Neto'te 8
8
Noa tum ntùm kanu
1Nsi ko ndèn Noa boa njoṅ nyàm fa, nyàm nke'nke' tse boa Noa be ntùm sitima là. Nsi ghù mo' neta fetmbaṅ tshùa num nsitsha'a, ngù ntse kôgte. 2Ndùlala njoṅ tumnsi ntse fa tsin, ntôndà mi a kamànyam nà fùn, mbaṅ ke bèn nelo. 3Ntse nke mi num nsitsha' be nda'nda', nke nèn nke mbène; a be kum lé'njù bon tàn nkù ntse kôg. 4A be kum ntùm ṅwù sammbàa, mum lé'njù ntshob sammbàa gham, sitima Noa tsin num tu mbat Ararat. 5Ntse nke nkôg, nke mi, tà nkum num ṅwù gham. A be num mbwe lé'njù ntùm ṅwù gham, ntshùa mbat shùte tu tshob tù.
6Lé'njù ṅam nkuà be tshùa, Noa ghab tôndà sitima s'a na' nabte là, 7nkag mala, a nèn, mbe bèn njam ndù ntse jumte num nsitsha' fafa. 8Noa bèn nkag bwoṅtambia' neyen mbe ze ntse yà ke mi njoṅ dù' fa num nsitsha' là. 9Bwoṅtambia' tsho ke yen dù' nete nku mi bwe, mbèn njam mbaṅ Noa, mbaṅ sitima, nummbe ntse lo ke' njoṅ dù' fa num nsitsha'a. Noa tshag bu i ngom i, ndo' i mbèn yi mum sitima. 10A bèn mbéb tsemo' lé'njù sammbàa, mbèn ntum bwoṅtambia'. 11A be bèn njam mbaṅ i mfetnjù ndù a fét futù fi ntshu i. Ndùlala Noa lèn ndù ntse kôgte num njoṅ nsitsha' fa. 12A bèn mbéb lé'njù sammbàa, mbèn ntum bwoṅtambia', a tsho ke bèn nebèn njam mbaṅ i.
13A lo be be num mbwe lé'njù num mbwe maṅwù mba Noa tswe ntùm njù ngu'njù nkù ntôg ngù ta' ngu'njù ntshù' là, ntse jwimte num nsitsha'a. Noa bù' kabte sitima, ndôte njen ndù num nsitsha' jumte!
14A be num mbatte ṅwù bàa, mum lé'njù ntshob sammbàa ṅam mbàa mum ṅwù, tsha' miagte njume. 15Ndùlala Nsi tshob Noa ndù: 16Tum ntùm sitima, wù bin nzwi o, bon tsho tse bandum boa zwi bon tsho. 17Lo' njoṅ nyàm fa tse bin à bo be là ntum yi, boa njoṅ tshu neyôg fa: Nsaṅe, nyàm nke'nke'e, boa nyàm tse bo be nsoṅ bam sob nsi là. A bwô ndù bo sa num njoṅ nsitsha' fa, mbwe, mbèn njàm num njoṅ nsitsha' fa. 18Ndùlala Noa tum boa bon tse tse bandum, nzwi i boa zwi bon tse. 19Njoṅ nyàm fa, njoṅ nsaṅ fa, njoṅ nyàm fa tse bo be nsoṅ bam sob nsi là tum ntùm sitima, mba tsit lo num yub nzwit.
20Noa kut tômbwôg le'te Tshùaben. A lo' nyàm netèt tse nelàne, ndo' nsaṅ netèt mi nelàne, nton yub Tshùaben num tômbwôg le'te Nsi. 21Tshùaben fit ywèt tse, a bwô i, a tshob mum ntù i ndù: Me ke nsi zi bèn so ndon num tsha' a num mènntùn, nummbe nkwatenu ntù mènntùn b'a mi kebwô fe mônke'; me ke nsi bèn biagte njoṅ tshu fa tse me na' nabte mba me lo neghù là.
22Ngelaṅ neywit bo netsho'o,
ngelaṅ nyam bo ze mfùag,
dum bo sàne,
mbwôgtshù bo tèttswe' nsi ke be bwe,
mba num zit ngelaṅ no ze njù ke' là.
Nu geselecteerd:
Neto'te 8: BMa
Markering
Deel
Kopiëren
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fnl.png&w=128&q=75)
Wil je jouw markerkingen op al je apparaten opslaan? Meld je aan of log in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.