Piligu 11
11
Babɛl du’ wɔɣinli mɛbu
1Piligu ni, zuliya yɛtɔɣ’ yini n-daa be dunia ŋɔ zaa ni, ka bɛ yɛtɔɣa daa nyɛ yɛtɔɣ’ yinsi. 2Ka niriba daa ti yiɣisi wulimpuhili polo n-chaŋchaŋ ti paai Shiina tiŋgbɔŋ ni bɔpiɛligu ni n-kpalim ʒini nimaani. 3Ka niriba maa daa ti yɛl’ taba, “Kamiyana ka ti ŋma bilichiisi n-nyo li buɣim viɛnyɛliŋga.” Ka bɛ daa ŋma bilichiisi maa ka di be kaman kuɣa la, ka zaŋ kootaali mi n-leei tandi. 4Ka bɛ daa yɛl’ taba, “Kamiyana ka ti me timaŋmaŋ’ tiŋa, ka me pii tam di zuɣu ka di du hal ka di zuɣusaa ti tɔri sagbana n-zali yuli, dama di yi pa lala, ti ni ti wurim gili dunia ŋɔ zaa.”
5Ka Yawɛ daa kana ni o ti nya ninsalinim’ ni me tin’ shɛli ka me pii tam di zuɣu maa. 6Ka Yawɛ daa yɛli, “Nyama, bɛ ni nyɛ zuliya yini ka mali zuliya yɛtɔɣ’ yini maa zuɣu ka bɛ tumdi lala maa, ka bɛ ni lo ni bɛ niŋ shɛm piligu n-na bɔŋɔ; ka binshɛli kani ka bɛ ni bɔri ni bɛ niŋ li ka di ku nani. 7Chɛliya ka ti chaŋ bɛ sani nti chɛ ka bɛ yɛtɔɣa woli taba, ka di chɛ ka bɛ ku lan tooi wum tab’ yɛtɔɣa.” 8Dinzuɣu ka Yawɛ daa wurim ba nimaani n-kpɛhi dunia ŋɔ luɣ’ shɛlikam zaa, ka bɛ daa chɛ tiŋ’ maa mɛbu. 9Ka bɛ daa boli nimaani yuli Babɛl#11.9 BABƐL: Hiburuli ni bɛ ni booni Babɛl shɛm mini bɛ ni booni “Gabbu” shɛm nyɛla yim., dama nimaani ka Yawɛ daa chɛ ka bɛ yɛtɔɣa woligiwoligi; nimaani ka o daa lan wurim ba kpɛhi dunia ŋɔ luɣ’ shɛlikam zaa.
Shɛm daŋ niriba
(1 Yɛlikura 1.24-27)
10Shɛm daŋ niriba yɛla m-bɔŋɔ. Shɛm ni daa ti paai yuun’ kɔbiga saha shɛli ka o daa dɔɣi Aripakishad, yuma ayi din daa doli dunia ŋɔ kom dibu nyaaŋa la. 11Shɛm ni daa dɔɣi Aripakishad maa nyaaŋa, o daa niŋla yuun’ kɔbisinu. O daa lan dɔɣi bidibisi mini bipuɣinsi pahi.
12Aripakishad ni daa ti paai yuun’ pihitanaanu saha shɛli ka o daa dɔɣi Shɛla. 13Aripakishad ni daa dɔɣi Shɛla maa nyaaŋa, o daa niŋla yuun’ kɔbisinahinaata. O daa lan dɔɣi bidibisi mini bipuɣinsi pahi.
14Shɛla ni daa ti paai yuun’ pihita saha shɛli ka o daa dɔɣi Ɛba. 15Shɛla ni daa dɔɣi Ɛba maa nyaaŋa, o daa niŋla yuun’ kɔbisinahinaata. O daa lan dɔɣi bidibisi mini bipuɣinsi pahi.
16Ɛba ni daa ti paai yuun’ pihitanaanahi saha shɛli ka o daa dɔɣi Pɛlɛg. 17Ɛba ni daa dɔɣi Pɛlɛg maa nyaaŋa, o daa niŋla yuun’ kɔbisinahi ni pihita. O daa lan dɔɣi bidibisi mini bipuɣinsi pahi.
18Pɛlɛg ni daa ti paai yuun’ pihita saha shɛli ka o daa dɔɣi Riu. 19Pɛlɛg ni daa dɔɣi Riu maa nyaaŋa, o daa niŋla yuun’ kɔbisiyinaawɛi. O daa lan dɔɣi bidibisi mini bipuɣinsi pahi.
20Riu ni daa ti paai yuun’ pihitanaayi saha shɛli ka o daa dɔɣi Sɛrug. 21Riu ni daa dɔɣi Sɛrug maa nyaaŋa, o daa niŋla yuun’ kɔbisiyinaayopɔin. O daa lan dɔɣi bidibisi mini bipuɣinsi pahi.
22Sɛrug ni daa ti paai yuun’ pihita saha shɛli ka o daa dɔɣi Nahɔr. 23Sɛrug ni daa dɔɣi Nahɔr maa nyaaŋa, o daa niŋla yuun’ kɔbisiyi. O daa lan dɔɣi bidibisi mini bipuɣinsi pahi.
24Nahɔr ni daa ti paai yuun’ pihitayinika saha shɛli ka o daa dɔɣi Tɛra. 25Nahɔr ni daa dɔɣi Tɛra maa nyaaŋa, o daa niŋla yuun’ kɔbiga ni pisiyinika. O daa lan dɔɣi bidibisi mini bipuɣinsi pahi.
26Tɛra ni daa ti paai yuun’ pisopɔin saha shɛli ka o daa dɔɣi Ibram mini Nahɔr so ni Haran.
Tɛra daŋ niriba
27Tɛra daŋ niriba yɛla m-bɔŋɔ. Tɛra daa nyɛla Ibram mini Nahɔr ni Haran ba; ka Haran mi daa nyɛ Lɔt ba. 28Ka Haran daa ti kani ka chɛ o ba, o dɔɣiritiŋ’ din daa nyɛ Ur ka be Kalidianim’ tiŋgbɔŋ ni la. 29Ka Ibram mini Nahɔr daa kpuɣi paɣiba. Ibram paɣ’ yuli n-daa booni Zarai, ka Nahɔr mi paɣ’ yuli booni Milika. Milika mini Isika ba n-daa nyɛ Haran. 30Amaa ka Zarai daa lee nyɛ paɣiŋoo; o daa ka bia.
31Ka Tɛra daa zaŋ o bia Ibram min’ o yaaŋa Lɔt ni Ibram paɣa Zarai m-pah’ omaŋ’ zuɣu, ka bɛ yi Ur din be Kalidianim’ tiŋgbɔŋ ni n-kuni Keenan tiŋgbɔŋ ni. Ka bɛ daa mali ti paai Haran n-kpalim ʒini nimaani. 32Ka Tɛra daa ti niŋ ŋun kani Haran tiŋgbɔŋ maa ni. Tɛra daa niŋla yuun’ kɔbisiyinaanu, ka naanyi yi dunia yili.
Nu geselecteerd:
Piligu 11: DBwDB
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Dagbani Bible with Deuterocanonical Books © Bible Society of Ghana, 2011.
