Taruparea̧ Ma̧ȩ 7
7
Chara ana̧rä yu̧a̧tä yo̧rëremȩde Ütë tjamo̧ judi
1Ja̧dëa ji̧ Jeova judi yo̧rëremȩdejȩ Noe ju̧i̧:
—Danȩ, chara ana̧rä yu̧a̧vä. Na̧ pumȩ pio judiro̧borë yu̧a̧tädirȩ. Ado o judiro̧borë yu̧a̧tärea̧ ji̧, cjäri̧ madirȩ, jiada maeadirȩ. Pio mȩnȩmo̧rȩ coëma cjiari̧ cjo̧ro̧renȩ. Ja̧di tara chara ana̧rä yu̧a̧tä earequedemȩ na̧ pumȩ pio ji̧ri̧ nö̧ta —yo̧a̧dejȩ—. 2Ado danȩ, chirirä cjo̧ro̧ji̧ri̧ nö̧tarë, goe gu̧rori̧ yürüdëpea̧ pio judiro̧ peaja̧di yu̧a̧ tänȩpea̧dirȩ cja̧rȩmȩrȩ iei̧ra̧ jadü. Aja̧, pio mȩa nö̧ta yu̧a̧ tänȩpea̧dirȩ. Toyae üdë, böa üdë, chjido üdë, ariguri üdë, chjö̧na̧i̧ti̧rȩ yu̧a̧ tänȩpea̧dirȩ cja̧rȩmȩrȩ iei̧ra̧ jadü. Jabo pio coaiäpȩmo̧ goe gu̧rori̧ yürüpea̧ pio judiro̧, mȩnȩro̧ jurapea̧ pio judiro̧, jabechji̧ ca̧i̧ta̧ra̧ ichiri yo̧a̧ri̧rȩ yu̧a̧ tänȩpea̧ maeadirȩ iei̧ra̧ jadü. 3Peaja̧di pua nö̧tarë yu̧a̧tädirȩ iei̧ra̧ jadü. Ca̧i̧ta̧ra̧ ichiri yo̧a̧ri̧ jadürë yu̧a̧ tänȩpea̧dirȩ iei̧ra̧ jadü. Aja̧, ja̧di dari̧ yu̧a̧ tänȩtä earequedemȩ. Pio mȩa nö̧ta yu̧a̧tädirȩ judiro̧ ado chjereno̧ goë jeji̧ra̧pe järea̧ dapea̧ oa chiri üdë ado gapea̧rä —yo̧a̧dejȩ—. 4Ado danȩ, ca̧i̧ta̧ra̧ ichiri yo̧a̧ri̧ do chjätä ëte, jabechji̧ ui ana̧ oa chjadüpareconȩ chiri oa. Cjü tänȩpareconȩ 40 do nö̧ta. Do yoa, gȩrȩ yoa cjü tänȩparequede cjüdëpe järea̧ decjiari̧. Cüdë pareapea̧ oa cjo̧ro̧ji̧ri̧ chjö̧na̧i̧därä oa goarijä tänȩparequedejȩrȩ cjiadiädëri̧ —yo̧mȩrȩ ma̧ȩ yürürëremȩdejȩ Noe ju̧i̧ Ütë tjamo̧ judi. 5Ado Jeova judi yo̧a̧mi̧ nö̧tadäräri̧ ta̧rë ta̧rë japarëremȩde Noe judi jiadarea̧ decjiari̧.
6Ado Noe judi 600 ui goarëremȩde Ütë tjamo̧ judi ui ana̧ oa chjadürërea̧ ji̧, chiri nö̧tai̧ oa ui mape bagarërea̧ ji̧. 7Jabo jabë cjüdërä, jabechji̧ chjadëri̧ yu̧a̧rëremȩde Noe judi chararä. Jibëa̧ iei̧borë, jibëa̧ u̧ri̧borë, jibëa̧ u̧ri̧ ja̧ iviborë yu̧a̧rëremȩde. Aja̧, ui ana̧rä jemu̧i̧ ja̧bochea oa yu̧a̧rëreji̧ri̧dirȩ. 8-9Ado goe gu̧rori̧ yürüpea̧ judiro̧, goe gu̧rori̧ yürüdëpea̧ pio judiro̧borë yu̧a̧ maeadirȩ peaja̧di Noe pio ju̧i̧ nö̧ta. Pua nö̧tarë, coë jäji̧ri̧ nö̧tarë, chirirä cjo̧ro̧ji̧ri̧ nö̧tarë iei̧ra̧ jadü yu̧a̧ maeadirȩ chara ana̧räpȩ. Aja̧, Ütë tjamo̧ judi yo̧a̧mi̧ yu̧a̧ maeadirȩ. 10Jabo ja̧dëa ji̧ ca̧i̧ta̧ra̧ ichiri yo̧a̧ri̧ do chjätä ëte, dëdë, ui ana̧ oa chjadürëremȩde Ütë tjamo̧ judi. Chiri nö̧ta oa cjücjürü tjamo̧pe bagari̧ ui ana̧ oa chjadürëremȩdejȩ.
