Matius 6
6
Ngone o Gikimoi powileleleani gena upa de nanga edekati la inagiliri
1“Nimasidodiahi, upa sidago ngini o agama ma dodagi de ma dodoto o nyawa manga simaka niaaka la ma ngale o nyawa ngini inikelelo. Nako komagena niaaka, de ngini asa nia fanggali o Gikimoi kadaku o sorogaka winihikewa.
2So nakoso ngini o roriwo o pipi niahike o nyawa isususaka, upa niasingangasu o nyawaka, maro o nyawa ma binuka manga sigogise o Gikimoika ikokulai gena ona yaaka. Ona magena manga sigogise o Gikimoika, kagena o Yahudika manga puji ma bi tahu ma rabaka eko o ngekoka, la ma ngale o nyawa yakelelo asa ona yasigiliri. Ngini tinisingangasu igogou, o Gikimoi Awi fanggali gena he ihiwa onaka, sababu ona magena manga giliri o nyawano yamake daboloka. 3Duma ngini manena nakoso o roriwo o pipi niahike o nyawa isususaka, bilasu o roriwo niahike gena nisipongoka, upa he niasingangasu o nyawaka. 4Foloi daloha nia manara gena o nyawa moi lo upa yanako, ka cawali nia Baba o sorogaka wanako. To ngini nia gogoho o nyawa yananakowa gena Una wakelelo, de asa ngini winifanggali.”
Ngone o Gikimoika pososumbayang gena upa de nanga edekati inagiliri
(Lukas 11:2-4)
5“De nakoso ngini nisumbayang, upa sidago niaaka maro o nyawa de manga sigogise o Gikimoika ikokulai ona magena yaaka. Sababu o nyawa ona magena manga dupa imaoko o puji ma bi tahu ma rabaka eko o ngeko ma bi sagoka, la ma ngale o nyawa asa ona yakelelo. So ngini tinisingangasu igogou, sababu ona manga giliri o nyawano gena yamake dabolo, so o Gikimoi Awi fanggali gena he ihiwa onaka. 6Duma ngini gena nakoso nisumbayang, bilasu nia tahuka niwosa so ka nimatengoka de nisumbayang nia Baba wikokelelowa. Sababu Una gena igogou nia manara o nyawa yananakowa gena Una wanako, de asa ngini winifanggali.
7De lo nakoso ngini nisumbayang gena, upa nia demo nisidadu-dadu, maro o nyawa ona magena o Gikimoi wipipiricayawa. Ona itemo, nakoso manga demo ikuru, de asa manga gogolo gena isiganapu. 8Manga manara maro ona magegena upa bai! Sababu ngaroko ngini nia Baba o sorogaka niwigolo waasi, de to ngini nia gogolo gena Una he wanako dabolo. 9So hika nisumbayang komanena,
‘Mia Baba kadaku o sorogaka,
migolo tanu to Ngona Ani ronga o nyawa yangodu isihoromati.
10De Ngona nokolano o duniaka,
so o nyawa o duniaka yangodu Ani dupa gena yaaka,
imatero maro de o sorogaka.
11O wange manena mia oho ma kurangi nomihike.
12De to ngomi mia dorou tanu nosiapongu,
imatero maro ngomi lo o nyawa manga dorou gena miasiapongu.
13Upa nosimaha la o dorou imibaja ngomika,
duma nomisirese o dorou ma kuasano.
[Sababu Ngona nokolano nokuasa
de lo nomulia ka sidutu ikakali. Amin.]’
14Nakoso o nyawa la kanaga manga dorou nginika, de ona magena ngini niasiapongu, de ngini lo asa nia Baba o sorogaka winisiapongu. 15Duma nakoso ngini la kanaga o nyawa manga dorou nginika, de ona magena niholu niasiapongu, de ngini lo o Baba asa woholu winisiapongu to ngini nia dorou.”
Nakoso pooqowa de poudowa gena upa ma ngale ngone inagiliri
16“Nakoso ngini niodowa de niudowa,#6:16 niodowa de niudowa: “o puasa”. upa nimatuhudu maro o nyawa manga sigogise ikokulai o Gikimoika ona magena yaaka. Ma orasi ona yoodowa de youdowa, de yodupa imatuhudu de manga bio yamasauwa de lo manga hutu yawusiwa, la ma ngale o nyawa yanako ona yoodowa de youdowa. So tinisingangasu igogou, sababu ona manga giliri o nyawano gena yamake daboloka, so o Gikimoi Awi fanggali gena he ihiwa onaka. 17Duma ngini gena nakoso niodowa de niudowa, bilasu nia bio niamasau de lo nia hutu niawusika, 18la ma ngale ngini niodowa de niudowa gena ka o nyawa lo yanakowa. Ka cawali nia Baba wikokelelowa o sorogaka wanako. To ngini nia gogoho o nyawa yananakowa gena Una wakelelo, de asa ngini winifanggali.”
