Taruparea̧ Ma̧ȩ 4
4
Cai̧ judi ja̧bo tänȩrëremȩdejȩ ja̧ omȩ oa, Abe pio ju̧i̧
1Ado Ada̧ judi ëba mo̧a̧rëremȩdejȩ jibëa̧ iei̧ i̧a̧, Eva pio ji̧. Ado boma̧i̧yi̧pea̧nȩ. Ja̧dëa̧ ji̧ japamitë chjätä ëte ararëreyi̧nȩjȩ üi̧ boi̧ oa. Ado üi̧ boi̧ oa ara ëte, "Aja̧, Jeova judi coa yürüa̧ oa üi̧ boi̧ oa ëbayi̧pea̧requede yaba̧. Ado pio ju̧i̧iä Cai̧ yo̧mȩ quȩra̧ quȩpajareconȩ" yo̧rëreyi̧nȩ Eva jini̧ ara̧ duri oa. 2Ji̧dë duri oa japamitë chjätä ëte Eva jini̧ ado cja̧rȩmo̧ oa ararëreyi̧nȩjȩ. Cai̧ ja̧ joji̧ri̧ja oa ara̧nȩjȩ. Ado Abe yo̧mȩ quȩra̧ quȩparëreyi̧nȩjȩ. Ado Abe judi ütëpa ëte oveja jidamȩpea̧de. Ado Cai̧ judi, jojadi pio judi, tjadoro ja̧bepamȩpea̧de.
3Ja̧dëa̧ ji̧ Cai̧ judi japamitë chjätä ëte yürürëremȩdejȩ Jeova pio ju̧i̧iäpȩmo̧. ‘Aja̧, cüdë ja̧bepea̧rä ja̧ oa, tjadoro ja̧bepea̧ ba oa yürütäremȩcuni̧da’ quëna̧ jo̧rȩtamȩrȩ yürütarëremȩdejȩ Jeova pio ju̧i̧iäpȩmo̧. 4Ado Abe judi peaja̧di yürürëremȩdejȩ jënȩ ja̧bepea̧rä ja̧ oa, jënȩ jida̧rä ja̧ oa. Aja̧, oveja mitë ëte, pëi̧ chja oa, yabo ara̧ oa, chjadë tjamo̧ oa mitë ëte, goe gu̧rori̧ cäë yürürëremȩdejȩ. Oveja go̧a̧ chja oa, yo̧ chiamȩ go̧a̧ oa yürüa̧dejȩ Jeova pio ju̧i̧iäpȩmo̧. Ado Jeova judi pio ju̧i̧ daea̧rä, ‘jabechji̧dica̧da' quëna̧ jo̧rȩtamȩrȩ darëremȩdejȩ Abe ju̧i̧iäpȩmo̧. Jabechji̧ jënȩ yürüa̧ üdë, ‘peaja̧di jabechji̧dida' quëna̧mȩrȩ darëremȩdejȩ.
5Jabo Jeova judi Cai̧ pio ju̧i̧iäpȩmo̧ ja̧di dari̧ jo̧rȩtamȩrȩ dadëa̧dejȩ. 'Jabechji̧dida' quëna̧mȩrȩ' dadëa̧. Jabechji̧ jënȩ yürütea̧ pio ju̧i̧iäpȩmo̧ daea̧rä, 'jabechji̧dida' quëna̧ dadëa̧dejȩ. Ja̧di tara Cai̧ judi da ga̧ri̧rȩ ërecjiapea̧de, ma̧ cjüëtüri̧ jo̧rȩtamȩrȩ. 6Ja̧dëa̧ ji̧ Jeova judi yo̧rëremȩdejȩ Cai̧ ju̧i̧iäpȩmo̧:
—¿Jabo tjana̧ japatä ma̧ cjüëtüri̧ jo̧rȩtarenȩ? Da ga̧ri̧ cjiamȩ oa darequedemȩ. 7Jabo danȩ, mȩnȩ chjadëri̧ japarä judi, ‘jabechji̧dida’ quëna̧ jo̧rȩtamȩrȩ daparequedemȩ. Tjamo̧ davä. Mȩnȩ chjadëri̧ japarä judi, ca̧ ma̧ȩ oa chjadëri̧ ta̧rë ta̧rë japarä judi, ‘jabechji̧dida’ quëna̧ jo̧rȩtamȩrȩ daparequedemȩ. Jabo na̧e chiavä. Mȩnȩ chjai̧dëri̧ japarä judi, chjai̧dë pio judi boë jäpadimȩ. Pa̧rȩmȩrȩ japarëmi̧ cjiari̧ boadäräpadimȩ. Jabo tjamo̧ri̧ na̧e chiavä. Ca̧ ma̧ȩ pio ju̧i̧ ta̧rë ta̧rë japavä mȩnȩ chjai̧dë pio ju̧i̧ chjadëri̧ boadärärea̧ dapea̧ oa —yo̧mȩrȩ yo̧rëremȩdejȩ Ütë tjamo̧ judi Cai̧ pio ju̧i̧iäpȩmo̧.
