Luk 9

Jisɔs Ɔtɔm Atɔmɔtɔm Zowaffa Pɛ ki Iyan

1Jisɔs ojer atɔmɔtɔm pɛ zowaffa otsog ɔwang gwan, ɔnang bɛ ɛffa abɛ aba akuw akpakpa pyuwa ɔttara abɛ aba agweng mmada. 2Ɔtɔm bɛ abɛ aba ateg anang Ɛvaar tsu Ubɨnɔkpaabyi ɔttara aba assi anang aba agweng. 3Oteg bɛ abɛ, “Anang ottɔg atɨm ko osenga ngwa; abanga nang ɛgbatsi atɨm, nang ɛkpa atɨm, nang utsapfɛ atɨm, nang akpog atɨm, nang ɔnɔma ɔdwag atɨm. 4Ɔtsɔm kwidede kwa abanga anwa anɨnga muma tar abanga bɨna ma ko ofon ngwo. 5Odesɛ anang po ofon ngwo ana abanga na alowa, abanga akan ububuma kwo ofon ngwo kɨ nfogkpatwak ra abanga azɛ masɛ ɔttɔg fɛ mɔ ɔnang bɛ ikamana abɛ Ubɨnɔkpaabyi nɔ ɔnang bɛ irem.” 6Atɔmɔtɔm mbo aba abɨna aba ata ki ifon ki ifon abɛ na ateg anang ɛkkawa zuwa ɔttara aba agweng anang kɔ ɔwang kwidede.

7Okpe kwɛ Hɛrɔd, ɔvaar nang kwu Galili, ɔwang idɨg rɨ Jisɔs ku ussa, akwɛ okkon-ɛ, ukwurabɛ anang ban ana aben abɛ Jɔn opyenga-assi kɔ ɔshɔwa ko obo. 8Ayog ban abɛ Ɛlaija ku uyina ki iyan, ayog ban abɛ otegɛkkawa kwu Ubɨnɔkpaabyi wan kwe etseden kɔ ɔshɔwa ko obo. 9Hɛrɔd abɛ, “Amma ki Jɔn etso nrenga, bag ɔnang wɔ ma kwɛ nnɨ wanga idɨg nda nbanga?” Ɔyɔr abɛ usse-ɛ.

Jisɔs ɔnang anang nnɔna zowaffa ukkuma araw zow utsapfɛ

10Okpe kwa atɔmɔtɔm mbo aba akwɨn, aba ateg Jisɔs idɨg ra abɛ ka assa. Ɔtag bɛ opfona ga ofon kwo okpen Bɛtsaida aba ata anɨnga mɨntsen. 11Okpe kwa anang pa asawɔsaw awang, aba abuw-ɛ innam. Olow bɛ, oteg bɛ ɔbanga Ɛvaar tsu Ubɨnɔkpaabyi ɔttara ogweng anang pa aror egwenga.

12Kɛ ɛtsɔga, atɔmɔtɔm mbo zowaffa abɨna ata kew-ɛ, aba ben-ɛ abɛ, “Ben anang mba aba apfona ki ifon ri ibang mama ɔttara kɨ mmɨn rɨ mbang mama fasɛ aba aror utsapfɛ ɔttara ki iwang ra abɛ ma yɨma ukwurabɛ owang ngwama anang ka ade.”

13Jisɔs ɔpɔna abɛ, “Abanga anang bɛ utsapfɛ aba atsi.”

Abɛma aben abɛ, “Amana ankam abrɛd kpara asen ɔttara nsiten nffa mɨntsen. Odesɛ ma anang mbɛ utsapfɛ nata dew utsapfɛ anang mbɛ.” 14Okkema ode adwunɨng nnɔna zowaffa ukkuma araw zow pa aba anɨng muma.

