Luk 5
5
Yesò lyɨ̀ ndzɨ̀mtə̀sə bàm wen sə mbì
(Mat 4.18-22; Mak 1.16-20)
1A nə̀ sə diʼ a kətsi kətsenkə, Yesò dyʉ̀ tɨmə a mbyɨ̀ mo Gènesalèt sə shə̀ʼtə̀ kənyʉ̀ kə Nyìngòŋ nòyn viʼi vì sə fosə kwenə vì əzhʉtə. 2Ghə̀ yen və nkanuʼ və bò a mbyɨ̀ Amù mu viʼi vyì a və ə nku shʉsə fʉ̀li fa tsu ə ŋwʉʼmə a bàm ə sə shyə̀ʼ mə̀lam mə vəwenə. 3Ghə̀ kwen a ghə̀ muʼ a ndiʼi ghə̀ Simùn, ə gàʼ a wen la ghə̀ zəf ə kwentə dyʉ̀ nə̀ wen a mù. A ndiʼ ando Simùn nkwentəli dyʉ̀ nə̀ wen, ghə̀ shiʼi ŋwʉʼ tsu mù sə̀ dìʼsə viʼi.
4Ghə̀ nè gàʼà myètə̀ mù gàʼ a Simùn la, “Kwentə dyʉ̀ nə̀ nkanuʼ a ntìntìn amù, moʼ shiʼsə mə̀lam məŋə, a ghə̀ŋ a ku shʉsə.”
5Simùn bwènsə̀ gàʼ a wen la, “Yes tə tsi tò mə moʼ a Ti, kò yes lu ku kəfo, ali à sətsen à gàʼ wù alə̀, mà gàʼ, və bè moʼ shiʼsə.” 6Vəwenə mòʼ məlàm myì ə ku shʉsə no se ghoʼo mə̀lam mə vəwenə sə kəŋ tinkə. 7Vəwenə kabtə̀ viʼi jeʼ vəwenə la vəwenə vi ə gyàmtə̀ vəwenə, vəwenə vi nə̀ nkanuʼ tsen ə lwinsə və nkanuʼ na vyì və bò və sə̀ kəŋ shwemə a mù. 8A ndiʼ ando Simùn Bità nyenə kənyʉ̀ a kə nlyɨ̀ kəshi, ghə̀ shiʼi à wen alwi ashɨ Yesò ə gàʼ a wen la, “Lu fa mò a mbyɨ̀ a Tìʼ. Mà diʼ wu ə byɨ!”
9Ghə̀ ngàʼa ali byìʼì ando wen viʼi jèʼ wen ndiʼ nə̀ kaynə byìʼì shʉsə sə ghoʼsə shì a vəwenə nku. 10Vunə Zebedì vyì a və Simùn nshwèʼè a muʼu, a ndiʼi Jems nə̀ Joyn, bè ndìʼi nə̀ kàynə. Yesò mù gàʼ a Simùn la, “Kə wù be fàyn, əzìtə̀ fa luwen ədyʉ̀ mbì, wù ne nku viʼi.”
11Vəwenə nè bwènə̀ vì nə̀ və nkanuʼ və vəwenə a mbyɨ̀ amù ə ghʉsə no mə gho ə dzɨ̀mtə̀ dyʉ̀ nə̀ Yesò.
Yesò chʉ wù kənsòtə̀
(Mat 8.1-4; Mak 1.40-45)
12Yesò lu dyʉ̀ a ntə̀ʼ tsen, wìʼ vì mu kənsòtə̀ kə pfiʼli wenə wen no tsèm. Ghə̀ nə̀ yen Yesò ə vì ə fəŋ a wen ashɨ ə sensə wen la ghə̀ chʉʼ wen gàʼ la, “Tìʼ, wù sətsen kòŋ, wu chʉʼ mo.”