8Ja̧dëa̧ ji̧ ji̧dë duri oa Cai̧ judi yo̧a̧dejȩ joji̧ri̧ja pio ju̧i̧iäpȩmo̧:
—Goë jaeibe. Chiriräpȩ ta̧i̧tärȩ —yo̧a̧dejȩ.
Ja̧dëa̧ ji̧ judiro̧ pumȩ decjiamȩräpȩmo̧ go̧düdäräa̧ ji̧, Cai̧ judi chjaodëri̧ acji bagurarëremȩdejȩ ja̧ omȩ oa, Abe pio ju̧i̧. Ado ja̧bo tänȩrëremȩdejȩ ëba tai̧mȩ oa. 9Ja̧dëa̧ ji̧ Jeova judi iëno̧ë ta̧rëa̧dejȩ Cai̧ ju̧i̧:
—¿Yoaiäpȩde na̧ ayi̧ma̧i̧ judi?
Ado Cai̧ judi dëbë yo̧a̧dejȩ:
—Dabadëde. Pio ju̧i̧ jidamȩrȩ cjo̧ro̧ ma ja̧didë —yo̧mȩrȩ dëbë yo̧a̧dejȩ.
10Ado ja̧dëa̧ ji̧ Ütë tjamo̧ judi iëno̧ë ta̧rëa̧dejȩ:
—¿Tjana̧ japea̧ ji̧ chjai̧dëri̧ japea̧renȩ? Gitori̧ jo̧rȩtamȩrȩ dareconȩ na̧ omȩ ja̧ goe oa. 'Aja̧, ja̧ omȩ oa chjai̧dëri̧ japea̧diji̧da, jibëa̧ goe oa gu̧ro tänȩa̧diji̧da' quëna̧ jo̧rȩtamȩrȩ dareconȩ. Ado yaba̧ jabechji̧, mȩnȩ na̧ omȩ ja̧ goe oa gu̧ro tänȩa̧ oaiä, cüdë daburo a̧rȩmȩ oa daea̧ oaiä, ‘jabechji̧ bapë yürüpacuni̧da' quëna̧ jo̧rȩtamȩrȩ yo̧requedemȩ. 11Aja̧, mȩnȩ ja̧di dari̧ japea̧ tara, jabechji̧ chjai̧dëri̧ cjiadiäparenȩ. Danȩ, na̧ omȩ ja̧ goe pio ju̧i̧ gu̧ro tänȩa̧renȩ. Ado pio jiro goe üdë yu̧i̧a̧dejȩ dabu oa. Ado pio ju̧i̧iä dabu oa ja̧beparea̧mi̧dëpea̧renȩ yaba̧. Jabechji̧ dabu oa ja̧beparea̧mi̧dëri̧ chjätäti̧ cjia tänȩparequedemȩ. 12Mȩnȩ na̧ tjado oa ja̧bepë tararä judi, cjäri̧ madimȩ, na̧ jurarea̧ oa chjadëri̧ yürüdëpadimȩ. Jabechji̧ dabu üdë na̧ omȩ ja̧ goe oa yu̧i̧a̧ oa cjia oaiä, chjadëri̧ yürüdëpadimȩ. Ado tjado oa chjadëri̧ ja̧beparea̧mi̧dëri̧ chjätäti̧ cjia tänȩparequedemȩ cja̧rȩmȩrämo̧ cjo̧ro̧diä bagadëri̧ —yo̧mȩrȩ yo̧rëremȩdejȩ Cai̧ pio ju̧i̧iäpȩmo̧ Jeova judi.