Jisɔs oben abuwinnam pɛ abɛ, “Ben bɛ aba anɨnga nyar ki iseg, kɨ nnɨnga kɨ nnɨnga, pa anang araw affa ukkuma zow.” 15Abuwinnam assi otse ngwo, anang mbo ibɨng aba anɨnga nyar ki iseg. 16Jisɔs ɔtaga abrɛd mbyo asen ɔttara kɨ nsinten ndo nffa okker ke ɛrang, usɨma Ubinɔpkaabyi ku utsapfɛ, ɔzɔg pyɛ ɔtaga ɔnang abuwinnam aba ataga akkew anang mbo. 17Ɔnang kwidede utsi ɔdɔw. Abuwinnam aba adwunga pyi irug-urug iffu ɔkarbang zowaffa.

Pitɛ oben abɛ Jisɔs wɔ ode Krais

18Igwu zan Jisɔs ɔnɔ ɔzɔm atɨm mɨntsen, abuwinnam akwu kwa kew-ɛ. Ɛma ɔbɔw bɛ abɛ, “Anang ana ben abe amma nde anɛ?”

19Abɛma apɔn-ɛ abɛ, “Ayog ban abe ɔma ade Jɔn Opyenga-assi, ayog ban abɛ ɔma ade Ɛlaija, ayog ban abɛ otegɛkkawa kwu Ubɨnɔkpaabyi wan kwe etseden kɔ ɔshɔwa ko obo.”

20Ɛma ɔbɔw bɛ abɛ, “Abangama aben abɛ amma nde anɛ?” Pitɛ ɔpɔn-ɛ abɛ, “Ɔma wɔ ade Krais kwu Ubɨnɔkpaabyi.”

Jisɔs oteg obo kwɛ mo oppe

21Jisɔs ɔnang bɛ ikamana rititam abɛ aba anang ɔnang udɨg ngwo ateg. 22Oteg bɛ, “Unwa kwu Udwunɨng nɔ ɔdɔw irem ki idɨg ri isaw-ɔsaw ɔttara atsonang ɔttara avaar pa affɔnɛzza ɔttara akpewinyɨna tsɛ Mosis abɛ na fɨm-ɛ. Abɛ na afɔ-ɛ, sɔ ɔgba ngwu nttan nɔ ɔshɔw ko obo.”

23Oben bɛ abɛ, “Ɔnang kwidede kwɛ mu ubuw-m innam, nu afum ɛma oyen, ɔtaga ɛkpaga tsɛ oyen okpen igwu ubuw-m innam. 24Ɔnang kwidede kwo oben abɛ ɛma mɔ ɔkkana akpen pɛ, abɛ na adɨm-ɛ udɨm, ɔnang kwidede kwu udɨm akpen pɛ ukwur amma, nɔ ɔkam ɛnnanga. 25Bag ɔttɔg vɔ ode uru kwɔ odesɛ akam oyagbɨn ibɨng ammanga ana akpen pɔ na adɨma, na allɨg akpen pɔ? 26Odesɛ ɔnang kwidede nkpar nsi-ɛ ukwur amma ɔttara kɔ otɔnga kwam, nkpar ni gbi nsi Unwa kwu Udwunɨng ko okpe kwɛ mɔ ɔmanga kɛ ɛnya tsɛ ɔttara kɛ ɛnya tso Otte ɔttara ka atɔmɔtɔm pyɛ pyi iwuruwur.

27“Nteg banga udɨg ɔkka, anang ban abe mama pa aba nama pe pɛrɛ aba se Ɛvaar tsu Ubɨnɔkpaabyi.”

