Naṉ. 3
3
Ataṉ Éwaja̱i̱ Yusan umirkacharma
1Kame Uunt Yus ashí yajasman najankamia nuyá̱ nápikia ti anermauyayi. Nisha nuwa̱n jearí aníak “¿Nekasaṉ Yus ashí numí neré̱ yúashtiniaitrume turammarum?” tímiayi. 2Tutai nuwa̱sha áimiuk “Kame ajanam ashí numí neré̱ írunna ju̱ka yúatniuitji 3antsu numi ajapén wajana au nere yúatniunka suritramkaitji. ‘Au nere̱nka yuáwairap tura ántsarmek antiṉkiairap jáka̱i̱rum’ Yus turammaji” tímiayi. 4Tutai napisha nuwa̱n chichareak “Nekaschaiti. Jákashtatrume. 5Antsu atumsha nú numí neré̱ yúarmeka péṉkera nu tura yajauchia nusha Yus nékana nuja̱i̱ métek paant nekaattarme. Núnaka Yus nékawai. Tuma asamtai suritramkaitrume” tímiayi.
6Tutai nuwa̱sha nú numí nere̱n ii wajas ya̱i̱ ya̱i̱ ajakmiayi. Tumá wajas “Nekas íi ajamainti. Ju̱na yuantka mash neka ajasaintjiai” tusa akak yuá áishri̱ncha niji̱a̱i̱ wajamia nuna ajamsamiayi. Túram áishri̱sha yuámiayi. 7Nuna yukamá shintiá áintsar misú pujamun paant nekaamawarmiayi. Túrunawar ikiu numi nuke̱n aparar itipruáwarmiayi.
8Nuyá̱ kí̱arai̱ mayai̱ túpututu ajamunam nui̱ Uunt Yus wekaamun áishmaṉ nuwe̱ja̱i̱ antukarmiayi. Uunt Yus winiawai tusar ajanmaani̱ numi írunmanum u̱mpruktai tusar tsékeṉkiarmiayi. 9Nuyá̱ Yus Ataṉkan untsúak “¿Tui̱ pujam?” tímiayi. 10Tutai áishmaṉ áimiuk “Ame winiamun antukan misú asan ashamakun u̱mprukjame” tímiayi. 11Tutai Yus aníak “¿Ya misuwitme turama? Wi chicharkun ‘Numí neré̱ yuáwaip’ tímiajmena nu ¿yúachumek?” tímiayi. 12Tutai áishmaṉsha chichaak “Nuwa̱ wiji̱a̱i̱ tsaniṉ pujusat tusam surusmamna nu, ju̱ numí nere̱n yuá ajamprusmatai yuajai” tímiayi. 13Nuyá̱ Uunt Yus nuwa̱n aníak “¿Urukamtai ántutskesha yuam?” tímiayi. Tutai nuwa̱sha aya̱k “Napi anaṉkruamtai yuajai” tímiayi. 14Nui̱kia Uunt Yus napin chicharuk
“Nu tura asam ashí yajasmaja̱i̱ naṉkaamas ámeka yajauchiji̱a̱i̱ yumiṉkramu átatme.
Yamaiya̱ ju̱ya̱ṉ aya jápintsamek wekain átatme
tura nuṉkaya̱ juukam yurumtiniaitme.
15Ámin nuwa̱ja̱i̱ nemasmamtikiattajme.
Tura ame tiraṉmí tiraṉki̱sha nuwa̱nuja̱i̱sha núnisaṉ nemasnaikia ártatui.
Ti ukunam nuwa̱nu átatna nu muukmin najatmarmatai
ame ni saṉkani̱n esaim najaimiamtikiattame.” Tú timiayi Uunt Yus.
16Nuyá̱ nuwa̱n chichareak
“Ajaprukmesha najaimiakum ti wáitin átatme
tura uchi takakmesha ti najaimiakam takúu átatme.
Ame áishrum nupetkattsam wakerittiame
túrasha niṉkia ame úuntrum átatui” tímiayi.
17Nuyá̱ áishmaṉkan Yus chichareak “Nuwe̱mi chichame̱ umirkam suritkiamjamna nú numí neré̱ yua asakmin umikchamurmi̱ji̱a̱i̱
nuṉkasha yajauchiji̱a̱i̱ yumiṉnawai.
Tura iwiaaku pujuttamna nui̱ṉkia takakmakum wáitsam yurumin átatme.
18Ame takakmasmanum narasha nupa̱sha jaṉkisha tsapartámtiatui.
Tura wáitsam kampunniunam írunna nusha yútatme.
19Ámeka ti takakmakum se̱a̱ram yurumin átatme.
Túma túmakuam ame wainkiam nuṉkaja̱i̱ najanamu asam ataksha nuṉka ajastatme.
Warí nuṉka najanamuitme túramu asam ataksha nuṉka najanartatme” Uunt Yus tímiayi.
20Ataṉka nuwe̱n Ewa anaikiamiayi. Éwasha ashí aentsu nukurí̱ átin asamtai tú anaikiamiayi. 21Nuyá̱ Uunt Yuska pushí nuntuarun nuapja̱i̱ iwiartur Ataṉkan nua̱ri̱ji̱a̱i̱ áentsrarmiayi. Naṉ. 2:25 22Nuyá̱ Uunt Yus chichaak “Iisiá jú̱ shuarka numí nere̱n yúawaru ásar Iiya áantiaku ajasárai. Warí péṉkernasha tura yajauchincha nekaawarai. Antsu yamaikia iwiaaku pujustin numí nere̱n yúawarka tuke iwiaaku pujusárainti” tímiayi.
23Tuma asamtai Uunt Yus nuna túrunawara̱i̱ṉ tusa Ataṉkan Eten ajanmaya̱ ji̱i̱ki̱ akupkámiayi. Nuṉkaja̱i̱ najanamu asamtai nuṉká takakmasat tusa túramiayi. 24Tura Ataṉkan ji̱i̱ki̱ akupak Eten aja tatainmaani̱ Uunt Yus ni suntari̱n awajtúsarmiayi. Tura puyá̱ atsakamu keá ayantak péper ajak ajá jintin akirtuat tusa ikiusmiayi. Kame iwiaaku pujutai̱ numiniam jeara̱i̱ṉ tusa túramiayi.
Nu geselecteerd:
Naṉ. 3: jiv
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
©2009 Avant Ministries in cooperation with Wycliffe Bible Translators, Inc. All rights reserved.
