uMataayi 13
13
Ishiholanyo isha mupesa mbeyu
(uMaaliko 4:1-9; uLuuka 8:4-8)
1Isiku lyeliila, uYeesu ahafuma mu nyumba yiila, ahasogola ahatendama pa luvhazu pa sumbi. 2Ivhungaana ipiti ilya vhantu lihinza pe uYeesu áamile, pe uweene ahalimbila mwi ivhooti nu kutendama muumwo. Avhantu ivho vhahasyala vhimiliiye pa luvhazu pa sumbi. 3Pe uYeesu ahavhavhuuzya amazwi aminji ku viholanyo. Ishiholanyo shimo ahati, “Umulimi wumo ásogooye kupesa imbeyu zyakwe. 4Lwe akupesa, imbeyu zimo zihagwila pa luvhazu pi idala, inyunyi zihinza, zihalya. 5Izyamwavho zihagwila pi iyalaawe, pe patáamile intope inyinji. Izyene zihamela naluvhiilo, mwe pe patáamile intope inyinji. 6Ileelo lwe ahasanya haalama, imbeyu izyo zihafwoha nu kwuma, mwe pe amazi gaakwe gatíisile pansi nkaani. 7Izyamwavho zihagwila pahati pa mimvwa, lwe amimvwa igo gaakula, gahazibuda. 8Izyamwavho zihagwila pa nsi inyinza. Pe lwe zyela, zimo zihapaapa amantonongwa 100, izyamwavho 60, izyamwavho zihapaapa amantonongwa 30.” 9Havhili ahati, “We ali na makutwi, atejeelezye!”
Insiivho izya Yeesu kusambiilizya ku viholanyo
(uMaaliko 4:10-12; uLuuka 8:9-10)
10Avhasundikwa avha Yeesu vhahinza, vhahamuvhuziilizya vhahati, “Shooni she ukuyanga na vhantu ku viholanyo?” 11Uweene ahavhaamula ahati, “Imwe uMulungu avhapiiye kuzimanya izya kukwilu izya vhumwene vhwakwe. Ileelo avheene atavhapiiye kuzimanya zyonti izyo. 12Nkuyanga vhwevhulo, mwe pe umuntu wonti we azimanyile hansi inongwa izya vhumwene uvhwa Mulungu, uMulungu aliimupa kuzimanya nkaani. Ileelo umuntu we atazimanyile, uMulungu aliyeefwa poosye kumanya kwakwe ukunsi kwe ali nakwo. 13Ye nongwa nkuyanga navho ku viholanyo, mwe pe vhakwenya zye nkuvhomba, ileelo vhatakuzilola, havhili vhakutejeelezya zye nkuyanga ileelo vhatakwivwa, poosye kumanyinsanya. 14Izi zikuvhombwa ku kwavho, inga vhulunjishe uvhukuvhwi vhwe uYisaayi áyanzile kuuti,
‘Nalyoli muliyivwaga, ileelo te muhamanyinsanyaaje.
Havhili nalyoli muliyenyaaga, ileelo te muhazisinkamizyaje.
15Avhantu ivha amooyo gaavho magomu,
na makutwi gaavho gatakwivwa,
na minso gaavho vhasinziliiye.
Inga te she shiyo, aminso gaavho, nkandi gakulola,
na makutwi gaavho, nkandi gakwivwa,
havhili, nkandi vhakumanyinsanya ku nsiivho zyavho,
pe vhapindushe inga mbaposhe.’#13:14-15 uYisaayi 6:9-10”
16UYeesu ahati, “Mulosiitwe imwe, mwe pe aminso giinyu gakulola na makutwi giinyu gakwivwa. 17Nalyoli nkuvhavhuuzya kuuti, vháliipo avhakuvhwi avhinji na vhantu avhinji avhagolosu vhe vhányonyiilwe kuzilola zye mukuzilola imwe, ileelo vhatázivhwenyi. Havhili vhahanzaga kuzyivwa zye mukuzyivwa imwe, ileelo vhatázyivuuye.”
