Ruuka 19

Yeesu kaagenda iika wa Jaakayo owa ebhibhiibhi

1Yeesu ejire eengira mu‑musi gwa Yeeriko, aaturaga agatigati ya omusi ogwo. 2Mu‑musi ogwo, aariga ari‑mo omuniibhi umwi, risiina ryaye ˆnaatogwaga Jaakayo. Jaakayo oyo aariga ari mukuru wa abhatobhesya bha rigooti. 3Omuniibhi oyo eendaga okurora Yeesu, ati, ni muunu wa mbaga ki. Nawe, ꞉ataaturire okumurora, ku‑songa ya echise chinene cha abhaanu, ka wone Jaakayo omwene aariga ari mufuyi. 4Kurwa ejo, ˆnaabhirima bhwangu, ˆnaatangata imbere, ˆnaariinya kw‑ikuyu, korereki arore Yeesu kwa okubha kaja okutura ku‑njira awo.

5Mbe, Yeesu ejire aakinga kw‑ikuyu arya, ˆnaaringira inguru, ˆnaamubhwira ati, “Jaakayo, yika bhwangu! Reero jeenderwe nibhe omugenyi ewaawo.” 6Awoawo, Jaakayo ˆneeka bhwangu, ˆnaakuma Yeesu iika ewaaye enu ˆnaakonderwaga muno.

7Abhaanu bhoone, bhejire bhaarora ejo, nibhaamba okujujuuma ati, “Mbawo aagenda okubha omugenyi wa omuunu owa ebhibhiibhi!”#19:7 Omuunu owa ebhibhiibhi. Abhayawudi bhaariga bhamenyere ati, abhatobhesya bha rigooti ni bhaanu abha ebhibhiibhi muno.

8Nawe, Jaakayo ˆneemereeguru, ˆnaabhwira Raatabhugenyi ati, “Raatabhugenyi ringira! Woori kutya, risinja rya omwandu gwani enigabhira abhataka. Araabha ꞉naateesiisye omuunu woonewoone echiinu, enimusubhisya kwiya kana ya chinu ꞉naamuteesiisye.”

9Yeesu ˆnaamubhwira ati, “Reero inu, obhuchungusi bhwakingira abhaanu bha inju inu, kwa okubha ebhikorwa bhyaye bhyeresya ati, omuunu unu wone ni mwana wa mu‑ruganda rwa Bhurayimu. 10Okubha anye Omwana wa Omuunu ꞉neejire okuyenja na okuchungura abhaanu bhanu bhabhurire.”

Echijekekanyo cha abhagaya bhanu ꞉bhaayaaywe jipirya

(Mataayo 25:14‑30)

11Abhaanu bhaariga nibhagenderera okutegeresya emisango ejo, Yeesu ˆnaabhabhwira echijekekanyo echindi chimwi. Abhaanu abho bheetogeraga ati, jisiku ja obhukama bhwa Nyamuwanga, jikakingire omwanya guryagurya, kwa okubha Yeesu aariga ˆnaarebherera omusi gwa Yerusareemu.#19:11 Abhayawudi bhaariga nibhasombookerwa ati, Kirisito kaja okwambira obhukama bhwaye mu‑musi gwa Yerusareemu, gunu gwariga guri musi gwa omukama Dawudi. 12Kurwa ejo, ˆnaayika ati, “Aariga ari‑wo omuunu umwi wa echibharo cha inguru muno. Omuunu oyo, ꞉aagendere mu‑rugendo mu‑chaaro cha kura, korereki abhone obhukama, akamara asubhe okubha omutungi mu‑chaaro cha ewaabho.

13“Mbe, omwanya gunu aariga achaari okwimuka, ꞉aabhirikiiye abhagaya bhaaye ekumi, ˆnaayaana bhuri muunu jipirya nyafu,#19:13 ˆNaayaana bhuri muunu jipirya nyafu. Jinyabhurira ejindi ejaayika ati, ˆnaayaana bhuri umwi weebhwe imina imwi, inu yaariga iri muyeero gwa ameesi gasatu ku‑mukosi wa emirimu ku‑mwanya gurya. na ˆnaabhabhwira ati, ‘Mwibhusyege‑mo jipirya jinu okukingira omwanya gunu nirisubha.’

