Naṉ. 6
6
Shuara yajauchiri̱ túrunamu
1Tura ashí nuṉkanam aents ti untsurí pampáa tekarmatai ni nawantri̱sha akiinkiarmiayi. 2Tura Yusa uchirí̱ aentsu nawantri̱ shíirmach áinian wáinkiarmiayi. Túrawar aṉkant aṉkant ní wakeramun nuatkarmiayi. 1 Pit. 3:19-20; 2 Pit. 2:4; Jut. 1:6 3Tura Uunt Yus chichaak “Aents aya aya̱sh wakeramun tuke túrin ásarmatai Winia Wakaniur tuke katsuntu pujushtatui. Antsu aentsnaka siantu painti uwí iwiaaku pujustinian tsaṉkatkartatjai” tímiayi.
4Nú tsawantin aents ti naya tura kakaram ármiayi. Kame Yusa uchirí̱ chíkich shuara nawantri̱n nuatkar yajutmakarmia nú tsawantin tura ukunmasha pujuarmiania nú aentska peṉké sápijcha núnisaṉ tí paantin ármiayi.
5Tura Uunt Yus aentsu tunaarí̱ nuṉká piakmia nuna wainkiamiayi. Núnisaṉ aya yájauchiniak túratniun enentáimtiarmia nunasha paant nekaamiayi. 6Nuna nekáa tí kuntuts enentáimiar chichaak “¿Urukamtaik aentsnasha najankayaj?” tusa ni enentái̱ ti najuakmiayi. 7“Shuaran Wi najankamiaj nunasha tura ashí yajasmancha taṉkuncha japinias nuṉká yujá ainia nunasha ántsaṉ ashí nanamtinniasha yamaikia amuktájai. ¿Urukamtaik aentsnasha najankayaj?” tímiayi Uunt Yus.
8Antsu Nuwaikia Uunt Yus íismaka péṉker túriniuyayi. 9Kame ashí aentsja̱i̱ apatka iisam Nuwái péṉker áishmaṉkauyayi. Nisha Yusan umirkauyayi. Wats ju̱i̱ti Nuwái túrunamuri̱. 10Nuwái uchirí̱ menaint ármiayi, ni naari̱ Sem, Kaam nuyá̱ Jajet.
Nuwái uunt kanun najanamu
11Kame Yus íismaka ashí nuṉkanam tunáa piákuyayi. Aentssha ti netse ajasár nuamtak tí yajauch awajnáiyarmiayi. 12Maa, ashí nuṉkanmaya̱ aentska peṉké yajauch ajasármiayi. Tuma asa Yúsja̱i̱ṉkia peṉké mui̱jmiai̱ ajasmiayi. Nisha tunáa ti aant wainiak 13Nuwain chicharuk “Ashí aentsun amuktájai. Ni yajauch túramuja̱i̱ nuṉkasha tí yajauch awajnásu asamtai sumamawaru áiniawai. Tuma asamtai aentsnasha amukan nuṉkancha emeskattajai. 14Tuma asamtai amesha Nuwaiyá, kátsuram numi wárik mamurchamnia ainia nuja̱i̱ uunt kanu najanam yakiní̱sha nukukta. Túram initiaani̱ tesarta. Nuyá̱ entsa waya̱wa̱i̱ṉ tusam initiaani̱sha tura á̱a̱ni̱sha péṉker seká sekatu awajsata. 15Kanú esantí̱sha 140 mitru jeá atí tura waṉkantí̱sha 22 mitru nekapek íniaṉkasaṉ jeá atí tura yakiri̱sha 13 mitru jeá íniaṉkasaṉ atí. 16Nuyá̱ menaintiú ekentramu najanata. Yakí̱ nukurke̱ṉ jeastatuk áaṉkata. Chikichkí yantamnumaṉ wáitikia najanata. 17Nu umikiakmin Wi Uunt Yus asan tí yutumtikiattajai. Nuja̱i̱ ashí nuṉkanam írunna nu kajinkiartatui. 18Tura antsu ámiji̱a̱i̱ṉkia chichaman najanattajai. Kanunam eṉkemprarum amesha nua̱rmiji̱a̱i̱, uchirmiji̱a̱i̱, najatmiji̱a̱i̱ nekas uwemprattarme tájame. 19Tura nuṉkanam ashí iwiaaku ainia nusha áishmaṉ nuwa̱ja̱i̱ nú weak ámiji̱a̱i̱ iwiaaku árat tusam eṉkeawarta. 20Kame ashí yajasmasha ní weak tura nanamtincha núninniak nuyá̱ japinias yujá ainia nusha núninniak iwiaaku árat tusam ámiji̱a̱i̱ jímiar jímiar kanunam eṉkeawarta. 21Tura tsukái wáitsa̱i̱j tusam ashí yurumak ainia nu chumpíata. Nuja̱i̱ nisha tura atumsha yurumkuram iwiaaku pujustatrume” 22tutai Yus timia ímiatrusaṉ Nuwaikia umikmiayi.
Nu geselecteerd:
Naṉ. 6: jiv
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
©2009 Avant Ministries in cooperation with Wycliffe Bible Translators, Inc. All rights reserved.
