1 Пачаби 3
3
Шамуилихъе БетӀергьанасул калима рещтӀин
1Элил нухмалъиялда гъоркь Шамуил БЕТӀЕРГЬАНАСЕ хъулухъалъе чӀун вукӀана. БЕТӀЕРГЬАНАСУЛ калима ва Гьесул илгьам къанагӀатлъун букӀана гьел къояз.
2Цо сордоялъ Эли жиндирго бусада вегун вукӀана. Гьесул беразда канлъи хутӀун букӀинчӀо – щибго бихьулароан гьесда. 3Жеги Аллагьасул Чирахъ свинчӀеб гӀуж букӀана, ва Шамуил Аллагьасул гъамас жаниб лъураб БЕТӀЕРГЬАНАСУЛ рокъов вегун вукӀана. 4БЕТӀЕРГЬАНАС Шамуилин абун ахӀана, ва гьес гьале вачӀунев вугин жаваб кьуна.
5Цинги Элихъе векерана Шамуил: «Дуца ахӀун вачӀана дун», – инги абун.
Амма гьес абуна: «Дица ахӀичӀо мун, тӀадвуссун вегизе а», – ян. Шамуил тӀадвуссун вегизе ана.
6БЕТӀЕРГЬАНАС цоги нухалъ ахӀана: «Шамуил! Шамуил!» – ин. Нахъеги Элихъе векерана гьев. «Дуца ахӀун вачӀана дун», – ин абуна гьес. Амма Элица абуна: «Дица ахӀичӀо мун, дир вас, тӀадвуссун вегизе а», – ян.
7Шамуилида жеги БЕТӀЕРГЬАНАСУЛ гьаракь рагӀун букӀинчӀо, ва жеги БЕТӀЕРГЬАНАСУЛ калима гьесухъе рещтӀун букӀинчӀо.
8БЕТӀЕРГЬАНАС лъабабилеб нухалъги ахӀана Шамуилиде. ТӀаде вахъун нахъеги Элихъе вилълъана гьев. «Дуца ахӀун вачӀана дун», – ин абуна гьес.
Гьеб мехалъ бичӀчӀана Элида БЕТӀЕРГЬАНАС ахӀулеб букӀин васасде. 9Цинги Элица Шамуилида абуна: «Мун тӀадвуссун вега. Нахъеги дуде доб гьаракьалъ ахӀани, дуца абе: „КӀалъай БЕТӀЕРГЬАН, Дур лагъ гӀенеккун вуго“, – ян». Цинги Шамуил тӀадвуссун жиндирго бакӀалда вегана.
10БЕТӀЕРГЬАН илгьам гьабун вачӀун эхетана, ва цебего гӀадин нахъеги ахӀана: «Шамуил! Шамуил!», – ин. Шамуилица жаваб кьуна: «КӀалъай, БетӀергьан, Дур лагъ Духъ гӀенеккун вуго», – ян.
11Цинги БЕТӀЕРГЬАН Шамуилида кӀалъана: «Дица ГӀизраилалда гьабизе буго бицун жиб рагӀарабщинасул гӀундузулъ багъулеб иш. 12Дица Элил хъизан-къаялда тӀаде битӀун букӀараб калима рагӀа-ракьанде щун тӀубазабила гьеб къоялъ. 13Дица гьесда лъазабун букӀана, жиндир васазул пасатаб хьвада-чӀвади букӀин лъаниги, гьезие гӀадлу гьабичӀелъухъ, Дица тамихӀ гьабизе бугин гьесул хъизан-агьлуялъегоян. 14Гьединлъидал, Дун гьедулев вуго, Элил хъизан-къаялъул хӀакъ, я къурбаназ, я цогидал ролъул сайгъатаз абадиялъго чуризе гьечӀеб».
15РогьинегӀан парахатго кьижана цинги Шамуил ва, радалго тӀадеги вахъун, БЕТӀЕРГЬАНАСУЛ Рукъалъул нуцӀби ричӀана. Шамуил хӀинкъун вукӀана къаси лъугьараб жо Элида бицине.
16«Шамуил, дир вас!» – ин ахӀана Элица Шамуилиде. «Гьале дун», – ин данде жаваб гьабуна гьес.
17«Щиб дуда БетӀергьанас абураб? Щибго бахчуге дидаса. Дуда бицаралъул цо рагӀигицин дуца дидаса бахчани, БетӀергьанас балагьалъукье ккезавила мун».
18Гьебмехалъ Шамуилица кинабго загьир гьабуна гьесие, цо рагӀи гьоркьоб биччачӀого. Цинги Элица абуна: «Гьев БЕТӀЕРГЬАН вугелъул, Гьес Жиндаго лъикӀ бихьараб гьабеги», – ян.
Шамуил БетӀергьанасул авараглъун вахъин
19Шамуил санаде вахана, ва БЕТӀЕРГЬАНАС гьесие сундулъго кумек гьабулеб букӀана; гьес бицухъе кколеб букӀана кинабгоги. 20Гьедин, Даналдаса бахъараб Беэр-Шевалде щвезегӀан тӀолабго ГӀизраилалда лъана Шамуил БЕТӀЕРГЬАНАСУЛ авараг вукӀин. 21Нахъе-нахъеги илгьам гьабун Шамуилихъе вачӀунаан БЕТӀЕРГЬАН Шилоялда, ва гьенив Жиндирго Калимаялдалъун гьесие Живго загьирги гьавулаан.
Nu geselecteerd:
1 Пачаби 3: АварАК
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© Институт перевода Библии, 2005-2023