От Матфея 4

Туӷныӷа̄м Сыӷлыҳқыснақуткыхкаңа Иисус

1Та̄хкын Аглыӷналӷӣм Таӷныӷам аӷуляқутка̄ Иисус килга̄нун, Туӷныӷаӷмун сыӷлыҳқыснақуткысқылъюку. 240 аӷнық, 40 унук Иисус ныӷумаңилңуқ; та̄хкын та̄кут аӷныӷыт киңуңитның игатақақ. 3Та̄хкын Туӷныӷа̄м такулюку пика̄: «Кияӷныӷым Иӷнықңукаңатын, нықңуҳтысқики тама̄кут уйӷагыт».

4Иўырңа Иисусым пика̄:

«Акузитыт Игақыхкат пика̄гут:

“Ю̄к кияҳна̄нӷитуқ нықңинаҳаҳқун,

иўырңа кияҳсяҳқа̄гуқ тамаҳа̄кун Кияӷныӷым акузитаңакун”».

5Та̄хкын Туӷныӷа̄м Иисус агля̄тка̄ Иерусалимымун, Аглыӷналӷӣмун Ныҳлъягмун. Таўани Храмым ӯсқалъҳакун ныкывыслъюку 6пика̄: «Кияӷныӷым Иӷнықңукаңатын, қытхыӷи тысямавык; қаюҳлъяк Акузитыт Игақыхкат пика̄гут:

“Кияӷныӷымңуқ яқулыгминун пақнасиҳтысяҳтуҳлъықа̄тын;

ӣхмыхның нуқнықылъықа̄тын лю̄рақ итыгаҳтын уйӷаҳқӯнъаюката”».

7Иисусым пика̄: «Иўырңа Акузитыт Игақыхкат хўатынлъю пика̄гут:

“Атанық Кияӷныӷын нанӷӣқухпына̄н сясқылъюку лъңан пиюкылъқынӷилъкаңаның”».

8Та̄хкын Туӷныӷа̄м Иисус маю̄лъюку ӯсқапихлъыӷӣмун на̄йӷамун кылгуткӣ қамахтыңъўа̄ӷлюки атаныҳпагулъҳи нунам, пиниӷналъыҳлъягилъю. 9Ынка̄м пика̄: «Қамахтыңъўа̄ӷлюки ма̄кут тӯнылъықанка лъпынун, сыгысқуҳлъютын манигуӷьяқувңа».

10Та̄хкын Иисусым пика̄: «Туӷныӷақ, иқитын! Акузитыт Игақыхкат хўатын пика̄гут:

“Манигуӷьяҳқақан Атанық Кияӷныӷын, лъңина̄гуқлъю қыпҳа̄сяҳқан!”»

11Та̄хкын Туӷныӷа̄м унисягу Иисус, яқулгыт афлъыңаксяҳтуқа̄т.

Иисусым Пӣнлиқаңа Уңипақилъыни Галилеями

12Иисусым нагақуӷлюку Иоанн анусимиңлъяӷвигмынъилюку, Галилеямун утыӷниқақ. 13Назаретымың агляқақ Капернаумымун тама̄нъалюни. Капернаум ысныңанитуқ На̄йвам Галилеям, нунами Завулонылъю, Неффалимылъю киңунӷита кияҳфигитни. 14-15Иисусым таўатын пилъыӷмикун апыӷӣқа̄ ӯкналиқистым Исаиям ӯкналиқылъҳа. Қавңарухлъяк Исаиям ӯкналиқуткыхкақӣ югыт кияҳлъыҳӣт нунахкыни Завулонылъю, Неффалимылъю. Та̄кук нунак на̄йвам туңаңанилңӯк, налъяңани Кӣўым Иорданым, Галилеямылңуӷми язычнигыт кияҳфигитни! 16Исаиям пикақыхкаңи хўатын:

«Тама̄кут кияҳлъыҳӣт сыӷлыҳқылъҳым мамлыҳқыстылъҳани ысҳа̄сяҳқа̄гут ниӷухлъягмың.

Алиңылъҳита туқумың лъяңақа нунаңат ся̄пңалӷӣ таӷныӷаңутылъҳаның туқулъҳым.

Иўырңа ма̄тын аҳтаӷа̄тақӣ».

17Галилеямун утыӷнилъыӷминың кынлыклъюку Иисусым пӣнлиқа̄ уңипақилъыни: «Авутыҳқылъюси сыӷлыҳқынъаниҳтык, қаюҳлъяк Атаныҳпагулъҳа Қилягым ка̄сяҳтӯма̄қ».

Иисусым Тахсиқаңи Стамат Иқалъинӣҳтыт

18Иисусым иглыӷуткылъюку ысныңани На̄йвам Галилеям, ысҳақакык аңлыгуткулъҳӣк, Симонынкуңуфтук (а̄тҳан а̄лъҳа Петр), Андрейемлъю. Иқалъинӣлӷӣк ныгаҳпахтын милю̄тақлъюку на̄йвамун. 19Та̄хкын Иисусым пикақӣ: «Малихтыңъа, апыҳтуҳлъықамси иқалъинӣҳтыңуҳтысқылъюси югнуң». 20Таўаниңинақ ныгаҳпатың унилъюки малихтыка̄т.

21Та̄ганиқа̄ӷақ ысҳақақит аңлыгуткулъҳӣк, Иаковым, Иоанным иӷныӷык Зеведейем. Аңьямыхни атакулъҳӣт ныгаҳпатың иля̄ҳтуӷақыфтӣт. Иисусым туқлъюқакык. 22Таўаниңинақ аңьяҳтык унитка̄к атайыклъю ынка̄м Иисус малихтыка̄к.

Иисус Апыҳтуӷилӷӣлъю, На̄лъҳуқулӷӣлъю

23Иисус иглыӷакақ тамаңи Галилеями, синагогаңитни апыҳтуӷӣқлъюни. Нани алңунак уңипақақ Пинилӷӣның Уңипа̄мың Атаныҳпагулъҳым, на̄лъҳуқуқақ тамаҳа̄ның ақниӷныӷныңлъю, қинуюгныңлъю. 24Уңипақ миңитка̄лӷӣ на̄лъҳуқулъҳа тамаҳа̄ни Сириями. Ынка̄м югыт тагитка̄т лъңанун қамахлъютың қинуюлӷӣт, алъяҳӣна̄ӷның ақниӷнылгыт, икфиқңалӷӣт, туӷныӷалгыт, сяюхпахтақаюгыт, унӣқатлъю. Қамахлъюки Иисусым на̄лъҳуткӣ. 25Угля̄пихлъыҳӣми малихтыка̄т Галилеямың, Десятиградиямың, Иерусалимымың, Иудеямың ынка̄м Иорданымлъю иңлюңаның та̄хкын.

Nu geselecteerd:

От Матфея 4: ess2

Markering

Deel

Kopiëren