UYeesu akulondovhola ishiholanyo isha mupesa mbeyu
(uMaaliko 4:13-20; uLuuka 8:11-15)
18“Ishi pe mutejeelezye inongwa izya shiholanyo isha mulimi we ahapesaga imbeyu. 19Umuntu wonti we akulitejeelezya izwi ilya vhumwene uvhwa Mulungu ileelo atakulimanyinsanya, pe uMuvhiivhi ula#13:19 UMuvhiivhi ula kwe kuuti uSeetano. akwinza nu kulisompola lye uMulungu alivhwaye mu mwoyo waakwe. Umuntu uyo akuholana ni mbeyu ye yágwiliiye pa luvhazu pi idala. 20Imbeyu zye zyágwiliiye pansi pi iyalaawe shiholanyo isha vhantu vhe vhakwivwa izwi ilya Mulungu nu kuliposheela naluvhiilo ku luseshelo. 21Ileelo, mwe pe amazi muhati yaakwe gatiisile pansi nkaani, izwi ilyo likutendama ku havhaliilizyo hansi vhweleele. Amayimba poosye amalavha inga gamwaga kuzya izwi ilya Mulungu, naluvhiilo akulileha. 22Imbeyu zye zyágwiliiye mu mimvwa, shiholanyo isha vhantu vhaala vhe vhakwivwa izwi ilya Mulungu, ileelo pisinda mu vhulanzi vhwavho, vhakulemwa na maganigani nu kutepushila mu vhudumbwe na mu nyinza izya mu nsi. Izyo zikuliviganya izwi ilyo nu kulivhiiha kuuti lipootwe kupaapa. 23Imbeyu zye zyágwiliiye pa nsi inyinza, shiholanyo isha vhantu vhe vhakulitejeelezya izwi nu kulimanyinsanya. Avhantu ivho vhe vhamo vhakupaapa amantonongwa 100, avhamwavho 60 na vhamwavho vhakupaapa amantonongwa 30.”
Ishiholanyo isha ndezye mu ngana
24UYeesu ahavhavhuuzya ishiholanyo ishamwavho ahati, “Uvhumwene uvhwa Mulungu vhuholiine nu muntu we ápesile imbeyu inyinza mu mugunda waakwe. 25Ileelo lwe avhantu vhonti vhakaasite, umulugu waakwe ahinza kupesa indezye mu ngana, pisinda aheepa. 26Lwe ingana yaamela nu kwanda kufumwa amatwe, indezye zyope zihamela. 27Pe avhavhomvi avha muhaata mugunda vhahinza kumuvhuziilizya kuuti, ‘We mwene, wápesile imbeyu inyinza mu mugunda waaho. Ishi indezye zyafuma kwoshi?’ 28Ahavhaamula ahati, ‘Umulugu we avhomvile izyo.’ Avhavhomvi vhaakwe vhahamuvhuziilizya vhahati, ‘Vhuli, ukwanza tusogole tusaagule?’ 29Ahati, ‘Ndaali, lwe mukusaagula indezye, mungasagulila pooka ni ngana. 30Muleshe vwonti vikule pooka, kufishila ahavhaliilizyo aha kuvuna. Ahavhaliilizyo iho, ndivhavhuuzya vhe vhakuvuna kuuti vhalundishe suuti indezye nu kuzipinya zivhe nsunzo, inga vhazipembe. Ileelo ingana vhayilundishe nu kuyisengula mu shanga shaane.’”
Ishiholanyo isha mbeyu iya haladaali
(uMaaliko 4:30-32; uLuuka 13:18-19)
31UYeesu ahavhavhuuzya ishiholanyo ishamwavho ahati, “Uvhumwene uvhwa Mulungu vhuholiine ni mbeyu iya haladaali, ye umuntu ányatuuye nu kuvhwala mu mugunda waakwe. 32Ileelo poosye she nyinsi kuluusya imbeyu zyonti, yikukula kuluusya amakwi gonti aga mu shilimbika, ni nyunyi zikutenjela mu nsamba zyakwe.”
Ishiholanyo isha mulembo uwa kuluzizya
(uLuuka 13:20-21)
33UYeesu ahayanga ishiholanyo ishamwavho ahati, “Uvhumwene uvhwa Mulungu vhuholiine nu mulembo uwa kuluzizya we umwantanda wumo áwunyatuuye nu kuwusangaanya nu vhusu uvhwa ngana ivitundu vitatu. Lwe aahanya, umunya wonti wuhalula.”
Insiivho izya Yeesu kusambiilizya ku viholanyo
(uMaaliko 4:33-34)
34Zyonti izyo uYeesu ahagavhuzyaga amavhungaana aga vhantu ku viholanyo. Atahavhavhuzyaga naashimo ishisita ishiholanyo. 35Izyo zyávhombesile, inga lilunjishe izwi lye umukuvhwi áyanzile átili,
“Ndiyanga na vhantu kwi idala ilya viholanyo.
Ndivhavhuuzya zye zyázyihiime
kufuma ku vhwandilo uvhwa nsi.”#13:35 iZabuuli 78:2
UYeesu akulondovhola ishiholanyo isha ndezye
36Pe uYeesu ahalilaga ivhungaana ilya vhantu, ahinjila mu nyumba. Avhasundikwa vhaakwe vhahinza, vhahayanga vhahati, “Tulondovholele ishiholanyo isha ndezye zye zyámile mu mugunda.”
