मरकुस 15
15
पिलातुस उन मुंद यीशु
(मत्ती २७:१-२; ११:१४; लूका २३:१-५; यूहन्ना १८:२८-३८)
1व्हातुर आगतेला अच तुरन्त प्रधान याजकगोळ, स्याणागोळ, अदिक शास्त्रीगोळ उलटा सप्पा यहूदी महासभा आपस दा सलाह माळकु यीशु उक कट्सुसदुर, अदिक आऊक वोतकु पिलातुस उन कय दा सौप्सदुर.
2पिलातुस आऊन से केळदुन, “येन नी यहूदीगोळ्द राजा हुय?” यीशु आऊक उत्तर कोट्टुन, हव “ह्यांग नी खुद अच अनत्या.”
3प्रधान याजक आऊन मा हापाळ मात ईनव दोष हच्चोर. 4पिलातुस यीशु से मात्त केळदुन, “येन नी येनु उत्तर कोळाल? नोळ इंदुर नीन मा यास मात ईनव दोष हचीत्यार!”
5यीशु फिर भी येनु उत्तर कोटीदील; ईल ताका कि पिलातुस उक बळा आश्चर्य आत.
मृत्यु-दण्ड इन आग्या
(मत्ती २७:१५-२६; लूका २३:१३-२५; यूहन्ना १८:३९; १९:१६)
6हर ऊंद फसह हाब्ब इन घळी दा पिलातुस यावारा भी ऊंद कैदी इक यारी यहूदी लॉकुर चाहासतोगोर, आऊक आंदुर साठी बिट्टबुळ तोगोन. 7बरअब्बा हेसुर ईनव ऊंद मंळसा ईरोन जो आ विद्रोह इन सांगुळ कैदी ईरोन, जो रोमन सरकार उन खिलाप विद्रोह दा हत्या माळीदुर. 8अदिक भीळ म्याकुच होगकु पिलातुस से विनती माळली कुर्त, कि ह्यांग नी नाम साटी माळतेला बंद्या हांग अच माळ. 9पिलातुस आंदरी उत्तर कोट्टुन, “येन नीव चाहासतीर कि ना नीम साटी यहूदीगोळ राजा अक बिट बुळाईन?” 10यतिकी पिलातुस जानसोन कि प्रधान याजकगोळ आऊक सिट्ट देल सौप्सीदुर.
11लेकीन प्रधान याजकगोळ लॉकुरी येर्सदुर कि आव बरअब्बा अक अच आंदुर साठी बीटबुळुल. 12ईद केळकु पिलातुस आंदुर से मात्त केळदुन, “रा यारी नीव यहूदीगोळव राजा अनतीर, आऊक ना येन माळाईन?”
13आंदुर मात्त चिळ्लासदुर, अदिक अंदुर “आऊक क्रूस मा येर्सबुळी!”
14पिलातुस आंदुर से अंदुन, “येती ईव येन बुराई माळ्यान?”
लेकीन आंदुर मात्त अदिक चिल्ळासदुर, “आऊक क्रूस मा येर्सबुळी!”
15आग पिलातुस भीळ इक खुश माळोद इच्छा देल, बरअब्बा अक आंदुर साठी बिट्ट बुटुन, अदिक यीशु उक कोळागोळ देल बळकु सौप्सदुर कि क्रूस मा येरसुल.
सैनिकगोळ द्वारा यीशु उन अपमान
(मत्ती २७:२७-३१; यूहन्ना १९:२-३)
16सैनिकगोळ यीशु उक किला अन्द बुळ्क राज्यपाल उन मान्ना अन्द आंगुळ दा ओतुर जो प्रीटोरियुम कहलुसतद, अदिक बाकी नोर रोमी सिपाईगोळी कारूकु तंदुर. 17आग आंदुर आऊक जांभळा रंग इन कपळा हाक्सुसदुर अदिक मुळ्ल इन मुकुट माळकु आऊन ताल्ला मा मंळ्सदुर, 18अदिक ईद अनकु आऊक नमस्कार माळली कुरतुर, “हे यहूदीगोळ राजा, नीन जय आगुल!” 19आंदुर आऊन ताल्ला मा सरकण्डा बडोर, अदिक आऊन मा ऊग्ळोर, अदिक ट्वांगरा टेक्सकु आऊक प्रणाम माळतेला ईत्तुर. 20याग आंदुर आऊंद मज्याक हार्सकोंड्डुर, रा आऊन मय मा कळ्व जाभळा रंग इन फळक्या ईळ्सकु आऊन अवा कपळा मात हाक्सुसदुर; अदिक आग आऊक क्रूस मा येरसोर साठी व्हार्या ओतुर.
