2 MULIYANA 4
4
Elise li ɗekka
1Cat kep jar boyna vi gurona vi sa jobta, na' ka siwel tam Elise ala: Jufan sa ma sunda vaŋ mitiya, naŋ vi ala jufan kayni nam li nar kuɗ Ma-Vatɗina; may sa mara ka'a, balla valam ka kay jufanu, nam yaw gurona van sa ma'na gorvo'o. 2Elise di ta'a: Nan as lum tag ɗawn mi mige? Nak dan tige, va vag ma ka vo hay ziyna mi mige? Na' hot dit ala: Nan gorvota vaŋu ka kan vo kayn ti doŋolay ta ɦok mula tuta. 3Nala nam di'e: Tuɗag goy vi nuriyokŋa kaf, siɗawag doŋolay ma hayam goy ɦawana, nak ma siɗawam ir kiɗayɗi. 4Hay li ma nak hotiyawa vo'o, nak ma duk vun-ziyn kagu hiɗi gurona vagu; nak ma ɦok mula hay doŋolay namna kaf, ma hobawana nak ma lakam goy galamu may. 5Bugol kayni na' kaliya. Na' duk vun ziyn kulo ka'a hiɗi gurona va'a; nisi mara' doŋolayna, na' ɦok mul haya may. 6Hay li ma doŋolayna hobawa, na' di tam goora va' ala: Maran doŋolay tara lo. May nam hota' dit ala doŋolayna may loɗi, ki kayn nala mula min jaŋ loɗi. 7Na' tuɗ labar namna tam sana vi Lawna, nala nam di'e: Tuɗag gusag mula goyo, wurakag bal ma kagŋa, nala diram ma hinina ma suɗag nak hiɗi gurona vagu.
Goora vi cata Sunamitta
8Fat tara kep Elise co hay Sunem. Cat ta dono ka hay liy namna kep, na' som dono'o kay nam ti'e. Hay buur kaf ma nam ka co hay Sunem, nam ka kal vo va'a kay ti'e. 9Na' di tam jufa'a: Humaŋu, san namna ma ka co hay ziyna vay dok-dok klani, mi sa ma peldetna vi Lawna. 10Kotay ziy ta gooro ta kulo'o, hiɗi gulmun ta'a, nay ma tun va ma buur haya'a, tun table haya' kepe, jaŋgal ma mus kepe, va ma tun lampan kepe kaw, kay hay li ma nam coyawa hay ziyna vaya, nam ɗawn ma kal mus haya'a.
11Hay li ma Elise hotay hay Sunem, nam kal mus hay ziy na'ta, cap bura. 12Nam di tam Gehazi ma sunda valamna ala: Yaŋ cat ta Sunamitta aya. Gehazi ya' aya, na' co vokomu. 13Elise di tam Gehazi ala: Daŋgis tige, wulin kayni na' li ŋaatawa kafe taya; nay ma lum ta' mi mige? Nay ma law ka'a tam mulla lebo ma ŋolla vi sojen su? Na' hot dita: Nan musi kayn jar sumuna vanu. 14Nam di lo: Nay ma lum ta' mi mige? Gehazi hot dita: May na' kaw goor may noŋɗi, jufa' kaw muɗi maari. 15Nam di lo: Ya' aya. Gehazi ya' aya, na' co hay vun-ziyna. 16Elise di ta'a: Cakata hay li ma liyn hotiyawa ki tan nala, nak ma vi goor kagu. Na' dumu: A'a, sam-ŋolla vanu, sana vi Lawna, naŋ ɗutanɗi.
17Cat kayni vi haya, co cakat kayni na' vuɗ gooro, ki Elise di ta' nala. 18Goor kayni muɗi ŋolo. Bulum ka goy kuɗ sum sa feɗna, fat tara kep nam kal kuɗumu. 19Nam ka di tam bulum ala: Yan ɓasanu! Yan ɓasanu! Bulum di tam sa ma sunda valam ala naraŋgi mi sulumu. 20Sa ma sunda slumu kalam mi sulumu. Goor bur dik sulum waŋ' ta-ta falay calakka, bugol kayni nam mita. 21Na' jik kulo'o, burum kay va ma buura vi sana vi Lawna, duk vun-ziyn kulo kalamu, kalay goyo may. 22Na' yi jufa'a ka dum ala: Nan siɗawaŋu kay naŋ ma gan sa ma sunda ma joriyona ay kepe hiɗi kurota ta cata; nan min nan min kal gosoy wit' tam sana vi Lawna, nan ma hotiya. 23Nam di ta'a: Vaydi kayn may mi til ma wulinɗi lay sabatnɗi lay, may nak min tuɗ talam kay mige? Na' hot dit ala ɦawa'a. 24Bugol kayni na' gan kurona, di tam sa ma sunda va' ala tunaŋis vokomu, tuɗaŋisa; la nan bay vulaŋ hagata, naŋ as colɗi.