Ɛwaga tsɛ Jisɔs

28Kɔ ɔttɔg fɨn ngwu ɔsɔttan sɛ Jisɔs ɔtɔng otɔnga ngwa, Jisɔs ɔtaga Pitɛ, Jɔn ɔttara Jems, opfona ko okpetso kwididen ɔtɔ ozɔm atɨm. 29Sɛnɔ ɔzɔm atɨm mbo, itɨtɨga atsɛ ɛwag, ekpo pyo oke ɛwag iwur masɛ ekpon. 30Muma zizan, anang affa, Mosis ɔttara kɛ Ɛlaija aba atitso aba na atɔnga abɛ. 31Aba ayɨn akɔga azuwada pɛ ɛrang ɔttara aba tɔnga abɛ otse kwɛ mo oppe giga Jɛrusɛlɛm mɛ ɛkɔga. 32Pitɛ ɔttara ka ayog pɛ wɛrɛ nattawa ɔda, aba shɔwa aba se azuwada pɛ Jisɔs ɔttara anang mboga affa pa abe ɛmabɛ ki ibe ndo. 33Masɛ anang mboga affa nama bɨna arɨg Jisɔs, Pitɛ oben Jisɔs abɛ, “Ɔvaar, ɔbanma abɛ amana anɨnga mama, amana anssi achira attan; dan rɔ, dan rɨ Mosis, dan rɛ Ɛlaija.” (Ɔtɔnga kwɔ ɔtɔng muma fɨno osonga.)

34Sɛnɔ ɔtɔnga muma, ɔkkpang ukwu kwu ubuw bɛ, abuwinnam mbo ozora ussi bɛ sɔ ɔkkpang nwo ubuw bɛ. 35Ɛmang iyɨn ma kɔ ɔkkpang eben abɛ, “Mama wɔ ode Unwa kwam kwɛ kɛ nrenga, akɔm-ɛ itɔng.” 36Sɔ ɔtɔnga ngwo ku utɨma, Jisɔs ɔwag unɨnga mɨntsen. Abuwinnam aba myi zɨm, abɛ ɔnang wan wan na tega ɔttɔg fa aba ase.

Jisɔs Ogweng Unwa dwunɨng kwa Akpakpa Pyuwa Anwa-ɛ

37Si igwu nzo eseng, sa abɛ ko okpetso nwo araga, anang pa sawɔsaw akwu kwa akew-ɛ 38Ɔnang wan ma kɔ ɔsaw nvo, ojer-ɛ, “Okpew-nnwer, nnɨntsɨn ɔma utsɨn, ker unwa dwunɨng kwam, ɛma mɨntsen kwu nkam 39Ɔkpakpa pyuwa kɛ upfuwa, usi-ɛ ɔnɔ gama, otto ki iseg, afɔfɔ ayɨn kɛ ɛmma, oreng-ɛ nden, ku ufuma abɛ utte-ɛ ɔbɔg. 40Ka abuwinnam pɔ ntsina mbɛ aba areng-ɛ kwɛ, abɛ funakka.”

41Jisɔs ɔpɔn-ɛ abɛ, “Abangama anang pa na etsera ka kam attara anang pa ka allɨga. Mɨ nɨnga abangama abɛ ukpɨra yan ɔttara ko ottem bar? Nang-m unwa nwo.”

42Su unwa nwo unu ukwu, ɔkpakpa pyuwa nwo udɨr-ɛ ɔzɛ ki iseg, usi-ɛ utitso ukpɨr ki iseg. Jisɔs ɔkpɛm ɔkpakpa pyuwa ngwo, ussi unwa nwo ogweng, otaga-ɛ ɔnang otte. 43Akwɛ okkon ɔnang kwidede ukwur ɛffa tsu Ubɨnɔkpaabyi.

Jisɔs oteg obo kwɛ mo oppe adɛgɛ

Sɔ ɔnang kwidede utɨm okkon-ɛ okkona ku udɨg kwu Jisɔs ussi, Jisɔs oben abuwinnam pɛ abɛ, 44“Akɔm-m itɔng ku udɨg kwu nnɨmben bɛ nteg banga: Abɛ nama taga Unwa kwu Udwunɨng ake anang kɨmbɔg.” 45Abuwinnam akwɛ bɛ no ogwonga. Uduw bɛ kwɛ uduw fasɛ ɔnang bɛ ogwong. Ozor bɛ otse kwɛ abɛ ma abɔw-ɛ kwɛ.

