MATEO 5

Yesu Áte Betidi Asa Lǝ Kɔtini Ǝsuǝ.

1Se Yesu dínyǝ sitiditu sia dítǝkǝko wǝǝ, óbe úsu kɔtini kato nya úsiǝ kasɔ. Mfó nya wǝ bakasebi díbǝ wǝ ɔflɔ. 2Nya útsyiko mǝ asa bote nkǝ,

3“Onanto ákpo atsyɔ betidi ba nyi bǝ beyifo bakombo lǝ lɛwɔnɔ ǝsuǝ,

itsyise Onanto eto sekakedikɔ eyifo mǝ sele.

4Onanto ákpo atsyɔ betidi ba leewi kaminsǝku.

Mǝ Onanto loomansǝ lɛkɔ nɛ.

5Onanto ákpo atsyɔ betidi ba laabokosǝ ǝsuǝ kasɔ.

Mǝǝ ni mba luudi sɛkplɛ lǝ kasɔ kamfo eto bikǝ ǝsuǝ.

6Onanto ákpo atsyɔ betidi ba laakplatsya keklekle bǝ bǝǝsiǝ nkpǝ sɛɛ lǝ Onanto eto ǝnǝmi.

Mǝ ni mba luunyǝ asa nnya luuyuǝsǝ mǝ kafo nɛ.

7Onanto ákpo atsyɔ betidi ba lǝǝnyǝ mǝ bǝtsyuǝ kaminsǝ.

Onanto ebunyǝ mǝ kaminsǝ.

8Onanto ákpo atsyɔ betidi ba eto ketu lekpa kɛnkɛ.

Mǝ luunyǝ Onanto nɛ.

9Onanto ákpo atsyɔ betidi ba laalɔ bǝtsyuǝ nti kaboko diyuǝ.

Onanto ebokpo mǝ wǝ bebi tinti.

10Onanto ákpo atsyɔ betidi ba eto kama baati kate ohiã se bensi nkpǝ sɛɛ ekeyifo lǝ Onanto lelabi ǝsuǝ eso.

Onanto eto sekakedikɔ eyifo mǝ sele.

11“Onanto ákpo mi atsyɔ lǝ betidi aaka mi, kate mi ohiã nya baatɛyi bidia saa lǝ mi ǝsuǝ se bitǝkǝko mɛ eso. 12Binyǝ disuǝyuǝ lǝ beto keyudu, itsyise mi kayofofo fui lǝ Onanto eto kato. Nko ke ete báte Onanto eto bǝnyɛlǝkǝtidi ba lɛtɔ mi sɛtɔ ohiã nɛ.

Mba Ntǝkǝko Yesu Eyifo Fe Mmba Ku Diyǝnde.

13“Bite fe mmba bitǝ betidi ba kenke. Fɛɛ lǝ kamini ábɔ lǝ mmba bomǝ ǝsuǝǝ, ǝnsiǝmbofo kamini bokpe lǝ mu bio. Nya se bunsibǝ kutǝkǝ saa esoo, buwui hã ele bǝ befi mu bewui lǝ betidi lǝ bayɛ lǝ mu ǝsuǝ bafe.

14“Biyifo fe diyǝnde bitǝ kawunsiǝ kenke. Umǝ wǝ bála bǝtǝkǝ lǝ kɔtini ǝsuǝǝ, ambiɔ. 15Kuutsyuǝ saa anto okandiɛ kefi asa keti wǝ. Bomu bufi beefi wǝ kǝtǝkǝ lǝ wǝ kǝtǝkǝkɔ ǝsuǝ kaka wuutǝ diyǝnde utsyuǝ saa wǝ nkpe lǝ diyo nǝmǝ. 16Nko ke ele bǝ mi okandiɛ yǝnde utǝ lǝ betidi lǝ bǝnyǝ nɛ. Bǝ lǝ bǝnyǝ asa sɛɛ nnya bieyifo lǝ befi atɛsǝ bǝtǝ mi Anto wǝ nkpe kato.”

Yesu Ǝbǝ Kawunsiǝ Bǝ Lǝ Ubǝ Ɔflɔsǝ Asa Nnya Moses Léte.

