uMataayi 22
22
Ishiholanyo isha mulyo uwa winga
(uLuuka 14:15-24)
1UYeesu ahajendeelela kuyanga havhili na vhapiti avha vhapuuti na Vhafalisaayi ku viholanyo ivwamwavho ahati, 2“Uvhumwene uvhwa Mulungu vhuholiine nu mwene wumo we ámusenganiziinye umwana waakwe umulyo uwa winga. 3Umwene uyo ahavhasonteelezya avhavhomvi vhaakwe kuvhiita avhantu vhe ávhalanjiiye kuuti vhinze ku winga, ileelo avheene vhahahaana kwinza.
4“Pe ahavhasonteelezya havhili avhavhomvi avhamwavho ahati, ‘Musogole muvhavhuuzye vhaala vhe naavhalanjiiye muti, “Nsengiinye ivintu vwonti ivwa winga. Mbooye inkambaku ni ngida zyane inyinza. Mwinze ku winga!”’ 5Ileelo avheene vhatahasaajila. Vhahasogola ku mbombo zyavho, wumo ahasogola ku mugunda waakwe, uwamwavho ahasogola ku mbombo yaakwe iya kutaanania. 6Vhamo vhahavhalema avhavhomvi ivho, vhahavhahoma nkaani nu kuvhagoga. 7Lwe umwene ayiivwa zye zyávhombesile ku vhavhomvi vhaakwe, ahaviitwa nkaani. Ahavhasonteelezya avhasikaali vhaakwe, vhahavhagoga avhagozi ivho nu kuyipemba inkaaya yaavho. 8Pe umwene ahavhavhuuzya avhavhomvi vhaakwe avhamwavho ahati, ‘Ivintu ivwa winga nsengiinye, ileelo vhe naavhalanjiiye vhatahondeeye kwinza. 9Ishi musogole mu madala amalehaana, muvhavhuuzye vhonti vhe mukuhomaana navho kuuti vhinze ku winga.’ 10Pe avhavhomvi ivho vhahasogola mu madala amalehaana. Vhahavhavhungaaniha vhonti vhe vhávhaazile, avhavhiivhi na vhagolosu. Pe avhajeni vhahiizula mu nyumba iya winga.
11“Ileelo lwe umwene ayinjila mu nyumba, inga ayeenye avhajeni, ahamulola wumo atazwaye ishizwalo she shikwanzilwa pa winga. 12Pe ahamuvhuziilizya ahati, ‘We mumanyani, uyinjiiye vhuli umu ishisita kuzwala ishizwalo she shikwanzilwa pa winga?’ Ileelo uweene ahapuuma mwaa. 13Pe umwene ahavhavhuuzya avhavhomvi vhaakwe ahati, ‘Mukunji umuntu uno ivinama ni nyoovhe, mumusumbe kunzi ku shiisi, ukwo kwe vhalikuutaga nu kuyimba nkaani.’ 14Nkuyanga vhwevhulo, mwe pe uMulungu akuvhiita avhantu avhinji kwinjila mu vhumwene vhwakwe, ileelo vhe vhakusaavhulwa kwinjila vhansi.”
Kusonka umusonko kwa Kayisaali
(uMaaliko 12:13-17; uLuuka 20:20-26)
15Pe aVhafalisaayi vhaheepa paala, vhahavhungaana kupanzanya vwe vhamuteje uYeesu ku mazwi gaakwe. 16Pe vhahavhasonteelezya avhasundikwa vhaavho na vhatuuli avha mwene uHeelodi#22:16 Avhatuuli avha mwene uHeelodi yáali mpuga iya Vhayuuda ye yihavwaga uvhumwene uvhwa Shiluumi, havhili vháali vhamanyani nu mwene uHeelodi uAntipa. Avhantu ivha vhatáali vhamanyani na Vhafalisaayi, ileelo vhívwine ku nongwa iya kumugoga uYeesu. kwa Yeesu, vhahamuvhuziilizya vhahati, “We Musambiilizi, tumanyile kuuti iwe we mugolosu, ukusambiilizya idala ilya Mulungu mu vhwanalyoli. Havhili utakuvhasaajila avhantu kulandatana nu vhupiti vhwavho. 17Ishi tuvhuuzye vwe ukulola, vhuli, indajizyo izya Moose zikutwitishila kusonka umusonko kwa Kayisaali?#22:17 UKayisaali: Vhaazya mu Ntantiho izya Mazwi aMajeni.” 18Ileelo uYeesu, mwe pe ámanyile insiivho zyavho imbiivhi, ahati, “Mwe vhashifumbo, shooni she mukuntega? 19Ndanji insavhaazya ye mukusonchela umusonko.” Vhahamuleetela idinaali yooka. 20Pe uYeesu ahavhavhuziilizya ahati, “Ishiholanyo ishi nu vhusimbe vhwe vhuli pa nsavhaazya ino vwa naanu?” 21Vhahamwamula vhahati, “Vwa Kayisaali.” Pe uYeesu ahavhavhuuzya ahati, “Ishi ivwa Kayisaali mumupanje uKayisaali, vwope ivwa Mulungu mumupanje uMulungu.” 22Lwe vhiivwa kwamula kwakwe, vhahasukumila nkaani. Pe vhahamuleha nu kwepa.