46Ɔmakkara okwo otto bɛ ɔbanga ɔnang kwɔ ɔbar kidam. 47Jisɔs masɛ osong nttem ra abɛ, ɔtaga unwanwa obe ɔbanga ɛma oyen. 48Oben bɛ abɛ, “Ɔnang kwidede kwo ollow unwa nwama ke etse tsam, ka amma ollowa, ɔnang kwo ollow amma kɔ ɔnang kwɔ ɔtɔm-m ollowa. Ɔnang kwidede kwɔ ɔkar kidam maka banga, ɛma wɔ ɔbar kidan.”

49Jɔn oben Jisɔs abɛ, “Ɔvaar, amana anse ɔnang kwɛ unu utɨma etse tsɔ unu ukuw akpakpa pyuwa. Amana anyɔr mbɛ ankpa-ɛ eden ukwurabɛ mana nɔttara.” 50Jisɔs oben-ɛ abɛ, “Dag kɛ ka kpa, ukwurabɛ ɔnang kwidede kwɛ ona abanga nɔ ɔkwana, ɔttar ka abanga.”

Anang pa Sameriya afɨm Jisɔs

51Sɛ okpe akwɛ ko ofora kwu Ubɨnɔkpaabyi mɔ ɔtaga Jisɔs opfona kɛ ɛrang, ɛma odo ɛkpakpa ɔta Jɛrusɛlɛm. 52Ɔtɔm atɔmɔtɔm ban aba atseden aseng, aba ta seng ko ofon gwan kwu Sameriya fasɛ aba addo ekpo atsog pɛrɛ ɛma oyen owem. 53Anang po ofon ngwo abɛ kɛna allowa ukwurabɛ ɔnɔ ben abe ta Jɛrusɛlɛm. 54Okpe kwa abuwinnam pɛ, Jems ɔttara Jɔn abɛ ase kwɛ, aba bɔw Jisɔs abɛ, “Ɔvaar, amana jer ekpon ibɨna ga kɛ ɛrang ɛkkam bɛ?” 55Jisɔs ɔwag ɔkpɛm bɛ. 56Jisɔs ɔttara ka abuwinnam pɛ aba bɨna pfona ofon ɔdwag.

Ɔttɔg fɛ ma anang fasɛ abuw Jisɔs innam

57Sɛ abɛ na senga ma ke eden, ɔnang wan oben Jisɔs abɛ, “Amma mɨ mbuw-ɔ innam npfona kɔ ɔwang kwidede kwɛ ma ta.”

58Jisɔs oben-ɛ abɛ, “Akkenyang ɛkam appe, ɔnɔn okam mkpara, Unwa kwu Udwunɨng ɔwang kɔ kam kwe mu uyɨma ɔnana etso.”

59Oben ɔnang ɔdwag abɛ, “Buw-m innam.”

Ɔnang nwo abɛ, “Ɔvaar, tte mɔ ɔbɔg nta ti nɔnga otte kwam pɛrɛ.” 60Jisɔs oben-ɛ abɛ, “Tte ɔbɔg anang pɛ kappa aba annɔnga apfura pa abɛ, ɔma sɔng ta teg anang Ɛvaar tsu Ubɨnɔkpaabyi.” 61Ɔnang ɔdwag oben Jisɔs abɛ, “Ɔvaar amma mɨ mbuw-ɔ innam, tte mɔ ɔbɔg nta ti teg anang pam abɛ aba addo anɨnga, pɛrɛ.”

62Jisɔs oben-ɛ abɛ, “Ɔnang kwu unu utɨma nten ɔtsara iseg ki imɨn oshewa ki innam#9:62 Ɔttɔg pfa abɛ na atɨma atsara iseg pɛrɛ abɛ akpon ekpo ki imɨn. Abɛ na atɨma adamagbudu aba atwar pfɛ, Ɔnang ɔnɔ ɔvaga pfɛ fasɛ enem-onem. fɨnɔ ɔbana kɛ ɛvaar tsu Ubɨnɔkpaabyi.”

Nu geselecteerd:

Luk 9: mfn

Markering

Deel

Kopiëren