11Aja̧, Noe judi 600 ui goamȩpea̧ uirä, yo̧a̧ri gupënȩrȩ chjätäa̧rä, ado 16 do chjätä ëte ui ana̧ oa chjadürëremȩde Ütë tjamo̧ judi. Pio jiro doro dabu ëteri pio judiri uëräpȩmo̧ acji cjitë tänȩrëremȩdejȩ ui oa urëdi tjamo̧ri pio judiri. Ma̧i̧ dari̧ cjitë tänȩrëremȩdejȩ ae chja̧de ae chja̧de cjiarea̧mi̧ dari̧. Ado a̧dë iri pio judiribo gu̧ro tänȩrëremȩdejȩ ui oa. Aja̧, a̧dë i uëmo̧ bararemȩ ui pio ju̧i̧ a̧dë chjäte ma̧i̧ dari̧ gu̧ro tänȩrëremȩdejȩ chjä ma cjiari̧. 12Aja̧, 40 do nö̧ta cjürëremȩdejȩ davä chiri nö̧tai̧ oa. Do yoa, gȩnȩ yoa cjürëremȩde, cjüdëpe järea̧ decjiari̧.
13Ado pio jiro domȩ ju̧i̧iä, jabërä yu̧a̧rëremȩde Noe judi chararä jibëa̧ iei̧ pio ji̧ nö̧ta, jibëa̧ u̧ri̧ pio ji̧ri̧ nö̧ta. Tjamo̧ davä. Noe judi, jibëa̧ u̧ri̧ judiro̧borë yu̧a̧rëreji̧ri̧dirȩ. Chȩ judi, Ca̧ judi, Japje judi chjadëri̧ yu̧a̧ maeadirȩ. Ado Noe ja̧ iei̧ pio jini̧borë, Noe ja̧ u̧ri̧ ja̧ ivi pio jini̧ro̧borë chjadëri̧ yu̧a̧ maeani̧rȩ peaja̧di pio jiro domȩ ju̧i̧iä, ui ana̧ üdë jabë tarupadëa̧rä. 14Peaja̧di yu̧a̧rëreji̧ri̧dirȩ chirirä cjo̧ro̧ji̧ri̧ judiro̧ nö̧tadärärë. Toyae üdë, böa üdë, chjido üdë, ariguri üdë yu̧a̧ maeadirȩ iei̧ra̧ jadü, chirirä cjo̧ro̧ji̧ri̧ chjö̧na̧i̧rȩ. Ado pumȩ judiro̧ goa̧ üdë peaja̧di yu̧a̧dirȩ nö̧tarë. Baca üdë, chivo üdë, oveja üdë yu̧a̧ maeadirȩ iei̧ra̧ jadü yo̧a̧ri̧rȩ. Ado coë jäji̧ri̧ pio judiro̧ nö̧tarë peaja̧di yu̧a̧rëreji̧ri̧dirȩ. Aja̧, ipurimȩchja üdë, jo̧dëcjara üdë, datutumi̧ üdë, iei̧ra̧ jadü yu̧a̧ maeadirȩ. Puaborë nö̧tarë yu̧a̧ maeadirȩ peaja̧di iei̧ra̧ jadü. 15Jabechji̧ Noe pio ju̧i̧iäpȩ jäji̧ri̧rȩ pio ju̧i̧ nö̧ta yu̧a̧rëreji̧ri̧dirȩ chara ana̧ oa. Iei̧ra̧ jadü maearë, yo̧a̧ri̧ maearë yu̧a̧rëreji̧ri̧dirȩ cjo̧ro̧rea̧ chiaji̧ri̧ pio judiro̧ chjö̧na̧i̧rȩ. 16Ado judiro̧ yu̧a̧rërea̧ ji̧, yu̧a̧ji̧ri̧ pio judiro̧ chararä yu̧a̧rërea̧ ji̧, iei̧ra̧ jadü yu̧a̧rërea̧ ji̧, jabechji̧ Ütë tjamo̧ ja̧ ma̧ȩrä yu̧a̧ marëreji̧ri̧dirȩ. Aja̧, pio judi tänȩa̧ oa yu̧a̧ marëreji̧ri̧dirȩ. Ado ja̧dëa ji̧ ütëborë chjadëri̧ yu̧a̧däräa̧rä, pumȩ pio judiro̧borë chjadëri̧ yu̧a̧däräa̧rä, jabechji̧ Jeova pio judi chjuari̧ tuti cararëremȩdejȩ joë ya oa.