13Ja̧dëa̧ ji̧ Cai̧ judi pio ju̧i̧ ta̧rëa̧ oaiä, dëbë yo̧a̧dejȩ Jeova pio ju̧i̧iäpȩmo̧:
—Jabo cjäri̧ marenȩque, a̧dë chjäte ma̧i̧ dari̧ japarenȩque. Cjo̧ro̧rea̧mi̧dëri̧ japarenȩque. 14Jabechji̧ pio yoa dabu oa ja̧bepatärea̧ ji̧, aeno̧a̧ oa cjiami̧ dari̧ cjiadiäa̧requede yaba̧. Jabechji̧ mȩnȩ yo̧a̧mi̧ pio yoa chiri oa a̧dë baäpea̧ chiareconȩ yaba̧. Pio mȩa nö̧ta ori̧ bagari̧ ëba cjiarea̧mi̧dëri̧ chiri nö̧tai̧ oa chjätäti̧ cjiapea̧ chiarequede. Ado pio ju̧i̧iä eami̧rȩ pio coa ja̧bo tänȩrea̧ tararä judi, jabechji̧ chjaodëri̧ ja̧bo tänȩrea̧ dapadique. Ado pio ju̧i̧iä yo̧requedemȩ Jeova, jabechji̧ a̧dë chjäte ma̧i̧ dari̧ japarenȩque —yo̧mȩrȩ yo̧rëremȩdejȩ Cai̧ judi Ütë tjamo̧ pio ju̧i̧iäpȩmo̧, gito ana̧ri̧ jo̧rȩtamȩrȩ.
15Jabo Jeova judi dëbë yo̧rëremȩdejȩ:
—Danȩ, eami̧rȩ pio mȩa ja̧bo tänȩrä judi, jabechji̧ ana̧ tjamo̧ri̧ bape chjaopareconȩ. Danȩ, pio mȩa bape chjaorequedemȩ davä na̧ omȩ pio ju̧i̧ ja̧bo tänȩa̧ ba oa. Jabo danȩ, eami̧ pumȩrȩ pio mȩa ja̧bo tänȩa̧ ba oa ji̧dë u̧i̧ ana̧ri̧ bape chjaopareconȩ. Jabechji̧ cüdë mȩa cja̧rȩmȩmi̧ dara̧ bape chjaoa̧ ji̧, jabechji̧ ji̧ra̧ tjamo̧ra̧ bape chjaopareconȩ davä pio mȩa ja̧bo tänȩpamȩ pio ju̧i̧. Aja̧, ca̧i̧ta̧ra̧ ichiri yo̧a̧ri̧mi̧ dara̧ bape chjaopareconȩ ji̧ra̧ tjamo̧ra̧ —yo̧a̧dejȩ Ütë tjamo̧ judi.
Ja̧dëa̧ ji̧ Jeova judi go̧ȩ yürürëremȩdejȩ Cai̧ ju̧i̧ jibëa̧ irä ju̧ri̧. Aja̧, jibëa̧ irä yürüa̧dejȩ eami̧rȩ ja̧bo tänȩtäremȩ pio judi ja̧bo tänȩchea oa. 16Ja̧dëa ji̧ Cai̧ judi baärëremȩde. Jeova pio ju̧i̧ nöta ori̧ bagari̧ ëba cjiarea̧mi̧dëri̧ baärëremȩde. Node quȩmȩ chiriräpȩ baäa̧de, Edȩ quȩmȩ tjado yaboräpȩmo̧, dorë cjitëmȩräpȩmo̧.
