मर्कुस 9
9
1हसे येसुइ उसब्के कहिकेभइल, “साच्चिकइ मोइ तेउह्रासब्के कहतम्, इछि ठोडेलाहारमद्धे कोलोउ-कोलोउयेइ परमेसोरक राज्जे सक्तियँ अइल नइजेदेख्लसमन नामोरत्।”
येसुक रुप फेरिल
(मति १७:१-१३; ९:२८-३६)
2येसुइ छ दिनपाछु पत्रुस, याकुब र युहन्नाके लेइकुन एक्टा अल्ग डाँडायँ जाइकेभइल। उछिका ओनेन्सब बाहेक अरु कोलोउ नइजे रहत, हसे उसब्कइ आघु ओनेन्क रुप फेरिल। 3र ओनेन्क लुगा यस्न चहकिलो गोरो भइल कि, पिर्थिबियँ कोलोउयेइ धोइकुन ओस्न गोरो बानाइके नासकइ। 4उहइ बेलाके एलिया र मोसा देखार पोर्ल, र उसब येसुसाङ कुरा करिके थाल्ल।
5इसे देखिकुन पत्रुसेइ येसुके प्याचइ कहल, “रब्बि#९:५रब्बि गुरु, हामे इछिका भइल राम्रइ भइल। आबे इछिका तिन्टा छोप्रा बानाहुँ, एक्टा तेउह्राके, एक्टा मोसाके र एक्टा एलियाके।” 6उसब बेस्के डाराल गुनेइ किति कहिके कइकुन पत्रुसके थाहाइ नइजे।
7उहइ बेलाके बाद्रिक बाहुनि आइकुन उसब्के ढाक्ल, हसे बाद्रिकमाटे एक्टा आबाज अइल, “इसे मेर मायालु छाहोम् हखइ, इहाइ कहल बचन तोहेसब सुनउ।” 8ओख्निहिँ उसबेइ चारिओर चाहाल, तर येसु बाहेक कोख्राहुके पुनु नइजेदेख्ल।
9येसुइ डाँडाकमाटे झर्तेखना चेलासब्के, “मानुसक छावा मोर्लकमाटे जिउत नइजे भइलसमन तोहेसब आजु देख्ल कुरा कोख्राहुके पुनु झुनकहउ कइकुन आग्या देइकेभइल।”
10ओनेनेइ कहिकेभइल कुरा उसबेइ मनहिँ राख्ल, तर मोर्लकमाटे जिउत भइके कलाक किति हबाहाइ कइकुन एक-आपसयँ छलफल करिके थाल्ल। 11उपाछु उसबेइ ओनेन्के पुछ्ल, “किके बेबस्थाक धर्मगुरुसबेइ ख्रिस्टकते पइला एलिया नइ आइके पोरित कताहात्?”
12येसुइ उसब्के कहिकेभइल, “साच्चिकइ, एलिया नइ पइला आइकुन सभइ कुरा मिलाइत। तर किके मानुसक छावाइ धेरइ दुख भोगिके पोरित र सभुनि इन्कार करित् कइकुन धर्मक कितापयँ लेख्ल बाटइ त? 13तर मोइ तेउह्रासब्के कहतम्, एलिया त आइसक्ल बाटइ, हसे उक्र बारेयँ लेख्ल अनुसार उसबेइ उख्राके जिति मन लाग्ल उहइ कर्ल।”
भुत लाग्ल छवँड निक भइल
(मति १७:१४-२१; लुका ९:३७-४३)
14जब येसु र तिन जेना चेलासब अरु चेलासब्कलघि फर्किकुन आइकेभइल, तब उसब्के बड्क भिडेइ घेरिराख्ल र धर्मगुरुसब उसबसाङ बादबिबाद करिराख्ल देखिकेभइल। 15हसे भिडेइ येसुके देख्ल बिथिकइ अचम्म मानिकुन दुघ्रते जाइकुन ओनेन्के सेवा लाउल। 16ओनेनेइ उसब्के पुछिकेभइल, “किति कुराक बारेयँ तोहेसब इसबसाङ छलफल कर्तिन बाटउ?”
