Taruparea̧ Ma̧ȩ 11
11
Pearä judi cja̧rȩmȩ ma̧ȩ maea oa ni̧bärëreji̧ri̧dirȩ pumȩ judiro̧ ütëborë
1Pio jiro japamitërä chiri nö̧ta oa cjo̧ro̧ji̧ri̧ pio judiro̧ cja̧rȩmȩ ma̧ȩ maea oa ni̧bärëreji̧ri̧dirȩ bapë ta̧rërea̧mi̧ dari̧. 2Ado pumȩ judiro̧ dorë cjitëmȩräpȩmo̧ järërea̧ ji̧, dadärärëreji̧ri̧diro̧jo̧ȩ chiri boi̧dë a̧rȩmȩ oa, Chinara quȩmȩ chiriräpȩ a̧rȩmȩ oa. Ado pio ju̧ri̧pȩ cjo̧ro̧ji̧ri̧pea̧dirȩ. 3Ado järi tjamo̧ji̧ri̧rȩ jibëa̧ dëbëti̧ra̧ yo̧rëreji̧ri̧dirȩ:
—Aja̧, goë jaeibe. Ja̧bepatärȩ. Dabu choco oa japatärȩ. Ado cjo̧dëra̧ pio ju̧ri̧ra̧ cjüëtüparȩtäro̧jo̧ȩ chjua tjamo̧pe järea̧mi̧ dari̧ —yo̧rëreji̧ri̧dirȩ jibëa̧ dëbëti̧ra̧ chia.
Ado judiro̧ yo̧a̧mi̧ japarëreji̧ri̧dirȩ. Jabechji̧ ta̧dëra̧ ja̧bepatärea̧ ji̧, dabu choco maeara̧ ja̧beparëreji̧ri̧dirȩ. Ado ërami̧ dara̧ ji̧chja̧parȩji̧ri̧rȩ goë cji̧däriä japarëreji̧ri̧diro̧jo̧ȩ. 4Ado ja̧dëa ji̧ yo̧rëreji̧ri̧dirȩ:
—Goë jaeibe. Jabechji̧ bë ma̧ri̧ oa japatärȩ pio a̧ro̧rȩ cjo̧ro̧pea̧ oa. Uë tjamo̧ cjiari̧ cjiamȩ bëbo japatäro̧jo̧ȩ. Jabechji̧ a̧dëräpȩ yuro cjiari̧ japatäro̧jo̧ȩ uë tjamo̧ oa. Ja̧di dari̧ japatärȩ oëra̧ti̧ oa cjo̧ro̧ji̧ri̧ judiro̧ pio ibë chjiari ba chia jo̧rȩtapea̧ oa. 'Aja̧, pio judiro̧vediro̧da, uë tjamo̧ cjiamȩ bë oa japea̧vediro̧da, ba chia tjamo̧vediro̧da, chjuchjupechädëa̧vediro̧da, jabo cja̧rȩmȩrämo̧ cjo̧ro̧ji̧ri̧pea̧vediro̧da' quëna̧bëmi̧ ja̧di dari̧ japatärȩ —yo̧ji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia.
Jeova judi a̧dëri pio judiri birarëremȩde tjaoëpai̧ dari̧ ni̧bä tänȩpea̧ oa pumȩ ji̧ri̧
5Ado japamitë chjätä ëte Jeova judi a̧dëri pio judiri birarëremȩde bë ma̧ri̧ oa dapea̧ oa, uë tjamo̧ cjiamȩ bë oa dapea̧ oa. Aja̧, pumȩ judiro̧ cji̧däa̧ pio ju̧i̧ daera̧pea̧de. 6Ado Jeova judi, ‘Jabo cjäri̧ madiro̧da, cja̧rȩmȩ pumȩ maeadiro̧da, cja̧rȩmȩ ma̧ȩ maea oa ni̧bädiro̧da, jabomo̧ tarupaji̧ri̧rȩ ma̧i̧ dari̧ japadiro̧da, jënȩro̧ dami̧ti̧ oa jo̧rȩtami̧ japadärärea̧ dapai̧ dadiro̧da, a̧dë chjäte ma̧i̧ da pio ju̧i̧bo japadärärea̧ dapai̧ dadiro̧da, chjao tjamo̧ pio ju̧i̧bo japadärärea̧ dapai̧ dadiro̧da’ quëna̧ jo̧rȩtarëremȩde. 7Ado ja̧dëa ji̧ ji̧dë u̧i̧ jo̧rȩtamȩrȩ ja̧di dari̧ jo̧rȩtamȩpea̧de Tjarari̧mȩ judi: ‘Aja̧, biratäreji̧ri̧a̧ro̧da, pumȩ judiro̧ cja̧rȩmȩ ma̧ȩ maea oa nibärërea̧ ji̧, ma̧ȩ ji̧ra̧ tjamo̧ra̧ ni̧bä tänȩtäreji̧ri̧a̧ro̧ji̧ri̧da, judiro̧ bapë ta̧rërea̧mi̧dëri̧ tjaoëpai̧da ma̧ȩ oa ni̧bä tänȩtärëji̧ri̧a̧ro̧ji̧ri̧da, ’quëna̧ jo̧rȩtamȩpea̧de Tjarari̧mȩ judi.
