uMataayi 12
12
UYeesu wu Mwene uwa Sabaato
(uMaaliko 2:23-28; uLuuka 6:1-5)
1Isiku limo ilya Sabaato,#12:1 ISabaato: Vhaazya mu Ntantiho izya Mazwi aMajeni. uYeesu na vhasundikwa vhaakwe vhahatuuhaga mu magunda aga ngana. Avhasundikwa vhaakwe inzala yihavhaluma, pe vhahanda kuvwanula amatwe aga ngana nu kulya. 2Lwe aVhafalisaayi vhazilola izyo, vhahayanga vhahati, “Yeenya, avhasundikwa vhaaho vhakuvhomba zye indajizyo izya Moose zitakwitishila kuvhomba pi isiku ilya Sabaato!#12:2 Zye indajizyo izya Moose zitakwitishila kuvhomba pi isiku ilya Sabaato: Indajizyo izya Vhayuuda zihavhitishilaga avhantu kuvwanula nu kulya amantonongwa kufuma mu magunda aga vhantu avhanji, lwe vhakutuuha mu magunda gaavho. Vhaazya iNkumbushizyo izya Ndajizyo 23:25. AVhafalisaayi vhahasukumilaga, mwe pe avhasundikwa avha Yeesu vhávhomvile imbombo iyo pi isiku ilya Sabaato lye lyáli lya kutuuzya, havhili lye umuntu nuumo atahitishilwaga kuvhomba imbombo. Vhaazya Kufuma 20:8-11; 34:21; iNkumbushizyo izya Ndajizyo 5:12-15.”
3UYeesu ahavhaamula ahati, “Mutahavhaazya mu Vhusimbe uVhufinjile vwe uDaavhudi ávhomvile lwe inzala yamuluma pooka na vhamwavho? 4Áyinjiiye mwi Iheema ilya Mulungu nu kunyatula amakaati ge gáamile mafinjile. Indajizyo izya Moose zitahitishilaga avhantu avhanji kulya amakaati igo, nkandi vhe vhapuuti vheeka. Ileelo uDaavhudi ahalya, ahaavhapa na vhamwavho. 5Vhuli, mutahavhaazya mu ndajizyo izya Moose kuuti avhapuuti vhakuvhomba imbombo mu Nyumba iMfinjile pi isiku ilya Sabaato, ileelo uMulungu atakuvhavhaazya kuuti vhakuvhomba havhiivhi? 6Nkuvhavhuuzya imwe kuuti, ipa ndiipo ne mupiti kuluusya iNyumba iMfinjile. 7Inga mwaavhumanyile uVhusimbe uVhufinjile vhwe vhukuti, ‘Nkwanza uvhwila kuluusya kufumwa impuutile,’#12:7 uHoosiya 6:6 nkandi mutakuvhalonga avhantu vhe vhatananzile naashimo. 8Nkuyanga vhwevhulo, mwe pe ne Mwana wa Aadamu indi na maha ni Sabaato.”
UYeesu akumuponia umuntu isiku ilya Sabaato
(uMaaliko 3:1-6; uLuuka 6:6-11)
9Pe uYeesu aheepa paala, ahinjila mwi isinagoogi lyavho. 10Umwo mwáli umuntu wumo we inyoovhe yaakwe yáhataliiye. Havhili mwáli aVhafalisaayi vhe vhahalondolaga idala ilya kumulonjeelela uYeesu. Pe vhahamuvhuziilizya vhahati, “Vhuli, indajizyo izya Moose zikwitishila kumuponia umuntu isiku ilya Sabaato?”
11UYeesu ahavhaamula ahati, “Wu naanu muli imwe we inga ingʼonzi yaakwe yooka yagwila mu shilivha isiku ilya Sabaato, atangayilema nu kuyifumwa? 12Umuntu wa nsavho nkaani kuluusya ingʼonzi! Pe ishi, indajizyo izya Moose zikwitishila kuvhomba inyinza isiku ilya Sabaato.”
13Pe uYeesu ahamuvhuuzya umuntu ula ahati, “Golosya inyoovhe yaaho.” Woope ahagolosya, yoope yihapona nu kuvha inza iyamwavho. 14Ileelo aVhafalisaayi vhaala vhahafuma panzi nu kupanzanya vwe vhamugoje uYeesu.
Umuvhomvi we asavhuliilwe nu Mulungu
15Lwe uYeesu aamanya kuuti aVhafalisaayi vhakupanzanya izya kumugoga, aheepa paala. Pe avhantu ivhungaana ipiti vhahamulandata, woope ahavhaponia vhonti vhe vháamile na mavhinu. 16Ileelo ahavhasoha kuuti vhatamumanyisyaje ku vhantu. 17UYeesu ávhomvile vhwevhulo, inga zilunjishe zye umukuvhwi uYisaayi áyanzile kuuti,
18“Yeenya, uno muvhomvi waane we musavhuuye,
uNkundwa waane we umwoyo waane wukuhondezelwa nawo.
