Matìyò 4
4
Deblə̀ Mwòmsə̀ Yesò
1Kəzhwì kəŋwoʼkə mù lyɨ̀ Yesò ə dyʉ̀ nə̀ wen a nsè zɨm ndi Deblə̀ mwòmsə wen tsu. 2Ghə̀ dyʉ̀ ə zaʼa tsu ə tsi mətsi məwum nkàʼ kò ghə̀ lə zhɨ kəfo. Fa bàm a tsu, jɨ̀ŋ mù sə zafə wen. 3Deblə̀ mù vì ə gàʼ a wen la,“A zhʉ a wu diʼi wàyn Nyìngòŋ, gàʼ li nguʼ sensə kaʼkə a kəfo kəzhɨkə, wù zhɨ.” 4Yesò bwènsə̀ gàʼ a wen la,“Və nyòʼ li a ŋwàʼlə̀ Nyìngòŋ la,‘Wìʼ’ ko zì ghə̀ tsi tò byìʼì kəfo kəzhɨkə, alì tsi byìʼì no kənyʉ̀ kə kò a Nyìngòŋ gàʼà.” 5Deblə̀ bè lyɨ̀ Yesò ə dyʉ̀ nə̀ wen a Jelusalèm à diʼ ntə̀ʼ ŋwoʼə, ə kuʼ tom ə wen a fədzuʼudzuʼu fə ngə̀ŋ Nyìngòŋ ghoʼo. 6Ə gàʼ à wen la, “Ando wù diʼ no wàyn Nyìngòŋ lə̀, tsoʼo a nsè byiʼàndo və nyòʼ li a ŋwàʼlə̀ Nyìngòŋ la Ghə̀ ne tɨmə ntsɨŋsə wen à wù a bàm, la sə ntsɨ̀ŋə̀ wù. Sə ne ghàʼ wù ə jèʼsə a kaŋ ndi nè la kə wù a tem kəghʉ kyèkə a nguʼ” 7Yesò bwènsə̀ gàʼ a wen la, “Və be nyòʼ a ŋwàʼlə̀ Nyìngòŋ la ‘Kə wù lə mwòmsə̀ Bobo Nyìngòŋ wù.’” 8Deblə̀ bè lyɨ̀ Yesò fa tsu ə kuʼ nə̀ wen a kətʉ kə pfen kə dyə̀fə kə ə dìʼ təloʼ tə mbi tèn no tətsèm à wen nə̀ ghoʼo yi a ghə̀ diʼì tsu. 9Ə mù gàʼ a wen la,“Ma ku fo a venə à wù no tsèm a zhʉ a wù gwʉtə alwi wu à mò ashɨ ə kuʼsə mò.” 10Yesò gàʼ à wen la,“Bwènə̀ fa mò a bàm a Satan! Və nyòʼ li a ŋwàʼlə̀ Nyìngòŋ la,‘Wù diʼi ə gumlə tò Bobo Nyìngòŋ wù bè shyèʼ tò a wen.’” 11Deblə̀ lù fà a wen a mbyɨ̀ no a zhʉ kò, ntsɨ̀ŋsə Nyìngòŋ sə vì mù sə lyè wen.
