5.1-20; Duc. 8.26-39)

28Aden chian potiash pudundonobien nidaid Cadada yacnocquid podobitsi icsa dapuduedaid dada daëd choec Esusën dayun chopanëdash. Aid daëdi uënësaido chococaid shëcuëmbi tabadec uidënquiocquido nepanëdash. Matses cuessunnete bunquiec dacuëdampambo icsho isash aid podquiedën matses capuenquio icpanëdash. 29Aidon podobitsi icsabon oncamiacpadombuen cumapenec cuëdquin Esus naden chuipanëdash: ¿Atotsi ubitedi canuec ne? ¿Nuquin Papan Madombo icquin ubi natiamequin cuidnuecta cho? ¿Nuquin Papan abitedi cuidte uëshë choabi icnubida ubitedi cuide? capanëdash podobitsi icsabon oncamiac.

30Ambobi uannopactsëc chanchu dadpenshun natiacquin udquin pebededec tabadpanëdash. 31Adnubien podobitsi icsabon aid dada daëd oncameuac: Ubitedi cuenmequin chanchon dadan icbo icbuen dapuduedme, quecuededpanëdash podobitsi icsabo. 32Adsho tantiashun Esusën: Ai, mimbi tantiacpadec nid, cac nidash chanchon dadan icbo icboec dapuduednuc niquianec abucquio quiusudacnouësh chian nëpaëdbudnec mentoadbudnepanëdash chanchu nibëdquio yec.

33Adsho istanequien chanchu pemequin isquido aton matses chiec titinquianec shubu dadpen yacno nidannepanëdash. Ambo nidshun chanchu mentoadbudnebuedbëta podobitsi icsabo dapuduenmebued uesquin chuituidpanëdash. Nuqui dacuëdëmbuedobi bëdambo yanosh, quequin chuituidpanëdash. 34Adoaquien ambocquido abitedi Esus isec chochopanëdash. Adec chochoshombien: Dacuëdampambo mibi iqueque. Nëmbo iquenquio yec nidec nid, cabededac Esus nidpanëdash.

Nu geselecteerd:

Mateo 8: mcfNT

Markering

Deel

Kopiëren