8Ado Jeova judi ja̧di dari̧ japarërea̧ oaiä, jabechji̧ ji̧mo̧ ja̧bepë ano̧rëreji̧ri̧dirȩ pumȩ judiro̧. Jabechji̧ jibëa̧ dëbëti̧ra̧ chia bapë ta̧rërea̧ dadëa̧ oaiä, chjadëri̧ ni̧bä chjaorea̧ dadëa̧ oaiä, jabechji̧ ja̧bepë ano̧rëreji̧ri̧diro̧jo̧ȩ. Ado ja̧dëa ji̧ Jeova pio judi chjuchjupechä cjo̧ro̧ tänȩrëremȩdejȩrȩ pumȩ ji̧ri̧ chiri nö̧tai̧ oa. 9Ja̧di tara judiro̧ cjo̧ro̧rërea̧ chiri üdë, jabechji̧ Babe quȩmȩde. Jabechji̧ Jeova judi pumȩ ji̧ri̧ oëra̧ti̧ ni̧bä tänȩrërea̧ oaiä, judiro̧ chiriräpȩti̧ oa ano̧ mire cjo̧ro̧pea̧ oa chjadürërea̧ oaiä, jabechji̧ Babe quȩmȩde yaba̧ pio jiro chiri üdë, judiro̧ pearä cjo̧ro̧rërea̧ chiri üdë. Tjamo̧ davä. Pumȩ judiro̧ cja̧rȩmȩ ma̧ȩ maea oa ni̧bärërea̧ ji̧, chjaodëri̧ bapë ta̧rërea̧mi̧ dari̧ ni̧bä chjaorërea̧ ji̧, jabechji̧ oëra̧ti̧ ni̧bä tänȩrëremȩdejȩrȩ tjaoëpai̧da ma̧ȩ oa ni̧bäji̧ri̧pe bagari̧. Aja̧, ja̧di dari̧ japarëremȩdejȩrȩ Jeova judi daburo cjo̧ro̧ji̧ri̧ pumȩ pio ji̧ri̧. Ado ja̧di dari̧ japa ëte, jabechji̧ chiri nö̧tadärä oa chuchjupechä cjo̧ro̧pea̧ oa chjadürëremȩdejȩrȩ oëra̧ti̧ oa, chiriräpȩti̧ oa.
Chȩ pio ju̧i̧ chjiari ma̧ȩ
10Chȩ pio judiri ja̧ji̧ri̧ pio ji̧ri̧ chjiari go̧ȩpea̧ oa cjiade ma̧ȩ üdë. Chȩ judi ütëpa ëte, 100 ui goamȩrȩ nö̧rirëremȩdejȩ joja oa, Arapjacha quȩmȩ oa. Ui ana̧ üdë gaüpa ëte, yo̧a̧ri̧ ui chjätä ëte nö̧rirëremȩdejȩ. 11Ado Arapjacha pio ju̧i̧ nö̧ria̧ duri oa, jabechji̧ ui ji̧ra̧ri̧ cjo̧ro̧rëremȩde Chȩ judi. Aja̧, 500 ui cjo̧ro̧rëremȩde Arapjacha pio ju̧i̧ nö̧ria̧ duri oa. Ado jënȩ cjo̧ro̧a̧ nö̧ta ji̧dë u̧i̧ ji̧ra̧pe bagari̧ nö̧rirëremȩdejȩrȩ jibëa̧ bori̧ ji̧ri̧. Aja̧, oari bori ji̧ri̧, ivi bori̧ ji̧ri̧ nö̧rirëremȩdejȩrȩ o ji̧ri̧.
Arapjacha pio ju̧i̧ chjiari ma̧ȩ
12Ado Arapjacha judi ütëpa ëte, 35 ui goamȩrȩ nö̧rirëremȩdejȩ joja oa, Chera quȩmȩ oa. 13Ado Chera pio ju̧i̧ nö̧ria̧ duri oa, jabechji̧ ui ji̧ra̧ri̧ cjo̧ro̧rëremȩde Arapjacha judi. Aja̧, 403 ui cjo̧ro̧rëremȩde Chera pio ju̧i̧ nö̧ria̧ duri oa. Ado jënȩ cjo̧ro̧a̧ nö̧ta ji̧dë u̧i̧ ji̧ra̧pe bagari̧ nö̧rirëremȩdejȩrȩ jibëa̧ bori̧ ji̧ri̧. Aja̧, oari bori̧ ji̧ri̧, ivi bori̧ ji̧ri̧ nö̧rirëremȩdejȩrȩ o ji̧ri̧.
