Genesisi 7
7
1Zonake Jehova i te ngalo ka Noa: Enghena lomu tarwini, wena ni nghamu ya wena yontlhe; hakuva nzi ku wonile na u lulamile mahlweni ka mina ka lexi xizukulwana,
2ka zontlhelele zihari lezi zi hlazekileko u ta teka ka zona ntlhanu ni mimbiri mipatswa, matsune ni kati; ni ka zontlhelele zihari lezi zi nga hlazekangiko u ta teka zimbiri, matsune ni kati wakwe. Levi 11:2
3Ni ka tinyanyani ta tilo u ta teka ntlhanu wa mipatswa ni mimbiri, matsune ni kati; kasi u hlayisa a mbewu nghoheni ka yontlhe misava.
4Hakuva hi nzhako ka ntlhanu wa masiku ni mambiri nzi ta nisa a vula misaveni a 40 ya masiku ni wusiku ga kona; zontlhe zi hanyako nzi zi mahileko nzi ta zi lovisa a nghoheni ya misava.
5Na Noa i lo maha zontlhe lezo Jehova a mu layileko zona.
6Noa i wa hi ni 600 wa malembe laha a ntalo wa mati wu ngata misaveni.
7Noa i lo enghena lomu tarwini, ni vana vakwe, ni sati wakwe, ni vasati va vana vakwe, hi kota ya ntalo.
8A zihari lezi zi hlazekileko, ni zihari lezi zi nga hlazekangiko ni zilo zontlhe zi makanyako misaveni,
9zi lo enghena hi mipatswa lomu tarwini, matsune ni kati, kota lezi Nungungulu a nga layile Noa.
10Na ku mahisile lezo hi nzhako ka ntlhanu wa masiku ni mambiri a mati ya ntalo ma lo chikela misaveni.
11Hi lembe ga wu 600 ya kuhanya ka Noa, hi hweti ya wumbiri, hi siku ga wuntlhanu ni mambiri, hi siku lego a zibuka zontlhe za kueta loku ka hombe zi lo vululeka, ni tinyangwa ta tilo ti lo vululeka, Joba 38:16
12yi lona laha misaveni 40 ya masiku ni 40 ya wusiku.
13Gwalego siku i lo enghena lomu tarwini Noa, na Xemi, na Hamu, na Jafete a vana va Noa, ni sati wakwe, ni vasati va vana va Noa va vanharu.
14Vona ni zihari zontlhelele hi tixaka ta zona, ni zifuyo hi tixaka ta zona, ni zontlhelele zi kokakokako laha misaveni hi tixaka ta zona, ni tinyanyani tontlhelele hi tixaka ta tona, ni tinyanyani tontlhe ta ti tsongwani ta tixaka ti hambeneko.
15Zi lo enghena na Noa lomu tarwini a mipatswa ya zihari zontlhe zi nga ni muhefemulo wu hanyako.
16Lezi zi nga enghena zi wa hi matsune ni kati wakwe, kota lezi Nungungulu a nga wa leletisile zona; na Jehova i lo mu valela lomu xikari.
17Yi lona yi maha ntalo laha misaveni 40 ya masiku: a mati ma lo kukumuka, ma tlakusa a taru, gi tlakuka hehla ka misava.
18A mati ma lo tala ma tlakuka nguvu laha misaveni; ni taru gi deluka hehla ka mati.
19A mati ma lo anza nguvu laha misaveni; ni zontlhe zitsunga lezi zo leha zi nga lahasi ka tilo zi lo fenengetwa.
20A mati ma lo tlakuka 15 ya mikono hehla ka zitsunga.
21Yi lofa a nyama yontlhe yi makanyako misaveni: tinyanyani, ni zifuyo, ni zihari zontlhe, ni lezi zi kokakokako misaveni, ni vanhu vontlhelele.
22A zilo zontlhe lezi zi nga hi ni muhefemulo wu hanyako, zontlhe lezi zi nga muhanzeni wu omileko zi lofa.
23Ku lobyiswa zontlhe lezi zi hanyako misaveni, ni vanhu, ni zihari, ni zikokakoka, ni tinyanyani ta tilo; zi lobyiswa misaveni; ku lo sala Noa yece ni lezi a nga hi nazo lomu tarwini. 1 Ped. 3:20; 2 Ped. 2:5; 3:6
24A mati ma wa tele laha misaveni a 150 wa masiku.
Nu geselecteerd:
Genesisi 7: TSC72
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Tshwa Bible © Bible Society in Mozambique, 1972, 2007.