13Ghə̀ nàʼsə̀ kəvu kə wen ə kumə wen gàʼ la, “Ma kòŋ li, toli.” No a zhʉ kò, kənsòtə̀ a kyì mè fa wen a wen. 14Yesò tyɨftə wen la, “Kə wù a mwòm əshə̀ʼtə̀ a wìʼ,” ali “Dyʉ̀ diʼ wen wu a pfem ngə̀ŋ Nyìngòŋ ə ku kəku kyi a soʼ Mosìs gàʼa la wìʼ to fa kənsòtə̀, ghə̀ ku ndi viʼi kɨ la wu toli.”
15Ali soʼgho byìʼì Yesò zaʼa no shi tsèm nòyn viʼi vì əzhʉtə ando ghə̀ dìʼsə be vì la ghə̀ chʉʼ təkwaʼa tə vəwenə. 16Ali ghə̀ moʼtə vəwenə ə dyʉ̀ a kəshi, tò wen nyɨŋ ə jɨm.
Yesò chʉʼ wù kənkwaʼkə
(Mat 9.1-8; Mak 2.1-12)
17A sə ndiʼ kətsi kətsenkə tò mətsi ayì, Yesò sə nziʼi a kəshi, viʼi Falàsi nə̀ ndìʼsə̀sə təsoʼ sə ŋwʉʼ tsu, mu vəwenə fʉ̀ no fa ntə̀ʼsə tsèm a Galìlì nə̀ Judiyà bènə̀ Jelusalèm. A ndiʼ ali, kədyòʼ kə Bobo kə diʼ à wen ə ghə̀ chʉʼ təkwaʼa. 18Tò alə̀, viʼi sə vì nə̀ wìʼ mu ghə̀ kwaʼkəli, a kəbùŋ, sə kəŋ jì əkwen nə̀ wen a ngə̀ŋ yì a Yesò ndiʼ tsu ə nyòŋsə̀ wen a wenə ashɨ. 19Ali jì nko ndiʼ ə vəwenə kwen nə̀ wen byìʼì nòyn viʼi a ghə̀ ndiʼi. Vəwenə kuʼ nə̀ wen jì fa kətʉ kə ngə̀ŋ ə tsuʼ kəbʉ̀ʼ ə shiʼsə wen ə dyʉ̀ nə̀ wen a ntìntìn nòyn yì ə nyòŋsə̀ wen ashɨ Yesò. 20A ndiʼ ando ghə̀ nyenli byɨmə a vəwenə nkiʼi, ghə̀ gàʼ à wù kənkwaʼkə yì la, “Ma lyesəli nku mbyɨ shəsə!”
21Ndìʼsə̀ sə təsoʼ nə̀ və Falàsi zìtə̀ sə bèmə̀ à vəwenə ntyìntyìn la, “Ghèn diʼ ndo a ghə̀ telə̀ Nyìngòŋ alə̀ a? A lə zì a lyesə ku ndo mbyɨsə wìʼ, chò tò Nyìngòŋ a?”
22Ando Yesò nkɨ kənyʉ̀ vəwenə nkwòʼtə̀ ghə̀ bèm a vəwenə la, “Ghə̀ŋ kayntə nyʉ̀ və ne alə̀ byiʼ gho? 23A bwaʼmə kəkò, əgàʼ la, Və lyesəli nku mbyɨ shəsə mu, əgàʼ la, ‘Lu wù jeʼ lo?’ 24Ma diʼi a ghə̀ŋ luwen la Wàyn wìʼ kiʼi adyòʼ a kwi nse ə lyesə ku mbyɨsə viʼi.” Ghə̀ mù gàʼ a wù ə kənkwaʼkə yi la, “Mà gàʼ a wù la wù lu ə lyɨ̀ kəbùŋ kyə̀ ə pfwo.”
25A zhʉ ayì ghə̀ lù tò vəwenə ashɨ ə lyɨ̀ kəbùŋ kə wen a ghə̀ yi nyoŋ tsu sə̀ pfwo, ghoʼsə dyʉ̀ nə̀ Nyìngòŋ. 26Vəwenə sə diʼ nə̀ kàynə, fàyn ghaʼ vəwenə, vəwenə bwomsə Nyìngòŋ gàʼ à la, “Vəghəŋ yenli nyʉ̀ kàynə və layn!”