17Ado Ütë tjamo̧ judi ui ana̧ oa chjadürërea̧ ji̧, 40 do nö̧ta ma̧i̧ dari̧ japarëremȩde, ui üdë jämi̧rȩ cjitëmȩrȩ, ae chja̧de ae chja̧de cjiamȩrȩ. Ado ja̧dëa ji̧ cjücjürü tjamo̧pe bagamȩrȩ chia buarëremȩdejȩ chara ana̧ oa chirirä charea̧mi̧dëri̧. 18Jabechji̧ uëräpȩmo̧ chia buarea̧mi̧ dari̧ cjücjürü tjamo̧pe bagarëremȩde ui üdë. 19Ado japamitë ana̧ri̧ cjüea̧ oaiä, jabechji̧ a̧dë chjäte cjürürüpe bagarëremȩde. Jabechji̧ ya̧mi̧ uë tjamo̧ oa, chjö̧na̧i̧därä oa buadärärëremȩde ui üdë. Cja̧rȩmȩ ya̧mi̧rȩ dairä cjiadiädëri̧ buadärärëremȩde. 20Tjamo̧ davä. Ui ëteräpȩ cjiadiäa̧ri̧ buadärärëremȩdejȩ ya̧mi̧ chjö̧na̧i̧ oa. Ca̧i̧ta̧ra̧ ichiri yo̧a̧ri̧ metro chiari̧ buadärärëremȩdejȩ. 21Ado daburo cjo̧ro̧ji̧ri̧ pio judiro̧ chjö̧na̧i̧däräti̧rȩ, cjäri̧ madirȩ, jemu̧i̧ ja̧boa̧ marëreji̧ri̧dirȩ, cja̧rȩmȩrȩ cjiadiädëri̧. Tjamo̧ davä. Pumȩ judiro̧, pua üdë, pumȩrȩ goa̧ üdë, daburo cjo̧ro̧mȩ üdë chjö̧na̧i̧rȩ ja̧boa̧ maeadirȩ. 22Ado chiriräpȩ cjo̧ro̧ji̧ri̧ pio judiro̧, jȩoaji̧ri̧ pio judiro̧ peaja̧di ja̧boa̧ maeadirȩ chjö̧na̧i̧ti̧rȩ. 23Aja̧, ja̧di dari̧ japamȩrȩ ja̧bo tänȩrëremȩdejȩrȩ Ütë tjamo̧ judi chirirä cjo̧ro̧ji̧ri̧ chjö̧na̧i̧däräti̧ oa. Pumȩ ji̧ri̧ chjö̧na̧i̧däräti̧ oa, pua chjö̧na̧i̧ oa, coë jäji̧ri̧ chjö̧na̧i̧ oa ja̧bo tänȩ marëremȩdejȩrȩ chiriräpȩ cjo̧ro̧ji̧ri̧ pio ji̧ri̧. Noe pio judimo̧rȩ cjiadiärëremȩde jibëa̧ pumȩborë. Chara ana̧räpȩji̧ri̧ pio judiro̧mo̧rȩ cjiadiärëreji̧ri̧dirȩ. Pio judiro̧mo̧rȩ chjätärea̧ darëreji̧ri̧dirȩ.
24Ado cjücjürü tjamo̧pe bagarëremȩ ui üdë, jabechji̧ jo̧ȩra̧pe gape jädë marëremȩa̧de. Jabo japamitë chjätä ëte, 150 do chjätä ëte, cja̧rȩichimo̧ gupënȩ chjätä ëte, jabechji̧ taruparëremȩde gaüpe jäpea̧ ji̧.
Nu geselecteerd:
Taruparea̧ Ma̧ȩ 7: Pume
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
©2021 Global Partners, All Rights Reserved