Ca̧i̧ pio judiri ja̧ ji̧ri̧ pio ji̧ri̧ chjiari go̧ȩparëremȩde Moiche judi
17Ado Cai̧ judi ëba mo̧a̧rëremȩdejȩ jibëa̧ iei̧ ji̧. Ado boma̧i̧yi̧rȩ cjo̧ro̧yi̧pea̧nȩ. Ado japamitë chjätä ëte, üi̧ boi̧ oa ararëreyi̧nȩjȩ Eno̧ quȩmȩ oa. Ado pio jiro japamitërä Cai̧ judi cji̧därëremȩdejȩ bë ma̧ri̧ oa. Joja ja̧ quȩra̧ pio ju̧ri̧ra̧ quȩparëremȩdejȩ jënȩ cji̧däa̧ bë ma̧ri̧ oa. Aja̧, Eno̧ ja̧ quȩra̧ pio ju̧ri̧ra̧ quȩpea̧dejȩ. 18Ado Eno̧ quȩmȩ pio judi ütëpa ëte nö̧rirëremȩdejȩ joja oa. Ado Irade quȩpea̧dejȩ. Ado Irade pio judi ütëpa ëte, peaja̧di nö̧rirëremȩdejȩ joja oa. Mejuyae quȩpea̧dejȩ. Ado Mejuyae pio judi ütëpa ëte, peaja̧di nö̧rirëremȩdejȩ jibëa̧ ja oa. Ado Metuchae quȩra̧ quȩpea̧dejȩ. Ado Metuchae quȩmȩ pio judi ütëpa ëte, peaja̧di nö̧rirëremȩdejȩ joja oa. Ado Dameque quȩra̧ pio ju̧ri̧ra̧ quȩparëremȩdejȩ. 19Ado Dameque pio judi ütëpa ëte, yo̧a̧ri̧ ivi ji̧ri̧ ëbamȩpea̧de. Ada quȩyi̧ ji̧, ado Chira quȩyi̧ ji̧ ëbamȩpea̧dejȩrȩ yo̧a̧ri̧ oa. 20Ado ëba mo̧a̧ oaiä bomai cjiadiärëreyi̧nȩ Ada jini̧. Ado japamitë chjätä ëte, ararëreyi̧nȩjȩ jibëa̧ ja oa. Ado Jaba quȩpea̧diro̧jo̧ȩ. Ado Jaba judi ütëpa ëte, tjaoëpai̧ dari̧ cjo̧ro̧mȩpea̧de. Jibëa̧ ütëti̧ judiro̧ baca oa goadërërea̧ ji̧, oveja oa goadërërea̧ ji̧, jabechji̧ goamȩpea̧de. Ado ira̧ japea̧ oa cjiamȩ bë oa decjiarërea̧ ji̧, jabechji̧ Jaba pio ju̧i̧iä taruparëremȩde pio jiro bërä cjo̧ro̧pea̧ ji̧. Pio ju̧i̧iä jabechji̧, ja̧di dari̧ cjo̧ro̧ji̧ri̧pea̧dirȩ pio judiri ja̧ji̧ri̧ judiro̧. 21Ado Jaba judi jibëa̧ omȩ oa ëbarëremȩdejȩ Juba quȩmȩ oa. Ado Juba pio judi carecare guarea̧ pio ju̧i̧ jëdano̧mȩpea̧de ea cjiari̧ pjurarea̧ pio ju̧i̧bo. Aja̧, Juba pio ju̧i̧iä taruparëremȩde carecare guarea̧ oa jëdano̧pea̧ ji̧. Pio ju̧i̧iä tarupea̧de ea cjiari̧ pjurarea̧ oa japapea̧ ji̧. Ado ea cjiari̧ pjurarea̧ decjiarërea̧ ji̧, goaeri̧ guarea̧ decjiarërea̧ ji̧, jabechji̧ Juba pio ju̧i̧iä taruparëremȩde. Ado pio judiri ja̧ji̧ri̧ pio judiro̧ peaja̧di dari̧ japaji̧ri̧rȩ cjo̧ro̧ji̧ri̧pea̧dirȩ. 22Ado Chira jini̧, Dameque ja̧ iei̧ ado cja̧rȩmo̧rȩ peaja̧di ararëreyi̧nȩ. Joja oa ara̧nȩ. Ado Tuba Cai̧ quȩra̧ quȩparëreji̧ri̧diro̧jo̧ȩ. Ado judi ütëpa ëte iero quȩmȩ chjiparari oa ja̧bepamȩpea̧de boro̧che quȩmȩ chjipararibo. Eami̧ pumȩ judi ja̧di dari̧ ja̧bepadërërea̧ ji̧ ja̧di dari̧ ja̧bepamȩpe bagarëremȩde. Aja̧, chjiparari pio ju̧i̧ mo̧ȩmȩrȩ japamȩpea̧de dami̧ti̧ oa. Coana̧rea̧ oa, tjapënȩ oa, jibë oa, dami̧ti̧ oa japamȩpea̧de. Aja̧, Tuba Cai̧ pio ju̧i̧iä taruparëremȩde chjipararira̧ ja̧bepapea̧ ji̧. Ado Tuba Cai̧ judi ëbarëremȩdejȩ ja̧ oyi̧ ji̧, Nama quȩyi̧ pio ji̧.