Yesò zhɨ wenə viʼi nə̀ nyʉ̀ byɨvə
(Mat 9.9-13; Mak 2.13-17)
27A bàm nyʉ̀ venə, Yesò bè sə ndyʉ̀ ə yen wù, tinə kənsè, zhiʼ wen diʼ Levì, ghə̀ ŋwʉʼ a tò yi a və tinə kənsè tsu, gàʼ a wen la, “Dzɨ̀mtə̀ mo.” 28No a zhʉ kò, ghə̀ ghʉsə fo tsèm ə dzɨ̀mtə̀ wen.
29Levì shə̀tə̀ no ntaʼ ghoʼo à wen à ngə̀ŋ à Yesò. Viʼi vì tsu no və ghoʼo boʼsə nə̀ viʼi tinə kənsè, wen vəwenə mù sə̀ zhɨ. 30Viʼi Falàsi vətsevə nə̀ ndìʼsə̀sə təsoʼ mù sə dèmkə̀ bèmə a ndzɨ̀mtə̀sə bàm Yesò la, “Byiʼi ghò a ghə̀ŋ zhɨ bè nyʉ ghə̀ŋ viʼi a və tinə kənsè bènə̀ viʼi nè nyʉ̀ byɨvə a?”
31Yesò bwènsə̀ gàʼ a vəwenə la, “Viʼi a və to ko kəŋ wù chʉʼʉ viʼi ali a kəŋ to viʼi və kwaʼa kə və. 32Mà ko vi ə tisə viʼi a və sə̀ kiʼi ntsìnə̀ tɨmə, mà vì byiʼ viʼi nè nyʉ̀ byɨvə ənè la vəwenə kwitə tətyɨm tə vəwenə.”
(Mat 9.14-17; Mak 2.18-22)
33Vəwenə gàʼ à Yesò la, “Ndzɨ̀mtə̀sə bàm Joyn sə mbamə chʉ̀, jɨ̀mə, ndə̀ŋndəŋ ando ndzɨ̀mtə̀sə Falàsi mbamə chʉ̀, bè jɨ̀mə̀ ali shəsə zhɨ tò zhɨ bè nyʉ ando vəwenə kòŋə̀.”
34Yesò gàʼ a vəwenə la, “Və la zì və byɨmə la viʼi mbam ə chʉ̀ a kəshi kə lam a, lɨmə wùwì bù tsu a? 35Kətsi kə lu vì, a və a lyɨ̀ lɨmə wùwì fa vəwenə a ntìntìn, ə lu nə̀ wen a vəwenə mu ne mbamə chʉ̀.”
36Ghə̀ gàʼ ali ə mò ngàyn tsen a ghə̀ ngàʼ à la, “Wìʼ ko zì ghə̀ lyɨ̀ kəbàs kə ndisə kə fikə ə baʼsə ndisə musə tsu. Wìʼ sətsen nè ali, mu ghə̀ byɨbsə ndisə fisə a shi tò kədyàŋ, ko kəbàs kə fi kyì à kusə ndisə musə shi. 37A diʼ ndə̀ŋndəŋ ando wìʼ zì kò ghə̀ lə̀ wye məlyʉ̀ʼ mə mfimə̀ a vəsaʼ və gwʉ̀ nyàm və muvə byìʼàndo ghə̀ sətsen nè alì məlyʉ̀ʼ a myì nè sə to ə bàytə̀ vəsaʼ, ghə̀ gho məlyʉ̀ʼ bè gho vəsaʼ. 38Və diʼi wye məlyʉ̀ʼ mə mfimə̀ a vəsaʼ və fivə. 39Gaʼa kò ghə̀ŋ kɨ la wìʼ a ghə̀ nyʉ məlyʉ̀ʼ mu mə toli, ghə̀ ko zì ghə̀ be kòŋ məlyʉ̀ʼ kenla mə toli, ghə̀ faŋ tò la, ‘Məlyʉ̀ʼ mə to, myì boŋ.’”
Nu geselecteerd:
Luk 5: bbkDBLnt
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
