मट्टि 9
9
येसुऎ एक्क याॽमि नुबक्मिॽमिम्पा
(मारकुस २:१-१२; लुका ५:१७-२६)
1येसु सिङ्खङ्पि भॆना हाङ् होइखेपा सङ्क टोम्पलिॽवा मॆअङ् टाङ्पाम् हाटाबि ऎन्टाआ। 2हाङ् याॽमिचिऎ लाङ् हुक् टानॆ एक्क याॽमि लिःॽमारा नुङ्न खिन्टॆटुचि। आक्खा याॽमिचिम् निवाँयुङ् खाङुहाङ् येसुऎ आक्क लाङ् हुक् टानॆ याॽमि लोसु, “पासो, निवाँबि चॆकुयॆ लिसॆ, आनाम् हिङ्वा यङ्निडा।” 3येसुऎ लोमिम्पा खानावाँ खेमुचिहाङ् एक्क हिप्पा मोसामि यायेॽमा चिन्खुबाचि उम्चि टाङ्पा टाङ्पाबि गर कासाचि, “गसॆ निवाँहाङ् रे इचाकुवॆ रछ।” 4उम्चि निवाँबिऎ खानावाँ वाप्टकुहाङ् येसुऎ आक्खाचि लोसुचि, “आन्नॆ मान्ठा निवाँबि काइसॆ मिॽलाकाम्नॆ? 5मान्ठाभनॆ काङाम् लागि ‘आनाम् हिङ्वा यङ्निडा’ लोमा नुऎ रु? ‘आना येप्पकॆ हाङ् लाम्ढुसॆ’ लोमा नुऎ? 6टर कॆ याॽमिमि पासा नुङ् बाखाटेम्पि हिङ्वा यङ्निमॆ ढुप्पाट्ट चु कामानुङ् आन्ना खाङ्मिकानि।” हाङ् येसुऎ आक्क लाङ् हुक् टानॆ याॽमि लोसु, “येबॆ हाङ् आम् लिच्रुम् खिम्मानुङ् खिम्पि खारॆ।” 7हाङ् आक्क याॽमि येप्पकाहाङ् उम् खिम्पि खारा। 8ग खाङुचि हाङ् आक्कुबि खोम्टि खॆडामिहा याॽमिचि किसिखारामि हाङ् निवाँहाङ्ऎ याॽमिचि गरक्मा ढुप्पाट्ट पिॽमिम्पासॆ निवाँहाङ्मि निङ् ठेरुचि।
येसुऎ मट्टि सेःॽमिम्पा
(मारकुस २:१३-१७; लुका ५:२७-३२)
9येसु आक्कबाङ् खॆॽमॆ सिसार यावॆङ्ग लाखुबा एक्क मट्टि लोमॆ याॽमि यावॆङ्ग खोम्मॆ ठालबि पेन्मेसिऎ खाङु हाङ् लोसु, “काङा टिङ्ङॆ।” हाङ् मट्टि पगाहाङ् येसु टिङ्पकु।
10हाङ् येसु मट्टिमि खिम्पि चामा चासि पेनार, यावॆङ्ग खोम्खुबा होइढा याॽमिचि, हिङ्वा याॽमिचि सङ्क टाआमिहाङ् खो हाङ् खोम् टिङ्खुबाचि नुङ् चासि पेनामि। 11फरिसिचिऎ म खाङ्टकुचिहाङ् येसुमि टिङ्खुबाचि लोसुचि, “मान्ठा आन्नामि चिन्खुबा यावॆङ्ग खोम्खुबाचि हाङ् हिङ्वाचिनुङ् पेन्से चाऎ?” 12म खानावाँ खेमुहाङ् येसुऎ लोसुचि, “टुक्मिनिहाचि ग सिढा याङ्खुबाऎ खाङ्मा पाब्नि, टर टुक्खाचि चाइ खाङ्मा लॆःॽमि। 13टर खारानॆ हाङ् निवाँनेन् साब्चिराबि साब्डॆ ग खानावाँऎ लोमिम्पा माल म वाबाम्नॆ कॆ काङाम् लागि सङ्टिॽमॆ खानावाँ हॆॽनॆ टर याॽमिचि नाम्नाम् पिसिॽमॆ खानावाँ नेन्चाकुङ्#होसे ६:६ मान्ठाभनॆ का निवाँनेन्चि हॆॽनि टर हिङ्वाचि सेसि टाडिङ।”
