मत्ति 10
10
एप्पा चोङ्साजिमि योम्बोक
(मरकुस ३:१३-१९; ६:७-१३; लुका ६:१२-१६; ९:२-६)
1येसुडे़ॽ खोमि बारो जना चोङ्साजि के़ःॽनुङ मङे़ॽमा चापजि यिक्मेनुङ चोप खालहा योःक्सिघे़ॽपॽआनुङ टुक्खुबाजि नुबुक्मे अधिकार पिसुजि।
2बारो जना एप्पा चोङ्साजिमि निङ मिम्मु साप्मिहा-पत्रुस (याक्लो खो सिमोन लुसुजे) खोम निसा आन्द्रियास, जब्दियामि पसा याकुबनुङ खोम निसा युहन्ना, 3फिलिप, बारथोलोमाइ, थोमा, मे़क्चेन लाखुबा मत्ति, अल्फायसमि पसा याकुबनुङ थेदियस, 4देसभक्त लुमे समुहबाङ्ए सिमोननुङ यहुदा इस्करियोत, इगोसे़ॽनोॽ येसु धोका पिसु।
5येसुडे़ॽ इघा बारो जना एप्पा चोङ्साजि इडोॽ लुनुङ पाक्सुजि। “अयहुदि याॽमिजिबेॽनुङ सामरिजिमि सहरबेॽ ए़ॽखे़ॽमे़। 6तर मे़ःखे़ॽपॽआ सामुजिडोॽ लिबॽआ इस्राएलि जातिजिबेॽ खडानिङे। 7खोजिमि रुम्बेॽ ‘थाङ्सिरिमि राज्य के़क्पेॽ लेम्बेटे़’ लुसाङ परचार ले़टानुमे। 8टुक्खुबाजि नुबोगानुमे, सिघे़ॽपॽआजि हिङ्बोगानुमे, सुक्टुबाङेॽ सुक्पॽआजि चोखो टोक्सानुमे, मङे़हा चापजि यिगानुमे। हे़निङे़ॽ मोडोक्नोॽ चुप्पॽआ, हाइखाजिसो मोडोक्नोॽ पिसानुमे। 9हे़निङे़ॽ टाङ्बामि लागि थोङ्माइबेॽ सुन, सिसे़ङ्नुङ ताबोमि इक्को मुन्डासो ए़क्खिसानुमे। 10रामबेॽ पाप्मिहा चाब्रा, फाल्टो चेॽ, फाल्टो राङ्सुपनुङ टोङ्इरा इमाङ्सो ए़क्खिसानुमे। इन्ढोङ्होङ खेत्लाडे़ॽ खोमि चामा चुप्मानोॽ खे़ये।
11 “हाम्बे सहर अथबा खिम्डेमबेॽ रुॽइन्डानुमे मोबेॽ असे़ॽ हे़निङ नुरोॽ ले़म्मे मो याॽमि योगानुमे मोबा बिदा मे़लिरो खोमि खिमबेॽनोॽ पेनानिङे। 12मो खिमहोङ्सिॽयु पे़एम्माबेॽ मो खिमबेॽहाजि सेवा मुसानुमे। 13मो खिमबेॽहा याॽमिजिडे़ॽ हे़निङे़ॽ सेवा मुमाबेॽ नुरोॽ टेसुजिहोङ मो खिमबेॽ सान्ति लेङ्रो। तर मो खिमबेॽहाजिडे़ॽ नुरोॽ मे़ले़ःॽमिहोङ हे़निङ्मि सान्ति हे़निङ्बेॽनोॽ टेआप्रो। 14मो ठाउँबेॽ असे़ॽसो हे़निङ स्वागत मे़ले़ःॽमिहोङ अथबा हे़निङ्मि बचन मे़ङ्खेप्सुजिहोङ, मो खिम अथबा सहरबाङ खे़ॽमाबेॽ हे़निङ्मि सराङ्बेॽहा धुलो फाप्युङ्आसानुमे। 15चइबानोॽ, के़ॽ हे़निङ लुनिम्ने़, न्यायमि याकपेॽ मो सहरमि दसागो सदोम सहरनुङ गमोरा सहरमि खेः बेॽलोनोॽ आङ्हेमारोमा लिये।