यीशु उन क्रूस मा येरसोद
(मत्ती २७:३२-४४; लूका २३:२६-४३; यूहन्ना १९:१७-२७)
21 #
रोमियों १६:१३
आंदरी कुरेन ईनव ईरावाळा शमौन हेसुर ईनव मंळसा, हादी मा सिकदुन. आव ऊरी टु बरोन. अदिक आव सिकन्दर अदिक रूफुस उन आप्प ईरोन. सिपाहीगोळ आऊन मा जबरदस्ती दबाव हाकदुर कि आव यीशु उन क्रूस नेगुकु नळदान. 22आंदुर यीशु उक गुलगुता हेसुर इन जागा मा तंदुर, यदुर मतलब खोपळी इन जागा हुन. 23अल यीशु उक केय मसाला मीसळुस्द अंगुर इन रास्सा कोळली कुरतुर, लेकीन आव ताकोंडीदील. 24आग आंदुर आऊक क्रूस मा येर्सदुर अदिक आऊन कपळा मा चिट्ठी गोळ हाक्कु, कि यारीक येन सिक्कीत, अवरी वाट्स बुटुर. 25याग आंदुर आऊक क्रूस मा येर्सदुर रा व्हातरी नव ऊंम्बत मुरदिदव. 26अदिक आऊन दोषपत्र लिख्सकु क्रूस मा आऊंद ताल्ला अन्द म्याकुच चिपकुस बुटुर “यहूदीगोळ राजा.” 27आंदुर आऊन सांगुळ येढ्ढ डाकूगोळी भी क्रूस मा येर्सदुर, ऊंद डाकू उक ऊमा कय दी अदिक दुसरा डाकू उक डाक्या कय दी क्रूस मा येर्सदुर. 28आग पवित्रशास्त्र अन्द अद वचन कि आऊक अपराधीगोळ सांगुळ आळुकु आदीत, पुरा आत.#१५:२८ ईद वचन हाळोद शास्त्र दा लिख्सकु हैलेच
29 #
मरकुस १४:५८; यूहन्ना २:१९ अदिक हादी मा टु होगावाळेर ताल्ला हालु-हालुस्कु अदिक ईद अन-अनकु आऊंद अपमान माळतोगोर, “वाह. मंदिर इक केळावाळा, अदिक मुर दिन दा माळावाळा! 30तान तान इक ऊळ्स अदिक क्रूस मा टु ईळुकु बा.”
31ईदा रीति देल प्रधान याजक भी, शास्त्रीगोळ सांगुळ, आपस दा आऊंद मज्याक हार्सकु अनतोगोर, “ईव रा दुसरा अक ऊळस्यान,” लेकीन तान तान इक ऊळ्स सकालुन.
32इस्त्राएल इन राजा, मसीह, ईग क्रूस मा टु ईळ्दकु बर कि नाव नोळकु विश्वास माळेव. अदिक जो आऊन सांगुळ क्रूस मा येर्सकु आगीदुर, आंदुर भी आऊन नीम्दा माळतोगोर.
यीशु उन जीव त्यागसोद
(मत्ती २७:४५-५६; लूका २३:४४-४९; यूहन्ना १९:२८-३०)
33याग दुसरा पहर आत रा पुरा द्याश दा अंधार आगेत अदिक मुर मुरास ताका हांग अच ईत्त. 34अदिक मुर मुरा दी यीशु हापाळ धोळ्द शब्द दा चिल्ळास्कु अंदुन, “इलोई, इलोई, लमा शबक्तनी?” यदुर्द मतलब हुन, “हे नान परमेश्वर, हे नान परमेश्वर, नी नानी येती बिटबुट?”
35आग जो आऊन हात्ती ईरोर आंदुर दा टु आरधा लॉकुर ईद केळकु अनली कुरतुर, “नोळी, आव एलिय्याह अक कारेत्यान.” 36अदिक ऊंद मंळसा ओळकु स्पंज इक सिरके दा नेनाकदुन, अदिक सरकण्डे मा ईटकु आऊक नेक्सदुन अदिक अंदुन, “थाम्सेगी, नोळाता एलिय्याह आऊक ईळसोर साटी बरतान का ईला.”
37आग यीशु धोळ्द शब्द दा चिल्ळास्कु जीव बिट बुटुन.
38अदिक मंदिर इन परदा म्याकुच टु ल्यालमा ताका हरूकु येढ्ढ तुकळा आगेत. 39जो सुबेदार आऊन मुंद नीदुरकु ईरोन, याग आऊक हिंग चिल्ळास्कु जीव बीळतेला नोळदुन, रा आव अंदुन, “खरा ई आद ईव मंळसा, परमेश्वर उन पार ईरोन!”
40 #
लूका ८:२,३ हापाळ आर्तेर भी दुर टु नोळतोगोर: आंदुर्दा मरियम मगदलीनी, स्याणेव याकूब अदिक योसेस उन मोय मरियम, अदिक सलोमी ईरोर. 41याग आव गलील दा ईरोन रा इंदुर आऊंद हिंद आगेगोर; अदिक आऊंद स्यावा टहल माळतोगोर; अदिक दुसरा हापाळ आर्तेर भी ईरोर, जो आऊन सांगुळ यरूशलेम दा बंदीदुर.
यीशु उक नळसोद
(मत्ती २७:५७-६१; लूका २३:५०-५६; यूहन्ना १९:३८-४२)
42याग द्याव मुळकेत रा इदुरसाटी कि तयार इन दिन ईरोद, जो आराम इन ऊंद दिन पयले ईरतद, 43अरिमतिया नव ईरावाळा यूसुफ बंदुन, जो महासभा दव सदस्य ईरोन अदिक तावा परमेश्वर उन राज्य अन्द हादी कायोन. आव हिम्मत माळकु पिलातुस उन हात्ती होगकु यीशु उन लाश बेळदुन. 44पिलातुस उक आश्चर्य आत कि आऊंद जीव ईट जल्दी होटोत; अदिक आव सुबेदार उक कारूकु केळदुन, “येन आव सोतोग्यान?” 45याग आव सुबेदार उन बाय देल हाल केळदुन, रा लाश यूसुफ उक बेळ कोट्टुन. 46आग आव मलमल इन ऊंद चादर कोंडुन, अदिक लाश इक ईळ्सकु आ चादर दा गुंळ्सदुन, अदिक ऊंद कब्र दा जो चट्टान दा अगुळकु आगीत ईटदुन, अदिक कब्र अन्द दरवाजा मा ऊंद कल्ल ढकलुसदुन. 47मरियम मगदलीनी अदिक योसेस उन मोय मरियम नोळतोगोर कि आऊक येल ईटकु आग्याद.
Nu geselecteerd:
मरकुस 15: NTHaa20
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020