Chera pio ju̧i̧ chjiari ma̧ȩ
14Ado Chera judi ütëpa ëte, 30 ui goamȩrȩ nö̧rirëremȩdejȩ joja oa, Ebe quȩmȩ oa. 15Ado Ebe pio ju̧i̧ nö̧ria̧ duri oa, jabechji̧ ui ji̧ra̧ri̧ cjo̧ro̧rëremȩde Chera judi. Aja̧, 403 ui cjo̧ro̧rëremȩde Ebe pio ju̧i̧ nö̧ria̧ duri oa. Ado jënȩ cjo̧ro̧a̧ nö̧ta ji̧dë u̧i̧ ji̧ra̧pe bagari̧ nö̧rirëremȩdejȩrȩ jibëa̧ bori̧ ji̧ri̧. Aja̧, oari bori̧ ji̧ri̧, ivi bori̧ ji̧ri̧ nö̧rirëremȩdejȩrȩ o ji̧ri̧.
Ebe pio ju̧i̧ chjiari ma̧ȩ
16Ado Ebe judi, ütëpa ëte 34 ui goamȩrȩ nö̧rirëremȩdejȩ joja oa, Perege quȩmȩ oa. 17Ado Perege pio ju̧i̧ nö̧ria̧ duri oa, jabechji̧ ui ji̧ra̧ri̧ cjo̧ro̧rëremȩde Ebe judi. Aja̧, 430 ui cjo̧ro̧rëremȩde Perege pio ju̧i̧ nö̧ria̧ duri oa. Ado jënȩ cjo̧ro̧a̧ nö̧ta ji̧dë u̧i̧ ji̧ra̧pe bagari̧ nö̧rirëremȩdejȩrȩ jibëa̧ bori̧ ji̧ri̧. Oari bori̧ ji̧ri̧, ivi bori̧ ji̧ri̧ nö̧rirëremȩdejȩrȩ o ji̧ri̧.
Perege pio ju̧i̧ chjiari ma̧ȩ
18Ado Perege judi ütëpa ëte 30 ui goamȩrȩ nö̧rirëremȩdejȩ joja oa, Ereu quȩmȩ oa. 19Ado Ereu pio ju̧i̧ nö̧ria̧ duri oa, jabechji̧ ui ji̧ra̧ri̧ cjo̧ro̧rëremȩde Perege judi. Aja̧, 209 ui cjo̧ro̧rëremȩde Ereu pio ju̧i̧ nö̧ria̧ duri oa. Ado jënȩ cjo̧ro̧a̧ nö̧ta ji̧dë u̧i̧ ji̧ra̧pe bagari̧ nö̧rirëremȩdejȩrȩ jibëa̧ bori̧ ji̧ri̧. Oari bori̧ ji̧ri̧, ivi bori̧ ji̧ri̧ nö̧rirëremȩdejȩrȩ o ji̧ri̧.
Ereu pio ju̧i̧ chjiari ma̧ȩ
20Ado Ereu judi ütëpa ëte, 32 ui goamȩrȩ nö̧rirëremȩdejȩ joja oa, Cherugo quȩmȩ oa. 21Ado Cherugo pio ju̧i̧ nö̧ria̧ duri oa, jabechji̧ ui ji̧ra̧ri̧ cjo̧ro̧rëremȩde Ereu judi. Aja̧, 207 ui cjo̧ro̧rëremȩde Cherugo pio ju̧i̧ nö̧ria̧ duri oa. Ado jënȩ cjo̧ro̧a̧ nö̧ta ji̧dë u̧i̧ ji̧ra̧pe bagari̧ nö̧rirëremȩdejȩrȩ jibëa̧ bori̧ ji̧ri̧. Oari bori̧ ji̧ri̧, ivi bori̧ ji̧ri̧ nö̧rirëremȩdejȩrȩ o ji̧ri̧.
Cherugo pio ju̧i̧ chjiari ma̧ȩ
22Ado Cherugo judi ütëpa ëte, 30 ui goamȩrȩ nö̧rirëremȩdejȩ jibëa̧ ja oa, Nacoro quȩmȩ oa. 23Ado Nacoro pio ju̧i̧ nö̧ria̧ duri oa, jabechji̧ ui ji̧ra̧ri̧ cjo̧ro̧rëremȩde Cherugo judi. Aja̧, 200 ui cjo̧ro̧rëremȩde Nacoro pio ju̧i̧ nö̧ria̧ duri oa. Ado jënȩ cjo̧ro̧a̧ nö̧ta ji̧dë u̧i̧ ji̧ra̧pe bagari̧ nö̧rirëremȩdejȩrȩ jibëa̧ bori̧ ji̧ri̧. Oari bori̧ ji̧ri̧, ivi bori̧ ji̧ri̧ nö̧rirëremȩdejȩrȩ o ji̧ri̧.
