Matiusu 3
3
Abe ma titi o Yohanese Wotobaohi-ohiki
Maruku 1:1-8; Lukasa 3:3-18; Yohanese 1:19-28
1De ipahaino o Yesusu wolamokoka, de naga ma oraha gea o Yohanese Wotobaohi-ohiki womulaenge wahingahu-ngahu o nyawaika ma titi Ma Jou ai hingahu ma demoino. De gea wohingahu-ngahu o tonaka ma kakaahaka abe genangoka o nyawa ko yowoeua yogogere, abe ma tonaka gea imanoa o Yudea ma tonakoka. Masara naga o nyawa manga ngoe yoboa ma tonakika gea la iwitoihene unangika, ho una wahingahu onangika wato, 2“Ngini kiani nitoba la nioporetika nia howo-howonika de nianiikoli Ma Jou ai hiningaika dika. Angamoi itigioka abe ma oraha Ma Jou wonahikoano ngone o duniaka naa.” De hokogea o Yohanese ai demo onangika la wato ona ahao iwidafongo irahai manga Koano Ma Jou.
3De abe ma titi o Yohanese gea, duru ma dodihiraino de Ma Jou ai uru ma dodofanga o Yesaya wohitulihuku ai demo abe duru iwidumutu o Yohanesika. Abe o Yesaya ma dihiraino de naga moi ai demo wohitulihuku wato,
“Ho ahao naga womatengo hoihene to una ai ilingi o tonaka ma kakaahaka,
waamo-amokiye wabobanarata wahitararono o nyawaika wato,
‘Nako o koano woboaino, gea kiani to una ai ngekomo hohidiaiohi la hidafongo irahai.
De naa itigioka ma oraha abe Ma Jou woboa ngoneino la wonatutumu.
Ho ti ngini nia hininga kiani nimahidiaioka la niwidafongo irahai Unangika,
abe imaketero hoka o koano ai ngekomo hohidiaiohi la gea idadi ma dodunguu hidafongo irahai.
Ho ngini nihitiaioka Ma Jou o Yawe ai ngekomo gea!’” # 3:3
Yesaya 40:3
De hokogea o Yesaya ai demo ma dodihiraino abe to ena ma dumutu o Yohanesika, angamoi o Yohanese ai demo ma titi la wahidiai o nyawa manga hininga la ka idadi iwidafongo Ma Jou.
4De to Yohanese ai baju gea o aewani o unta ma gogoino yodiai, de ai goronaino una womahidubuluino de gea o aewani ma kaiino. De to una ai inomo o kabotara de o ofungu ma gula.
5De abe ma oraha una wohingahu-ngahu o tonaka ma kakaahaka gea, de o nyawa duru ko manga ngoe yoiki unangika la ka idadi yotoihene ai hingahu ma demo. Abe ona utu yoboa o Yerusaleeme ma kotaino, de utuoli o Yudea ma tonaka ma kapo-kapongino yoboa, de naga utuoli abe yogogere o Yorodani ma dolaka, ho ona duru ko manga ngoe yokokiboa la yotoihene ai hingahu ma demo gea. 6De gea yoihene de ahao ona manga ngoe yomamao ma titi manga howo-howono Ma Jouika, ho gea yomangaku manga howono de ahao o Yohanese waohiki ona gea o Yorodani ma akeroka. La ma dodunguuino gea de itararono abe ona yotobaka.
7De ma oraha gea naga o Yahudi ma nyawaka o doomu moi abe yomahiromanga o Farisi ma nyawa de o doomu moioli abe yomahiromanga o Saduki ma nyawa. De ona abe ma doomu hinootoino gea onangoo yoboa o Yohanesino la ato una waohiki onangika. Masara ka de o Yohanese wamake ona gea yoboaino de duru wataere onangika wato, “Ho ngini naa done sarakia nia hiningaka hiadono niboa la niato tiniohiki nginika? Angamoi ngini nimaketero abe hoka o dodiha iloara o ukuoka de aino, angamoi ngini niato Ma Jou ai hohowono ma uku nginika ka idadi nimahitingaka genangino iti ngohi tiniohiki. Masara ngini nia hiningaka de nimadokangeluku dika ho ko nianoaua nia howo-howonino gea, ho gea ngaro nimaohiki ma ko idadiua iniduhunu Ma Jou ai himangoka ma gogohiki gea. 8Ho koaho ngini nia hiningaka de nioporetika nia howono la nia wowango ma datorino de ka idadi nimahitaana abe niagou-goungu nianoaka nia howo-howono gea, angamoi gea de ahao Ma Jou ka idadi winisanangi nginika.”
9De ahao o Yohanese ai dodaere ma demo wohigila-gilali onangika wato, “De ngini ufa niataoko ihowono abe ma titi Ma Jou ai hininga ngone o Yahudi ma nyawaino. Abe ufa nimatemo nia hiningaka niato, ‘Ngone naa o Abarahaama ai totoforauku ho ahao Ma Jou Una ko wonahohowonua ngone.’ Ho ufa hokogea nimafikiri angamoi Ma Jou wonadafongo ngone abe gea ko ma titiua nanga tofora o Abarahaamino masara abe ma titi to ngone nanga hininga hokokia Ma Jouika.”