लेन्सिॽपोरोक्पॽआ खेःमि टुम्बेॽहा खा
(मरकुस १३:९-१३; लुका २१:१२-१७)
16 “खाक्सानुमे, के़ॽ हे़निङ एःभाजिडोॽहा याॽमिजिमि रुम्बेॽ, सामुडोॽ पाङ्मे़ॽनिङ्सिनिम्ने़। मोडोगे़ॽ हे़निङ पुसे़ॽडोॽ चेन्दुबानुङ उख्रिॽवाडोॽ सुधो लिमे़। 17तर याॽमिजिबाङ अडिॽयो, इन्ढोङ्होङ खोजिडे़ॽ हे़निङ अदालतबेॽ लाघे़म्मेनुङ यहुदिजि सुम्ढाम खिमबेॽ हे़निङ कोरराडे़ॽ साःप्इम्मे। 18हे़निङे़ॽ काबेॽ बिस्वास ले़ःॽपॽआसे़ॽ हे़निङ बेॽहा मायोङ्बानुङ सासकजिमि मोबा अयहुदिमि पोम्बेॽ चिॽखे़म्मे। मोडोक्पेॽ हे़निङे़ॽ माहाजि के़ए़ टुम्बेॽ लुमा खे़ये। 19तर मोडोक्पेॽ इमाङ लुमेनुङ इन्डोॽ इःमे़ मिॽनुङ सुरता ए़ले़टानुमे। इन्ढोङ्होङ हे़निङे़ॽ इमाङ इःमा खे़ये माहा चोप खा मोडोक्पेॽनोॽ हे़निङे़ॽ चुप्मिन्डानुमे। 20इन्ढोङ्होङ मोडोक्पेॽ यामुघुबा हे़निङ टाङ्बा ने़ॽनि, तर निवाहाङ पाबामि होङ्निवा हे़निङ्बाङ यामुये।
21 “वावाडे़ॽ निसा, निसाडे़ॽ वावा सेॽनेमामि सतुरजि राःप्मेन्डुजे, पाबा मामाडे़ॽ पसाजिनुङ पसाजिडे़ॽ पाबा मामामि टेडिघरिक लिनुङ सेॽनेमेन्डुजे। 22काबेॽ बिस्वास ले़ःॽपॽआसे़ॽ चोप याॽमिजिडे़ॽ हे़निङ सिॽचाम्मे, तर ए़क्साङ्ठोक असे़ॽ का बिस्वास ले़म्मे माहाजि हिङ्इम्मे। 23याॽमिजिडे़ॽ हे़निङ इक्को सहरबेॽ चुङ्जामिहोङ, हाइको सहरबेॽ चिःॽखडानिङे। के़ॽ चाइबानोक्मा खा हे़निङ लुनिम्ने़, याॽमिमि पसा लेम्मा याक्लो हे़निङे़ॽ इस्राएलबेॽहा चोप सहरबेॽ सुसमाचार खेम्मेॽसेडानुम्ने।
24 “चोङ्सा टाङ्बामि गुरुबाङ्नुङ सेउते खोमि मायोङ्बाबाङ बेॽए लिनिबा। 25चोङ्सा खोमि गुरुडोॽनुङ सेउते खोमि मायोङ्बाडोॽ लिडोक्माबेॽ सन्तोक ले़ःॽमिरो। हागो खिमदाङ्बानोॽ मङे़ॽमा चापजिमि हाङ्बा लुहेघुबाजिडे़ॽ, मो खिमबेॽहा हाइखाजिगो छना इमाङ लुन्डुजे ?
असाबाङ किस्सिमे़ ?