17हसे भिडकमाटे एक जेनाइ ओनेन्के जबाफ देल, “गुरुजिउ, मेर छाहोम्के भुत लागिकुन बोराइके नइजे सक्लगुनेइ तेउह्रलघि आन्ल बाटम। 18जब मेर छाहोम्के भुतेइ धरिकुन भुइयँ पछारित, तब उहाइ मुहुकमाटे गाज निस्काइकुन दाह्रा किटिके लागित र अरठ्ठइ पोरित। मोइ तेउह्र चेलासब्के भुत निस्काइदेओ कइकुन बिन्ति कर्ल, तर उसबेइ नइजेसक्ल।”
19हसे ओनेनेइ कहिकेभइल, “कस्न बिस्वास नइजेभइल पुस्ता रलाहाउ। मोइ तेउह्रसबसाङ कइह्यासमन रहतम् से? मोइ तेउह्रासब्के कत्का सहिके? खइ उख्राके मेरलघि आनउ।” 20उसबेइ उसे छवँडके येसुकलघि लेज्ल। जब ओनेन्के भुतेइ देख्ल, तब उहाइ छवँडके भुइयँ पछार्ल, हसे गाज निस्कातिन छवँड लइटपइट करिके लाग्ल।
21येसुइ उक्र बुबाहाके पुछिकेभइल, “इख्राके यस्न कइह्यासे भइल?”
हसे उहाइ कहल, “नान्हिसे, 22इख्राके भुतेइ नास करिके घरिघरि आगि र पानियँ घुघाल बाटइ। यदि तोहे केहाउ करिके सक्ताहाउ कने, दया करिकुन हाम्राके साहेता करिदेओ!”
23हसे येसुइ उख्राके कहिकेभइल, “किके ‘सक्ताहाउ कने’ कहते बाटस्? बिस्वास कर्लाहारसब्क लागि त सभइ कुरा सम्भब भइत।”
24इसे कुरा सुन्ल बिथिकइ छवँडक बुबाहिक् चिच्चेतिन् कहल, “मोइ बिस्वास कर्तम, तर मेर कम्जोर बिस्वासके साहेता करिदेओ।”
25जब येसुइ भिडसब दुघ्रतिन ओनेन्लघि अइल देखिके भइल, तब ओनेनेइ भुतके यस्न कइकुन हप्काइकेभइल, “ए बहिरा र लाटा बानालाहार भुत आत्मा मोइ तेह्राके आग्या कर्तम, उक्रमाटे निस्किकुन आउक्, र कइह्याउ पुनु उसे भितर झुनपोसुक।”
26हसे चिच्चेतिन् उसे छवँडके लछारपछार पार्तिन भुत निस्कल। उसे छवँड चाहिँ मोर्ल जस्नइ भइल, धेरइ जेनाइ त उसे छवँडके “मोर्ल” पुनु कहल रहत। 27तर येसुइ उक्र हाथ धरिकुन उठाइकेभइल र उसे छवँड जुरुक्कइ उठ्ल।
28जब येसु घर भितर जाइकेभइल, तब ओनेन्के चेलासबेइ सुटुक्कइ पुछ्ल, “किके हामे भुतके निस्काइके नइजेसक्ल?”
29ओनेनेइ उसब्के कहिकेभइल, “यस्न खालक भुतके चाहिँ पार्थानासे मत्रइ निस्काइके सक्ताहिँ।”
येसुइ फेरि आफ्न मोर्लाहारबारे कहिकेभइल
(मति १७:२२-२३; लुका ९:४४-४५)
30उपाछु येसु र ओनेन्क चेलासब निस्किकुन गालिल भइतिन् जाइकेभइल। येसुक इच्छा रहइ कि, ओनेन्सब्क यात्राक बारेयँ कोलोउयेइ पुनु थाहा झुनपाउस्, 31किकेकने ओनेनेइ आफ्न चेलासब्के यस्न कइकुन सिछ्या देतिन् रहत, “मानुसक छावाके मानुसकइ हाथयँ सोपदेताहात्, हसे उसबेइ उख्राके मार्ताहात् र उसे मोर्लक तिन दिनयँ फेरि जिउत भइकुन उठ्ताहात्।”
32तर ओनेनेइ कहिकेभइल कुरा उसबेइ बुझिके नइजेसक्ल, र दोहोरेइकुन पुछिके पुनु डाराल।
कोनो चाहिँ बड्क?
(मति १८:१-५; लुका ९:४६-४८)
33उपाछु येसु र ओनेन्क चेलासब कफर्नहुम आइकेभइल, र घरभितर भइतेखना येसुइ चेलासब्के पुछिकेभइल, “तोहेसब पइडायँ किति छलफल कर्तिन रहउ?”