23Ado ja̧dëa̧ ji̧ japamitë chjätä ëte, Dameque pio judi yo̧rëremȩdejȩrȩ jibëa̧ ivi ji̧ri̧. Aja̧, Ada quȩyi̧ ji̧, ado Chira quȩyi̧ ji̧ yo̧rëremȩdejȩrȩ, ja̧di ta̧rëri̧ yo̧mȩrȩ:
—Aja̧, chjadëri̧ ta̧rëchji̧coa. Cüdë dibë yo̧pea̧ pio ju̧i̧ chjadëri̧ ta̧rëchji̧coa. Danȩro̧, eami̧ üi̧rȩ pio coa goe chiari̧ gu̧na̧mȩ pio ju̧i̧, jabechji̧ ja̧bo tänȩpacuni̧. Ado eami̧ üi̧ pëi̧ chjarë pio coa gitori̧ cjae cjae guamȩ pio ju̧i̧, peaja̧di ja̧bo tänȩpacuni̧. Jabechji̧ pio coaiäpȩmo̧ chjai̧dëri̧ japea̧ ba oa bape chjaopaquiji̧ri̧. 24Ado eami̧ pumȩrȩ Cai̧ pio ju̧i̧ ja̧bo tänȩa̧ ba oa ana̧ tjamo̧ri̧ bape chjaoa̧ oa cjiaparä judi, 7mi̧ dara̧ bape chjaoa̧ oa cjiaparä judi, jabechji̧ ji̧dë u̧i̧ ana̧ri̧ bape chjaoa̧ oa cjiapadi pio coa ja̧bo tänȩmȩ judi. Tjamo̧ davä. Cai̧ pio ju̧i̧ ja̧bo tänȩmȩ pio judi 7mi̧ dara̧ bape chjaoa̧ oa cjiaparä judi, jabechji̧ 77mi̧ dara̧ bape chjaoa̧ oa cjiapadi pio coa ja̧bo tänȩpamȩ judi —yo̧mȩrȩ yo̧rëremȩdejȩrȩ jibëa̧ ivi ji̧ri̧ Dameque judi.
Ada̧ judi nö̧rirëremȩdejȩ jibëa̧ ja oa, Chȩ quȩmȩ oa
25Ado Ada̧ judi jibëa̧ iei̧ pio ji̧ ëba mo̧a̧ oaiä, ado boma̧i cjiadiärëreyi̧nȩ. Ado japamitë chjätä ëte, Eva jini̧ ararëreyi̧nȩjȩ üi̧ boi̧ oa. Ado Che quȩpea̧nȩjȩ. ‘Aja̧, Ütë tjamo̧ judi yürüa̧ oa ëbacuni̧da, Abe pio ju̧i̧ ëbatärea̧mi̧ ano̧ mire ëbacuni̧da, Cai̧rȩ ja̧bo tänȩa̧ pio ju̧i̧ ëbatärea̧mi̧ ano̧ mire ëbacuni̧da’ quëna̧ jo̧rȩtayi̧rȩ quȩparëreyi̧nȩjȩ Che quȩra̧ pio ju̧ri̧ra̧.
Che judi nö̧rirëremȩdejȩ jibëa̧ ja oa, Eno̧ quȩmȩ oa
26Ado Che judi ütëpa ëte nö̧rirëremȩdejȩ jibëa̧ ja oa. Ado Enocho quȩpea̧dejȩ. Ado pio jiro japamitërä pumȩ judiro̧ taruparëreji̧ri̧dirȩ a̧dopapea̧ ji̧. Tjamo̧ davä. Judiro̧ ja̧di dari̧ japadërërea̧ ji̧, Jeova pio ju̧i̧iäpȩmo̧ chjacjiamȩri̧ jo̧rȩtapea̧ oa a̧dopadërërea̧ ji̧, jabechji̧ ja̧di dari̧ japapea̧ ji̧ taruparëreji̧ri̧dirȩ.
Nu geselecteerd:
Taruparea̧ Ma̧ȩ 4: Pume
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
©2021 Global Partners, All Rights Reserved