Yesò zìtə̀ shwèʼ wen a Galìlì
12Yesò nè zhʉ la və shwin nə̀ li Joyn a mfɨŋ, ghə̀ bwenə dyʉ̀ a Galìlì, 13ə dyʉ̀ kèn la ghə̀ ŋwʉʼli fàŋ a Nazalèt. Ghə̀ boŋsə̀ dyʉ̀ sə̀ tsi a ntə̀ʼ Kàbanùm a ben mo Galìlì a shə loʼ zebulùn nə̀ Naftalì. 14Kə ncho alì ndi lwinsə kənyʉ̀ kì a nshə̀ʼ tə̀ ghoʼo Nyìngòŋ Isayà nlù nyoʼ la, 15“A ghə̀ŋ viʼi Zebulùn nə̀ ghə̀ŋ viʼi Naftalì, à ghə̀ŋ vyi a ghə̀ŋ tsi a jì shə ndzèn mu Jodàn. A ghə̀ŋ viʼi ntɨm a Galìlì, ghə̀ŋ kɨ la, 16Viʼi vyi a və ntsi a kəbəŋ kə fenə̀ kə, lu yen bayn ghoʼ ghə̀, bayn vili a kətʉ viʼi vyi a və tsi ashə a kəndemndem kəpfʉ kə jèʼè tsu.” 17Əzìtə̀ fa mətsi ayì ədyʉ̀ nə̀ mbì, Yesò mù shə̀ʼtə̀ ntɨm Nyìngòŋ gàʼ à la,“Ghə̀ŋ kwetə tətyɨm təŋtə fa ghə̀ŋ a mbyɨsə byiʼàndo soʼ fòyn Nyìngòŋ boʼsə li.”
Yesò dzàŋ ndzɨ̀mtə̀sə bàm wen sə mbìsə sə̀ kàʼ
18Yesò sə jèʼè fa mbyɨ̀ mu Galìlì a kətsi kətsen kə ə yen vəlemə vətsen və bò, à diʼ Simùn yì a və be dzàŋ nə̀ Bità wenə Andɨ̀lò, vəwenə mòʼò dyʉ̀ nə̀ məlàm mə vəwenə mù kutə̀ shʉsə à mù diʼ shwèʼ vəwenə. 19Yesò gàʼ à vəwenə la,“Ghə̀ŋ vi ə dzɨ̀mtə̀ mò, mà ziʼi ghə̀ŋ, ghə̀ŋ mbòŋsə̀ kutə̀ viʼi.” 20No a zhʉ̀ kò, vəwenə ghʉsə məlàm mə vəwenə tsu ə dzɨ̀mtə̀ Yesò. 21Wenə vəwenə sə ndyʉ̀, Yesò bè yen vəlemə vətsen və bò, à diʼ Jems wenə Joyn, vunə Zebedì, vəwenə ŋwʉʼ a ngùʼ wenə tiʼi vəwenə temə məlàm mə vəwenə ghə̀ dzàŋ vəwenə. 22No a zhʉ kò, vəwenə lù fa ngùʼ ayì ə ghʉsə kanuʼ nə̀ tiʼi vəwenə ə dzɨ̀mtə̀ dyʉ̀ nə̀ Yesò.
Yesò sə̀ ziʼi be chʉʼʉ viʼi
23Yesò sə̀ jèʼè fa loʼ Galìlì no tsèm ziʼi a aloʼ ntsèntə̀ vəwenə, shə̀ʼtə̀ ntɨm jùŋə byìʼì soʼo fòyn Nyìngòŋ, be chʉʼʉ no nkì kwaʼa kò a viʼi nkiʼi. 24Soʼo gho kùmə̀ shwèʼ wen dyʉ̀ a loʼ Sylia no tsèm, viʼi mù sə̀ lyɨ̀ viʼi nə̀ tə nkì tə kwaʼa vì nə̀ vəwenə à Yesò. Və sə̀ vì nə̀ viʼi a və nzhʉ lɨ̀m njòsə wen no ŋàŋ, vì nə̀ vətsen və a və nkiʼi zhwì byɨvə bènə̀ viʼi kembvʉ bènə̀ viʼi mu və kwàʼkəli, Yesò chʉʼ vəwenə no vətsèm. 25Nòyn viʼi fʉ no ghoʼo, fa Galìlì, fʉ fa ntə̀ʼsə̀ wum, ə fʉ fa Jelusalèm, ə fʉ fa Judiyà nə̀ fa shə loʼ yi a ghə̀ ndiʼ a ndzèn mu mə Jodàn sə dzɨ̀mtə̀ Yesò.
Nu geselecteerd:
Matìyò 4: bbkDBLnt
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