“Ho ufa niato bote ngini naa nitotiaioka Ma Jou ai himangoka ma titi ngini o Abarahaama ai totoforauku, angamoi ko genanginoua ma titi hiadono Ma Jou winidafongo. Angamoi nako Ma Jou woigo wodiai, tanu Una ka idadi wapake ka o hakaru dika abe dau nanga louoka naa abe ko kia-kiaua ma titi de genangino wahidadi o Abarahaama ai totoforauku utuoli, ho ufa ngini niataoko ihowono de nimafikiri abe nia gogere ikurutiye Ma Jou ai himangoka.”
10“De gea igoungu abe Ma Jou ai hohowono o nyawaika, ena gea wohidiaioka ho ko itedekanokaua de wahohowono o nyawa abe ko yotobaua. De gea ka idadi tohiketero abe womatengo womahidiaioka la ai gota watolanga ma titi ko iwa to ena ma hofoko irahai. Ho una gea ai bahuku wagoraka ho gea duru itigioka abe ai gota watolanga dau ma lifunino de gea ahao waumo o uku ma goronaika. Ho nginioli naa nimaketero abe hoka to una ai gota, ho ngini onagona dika abe ko iwa nia wowango ma hofoko irahai, gea itigioka niamake nia hohowono nginika.”
11De o Yohanese wogila-gilali wotemo o nyawaika wato, “De ngohi naa tinihiohiki ka de o akere dika la genangino idadi o dodunguu moi abe ngini nitobaka de nianoaka ti ngini nia howo-howonino gea. Masara ko itedekanokaua de naga womatengo woboaino abe nako Una de ngohi, duru ka Unangohi de ai kuahaka ikurutiye. De ai kuaha hokogea ma gurutiye hiadono ngohi naa tamao abe ko takunua todadi to Una ai gilaongo, ho ngaro toigo tileleani Unangika masara tamao ko takunua angamoi to Una ai kuaha kohagurutiye.”
“De igoungu ngohi tinihiohiki de tinihidumunu o akeruku dika, masara Una gea woboaino de ahao o gogohiki utuoli winihipake nginika. Abe ngini utu nia gogohiki ahao niamake abe winihingohama Ma Jou o Womaha ai kuaha ma goronaika, de naga ngini utuoli abe winihingohama o uku ma goronaika la nia hohowono niamake genangoka.”
12“De Una gea ka idadi tihiketero hoka womatengo abe ai pine watalo-taloko la wohikatingaka ai pine ma akeme de ma afa. De una wataloko ibootino de ahao ma akeme watoomuino de wagogono to una ai pine ma ngi ma goronaka, masara to ena ma afa enangoo watoomuino masara gea wakokitufuku de o uku iwango-wangoika gea. De hokogea tihiketero Una abe ahao woboaino, angamoi Una gea woboa de ahao wahikatingaka o nyawa la utu wahigogere to Una ma hirete ai ngioka de o nyawa utuoli ahao wahohowono o uku iwango-wangoika gea.” Hokogea to Yohanese ai demo ma titi Ma Jou ai hohowono abe wahingahu o Farisi ma doomu de o Saduki ma doomu ma nyawaika gea.
O Yohanese wiohiki o Yesusu
Maruku 1:9-11; Lukasa 3:21-22; Yohanese 1:32-34
13De ipahaino de o Yesusu Una o Galilea ma tonakoka de waino woboa o Yorodani ma akerino la ka idadi o Yohanese wiohiki Una. 14Masara o Yohanese una ko wosanangiua wiohiki o Yesusu, ho una wato, “Ngohi naa ka onaguna ho nato toniohiki Ngona? Ko idadiua! De tanu koaho Ngona nohiohiki ngohi angamoi ka Ngonahi duru nokurutiye, ho done ma titi o kia hiadono Ngona noboa ngohino la nato toniohiki?”
15De o Yesusu wipaluhu unangika wato, “Marai ma oraha naa dika de kiani nohiohiki Ngohi, angamoi ngone kiani haniiki Ma Jou ai hininga mata-mataika abe ngoneino.” De gea o Yesusu wotemo ibooto de ahao o Yohanese wiohiki o Yesusu genangoka.
16De o Yesusu wiohiki ibootino de Una o akeroka de wofareniye. De ka de wofareniye ma dudungoka gea de wamake abe o Horoga ifelenga de Ma Jou o Womaha wouti o Yesusuku abe hoka o totaleo o namodaara de iwidangiuku. 17De nagali woihene o ilingi moi o Horogauku itemo ato, “Una naa ahi Ngofaka abe duru tidora de duru tidosanangi Unangika.”
Nu geselecteerd:
Matiusu 3: MJDD
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Gereja Firman Allah, Yayasan Misi Masyarakat di Pedalaman