O loha paaaka gena isitero maro o kaya padiahi o sorogaka
(Lukas 12:33-34)
19“Upa o kaya o duniaka nimadolomu, sababu o duniaka ma kaya de ma arata gena aku dakeho de lo o lupu yaodo so ibaka, de lo kiaka nia arata niadodiahika done o nyawa itotosi iwosa de magena yatosika. 20Ngini bilasu ka o soroga ma kaya asa niadiahi. Magena asa dakehowa de o lupu lo yaodowa, de itotosi yaakuwa yadehe, so nia kaya o sorogaka magena akuwa isisa. 21Sababu kiaka bato to ngini nia kaya niadiahi, done kagena lo to ngini nia sininga yogapala.”
Nanga sininga gena upa ngai sinotoka
(Lukas 11:34-36, 16:13)
22“Ngini nia lako gena aku isitero de o poci. Nakoso ngini nia lako daloloha, de nia ginano gena asa datebi. 23Duma nakoso ngini nia lako datorou, de ngini nia ginano lo dafaja de datorou. So nakoso o Jou la kanaga nia sininga wosidisiwaka, de ngini niaaka so nia sininga dapuputu kali, so nia sininga gena maro o sakaputu yasaoka.
24Igogou, o nyawa moi lo yaakuwa yomanara o tuangi yasinotoka. Sababu ona asa o tuangi moi iwisininga eko iwisigise ifoloi, de o tuangi moili iwisikurangi eko iwisidoohawa. Komagena lo ngini. Idadiwa bai o Gikimoi Awi dupa niaaka de lo o duniaka ma kaya de ma arata gena salalu nimadolomu.”
Ma ngale o kia naga moi lo upa pohawateri o orasi ma simaka gena
(Lukas 12:22-31)
25“Kanaga de ma sababu so Ngohi totemo nginika, upa nihawateri eko nitemo, ‘O kia asa poodo de poudo.’ Upa he nihawateri eko nitemo, ‘O baju kia asa pomasipake.’ Sababu ngini nia oho ma ngale ilamo gena upa o ino de o baju. 26Hika niosininga o bi namo gena kanaga isoso hika de hino. Maena gena idatowa, iutuwa, de lo ma pola ihiwa. Ngaroko komagena, nia Baba o sorogaka gena kanaga so o ino lo wahike onaka. Duma ngini nia oho to Una Awi simaka gena ifoloi nidoku de o bi namo ma oho, de Una lo asa ngini winipalihara ifoloi daloha de o bi namo wapalihara. 27Ngaroko ngini nia sininga iruwahe so niamalo isusa gena, dadoohawa. Sababu ngini nia siningaka salalu ka o bi moi-moi idadala nisosininga, duma to ngini nia umuru gena ka o putu moi lo nidogo niaakuwa.
28Dadoohaso ngini ka baju de nia sininga ihawateri. Niakelelo o dumule de ma leruka. Maena imanarawa de lo o baju iakawa. 29Duma o orasi manena Ngohi totemo nginika, ma Kolano o Salomo idomaka una lo de awi kaya idala, de to una awi baju imaterowa de o dumule ma leru magena ma loha. 30So nakoso ka o dumule, kiaka kanaga o wange manenaka ioho de ilangika asa yatupu so daukuka, gena o Gikimoi ma loha wagaka de ngini manena lo kanaga de nia boloika. Una ngini winipalihara ifoloi daloha bai! De dadoohaso ngini Awi palihara gena niopiricayawa.
31Komagena so Ngohi totemo nginika, upa he nihawateri de nitemo, ‘O kia asa poodo de poudo. O baju kia asa pomasipake.’ 32Dangodu magena o bi moi-moi o kia naga o nyawa o Gikimoi wipipiricayawa ona magena yososininga. Ma ngale ngini gena o bi moi-moi dangodu hika upa he nihawateri, sababu nia Baba o sorogaka to ngini nia kurangi magena dangodu wanako. 33So o kia naga ngini bilasu niodupa niamote, ena gena: o Gikimoi Awi pareta ma rabaka nigoge de lo o moi-moi o kia itotiai gena niaaaka. Nakoso magena idoma niamote, de o bi moi-moi nia kurangi dangodu asa Una winihike nginika. 34So ma ngale ilangika gena o kia naga moi lo upa o wange manena de nisihawateri. O wange manena maena ma susa masirete gena yaadoka, so upa sidago o kia naga ilangi ma susa niosininga gena he niodogoli.”
Nu geselecteerd:
Matius 6: LAIGBI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
