1 MULIYANA 21
21
Akab ci Nabot goyo kuɗ sine gulda-guldana valamu
1Bugol slen kayni, humgi va ma lina. Nabot ma Yisreella sine gulda-guldana valam ka hay Yisreel, goboy hiɗi ziyna vi Akab, mul ma Samariyana. 2Akab di tam Nabot ala: Vulan sine gulda-guldana vaŋ ta', kay nan min pi gu ma vuɗn haya, kay nam ka goboy hiɗi ziyna vanu; nan ma vulaŋ sine gulda-gulda ma ŋaa'a suwumu hay baŋalamu, lebo la naŋ mina, nan as wurakaŋ gurju kalamu. 3May Nabot hot dit tam Akab ala: Ma-Vatɗin hinan a vulaŋ vocota vi sumiyanɗige. 4Akab kal vo hay ziyna valamu, muɗi yora, muɗi ɦiy kaw, kuɗ yoboy namna ma Nabot ma Yisreella di talamu ala: Nan as vulaŋ vocota vi sumiyanɗi! Nala nam bur gaa kay gilikŋa valamu, muɗ iram goyo, min ti fuɗi. 5Yesabel cata valam co talamu, ka dum ala: Naŋ muɗi yora, min ti fuɗi kaw kay mige? 6Nam hot dit ala: Nan di tam Nabot ma Yisreella ala nam gusan sine gulda-guldana valamu, lebo la nam mina, nan min vulum gulda-gulda mara hay baŋalamu. May nam ala, nam vulan gulda-guldana valamɗi. 7Nala cata valam Yesabel dumu: Ti mulda kay sum sa Israyel wulin kayni may mi naŋɗi su? Fokaŋ kulo'o, taŋgi mi funa, firiyaŋu kaw, nanu nan min slaŋ gulda-guldana vi Nabot ma Yisreella.
8Na' ɗo ɗerwelda hiɗi semda vi Akab, na' tun tampoŋŋa vi Akab kalamu, na' gum tam sa maariyana hiɗi sa ka kitana sa ka hiɗi Nabot hay hoyok-ziyn kepna. 9Na' ɗo hay ɗerwelda va' ala: Colgi buur ma li laata, tungi Nabot kulo vok sumuna, 10Lakgi sum sa joon ma' goy vokom ɗiger, kay nisi ma pi lawt kalam ala: Naŋ ŋul Lawna hiɗi mulla. Bugol kayni nigi ma naram goy jiya, nigi ma gum hiɗi goorhoyona, kay nam ma mita.
11Sum sa hay hoyok-ziyna vi Nabotna, sa maariyana hiɗi sa ka kitata sa ka lakay hay ziyna, li ki Yesabel gi sunda tisi nala, ki slen ka ɗoy hay ɗerwelda ta vuli tisit nala. 12Nisi col buur ma li laata, nisi tun Nabot kulo vok sumuna; 13sum sa joo sa ma'na co'o, lak goy vokom ɗiger, sum nisina pi lawt kay Nabot, sumun ala: Nabot ŋul Lawnawa, ŋul mullawa kaw. Bugol kayni nisi kalam goy gine hiɗi hoyok-ziyna, nisi gum hiɗi goorhoyona, cap cum mati. 14Nisi gi sunda tam Yesabel ala: Numa gi Nabot hiɗi goorhoyona, wulini nam mitiya.
15Hay li ma Yesabel hum ala nisi gi Nabot hiɗi goorhoyona, cumawa goyo kaw, na' di tam Akab: Fokaŋ kulo'o slaŋ sine gulda-guldana vi Nabot ma Yisreella, nam ma min gus sinena valam goy hay ɓaŋɗina, Nabot namna may iri loɗi, may nam mitiya. 16Hay li ma Akab hum ala Nabot mitiya, nam fok kulo'o kay tuɗ sli sine gulda-guldana vi Nabot, kay muɗum goy ir valamu.
17Ki kayn nala Ma-Vatɗin di yoboyn tam Eliyas ma Tikbina ala: 18Fokaŋ kulo'o, tuɗaŋ kaŋ vok Akab, mulla vi Israyel hay Samariya; nam ka goy hay sine gulda-guldana vi Nabot, nam kalay ɗawni kay muɗ sinen goy ir valamu. 19Naŋ ma dumu: Kay Ma-Vatɗin di ala: Naŋ zawni mi sa ma ci mati, mi sa kulu kaw ɗisu? Naŋ ma hot dum lo ala: Ma-Vatɗin ka di ala: Liyn ma durnayn tilek busuw Nabot hayamna tani, nam ma tilekeŋ busuwaŋ naŋ hay liy namna kaw. 20Akab di tam Eliyas: Naŋ fanawa kaŋ yo su naŋ sa ma gaw kanna? Nam hot dit ala nan faŋawa kan yo, kay mige naŋ gus tuwaŋawa goyo kay li sle ma joo'o kir Ma-Vatɗina. 21Humaŋu, Ma-Vatɗin min hin joot nig gaa kaŋu; nam min tokaŋ goyo, sumuna vaŋ kaf nam min vatsi irsi goyo, la mi sa ma gorvo'o lebo la mi sa ma vuɗiya kaw, 22nam min li ziyna vaŋ ŋray ca ki ziyna vi Yerobowam goora vi Nebat nala, ki ziyna vi Bayeska goora vi Akiya nala, kay naŋ muɗum dikam ɦiya, kay nam kal sum sa Israyel hay sulukŋa. 23Ma-Vatɗina law kay Yesabel kaw, nam di'e: Durnayn ma mut Yesabel goboy hiɗi gulmun ma tam Yisreella. 24Sa ma hay ziyna vi Akab ma mit kulo hay hoyok-ziyn ɗawni, durnayn ma mutumu, sa ma mit goy hay sinen ɗawni, layayn ma dukalawn ma tumu may.
25Sa mara ma tuwam gusi goyo kay li joo tam Ma-Vatɗina ki Akab nala mayɗi, kay nam li joo ŋolo kir Ma-Vatɗina; zutum hay joot ŋol kayni ti cata valam Yesabel. 26Liwista ta nam la'ta kayni na' suwiya, nam tuɗ kuɗ lawayn waana, ki sum sa Amoriyan ka li nala, nisi sa Lawn munsi vok gurona vi Israyel.
27Hay li ma Akab hum dita vi Eliyas humna, nam jet sligara valam goyo, nam cuk sligar-bolla talamu nam li laata: Nam bur gaa kayn hiɗi sligar-bolla, poy kayn tiŋgir tiŋgir'. 28Ma-Vatɗina hot di yoboyn tam Eliyas ma Tikbina ala: 29Hot ma Akab hot yalam gaa vokanna naŋ wumawa su? Kay nam hot yalamawa gaa vokanu ni, nan as mar joot kalamu hay irita valam tuwaɗi; nan hin joot ma kay ziyna valam ɗawni hay liyna vi goora valam tuwa.
Nu geselecteerd:
1 MULIYANA 21: Massana
Markering
Delen
Kopiëren
Wil je jouw markerkingen op al je apparaten opslaan? Meld je aan of log in
BIBALDA TA PELDETTA © L'Alliance Biblique du Cameroun, 2001