Ndiimupa uMupepo waane,
woope alikumusya uvhwanalyoli ku vhe te Vhayuuda.
19Ataliyuumana na vhantu, poosye kuzuma ahalanga,
havhili umuntu naawumo ataliyiivwa izwi lyakwe mu madala.
20Te ahaavhe muhali ku vhayeyevhazu
inza vwe atangalivunza itete ilyolo.
Havhili te ahaavhe muhali ku vhe vhatali nu wa kuvhaavwa
inza vwe atangavhuzimanya uvhutambi
vhwe vhukusuuha ilyosi.
Kumpeleela alivhuvhiiha uvhwanalyoli vhupoote.
21Havhili, vhe te Vhayuuda vhalilisuuvhila izina lyakwe.”#12:18-21 uYisaayi 42:1-4
UYeesu ali na maha kuluusya amaha aga Belizabuuli
(uMaaliko 3:20-30; uLuuka 11:14-23)
22Pe avhantu vhamo vhahamuleeta uwa mpepo inkandamanu kwa Yeesu. Impepo iyo yámuvhiisile umuntu uyo kuvha wu ntonko nu kuvha wu shinuunu. Pe uYeesu ahamuponia umuntu uyo, woope ahataliha kuyanga nu kulola. 23Ivhungaana ilya vhantu lihasukumila nu kuyanga kuuti, “Vhuli, uno te Mwana wa mwene uDaavhudi?” 24Ileelo lwe aVhafalisaayi vhiivwa izyo, vhahayanga vhahati, “Umuntu uno akushimbizya impepo inkandamanu ku maha aga Belizabuuli,#12:24 Belizabuuli lizina ilyamwavho ilya Seetano we mupiti uwa mpepo inkandamanu. Izina ili lyáfumiliine ni izina ilya Baali-Zebuubu. Izina ilyo lizina ilya mpepo yimo ye insi impalamani na Vhaisilayeeli vhahayipuutaga fwe wu mulungu waavho. umupiti uwa mpepo inkandamanu!”
25Lwe uYeesu aamanya insiivho zyavho, ahavhavhuuzya ahati, “Inga avhantu avha vhumwene vhwoka vhakulwa, uvhumwene uvhwo vhukunanjiha. Vhoope avhantu avha mu nkaaya yooka, poosye avha mu nyumba yooka inga vhanda kulwa vhuuvho vheeka, inkaaya ni nyumba iyo vilinanjiha. 26Woope uSeetano inga akumushimbizya uSeetano, uvhumwene vhwakwe vhukunanjiha. Pe ishi, uvhumwene vhwakwe vhungajendeelela vhuli? 27Ishi, inga ine nkushimbizya impepo inkandamanu ku maha aga Belizabuuli, pe avhasundikwa vhiinyu vhakushimbizya ku maha aga naanu? Kuli izyo, avhasundikwa vhiinyu vhe kwe vhalolesye kuuti zye mukusiivha te zya nalyoli. 28Ileelo ine inga nkushimbizya impepo inkandamanu ku maha aga Mupepo uwa Mulungu, pe uvhumwene uvhwa Mulungu vhwinzile kuli imwe. 29Wu naanu we anginjila mu nyumba iya muntu uwa maha nu kupumula ivintu vwakwe ishisita kumukunga suuti? Ileelo inga amukunga suuti umuntu uwa maha uyo, pe angapumula vwe vili mu nyumba yaakwe.
30“Umuntu wonti we atali uluvhazu lwane, mulugu waane. Havhili, we atakuvhavhungaaniha avhantu pooka niine, uyo akuvhasasaanya. 31Ishi nkuvhavhuuzya kuuti, uvhutalamalandu vhwonti nu musaamu wonti avhantu vhaliswilwa. Ileelo we akumusaamula uMupepo uMufinjile, te ahaswilwe. 32Havhili, inga umuntu anjanjila amazwi amavhiivhi ine ne Mwana wa Aadamu, aliswilwa. Ileelo inga amuyanjila amazwi amavhiivhi uMupepo uMufinjile, te ahaswilwe ahavhaliilizyo iha, poosye he hakwinza.”
