Halloo 17
17
Wogee Malletoon Tuneti Dokireyoo
1Abraami yixenaa yiixiye nati asho bi tunehooba, Doono Yeeri biich bekkeꞌi ishichiye: “Beshe Hakkechi Nuggishoo taane. Bulli aaboon ta getoyich deꞌa getibee beebe. Muricaallo tunebe. 2Neennaa taanna daggooch ta wogoon geddemmo taane. Ne shiijjereenaꞌon oogichi meechemmo taane” iye.
3Abraamiyoo bi baroona showooch guufehe. Yeeriyoo biich ishichiye: 4“Neenna tookki ta giyemmi wogo ebine: Meeti aageteenaꞌoyich qaabbechi nihoo tunemmo neene. 5Meeti aageteenaꞌoyich qaabbechi nihoon neen ta tuniitoyich, ebiyee bekk ne shigo Abraami#17:5 Abraami geto, “Oogechi nihoo” getone. getaa ceekkeyaachemmone; tunebaani Abrahami#17:5 Abrahami geto, “Meeti aageteenaꞌochi nihoo” getone. getaa ceekkemmone. 6Ne shiijjereenaꞌon oogichi meechiree, aageteenaꞌo tuniyemmo taane; boonoshi daggoocheenoo taateenaꞌo tunemminaꞌo beetinaꞌone. 7Neennaa neyee gubbi ne shiijjereenaꞌonoyich Nuggishoo ta tunemmoyich, neennaa taanna daggooch, gubbi ne shiijjereenaꞌo bullinaa taanna daggoochoo, bulli yemeenee wogoon giyemmo taane. 8Ebi and dallaawoo tunaꞌa ne beeti Kanaanee showoo bullin, bulli yemeenoon ittoshi hajjoo bi tunemmoyich, neennaa neyee gubbi ne shiijjereenaꞌonoyich immemmo taane; boonoshichoo Nuggishoo tunemmo taane” iye.
9Yeeriyoo daakkiꞌi Abrahamich ishichiye: “Neennaa neyee gubbi ne shiijjereenaꞌona, boonoshi shiijjereenaꞌo bullinoo ta wogoon quyemmo ittoshine. 10Neennaa taanna daggooch, gubbi ne shiijjereenaꞌonaa taanna daggoochoo, ittoshi quyemmi wogo ebine: Ittoshi anaaminaꞌo bulli dokireebeete. 11Ittoshiyoo dokireyemmo ittoshine; ebiyoo taannaa ittoshina daggooch beeti wogee malletoo tunemmone. 12Gubbi ittoshi shiijjeroo bulliich beddaahaa, anaami bushoo bulli bi shiijjeti shimitte qemona dokireebe. Wotta ittoshi yaroo tuneyaanolla bi tunetaa, ittoshi kexooch shiijjeti guuno woyee bare showoochee gijjoona kemeeti guunolla tuneba, anaamo bulli dokireebe. 13Ittoshi kexooch shiijjeti guuno woyee ittoshi gijjoona kemeeti guunoo dokireebe. Ebina ta wogo bulli yemeenee wogo bi tunoon ittoshi achooch beeti malletoo bekkiyemmone. 14Dokireyaani anaamo bulli ta wogoon biichito bi tunetoyich, are asho bi asheenaꞌo daggoochee kichaa yookkebe” iye.
15Yeeri andoo daakkiꞌi Abrahamich ishichiye: “Ne mechee Saarayin ebiyee bekk Saarayi geti ceeggaahine. Ebiyee bekk bi shigo Saari#17:15 Saari geto, “Taatoo bushee” getone. getteebe. 16Ta biin diiremmo taane; anaami bushoon neech shiyemmine; biin diiremmo taane; aageteenaꞌoyichoo indee tunemmine; aageteenaꞌoyich taatoon tunemminaꞌo bi waanee kechemminaꞌone” iye.
17Arooba Abrahami bi baroona showooch guufehe; miicciibee bi mulloona ishichii gabiye: “Iberoon balle nati asho bushoon shiyehe? Yixena natteti Saariyoo shimon hakkehane?” iye. 18Biyoo Yeerich, “Taach ne gibenikkiti gibeno Ishmaꞌeel waanaa bi tuneto gaata shunnoye” iye.
19Yeeriyoo biich ishichiye: “Ebi tuneyaache. Iberoon ne mechee Saari anaami bushoon neech shiyemmine. Bi shigoonoo, Yisaaqi#17:19 Yisaaqi geto, “Miicciye” getone. geti shigiyemmo neene. Ta wogoon biinnaa biyee gubbi bi shiijjereenaꞌoyich bulli yemeenee wogoon tuniiree manjiyemmo taane. 20Wotta Ishmaꞌeelichon ne qolloon waayeto taane; biin diiremmo taane. Biyoo shiijje shiijjere bi meettemmoyich tuniyemmo taane; aaraa gutte iraasheenaꞌochi nihoo tunemmone; aricheti aagetoon biin tuniyemmo taane. 21Tunebaani waabeeti natooch ebi goora Saari neech shiyemmi bushoo Yisaaqichiye ta wogoon ta manjiyemmo” iye. 22Yeeri Abrahamina tookkii yibbaatoon bi ciichitoyee gubb, Abrahamiyee barii hammiye.
23Ebi arooba Abrahami, Yeeri biich bi gettitoommon, bi bushoo Ishmaꞌeelin, bi kexooch shiijjeti guuninaꞌonaa gijjoona bi kemeti guuninaꞌo bulloshin, bi kexooch beeti anaaminaꞌo bullinoo dokiriye. 24Abrahami bi dokireehooba, yixenaa yiixiye nati ashoone. 25Bi bushoo Ishmaꞌeeli bi dokireehooba, aaraa keejje nati bushoone. 26Ebi arooba Abrahaminaa bi bushoo Ishmaꞌeelina dokireeheete. 27Bi kexeexi anaaminaꞌo bulli, bi kexooch shiijjeti guuninaꞌonaa bare showoochee kemeeti guuninaꞌona biinna tookkii dokireeheete.
Nu geselecteerd:
Halloo 17: KBRC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
SIM International, 2020.