37UYeesu ahavhaamula ahati, “Umuntu we ávhwaye imbeyu inyinza neene ne Mwana wa Aadamu. 38Umugunda ula, insi, imbeyu inyinza, vhaana vha vhumwene uvhwa Mulungu, ni ndezye, vhaana vha Muvhiivhi ula. 39Umulugu we ávhwaye indezye, wu mukwalanzi. Kuvuna, lisiku ilya kumpeleela ilya vhulonzi uvhwa nsi. Vhe vhakuvuna vhe vhahavhizya. 40Inza vwe indezye zikusaagulwa nu kupembwa mu mwoto, vwe ziliivha ku vhusililishilo uvhwa nsi. 41Ne Mwana wa Aadamu ndivhatumiilizya avhahavhizya vhaane, inga vhavhavhungaanishe nu kuvhafumwa mu vhumwene vhwane, avhantu vhonti vhe vhakuvhapuvwa avhamwavho na vhasambusu. 42Avhahavhizya ivho vhalivhasumba avhantu ivho mwi ipalaazya ilya mwoto, umwo vhalikuutaga nu kuyimba nkaani. 43Ileelo ahavhaliilizyo iho avhagolosu vhalilamaga mu vhumwene uvhwa Taata waavho ngati lizuvha. We ali na makutwi, atejeelezye!”
Ishiholanyo isha vintu ivwa nsavho
44“Uvhumwene uvhwa Mulungu vhuholiine ni shintu isha nsavho she shizyisiilwe mu mugunda. Lwe umuntu wumo ashaaga, ahashizyiha havhili munuumwo. Pe ku luseshelo, ahasogola kukazya ivintu vwonti vwe áamile navwo, ahawukala umugunda uwo.
45“Havhili, uvhumwene uvhwa Mulungu vhuholiine nu muntu wumo we akutaanania, we ásogooye kulondola ivhwe ilya nsavho. 46Lwe alyaga ivhwe ilya nsavho impiti nkaani, ahasogola kukazya ivintu vwonti vwe áamile navwo, ahinza ahalikala.”
Ishiholanyo isha lwelo
47“Havhili, uvhumwene uvhwa Mulungu vhuholiine nu lwelo lwe vhátezile mwa sumbi. Ulwelo ulwo luhalema inswi izya mavhiila mu mavhiila. 48Lwe ulwelo ulwo lwizula, vhahalukwesela kunzi kwa sumbi. Pe vhahatendama pansi nu kusevha inswi inyinza nu kuzivhiiha mu viseje, ileelo inswi imbiivhi vhahazisumba. 49Vwe ziliivha ku vhusililishilo uvhwa nsi. Avhahavhizya vhaliyinza nu kuvhasavhulanya avhatalamalandu kufuma mu vhagolosu. 50Avhahavhizya ivho vhalivhasumba avhatalamalandu mwi ipalaazya ilya mwoto, umwo vhalikuutaga nu kuyimba nkaani.”
UYeesu akusambiilizya impwa ni nkaali
51UYeesu ahavhavhuziilizya avhasundikwa vhaakwe ahati, “Vhuli, mwazimanyinsanya zyonti izi zye navhavhuuzya?” Vhahamwamula vhahati, “Twazimanyinsanya.” 52Pe woope ahavhaamula ahati, “Umusambiilizi uwa ndajizyo izya Moose we musundikwa mu vhumwene uvhwa Mulungu, akuvha inza umuhaata nyumba we akufumwa ivintu ivipwa ni vikaali mu nkoma yaakwe.”
Vhakumuhaana uYeesu ku mwavho
(uMaaliko 6:1-6; uLuuka 4:16-30)
53Lwe uYeesu aamala kuyanga iviholanyo ivwo, aheepa paala. 54Lwe aafiha mu nkaaya iya ku mwavho, ahataliha kuvhasambiilizya avhantu mwi isinagoogi lyavho. Avhantu ivho vhahasukumila nu kuvhuzilizanya kuuti, “Umuntu uno avhwazile kwoshi uvhushindamu uvhwa njeele na maha aga kuvhomba amafindango iga? 55Uno te mwana wa selemaala? Unyina te wu Maliiya? Havhili avhanine vhaakwe te vhe vha Yaakobu nu Yoosefu nu Siimoni nu Yuuda? 56Vhuli, avhanine avhalindu vhataliipo pa mwitu panaapa? Ishi azyaga kwoshi zyonti izi?” 57Vhahaviitwa nkaani nu kuhaana kumwitiha. Ileelo uYeesu ahavhavhuuzya ahati, “Umukuvhwi akushindikwa ukunji kwonti, ileelo ku mwavho, na ku vhantu avha mu nyumba yaakwe atakushindikwa.” 58UYeesu atávhomvile amafindango aminji ukwo, mwe pe avhantu ivho vhatámwitisile.
Nu geselecteerd:
uMataayi 13: nih
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2021 Wycliffe Bible Translators, Inc.