25Na' kaliya, na' co kat sana vi Lawna kulo kay hiɗiyta vi Karmel. Hay li ma sana vi Lawn wa' ay goy gine'e, nam di tam Gehazi ala: Humaŋu cata Sunamitta kilani. 26Wulin kayni tuɗaŋ kira' jaŋi, naŋ ma joba' ala nak ka ŋaa'a su? Jufagu hiɗi goora vagu ka ŋaa'a kaw su? Na' hot dit ala nisi ka ŋaa'a. 27Hay li ma na' co kat sana vi Lawna kulo kay hiɗiyta, na' bowom gayam ka'a. Gehazi co'o kay zuta' goyo. May sana vi Lawn di'e: Hinaŋga, kay ciwta va' ka hay yorta. May Ma-Vatɗin ŋay kayni kanu, nam min ɗekem kiranɗi. 28Ki kayn nala na' di'e: Mulanna, nan job goor hay ɓaŋ su? Nan may daŋ ala naŋ ɗutanɗi ɗisu?
29Elise di tam Gehazi: Junaŋ furaŋu, slaŋ zugulda van hay ɓaŋu, tuɗaŋu. La naŋ ŋaf hiɗi sa'a, naŋ gum deɓɗi; la sa gaŋ deɓe, naŋ hotom ditɗi. Naŋ ma bur zugulda van hay vok goora. 30Na' di'e: Hay semda vi Ma-Vatɗin ma irina, hay semda vaŋ kaw, nan as hinaŋɗi. Nala nam fokay kulo'o, tapay kuɗa'a. 31Gehazi kalay voksi jewe, nam bur zugulda hay vok goora, may del mayɗi lay, va ma muzuk ɓislek mayɗi lay. Nala nam hotay ŋaf ir Elise ka dum ala: Goor may zliy kuloɗi. 32Hay li ma Elise co hay ziyna, nam ɗuw kayni goor mitiya, ka buri gaa kay va ma buura valamu. 33Elise kal kalafi, duk vun-ziyn kulo kisi ma' pete, nam tun caw siɗaw Lawna may. 34Nam jik kulo'o, koɗ gaa kay goora, nam jo vunam hay vun goora, jo iram hay ir goora, jo ɓalam tam ɓam goora, meɗ tuwam goy gaa kay goora. Nala tuw goor tun caw gi kuwa. 35Elise vi tuwam goyo, nam ka tuɗ tani tani kalaf hay ziyda, bugolda nam hot jik kulo'o, koɗ gaa kay goora lo, goor herjehew sem siɗiya, nam mal iram goyo. 36Elise yi Gehazi ka dum ala: Yaŋ cata Sunamitta aya. Gehazi ya' aya, na' co kat Elise, nam ka di ta' ala: Slag goora vagu. 37Na' kaliya, gi tuwa' gaa selemu, girif gaa kay nagata. Bugolda na' sli goora va'a, kalay goyo may.
Dowayta ta sinawn haya'ta
38Elise hotay hay Gilgal, hay na'ta kayni mayta ka li hay nagata. Hay li ma gurona vi sa jobta ka dakay gaa vok Elise ta' kayni, nam ka di tam sa ma sunda valam ala: Jakaŋ doŋolayta ta ŋolda kulo'o, dafaŋ hadafna haya'a kay gurona vi sa jobta. 39Kep jarsiya kal goy hay sinena kay neɗ direkŋa; nam fi gulda-gulda ma fulla, nam ja kurdi-viira, hob sligara valam hiɗi namu. Hay li ma nam hotay vo'o, nam kaam iram goy ne' ne', cukum hay doŋolayta ta hadafn ka haya'ta, kay nisi may wum goy jewɗi. 40Nisi vulsit goyo kay ti'e. May hay li ma nisi tunum vunsin kayni, nisi ka siwel ala: Sana vi Lawna, mitta ka hay doŋolayta! Nisi may as a tum loɗi. 41Elise di'e: Yawgi futuwna. Nam ko futuwn hay doŋolayta, ka di ala: Vul tin mi sumun kayni hinsi ti'e: Bugol kayni va ma joo'o may hay doŋolayt loɗi.
Fu-orgena ma dok-ma'na
42San kep fokay hay Baal-Salisa pa, nam mar vun fu ma-jewna mi sana vi Lawna, fu-orgen dok-ma', hiɗi yam wa ma wulina hay birimna valamu. Elise di'e: Vulum mi sumun kayni kay nisi ti'e; 43Sa ma gutda valamu hot dita: Nan as vul mi sumun kis ɗawni ir nanige? May Elise di'e: Vulaŋgi mi sum nisina kay nisi ti'e, kay Ma-Vatɗin ka di ala: Nigi ma ti'e diram ma hin goy kaw. 44Ki kayn nala nam lak fun gaa voksiya, nisi ti'e diram hin goyo kaw, ki Ma-Vatɗin di nala.
Nu geselecteerd:
2 MULIYANA 4: Massana
Markering
Delen
Kopiëren
Wil je jouw markerkingen op al je apparaten opslaan? Meld je aan of log in
BIBALDA TA PELDETTA © L'Alliance Biblique du Cameroun, 2001