साक्नॆॽमॆ खानावाँ
(मारकुस २:१८-२२; लुका ५:३३-३९)
14हाङ् बाप्टिस्मा पिक्खुबा युहान्नामि टिङ्खुबाचि येसुबि टाआमिहाङ् सिमुचि, “काङ्का हाङ् फारिसि चाइ साक्नेॽढाङ्किङ्का, टर आनाम् टिङ्खुबाचि चाइ मान्ठा साक्नेॽमिनिहा?” 15येसुऎ आक्खाचि लोसुचि, “माल् डाङ्पा डाङ्कुटिङ्पाचिनुङ्न चुःक्र खोचि निवाँ टुक्मानुङ् साक्नेरुॽमिहॆ टा? टर गरक्मा ल स टा खोचिबाङ् डाङ्पा फाॽलाङ्, हाङ् खोचि साक्नेरुक्मि।
16“हाङ् आसॆस याॽलिहा नासॆलिसिम्पा चेबि उम्चङ् चे ऎप्टिसुचिनि, मान्ठाभनॆ उम्चङ् चे मिःछुपा लिबक् हाङ् आक्कसॆ याॽलऎ बाङ्स ढ्या नाःग्बकु।
17“गरहाङ्न आसॆस उम्चङ् आङ्गुरमि डिबु याॽलिहा साखक्मि बॆक्खाबि युङुचिनि। युङ्इटा हाङ्स म बॆक्खा स नाग्लिङ् खॆ हाङ् आङ्गुरमि डिबु स बोप्लिङ् खॆ, टर उम्चङ् आङ्गुरमि डिबु उम्चङ् बॆक्खाबिन युङुक् हाङ् हिच्चिन नासॆलिनि।”
येसुऎ याहुडि टुङ्घङ्पामि सम्सामा हाङ् एक्क मेॽनुङ्मा नुबक्मिॽमिम्पा
(मारकुस ५:२१-४३; लुका ८:४०-५६)
18येसुऎ आक्खाचिम खानावाँ इमॆ पाइटुर याहुडिचिम् एक्क टुङ्घङ्पा टाआहाङ् खो स्यामिटुहाङ् लोसु, “हःन काम् साम्सामा सिखारा, टर आना टाक्ना हाङ् खो सक्पि आनाम् हुक् युङुना हाङ्ग, आक्क हिङ्चा।” 19येसु येप्पका हाङ् आक्क याॽमि नुङ् लङ्पका हाङ् टिङ्खुबाचि सङ्क खोनुङ्न खारामि।
20मरक्लन एपङ्हि निङ् याॽलऎबाङ् हारि अङ्मॆ टुक्मावाऎ लाब्मिम्पा एक्क मेॽनुङ्मा येसुमि डॆङ्कॽवा पोट्टाबाङ् टाआहाङ् येसुमि चे मिःक्म डिन्चाउ। 21मान्ठाभनॆ आक्कसॆ “कॆ येसुमि मिःक्म चे टे डिन्चाउङ् हाङ्स नुबक्ङा” कामानुङ् मिन्मिम्पा लॆटा। 22हाङ् येसु यिङ्पका हाङ् आक्क मेॽनुङ्मा खाङ्टकु हाङ् लोसु, “नानो, चेन्चाऎ, आनाम् निवाँयुङ्ऎ आना नुबक्मिडा।” आक्क मेॽनुङ्मा मरक्लन नुबक्खारा।
23आक्क डॆङ्पि येसु म याहुडिचिम् टुङ्घङ्पामि खिम्पि टाआ। खोसॆ आक्कुबि याॽमि सिखॆम्पा ठालबि पॆँपॆँलिमा डुप्खुबाचि हाङ् हाप्ढाङ्पा याॽमिचि खाङ्टकुचि। 24येसुऎ आक्खाचि चोब्न “आम्पखारानॆ, मान्ठाभनॆ चाचा मासिखॆटि, टर इम्टिखॆडा” कामानुङ् लोसुचि। ग खानावाँ खेमुचिहाङ् चोब्न यिचाआमि। 25याॽमिचि बाहिरा लाबहाक्सुचि हाङ् खो चाइ मेॽनुङ्मा चुऎ ठालबि खारा हाङ् आक्क चाचामि हुक्पि लाबु हाङ् आक्क चाचा पःक्लिन्टा। 26हाङ् ग खानावाँ आक्क हाङ्टेम् भोरि फुबका।
