Genesis 9
9
M’ag ni ngongliy Got u thilrow Noah
1Me tow’athnag Got Noah nge fapi pumo’on ni fak Noah ko re bugithin ni ba’aray ni yog ni ga’ar, “Ngam diyen gad nge yo’or pifakmed ni fan e pi’in ni owchemed e nge mang yad e ra pired u gubin yang u daken e fayleng. 2Urngin e gamanman nu fayleng, nib mu’un e arche’ ngay, nge gamanman nib achig, nge nig e bay ur pired ni yad ba tamdag ngomed. Yad gubin ni kan tayrad nga tan pa’med. 3Chiney e aram e rayag ni ngam longuyed urngin e gamanman mi gimed kay ni ku bod rogon e woldug ni gimed be kay; kug pi’ ngomed ni gubin ni nge mang ggan ngomed. 4Ri ta’a ban’en e bay ndab mu koyed: ufin ni ba’ e racha’ u fithik’, ya racha’ e bay e yafos u fithik’.#Lev 7:26, 27; 17:10–14; 19:26; Deu 12:16, 23; 15:23 5Ma fa’anra thang be’ e pogofan rok be’, ma yira gechignag. Ma re gamanman nra li’ be’ nge yim’, e bay gu thang e fan rok ni gechig rok. 6En nra thang e pogofan rok reb e girdi’ e ku bayi cheal be’ nge thang e pogofan rok. Ya girdi’ e ni ngongliy ni bod ya’an Got.
7“Thingar mu diyen gad nge yo’or pifakmed, ya nge yo’or e pi’in owchemed ngar pired u gubin yang u daken e fayleng.”
8Me ga’ar Got ngak Noah nge pifak ni pumo’on, 9“Chiney e nggu ngongliy e m’ag u thildad nge pi’in ni bayi sum ni owchemed, 10nge ngak urngin e pin’en nib fos ni bay romed, ni arche’, nge gamanman, ni urngin ban’en ni yib ko fare barkow nga but’. 11Ba’aray e thin ni ir e ngug ngongliy e m’ag u thildad ngay; gube micheg ngomed ndab ki kirebnag e ran bayay urngin e pin’en nib fos. Ma dabki kirebnag e ran bayay e fayleng.” 12-13Me ga’ar Got, “Bay gu tay e ragim rog nga fithik’ e manileng ni nge mang pow ko re m’ag ney ndabi m’ay bi’id ni kug ngongliy u thildad nge urngin e gamanman, bayi par ni pow ko m’ag rog ngak e fayleng. 14Gubin ngiyal’ ni gu ra gagiyegnag e manileng nge yib nga daken e fayleng, me yib i m’ug e ragim u fithik’ e manileng, 15ma aram e bay gu leamnag e tin kugog ni nggu rin’ ngomed nge ngak urngin e gamanman, ni aram e dabki kirebnag e ran urngin e pin’en nib fos bayay. 16Ngiyal’ nra m’ug e ragim u fithik’ e manileng e bay ggu’ ma aram mu gu leamnag fare m’ag ndabi m’ay biid, ni m’ag u thilig nge urngin e pin’en nib fos ni bay u daken e fayleng.” 17Miki ga’ar Got ngak Noah, “Ireray e pow ko fare bugithin ni kugog ngak urngin e pin’en nib fos ni bay u daken e fayleng.”
Noah nge pifak ni pumo’on
18Fapi pumo’on ni fak Noah ni rabad u lan fare barkow nga but’ e aram Shem nge Ham nge Jafeth (Ham e chitamngin Kanaan). 19Dalip i pumo’on ney ni fak Noah e yad e chitamngin urngin e girdi’ nu fayleng.
20Mi Noah e be’ nma woldug mma chugol gamanman, me ir e som’on ni yung bangi woldug ni grape. 21Ma nap’an ni mu’ i unum rok boch fapi wayin ni yib ko grape, me balyang ngay, me chuweg urngin e mad rok nge mol u lan e tent rok ni dariy e mad u daken. 22I Ham, ni chitamngin Kanaan, e fa’ani guy e chitamngin ni dariy e mad u daken, me yan nge weliy ngak fa gali pumo’on ni walagen. 23Ma aram me fek Shem nge Jafeth ba mad nib n’uw nga ron’ew nga daken porow miyow kol. Ma aram miyow yan nga keru’row ngalan fare tent miyow upunguy fare mad nga daken e chitamangirow; nranow ni kar changargow nga bang ni fan e nge dab ra guyew e chitamangirow ndariy e mad u daken. 24Ma fa’ani tamilangan’ Noah me nang e n’en nike rin’ e bin bitir i fak ni pumo’on ngak, 25me ga’ar:
“Nge bucheg Got wa’athan Kanaan!
Bayi par ni ir e sib rok e gali pumo’on ni walagen.”
26Miki ga’ar:
“Ke sorok SOMOL, ni Got rok Shem.
Bayi par Kanaan ni ir e sib rok Shem.
27Nge ayuweg Got Jafeth#9:27 JAFETH: Re ngachal ney ni Hebrew e gowa fare bbugithin ni “yo’or.” nge yo’or owchen!
Ma pi’in ni owchen e ngu’ur pired e tirok Shem e girdi’ u ta’bang.
Mi Kanaan e bayi mang sib rok Jafeth.”
28Tomuren ni tharey e ran e fayleng, me par Noah nib fos ni 350 e duw, 29me yim’ nike gaman 950 e duw rok.
Nu geselecteerd:
Genesis 9: YAP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2007 Bible Society of Micronesia. Released under the Creative Commons CC-BY-SA license 4.0.