34तर उसब चुप्लालि रहल, किकेकने उसबेइ पइडायँ “हामेमद्धे कोनोचाहिँ बड्क हखइ?” कइकुन एक-अर्कसे छलफल कर्तिन रहत। 35हसे येसु बोसिकेभइल, र बाह्रइ जेना चेलासब्के बोलाइकुन कहिकेभइल, “कोलोउ मानुस आघु भइके मन करित् कने सभइकते पाछु र सभइक सेवक भइके पोरित।” 36उपाछु ओनेनेइ एक जेना नान्हि छावाके उसब्क आघु आनिकेभइल र उख्राके कोरायँ लेइकुन कहिकेभइल, 37“जोनेइ मेर नाउयँ नान्हि छावाके अप्नेताहात्, उहाइ मेह्राके नइ अप्नेइत हसे जोनेइ मेह्राके अप्नेइत उहाइ मेह्राके नइजे कि, मेह्राके पाठाइके भइलाहारके अप्नेइत।”
बिरोध नइजेकर्लाहारसब हाम्रइ पच्छेक
(लुका ९:४९-५०)
38हसे युहन्नाइ येसुके कहल, “गुरुजिउ, हामे एक जेना मानुसके तेउह्र नाउयँ अर्क मानुसयँ भइल भुतसब निस्काइराख्ते देख्ल। तर हामे उख्राके ओस्न झुनकरुक कहल, किकेकने उसे हाम्राके पच्छेलाहार मानुस नइजे।”
39येसुइ जबाफ देइकेभइल, “उख्राके झुनरोकुक, किकेकने मेर नाउयँ अचम्मक काम कर्लाहारइ ओख्निहिँ मेर बिरोधयँ नइजेराम्र कुरा बोराइके नासकइ। 40किकेकने बिरोध नइजेकर्लाहारसब, हाम्रइ पच्छेक हखत। 41साच्चिकइ मोइ तेउह्रासब्के कहतम्, जोनेइ तोहेसब ख्रिस्टक हखउ कइकुन मेर नाउयँ एक बोङ्ना पानि मत्रइ पिइके देइत कने, उहाइ आफ्न इनाम गुमाइके नापरइ।”
पापसे बचिके चेतावनि
(मति १८:६-९; लुका १७:१-२)
42येसुइ फेरि कहिकेभइल, “जोनेइ मेह्राके बिस्वास करिके इसे नाउनि छावासबमद्धे एक जेनाके पाप करिके लागाइत, उख्राके त एक्टा बड्क जाँतो घिन्टियँ झुन्डाइकुन समुन्रयँ घुघाइदेने राम्र भइत। 43यदि तेर हाथेइ तेह्राके पाप करिके लागाइत कने, उख्राके काटिकुन घुघाइदेउक्। दुक्टाइ हाथ भइकुन कइह्याउ नइजेबोतालाहार आगिक नर्गयँ पोरिके कते त डुडे भइकुन जिबनयँ पोस्ल तेर लागि राम्र भइत। 44[उसे नर्गयँ न त किरा मोरित, न त आगि नइ बोताइत्।] 45ओसिनकरिकुन तेर गोडेइ नइ तेह्राके पाप करिके लागाइत कने उख्राके काटिकुन घुघाइदेउक्। दुहइ गोड भइकुन नर्गयँ पोस्ल कते त लङ्गडा भइकुन जिबनयँ पोसिके तेर लागि राम्र हखइ। 46[उसे नर्गयँ न त किरासब मोरित, न त आगि नइ बोताइत्।] 47यदि तेर आँखिइ तेह्राके पाप करिके लागाइत कने उख्राके झिकिकुन घुघाइदेउक्। दुहइ आँखि भइकुन नर्गयँ पोरिके कते त बुरु एक्टा आँखि भइकुन परमेसोरक राज्जेयँ पोसिके राम्र हखइ। 48उसे नर्गयँ न त किरासब मोरित, न त आगि नइ बोताइत्।
49 “जस्के नुनेइ भोकके सुद्द पारित, ओसिनकरिकुन सभइके आगिइ खारित्। 50नुन राम्र हखइ तर नुन नइ सिट्ठो भइत कने, फेरि उसे केहाइ नुनायो बानाइके? आफ्नसाङ भइल नुनके जोगाइ राखिकुन, तोहेसब एक-अर्कसाङ सान्तिसे बोसउ।”
Nu geselecteerd:
मर्कुस 9: DRY
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2024 (Active), Mother Tongue Translators Society and Wycliffe Bible Translators, Inc. All rights reserved.
