Matayo 4
4
1Numa Yesu kakurikwa mMumuyo wa Iṛuva bateń, amu andeelelyo-fo nSatana. 2Ili andemaa-fo mikonu makumi aani kio na nsanyiń kitaare akomba nta shoonga, kawarwa nsoto. 3Nreya ulya kanshea kamwia: Kwakooya kukee Mwana wa Iṛuva, vavasa mawe va ave shoonga. 4Kamwaṛua kamwia: Nkitisiṛe: Nndu amakii iwara muu na shoonga yo sheni ndi, kake awaraa muu na kirero kyoose kyukie kaniń ka Iṛuva. 5Numa Satana kankurika muṛiń nsongori kamwaṛutya mmbewu alya uṛoṛo lwa numba ya Iṛuva. 6Kamwia: Kwakooya kukee Mwana wa Iṛuva kutuule na si boto. Amu nkitisiṛe: Akuvavasyaa vamalaika vamwi, nawo vakwambilyaa na maako awo, amu urende lwafo lutakabwa ni iwe. 7Yesu kamwia: Nkitisiṛe lingi: Manya kutaelelye Nndumi Iṛuva wafo. 8Satana kankurika lingi uroń waasha nnu kamworusa ngyumangi toose ta isangeń na ngyunuru tayo kamwia: 9Ifi foose mfikuniingaa, kwakooya kufwiṛyaa nri si kushińinise. 10Yesu kamwia: Shuuka Satana! Amu nkitisiṛe: Kuńinise Nndumi Iṛuva wafo na inkusura ye muni. 11Llyo Satana alakana nae. Na vamalaika vakanshea vakandundia.
12Ili Yesu andeita sheeli Yohane akee kifingyoń, kakwimboo kaenda kulya Galilaya. 13Kasama kulya Nasareti kaenda kandekaa kulya Kaperinaumu muṛiń ukee mbaai ya nruva miyanuń ya Sabulon na Nafutali. 14Naamu kifike kilya kyeenrerwaa mmwauya kisuku Yesaya eenumbuaa: 15Iwe uruka lwa Sabulon na lwa Nafutali kukee mbaai ya nruva, kukee kwa kulya ya Yoridane, kukee Galilaya ya vayavaṛumu, 16vandu vakee llemiń vallolia langa nini na valya vakee kiṛishweń kyuu kya ufu langa yammulika kwa ule yawo. 17Kuuka kyeeri kyo llyo Yesu abooka ikwanisa eenumbuaa: Ilashikeń mirimiń yanu, amu umangi lwa Iṛuva lwansha kufui. 18Neeli Yesu eeṛuaṛuaa kulya mbaai ya nruva ya Galilaya, kalolia vana va nka umwi vavili, nSimon eevaangwaa Petiro na Anderea mwanamae. Nawo veekee yolota mireyo yawo nruveń. Amu veekee vareya makunga. 19Nae kavaia: Shisoṛeń! Nań mmwaṛuaa vareya vandu. 20Na lia eni vakatia-wo mireyo yawo vakansoṛa. 21Neeli andeenda na mbele, kalolia lingi vana va nka umwi vavili, ni Yakobo wa Sebedayo na Yohane mwanamae. Nawo veekee ngalaveń andu emwi na nde yawo Sebedayo veesongosyaa mireyo yawo. Nae kavavaanga. 22Nawo vakatia ngalava ilya na nde yawo vakallatia. 23Nae kava akee ilengetya kulya Galilaya koose eeloshaa ifo numba tawo ta iterevya na yongoya vandu mboni ya ifura ya umangi lwa Iṛuva na ikiṛa saka toose na utanyari lukee miviliń ya vandu. 24Na nduma wamwi tikakwana kulya Siria koose. Vakamwendee vandu valole saka ta mikae miingi ta ivavisa nnu na valya veeworwaa mmimuyo mikasha na vasukwa na va saka ta meengo. Nae kavakiṛa. 25Kalatyo mmakanika meengi a vandu vauka Galilaya na kulya muungoń wa miri ikumi na Yerusalemu na Yudaya na kwa kulya ya Yoridane.
Nu geselecteerd:
Matayo 4: RWK72
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