14“Nawe abhaanu bha echaaro chaaye bhaariga bhamusokere muno. Kurwa ejo, nibhatuma abhajuuma bhamujee‑ko, bhamubhwire ati, ‘Chitakwenda omuunu unu, abhe omukama weeswe!’ 15Nawe omuunu oyo, ˆnaayaanwa obhukama, ˆnaasubha mu‑chaaro cha ewaabho. Ejire aakinga, ˆnaabhirikira abhagaya bhaaye bhanu ꞉aayaaye jipirya, korereki amenye omuriiro gunu bhuri umwi weebhwe ꞉aabhwene.

16“Omugaya wa okwamba ˆnaaja, ˆnaayika ati, ‘Mwami waani, ꞉naabhwene omuriiro jipirya ekumi okuruubhana na jinu waariga unaanire.’ 17Omukama oyo, ˆnaamubhwira ati, ‘Ukorere kisi, omugaya waani omwiyikanyibhwa! Okubha waabha omwiyikanyibhwa ku‑misango emitooto, woori owuja okubha omutungi inguru ya emisi ekumi.’

18“Omugaya wa kabhiri wone ˆnaaja, ˆnaayika ati, ‘Mwami waani, ꞉naabhwene omuriiro gwa jipirya etaanu okuruubhana na jinu waariga unaanire.’ 19Omukama oyo, ˆnaamubhwira ati, ‘Awe wone, owuja okubha omutungi inguru ya emisi etaanu.’

20“Omugaya owundi ˆnaaja, ˆnaayika ati, ‘Mwami, jipirya jaawo njiji anu. ꞉Naajisumikire mu‑chitambaara, ninjibhisa, korereki jaasiga okubhura. 21꞉Naakorere kutyo, kwa okubha ꞉naakuubhayire. Awe uri muunu omururu, owugega anu ꞉utaateeye echiinu, na owugesa anu ꞉utaayambire.’

22“Omukama oyo, ˆnaamubhwira ati, ‘Awe omugaya omubhiibhi! Enija okukuramura okuruubhana na obhwayiki bhwawo omwene. Waayika ati, umenyere ati, anye niri mururu kabhukabhu, enigega anu ꞉nitaateeye echiinu wuri, na enigesa anu ꞉nitaayambire echiinu wuri. 23Araabha nikwo kutyo niri, kurwa ki ꞉utaateeye jipirya jaani ku‑bhanu abheebhusya‑mo, korereki omwanya gunu nikasubhire, nikajigegere aamwi na omuriiro gwajo?’

24“Neeya omukama oyo, ˆnaabhwira abhaanu bhanu bhaariga bheemereeguuyu ayeeyi awo ati, ‘Mumuteesye jipirya ejo, muyaane unu eebhusiisye ejindi ekumi omuriiro.’ 25Nibhabhwira ati, ‘Nawe omwami, unu abhwene ejindi ekumi omuriiro!’

26“Omwene ˆnaabhabhwira ati, ‘Ni chimari ati, bhuri muunu unu kaakorera emirimu kisi, ebhiinu bhinu kaayaanwa, kaja okwongesibhwa ebhindi. Omuunu unu atakubhikorera emirimu kisi, noorwo echitooto chinu ari nacho kaja okuteesibhwa. 27Woori, abhasoko bhaani bhanu bhaariga bhatakwenda anye nibhe omukama weebhwe, mubhareete imbere yaani anu, mubheete!’”

Yeesu kaaramirwa Yerusareemu kwa esandabha

(Mataayo 21:1‑11; Maariko 11:1‑11; Yowana 12:12‑19)

28Yeesu ejire aamara okwayika ejo, ˆnaagenderera na orugendo rwaye rwa okurosya mu‑musi gwa Yerusareemu. 29Mbe, ejire aarebherera ayeeyi na jinguuyo ja Bheetifaage na Bheetaniya, ku‑chiima cha Emijeyituuni, ˆnaatuma abheeyigisibhwa bhaaye bhabhiri, 30ˆnaabhabhwira ati, “Mugende mu‑ruguuyo runu ruri imbere yeemwe. Omwanya gunu omuja okwingira omwo, omuja okurora echinyara cha isikiri chinu chichaariga okuriinywa‑ko na omuunu woonewoone chisibhikirwe. Muchisibhure, muchindeetere anu. 31Araabha omuunu akabhabhuusya ati, ‘Kurwa ki omuchisibhura?’ mumusubhye ati, ‘Raatabhugenyi kaachikena.’”