(लुका १२:२-७)
26 “मोडोगे़ॽ याॽमिजिनुङ ए़क्किसिडानिङे। इन्ढोङ्होङ टे़क्नुङ युङ्बॽआ चोप खाङ्मुहानुङ चुम्नुङ युङ्बॽआ चोप खा लेडोक्इहा। 27के़ॽ हे़निङ सेन्जुगुपबेॽ लुबॽआ खा, हे़निङे़ॽ उज्यालोबेॽ चोपजि लुमे़, ने़ए़कपेॽ खुस्रिङ लुबॽआ खा खिममि धुरिबाङ परचार ले़ःॽमे़। 28हे़निङ्मि होङ्निवा मे़न्सेॽहेघुबानुङ ए़क्किसिडानिङे माहाजिडे़ॽको हे़निङ्मि हिङारेॽ सेॽहेन्डुजे। बोरु हे़निङ्मि हिङानुङ होङ्निवा निच्चिनोॽ सेॽनेहेघुबा निवाहाङ्नुङ किस्सिडानिङे। 29इमा इक्को मुन्डाबेॽ निच्चि ओॽवाजि हाप्मिने ? तरसो माहाजिबेॽ इक्कोसो निवाहाङ पाबे़ॽ मे़लुरो भुइबेॽ हेॽमिनि। 30हे़निङ्मि निन्डवाँबेॽहा टाङ्सो इक्को इक्को निवाहाङ्डे़ॽ नेॽयुङ्इटुहा। 31मोडोगे़ॽ हे़निङ ए़क्किसिडानिङे! हे़निङ्गो माहा ओॽवाजिबाङ छना महङ्गो ले़न्डानिङे।
32 “खेप्सानुमे, असे़ॽ का याॽमिजिमि पोम्बेॽ काङ्मि परभु लुहेन्डुए, मो याॽमि के़ॽसो थाङ्सिरिबेॽ टुये के़ए़ निवाहाङ पाबामि पोम्बेॽ काङ्मि याॽमि लुनुङे। 33तर असे़ॽ का याॽमिजिमि पोम्बेॽ का लेङानि लुये, के़ॽसो खो थाङ्सिरिबेॽ पेङ्खुबा पाबामि पोम्बेॽ लेसुङ्निनोॽ लुनुङे।
चाइबमा चोङ्सा
(लुका १२:५१-५३; १४:२६-२७)
34 “का इगो मक्खाम्डेमबेॽ सान्ति लाजेॽसिॽ लेम्बॽआ लुनुङ ए़मिडानिङे। कागो सान्ति लाजेॽसिॽ ने़ॽनि तर खिमवा पुक्मेॽसिॽ लेङ्इटिङे। 35इन्ढोङ्होङ कागो पाबामि बिरोधबेॽ पसा, मामामि बिरोधबेॽ सम्समा पसानुङ नाम्मामि बिरोधबेॽ नाम्मिॽ काक्खुसे़ॽ चुमेॽसिॽ लेङ्इटिङे। 36याॽमिमि सतुरगो खोमि खिमबेॽहा याॽमिजिनोॽ लिम्मे। 37असे़ॽ काबाङ्सो बेॽलो खोमि पाबा अथबा मामा नम्नम ले़न्डुए खो काङ्मि चाइबमा चोङ्सा लिहेनिबा। मोडोक्नोॽ असे़ॽ काबाङ्सो बेॽलो खोम पसाजि नम्नम ले़न्डुजिहोङ मो याॽमि काङ्मि चोङ्सा लिहेनिबा। 38असा टाङ्बामि काप्सिङ खिमानुङ कानुङ राम्निबा, खो काङ्मि चाइबमा चोङ्सा लिहेनिबा। 39असे़ॽ खोमि हिङ्मवा जोगा ले़न्डुए, मोसे़ॽ मो मे़पेन्डुए, तर असे़ॽ काङ्मि लागि टाङ्बामि हिङ्मवा पिन्डुए मोसे़ॽ मो चुप्मिन्डुए।
चोङ्सामि लागि इनाम
(मरकुस ९:४१; लुका १०:१६)
40 “हे़निङ स्वागत ले़ःॽखुबे़ॽ कासो स्वागत ले़ये। का स्वागत ले़ःॽखुबाडे़ॽ का पाङ्घुबासो स्वागत ले़न्डुए। 41असे़ॽ अगमबक्ता अगमबक्तानोॽ मिॽनुङ स्वागत ले़न्डुए मोसे़ॽ अगमबक्तामिनोॽ इनाम चुप्मिन्डुए। धरमि याॽमि धरमिनोॽ मिॽनुङ नुबा ले़ःॽखुबे़ॽ धरमिमिनोॽ इनाम चुप्मिन्डुए। 42असे़ॽ इघा ए़डे़म्मा याॽमिजिबेॽ इक्को के़ए़ चोङ्सा मिॽनुङ इक खोरिया येम्जुवा योङा उङ्मा पिन्डुए, मोसे़ॽ खोमि इनाम चइबानोॽ चुप्मिन्डुए।”
Nu geselecteerd:
मत्ति 10: YAMP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2023, Wycliffe Bible Translators, Inc. and Nepal Bible Society
