Génesis 5
5
Ebꞌ Yicꞌaal Naj Adán
(1a Crónicas 1:1-4)
1Jaꞌ skꞌaneal ebꞌ yicꞌaal Adán yin xolilal tiꞌ. Jaꞌ yet jix waꞌnele ebꞌ ánima yu Jehová, jaxca wal yeocoj queytuꞌ jix yun swaꞌneni. 2Jix waꞌnele naj winaj cꞌal ix ix yu Jehová, catuꞌ jix yakꞌon syaaxilal yibꞌan ebꞌ. Jaꞌ yet jix waꞌxi ebꞌ tuꞌ, ánima,#5:2 Laan snotail yetoj Génesis 2:7. jix yij can a ebꞌ yu.
3Jaꞌ naj Adán tuꞌ, ey 130 abꞌil skꞌinal yet jix ali jun scꞌaal chi yij Set, caw laan yili jaxca smam. 4Jix lawi tuꞌ, 800 abꞌil skꞌinal naj Adán tuꞌ, eyto scꞌaal cꞌal scutzꞌin jix ali. 5Ey 930 abꞌil skꞌinal yet jix cami.
6Jaꞌ naj Set tuꞌ, ey 105 abꞌil skꞌinal yet jix ali jun scꞌaal chi yij Enós. 7Jix lawi tuꞌ, 807 abꞌil skꞌinal naj Set tuꞌ, eyto scꞌaal cꞌal scutzꞌin jix ali. 8Ey 912 abꞌil skꞌinal yet jix cami.
9Jaꞌ Enós tuꞌ, ey 90 abꞌil skꞌinal yet jix ali jun scꞌaal chi yij Cainán. 10Jix lawi tuꞌ, yet 815 abꞌil skꞌinal, eyto scꞌaal cꞌal scutzꞌin jix ali. 11Ey 905 abꞌil skꞌinal yet jix cami.
12Jaꞌ naj Cainán tuꞌ, ey 70 abꞌil skꞌinal yet jix ali jun scꞌaal chi yij Mahalalel. 13Jix lawi tuꞌ, ey 840 skꞌinal, eyto scꞌaal cꞌal scutzꞌin jix ali. 14Ey 910 abꞌil skꞌinal yet jix cami.
15Jaꞌ Mahalalel tuꞌ, ey 65 abꞌil skꞌinal yet jix ali jun scꞌaal chi yij Jéred. 16Jix lawi tuꞌ, ey 830 abꞌil skꞌinal, eyto scꞌaal cꞌal scutzꞌin jix ali. 17Ey 895 abꞌil skꞌinal yet jix cami.
18Jaꞌ naj Jéred tuꞌ, ey 162 abꞌil skꞌinal yet jix ali jun scꞌaal chi yij Enoc. 19Jix lawi tuꞌ, ey 800 abꞌil skꞌinal, eyto scꞌaal cꞌal scutzꞌin jix ali. 20Ey 962 abꞌil skꞌinal yet jix cami.
21Jaꞌ naj Enoc tuꞌ, ey 65 abꞌil skꞌinal yet jix ali jun scꞌaal chi yij Matusalén. 22Jix ecꞌabꞌ naj Enoc jaxca wal chi yoche scꞌul Jehová. Yet xax ali jun scꞌaal chi yij Matusalén tuꞌ, ey 300 abꞌil jix too ecꞌ Enoc tuꞌ. Jaꞌ yet jun tiempoal tuꞌ, eyto scꞌaal cꞌal scutzꞌin jix ali. 23Ey 365 abꞌil jix yilaꞌ. 24Jix ecꞌabꞌ jaxca wal chi yoche scꞌul Jehová, yuxan ey jun cꞌual tucꞌal jix qꞌueyaoj, yutol jaꞌ Jehová jix iꞌontoj yetoj.
25Jaꞌ naj Matusalén tuꞌ, ey 187 abꞌil skꞌinal yet jix ali jun scꞌaal chi yij Lámec. 26Jix lawi tuꞌ, ey 782 abꞌil skꞌinal, eyto scꞌaal cꞌal scutzꞌin jix ali. 27Ey 969 abꞌil skꞌinal yet jix cami.
28Jaꞌ naj Lámec tuꞌ, ey 182 abꞌil skꞌinal yet jix ali jun scꞌaal. 29Noé,#5:29 Jaꞌ yin Hebreo, jaꞌ jun bꞌie chi yij Noé, laan yetoj jun kꞌane chi yij “xewilal”. jix yakꞌ yij sbꞌi scꞌaal tuꞌ yutol jix yalaꞌ: Jaꞌ Jehová jix yaeytej sjowal scꞌul yibꞌan txꞌotxꞌ txꞌotxꞌ tiꞌ, yuxan yin wal syaꞌtajil chi yun cu mulna sat txꞌotxꞌ txꞌotxꞌ tiꞌ, jal tinaniꞌ xin, jaꞌ jun naj unin tiꞌ oj cu akꞌon xewoj, ẍi naj. 30Jaꞌ yet xax ali naj Noé tuꞌ, eyoc naj Lámec tuꞌ yin 595 abꞌil skꞌinal, eyto scꞌaal cꞌal scutzꞌin jix ali. 31Ey 777 abꞌil skꞌinal yet jix cami.
32Jaꞌ naj Noé tuꞌ, ey 500 abꞌil xa skꞌinal, catuꞌ jix ali ebꞌ yuninal, jaꞌton naj Sem, Cam cꞌal naj Jafet.
Nu geselecteerd:
Génesis 5: knj
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2016, Wycliffe Bible Translators, Inc. All rights reserved.