Kuzyuha ukwa vhafwe
(uMaaliko 12:18-27; uLuuka 20:27-40)
23Isiku lyeliila, aVhasadukaayi vhamo vhahasogola kwa Yeesu. AVhasadukaayi vhahasambilizyaga kuuti, avhafwe te vhahazyushe. Pe vhahavhuziilizya vhahati, 24“We Musambiilizi, uMoose átusimbiiye indajizyo kuuti inga umwanaavuli aafwa, amuleha umushi waakwe ishisita umwana, yikwanzilwa kuuti umunine waakwe amupwane umuziishe uyo, inga amupaapile avhaana umuyazi.#22:24 iNkumbushizyo izya Ndajizyo 25:5-6 25Ishi, ahavhaliilizyo hamo kwáli avhanaavuli 7 vhe vháamile uyise wooka. Uwa kwanda ahanyatula umwantanda, ileelo ahafwa, atahaleha umwana, pe uwa vhuvhili ahamupwana umuziishe uyo. 26Ileelo woope ahafwa ishisita kuleha umwana. Pisinda, uwa vhutatu woope ahamupwana, ileelo woope ahafwa. Yihavha shiniisho ku vhonti 7. 27Pisinda, umwantanda uyo woope ahafwa. 28Ishi inga kuzyuha ukwa vhafwe kuliipo, isiku ilya kuzyuha umwantanda uyo aliivha mushi wa naanu? Tukuvhuziilizya isho, mwe pe átendiime na vhonti 7.”
29UYeesu ahavhaamula ahati, “Mupuvile nkaani, mwe pe mutavhumanyile uVhusimbe uVhufinjile na maha aga Mulungu. 30Avhafwe lwe vhazyuha, te vhahiimale, poosye kwimalwa, vhaliivha inza avhahavhizya ku mwanya. 31Ileelo izya kuzyuha avhafwe, mutavhaziizye mu Vhusimbe uVhufinjile izwi lye uMulungu áyanzile kuuti, 32‘Ine ne Mulungu uwa Aabulahamu nu Yisaaka nu Yaakobu’?#22:32 Kufuma 3:6 Uweene te wu Mulungu uwa vhafwe, wu Mulungu uwa vhalanzi.#22:32 Uweene te wu Mulungu uwa vhafwe, wu Mulungu uwa vhalanzi: Amazwi igo kwe kuuti uAabulahamu nu Yisaaka nu Yaakobu vhali she vhalanzi, vhakulandila pooka nu Mulungu ku mwanya.” 33Lwe ivhungaana ilya vhantu vhiivwa izyo, vhahasukumila nkaani insambiilizyo zyakwe.
Ululajizyo ulupiti kuluusya izinji zyonti
(uMaaliko 12:28-34; uLuuka 10:25-28)
34Lwe aVhafalisaayi vhiivwa kuuti uYeesu avhapoota aVhasadukaayi ku mazwi, vhahavhungaana pooka nu kusogola kwa Yeesu. 35Wumo mu Vhafalisaayi ivho we áamile musambiilizi uwa ndajizyo, ahamuvhuziilizya uYeesu kumutega ahati, 36“We Musambiilizi, mu ndajizyo zyonti, lulajizyo vhuli lwe lupiti kuluusya indajizyo izinji zyonti?” 37UYeesu ahamwamula ahati, “Umukundaje uMWENE uMulungu waaho ku mwoyo waaho wonti, na ku vhulanzi vhwaho vhwonti na ku njeele zyaho zyonti.#22:37 iNkumbushizyo izya Ndajizyo 6:5 38Ululajizyo ulu lwe lupiti kuluusya izinji zyonti, havhili lwe lwa kwanda. 39Ululajizyo ulwa vhuvhili luholiine nu lwa kwanda, lukuti, ‘Umukundaje umupalamani waaho inza vwe ukuyikunda weneewe.’#22:39 aVhalaawi 19:18 40Indajizyo zyonti izya Moose pooka ni nsambiilizyo izya vhakuvhwi zili mu ndajizyo izi zivhili.”
UChilisiti Mwana wa Daavhudi
(uMaaliko 12:35-37; uLuuka 20:41-44)
41Lwe aVhafalisaayi vhaala vhali she vhavhungiine pooka, uYeesu ahavhavhuziilizya ahati, 42“Mukusiivha vhuli izya Chilisiti? Amwe Mwana wa naanu?” Vhahamwamula vhahati, “Mwana wa mwene uDaavhudi.” 43UYeesu ahavhavhuziilizya ahati, “Inga vwe zili, zili vhuli uDaavhudi lwe akulongolwa nu Mupepo, akumwita uChilisiti kuuti wu Mwene? Nkuvhavhuziilizya vhwevhulo, mwe pe umwene uDaavhudi átili,
44‘UMWENE uMulungu ámuvhuziizye uMwene waane átili,
“Tendaama ku luvhazu lwane ulwa kundiilo
pa vhushindamu uvhupiti nkaani,
kufishila pe navhavhiiha avhalugu vhaaho
pansi pa vinama vwaho.”’#22:44 iZabuuli 110:1
45Inga uDaavhudi wuuyo átili uChilisiti wu Mwene waakwe, pe woope uChilisiti angavha mwana waakwe inza vhuli?” 46Umuntu nuumo atahasheela kumwamula. Havhili, kufuma ahavhaliilizyo iho, atáliipo umuntu we ásheleeye kumuvhuziilizya uYeesu zimo.
Nu geselecteerd:
uMataayi 22: nih
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2021 Wycliffe Bible Translators, Inc.