येसुऎ हिप्पा मिक्सुरुम्पा हाङ् एक्क कुःबा नुबक्मिॽमिम्पा
27हाङ् येसु आक्क ठालबाङ् खॆॽमॆ सिसार लाम्फुबि हिप्पा मिक्सुरुम्पाऎ “ओ, डाउडमि पासा काचिगा नाम्नाम् पिसिचिमॆ!” कामानुङ् याकासे टिङ्पकाचु। 28येसु खिम् हङ्सि भॆना हाङ् आक्खा हिप्पा मिक्सुरुम्पाचि सङ्क आक्कुबि टाआचि। हाङ् खोसॆ आक्खाचि लोसुचि, “माल् कॆ आन्चिना नुबक्मिक्हिक्चिना कामानुङ् निवाँयुङ् लॆक्चुनॆ?” खोचिऎ लोसाचु, “लॆक्चुगा पारभु।” 29हाङ् येसुऎ उम्चि मिक्पि डिन्चासे लोसुचि, “आन्चिनॆ निवाँयुङ् लॆःॽमिम्पा रक्न लि।” 30हाङ् खोचि मिक् खाङ्खुबा लिसाचि। हाङ् येसुऎ आक्खाचि “ग खानावाँ आसास आखेम्मिटॆचॆ” कामानुङ् नुःर लोसुचि। 31टर खोचि खाराचि हाङ् आक्खा चोब्न ठालबि खोम् बारेबि खानावाँ फुबकाचु।
32खोचि खाइटाचि हाङ् याॽमिचिऎ खारिॽमाङ्ऎ लाप्मिम्पा यामुहिनॆ एक्क याॽमि येसुबि टॆटुचि। 33येसुऎ म खारिॽमाङ् लाबहाङ्मा अक्सि आक्क याॽमि यामुबक्का हाङ् चोब्न याॽमिचि आक्खॆसे गर कासामि, “गरक्मा योम्पक् ग काङ्कॆ इस्राएलबि हानाम्स माखाङ्पा लॆटिङ्का!” 34टर फारिसिचिऎ चाइ गरहाङ् लोसुचि, “गसॆ खारिॽमाङ्चिम् टुङ्घङ्पाम् चॆक्मावाऎ खारिॽमाङ्चि लाबक्मॆ योम्पक् यिगुकु।”
काम् योम्पक् मुखुबाचि मिःक्म लॆकुचि
(मारकुस ६:३४; लुका १०:२)
35हाङ् येसुऎ चोब्न हाटा हाङ् गाँवाँबिहा उम्चि याहुडिचि खोम्ठाम् खिम्पि चिन्से पारुमि हाङ्डाम्मि बारेबि नुऎ खानावाँ खेम्मिटुचिमि हाङ् चोब्न खालाहा टुक्मावाऎ टिप्भुङ्पा याॽमिचि नुःबक्मिट्टुचि। 36हाङ् ओइर याॽमिचि खाङुचि हाङ् येसुमि निवाँ नाम्नावाँऎ चेप्खॆटु, मान्ठाभनॆ आक्खाचि कोप्खुबाडोप्खुबा मॆड्डिङ्मा किसिमिम्पा हाङ् याक्टाखॆमिम्पा सामुङ्चिर लॆटामि। 37हाङ् खोसॆ टिङ्खुबाचि लोसुचि, “खोम्मा लॆऎ चारावा खॆलावा ग डिरिक् लॆकु, टर योम्पक् मुखुबाचि चाइ मिःक्म लॆकुचि। 38मसॆ चारावा खॆलावामि टुङ्घङ्पा, चारावा खॆलावा खोम्खुबाचि पाङ्हाङ् पिच्चिमॆ कामानुङ् ङागानॆ।”
Nu geselecteerd:
मट्टि 9: LBR
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2023, Wycliffe Bible Translators, Inc. and Nepal Bible Society