Nacoro pio ju̧i̧ chjiari ma̧ȩ
24Nacoro judi ütëpa ëte, 29 ui goamȩrȩ nö̧rirëremȩdejȩ joja oa, Tare quȩmȩ oa. 25Ado Tare pio ju̧i̧ nö̧ria̧ duri oa, jabechji̧ ui ji̧ra̧ri̧ cjo̧ro̧rëremȩde Nacoro judi. Aja̧, 119 ui cjo̧ro̧rëremȩde Tare pio ju̧i̧ nö̧ria̧ duri oa. Ado jënȩ cjo̧ro̧a̧ nö̧ta ji̧dë u̧i̧ ji̧ra̧pe bagari̧ nö̧rirëremȩdejȩrȩ jibëa̧ bori̧ ji̧ri̧. Oari bori̧ ji̧ri̧, ivi bori̧ ji̧ri̧ nö̧rirëremȩdejȩrȩ o ji̧ri̧.
26Ado Tare quȩmȩ pio judi ütëpa ëte, 70 ui goamȩrȩ nö̧rirëremȩdejȩrȩ jibëa̧ bori̧ ji̧ri̧. Abara̧ quȩmȩ ju̧i̧, Nacoro quȩmȩ ju̧i̧, ado Ara̧ quȩmȩ ju̧i̧ nö̧rirëremȩdejȩrȩ.
Tare pio ju̧i̧ chjiari ma̧ȩ
27Tera quȩmȩ pio judiri ja̧ji̧ri̧ pio ji̧ri̧ chjiari ütarë go̧ȩparequede. Danȩrȩ, Tare quȩmȩ pio judi nö̧rirëremȩdejȩ Abara̧ quȩmȩ ju̧i̧, Nacoro quȩmȩ ju̧i̧, ado Ara̧ quȩmȩ ju̧i̧. Pio ji̧ri̧ ja̧ ama̧i̧ tjamo̧ judi Tare pio judide. Ado Tare pio judiri ja̧ji̧ri̧ pio ji̧ri̧ chjiari ma̧ȩde pio yodë ma̧ȩ üdë. Ado Tare joja üdë, Ara̧ quȩmȩ pio judi nö̧rirëremȩdejȩ joja oa, Oto quȩmȩ oa. 28Ado Tare judi jabë ja̧bodëa̧rä ja̧borëremȩde joja judi, Ara̧ pio judi. U quȩmȩräpȩ ju̧ri̧ ja̧borëremȩde pio jea̧ ararërea̧räpȩ. 29Ado Nacoro judi ëbarëremȩdejȩ jibëa̧ iei̧ ji̧, Mica quȩyi̧ ji̧, Ara̧ pio ju̧i̧rea̧ jojabi pio ji̧, Ica quȩyi̧ pio ji̧ ja̧ oyi̧ pio ji̧. Ado Abara̧ judi peaja̧di ëbarëremȩdejȩ jibëa̧ iei̧ ji̧, Charai quȩyi̧ ji̧. 30Ado Charai jini̧ bomaitärea̧ ji̧ bomairea̧ dadëa̧nȩ. Bori̧ ji̧ri̧ ararea̧ dadëa̧nȩ.
31Ado Tare judi Canaa̧ quȩmȩ chiriräpȩ ano̧ mire bëpatämi̧ cjiamȩrȩ go̧dürëremȩde cadeo ja̧ chiriri pio judiri. U quȩmȩ chiriri pio judiri go̧dürëremȩde jibëa̧ pumȩ pio ji̧ri̧ nö̧ta. Jibëa̧ ja Abara̧ pio ju̧i̧ nö̧ta, Abara̧ ja̧ iei̧ pio ji̧ nö̧ta, jibëa̧ jadama̧i̧ Oto quȩmȩ pio ju̧i̧ nö̧ta go̧dürëremȩde. Jabo judiro̧ Canaa̧ quȩmȩ chiriräpȩ go̧düdärätärea̧ ji̧, cjiadiärëreji̧ri̧dirȩ Ara̧ quȩmȩ bë ma̧ri̧räpȩ ju̧ri̧. Aja̧, pio ju̧ri̧pȩ ano̧ mire cjo̧ro̧ji̧ri̧pea̧dirȩ. 32Ado Tare judi 205 ui goamȩrȩ ja̧borëremȩde. Ara̧ quȩmȩräpȩ ja̧borëremȩde.
Nu geselecteerd:
Taruparea̧ Ma̧ȩ 11: Pume
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
©2021 Global Partners, All Rights Reserved