32Mbe, abheeyigisibhwa abho nibhagenda, nibhasongʼana echinyara cha isikiri rwa kutyo Yeesu aariga abhabhwiriiye. 33Omwanya gunu bhaariga nibhachisibhura, abheene bhaacho nibhabhabhuusya ati, “Kurwa ki omusibhura echinyara cha isikiri echo?” 34Nibhabhasubhya ati, “Raatabhugenyi kaachikena.” 35Nibhachisira ku‑Yeesu echinyara cha isikiri echo, nibhaanja emyenda jeebhwe inguru yaacho, bhejire bhaamara nibharinyya‑ko Yeesu.

36Omwanya gunu Yeesu aariga ˆnaagenda, abhaanu bhaariga nibhaanja emyenda jeebhwe ku‑njira. 37Ejire aarebherera ku‑chooromoko cha echiima cha Emijeyituuni, echise choone cha abheeyigisibhwa bhaaye, nibhaamba okusandabha na okukuuya Nyamuwanga, inguru ya ebhiruguusyo bhinu ꞉bhaarorere. 38Nibhaayika ati,

“Ayaanwe amabhando Omukama unu kaaja kw‑isiina rya Raatabhugenyi Nyamuwanga!

Omurembe gubhe agati ya Nyamuwanga na abhaanu bhaaye!

Nyamuwanga unu ari mu‑rwire akusibhwe!”

39Mu‑chise echo, bhaariga bhari‑mo Abhafarisaayo. Mbe, nibhabhwira Yeesu ati, “Omwiyigisya, gonya abheeyigisibhwa bhaawo bhasige okwayika kutyo!” 40Yeesu ˆnaabhasubhya ati, “Enibhabhwira ati, araabha bhanu bhaakajibhira, noorwo amabhuyi ganu agaja okwamura obhuraka, gamwaye!”

Yeesu kaaririra omusi gwa Yerusareemu

41Yeesu ejire aarebherera okukinga Yerusareemu, ˆnaarora omusi ogwo, ˆnaamba okuguririra. 42ˆNaayika ati, “Awe Yerusareemu, reero inu naari neendere, usombookerwe injira ya okubhona omurembe! Nawe woori, ibhisirwe utakutura okuyibhona wuri. 43Ni chimari ati, jisiku ejiija, abhasoko bhaawo bharikusitira orugo orunene, korereki bhakurwane okusookerera bhuri rubhaara. 44Bharifumya omusi gwawo gwone na bharikusingaarisya awe na abhaana bhaawo bhoone. Abhasoko abho, ritari‑wo noorwo ribhuyi rimwi rinu bharisiga rigerekeene inguru ya erindi ku‑ndugu ja omusi, isonga iri ati, ꞉mutaasombookeeywe omwanya gunu Nyamuwanga ꞉eejire okubhachungura.”

Yeesu kaabhirimya abhasuruuja mw‑Iyekaru rya Nyamuwanga

(Mataayo 21:12‑17; Maariko 11:15‑19; Yowana 2:13‑22)

45Neeya, Yeesu ˆneengira mu‑rubhuga rwa Riyekaru rya Nyamuwanga, ˆnaamba okubhirimya abhaanu bhanu bhaariga nibhagusya ebhiinu omwo. 46ˆNaabhabhwira ati, “Jikaamirwe mu‑Bhikaame Ebhyeru ati, ‘Inju yaani, iribha inju ya risabhwa.’#19:46a Ringira Iisaya 56:7. Nawe emwe, muyikorere okubha isenga ya abhasaakusi!”#19:46b Ringira Yeremiya 7:11.

47Bhuri rusuku, Yeesu aariga ˆneeyigisya abhaanu mu‑rubhuga rwa Riyekaru rya Nyamuwanga. Abhakuru bha abhagabhisi, aamwi na abheeyigisya bha ebhiraagiro bhya Muusa na abhakuru bha Abhayawudi bhaariga nibhayenja injira ya okumwita. 48Nawe ꞉bhataabhwene omwanya gwa okukora kutyo, kwa okubha abhaanu bhoone bhaariga nibhamuruubha okutegeresya muno emisango jaaye.

Nu geselecteerd:

Ruuka 19: jit

Markering

Deel

Kopiëren