Ikwi likumanyiha ku mantonongwa gaakwe
(uLuuka 6:43-45)
33“Muvhwalaje ikwi ilyinza, goope amantonongwa gaakwe gakuvha minza. Muvhwalaje ikwi ivhiivhi, goope amantonongwa gaakwe gakuvha mavhiivhi. Ikwi likumanyiha vwe lili kufumiilana na mantonongwa gaakwe. 34Mwe vhaana vha njoha imwe! Mungayanga vhuli amazwi aminza she mwe vhavhiivhi? Nkuvhavhuuzya isho, mwe pe umuntu akuyanga zye zyizuuye mu mwoyo waakwe. 35Umuntu umwinza akuyanga nu kuvhomba inyinza, zye zikufuma mu mwoyo waakwe umwinza. Woope umuntu umuvhiivhi akuyanga nu kuvhomba imbiivhi, zye zikufuma mu mwoyo waakwe umuvhiivhi. 36Ishi nkuvhavhuuzya kuuti, amazwi gonti aga shaaha ge avhantu vhakuyanga, vhaligalondovhola isiku ilya vhulonzi. 37Yeenya, ku mazwi gaaho ulivhaazilwa kuuti we mugolosu, havhili ku mazwi gaaho ulilongwa kuuti we munanzi.”
AVhafalisaayi na vhasambiilizi vhakwanza ishilolesyo
(uMaaliko 8:11-12; uLuuka 11:29-32)
38Pe avhasambiilizi avha ndajizyo izya Moose na Vhafalisaayi vhamo vhahamuvhuuzya uYeesu vhahati, “We Musambiilizi, tukwanza uvhombe ishilolesyo isha kuhomeshezya kuuti ufumile kwa Mulungu.” 39UYeesu ahavhaamula ahati, “Avhantu avha havhaliilizyo iha vhavhiivhi, havhili vhavhembu! Vhakwanza ishilolesyo, ileelo te mbalolesye ishilolesyo naashimo, nkandi sheshiila isha mukuvhwi uYoona. 40Nkuyanga vhwevhulo, mwe pe inza vwe uYoona átendiime insiku zitatu mu lwanda ulwa nswi impiti#12:40 uYoona 1:17 uvhusiku nu musanya, niine ne Mwana wa Aadamu kwe ntendame mu mbiipa insiku zitatu uvhusiku nu musanya. 41Isiku ilya vhulonzi, avhantu avha mu Nineewe vhaliyimiilila kuvhalonga imwe mwe vhantu avha havhaliilizyo iha, kuuti mwe vhavhiivhi. Vhalivhalonga, mwe pe lwe uYoona akumusya izwi ilya Mulungu ku mwavho, vhátonsite imbiivhi zyavho. Ileelo ipa ndiipo ne mupiti kuluusya uYoona! 42Havhili isiku ilya vhulonzi, woope usamwene uwa ku Sheeba aliyimiilila nu kuvhalonga imwe mwe vhantu avha havhaliilizyo iha. Alivhalonga kuuti mwe vhavhiivhi, mwe pe uweene áshuuye kufuma mu nsi iya kutali, ahinza kutejeelezya amazwi aga vhushindamu uvhwa njeele uvhwa mwene uSolomooni. Ileelo ipa ndiipo ne mupiti kuluusya uSolomooni!”
Kugaluha ukwa mpepo inkandamanu
(uLuuka 11:24-26)
43UYeesu ahajendeelela kuyanga, ahati, “Lwe impepo inkandamanu yaafuma mwa muntu, yikutuuha pe patali aminzi, lwe yikulondola apa kutuuzya, ileelo yitakupaaga. 44Pe yikuti, ‘Kwe ngalushe mu nyumba yaane ye naafumile.’ Inga yaafiha, nu kumulola umuntu uyo ali ngati nyumba ye yitali naashimo, ye vhuusile nu kuyiyemvwa ahinza, 45pe yikusogola kuzileeta impepo izyamwavho 7 zye nkandamanu kuluusya iyeene. Impepo zyonti izyo zikwinjila mwa muntu uyo, nu kutendama munuumwo. Pe umuntu uyo akuvha havhiivhi nkaani kuluusya ku vhwandilo. Vhwevhulo, vwe ziliivha na ku vhantu avhavhiivhi avha havhaliilizyo iha.”
Unyina na vhanine avha Yeesu
(uMaaliko 3:31-35; uLuuka 8:19-21)
46Lwe uYeesu akuyanga ni ivhungaana ilya vhantu, unyina na vhanine vhaakwe vhahinza nu kwimiilila panzi, vhahanzaga kuyanga nawo. 47Pe umuntu wumo ahamuvhuuzya ahati, “Umaayi waaho na vhanine vhaaho vhimiliiye panzi, vhakukulondola, vhakwanza kuyanga niiwe.”#12:47 IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na hansi aha 47. 48Ileelo uYeesu ahamwamula ahati, “Umaayi waane na vhanine vhaane vhe vha naanu?” 49Pe ahavhasonta avhasundikwa vhaakwe ahati, “Yeenya, ivha vhe vhamaayi vhaane na vhanine vhaane! 50Umuntu wonti we akuvhomba zye uTaata waane uwa ku mwanya akwanza, uyo we munine waane, havhili we wu maayi waane.”
Nu geselecteerd:
uMataayi 12: nih
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2021 Wycliffe Bible Translators, Inc.