17Yesu esi ɔ́tɛyi nkǝ, “Biembu biǝ mbǝ miǝ maninsǝ Moses eto afi nnya ókpe, nye Onanto eto bǝnyɛlǝkǝtidi léte. Mǝmbǝ miǝ maaninsǝ nnya kon. Bomu mbǝ miǝ lǝ mbǝ mflɔsǝ nnya. 18Nya nla miǝ bete sitinti minkǝ, lǝ kase kato ku kasɔ nsi nkpee, kulesa saa embɔbɔ lǝ kɔfi komǝ ǝsuǝ isu ese lefe nǝ lesa saa luubǝ elo. 19Lǝ nyaso lǝ utsyuǝ ataka uńyǝ lǝ kɔfi komǝ eto lesa sɛkɛ ditsyuǝ ǝsuǝǝ, nya ote betidi bamba nkǝ mǝ tsya yifo nkoo, boofi wǝ fe ɔfɛfɛ lǝ Onanto eto sekakedikɔ. Fɛɛ utidi wǝ ke luuyifo lǝ kɔfi komǝ ǝsuǝ nya woote betidi bamba tsya nkǝ beyifo nkoo, boofi wǝ fe ɔkplɛnyǝ tinti lǝ Onanto eto sekakedikɔ. 20Nyaso nlɛ mi bɔtɛyi wuee minkǝ, fɛ biofo Onanto eto sekakedikɔ budufǝǝ, ele bǝ bisiǝ nkpǝ sɛɛ lǝ Onanto eto ǝnǝmi bo lɛlɛkɛ bonso kase kɔfi eto bateasa ku Farisifɔ kulaa tsya nsi.

Yesu Áte Asa Itsyi Lǝ Lɛblɔfi Ǝsuǝ.

21“Kɔɔ bɛnɔ bátɛyi betidi bǝnkǝ, ‘Manlo utidi.’ Nya utidi wǝ leeyifo nkoo, ele bǝ bakponko wǝ lekpo. 22Fɛɛ mɔmɔɔ, mɔ lɛ mi bɔtɛyi minkǝ, utsyuǝ saa ke luunyǝ ɔblɔ lǝ wǝ ɔyimi ǝsuǝǝ, bookponko wǝ lekpo. Nya utidi wǝ tsya lɔɔtɛyi wǝ ɔyimitsyuǝ nkǝ, ‘Eyifo utidi bimbaa,’ bookpa wǝ besuko beninǝ eto ǝnǝmi. Nya utidi wǝ lɔɔtɛyi wǝ ɔyimitsyuǝ nkǝ, ‘Eyifo ubukii,’ Onanto ebunǝ wǝ koto lǝ ditefɛnku manlo kǝmiǝ. 23Nyaso lǝ ibǝ bǝ efi fǝ ǝtǝsa atɔnko lǝ Onanto kedikǝtǝkɔ eto leba ǝsuǝǝ, nya fakloma fǝ lesatsyuǝ kpe lǝ fǝ ku fǝ ɔyimitsyuǝ lenti, 24yani fǝ kedi kamǝ ǝtsyǝ lǝ Disumuyo mfó lǝ esu lǝ fonko fǝ ɔyimitsyuǝ lǝ bekpo ntu lǝ bǝtsyuǝ nti fɛ lǝ efi fǝ kedi kamǝ esu ǝtǝ Onanto.

25“Lǝ utsyuǝ aala nkǝ weefi fǝ usuko kɔfi ɔflɔɔ, bɛbɛ lefe lǝ fonko wǝ lǝ bɛlɔ bǝtsyuǝ nti. Lenni nkoo, lǝ fonko wǝ esu lekpo etii, utidi ǝmfo ebufi fǝ okpe lǝ okponkpo eto ani. Nya wuntsya luufi fǝ okpe mba lɛmuǝ betidi eto ani nya bookpe fǝ lǝ diyo. 26Nya nlɛ fǝ bɔtɛyi kasini minkǝ ebɔkɛ lǝ mfó isu ese lefe nǝ foofo kayo ka fensi alosǝ.

Yanle Bǝ Bǝsǝ Ku Bǝsiǝ Fe Bǝtsyuǝ Kama.

27“Bɛnɔ bátɛyi bǝnkǝ, ‘Yanle bǝ bǝsǝ ku bǝsiǝ fe bǝtsyuǝ kama.’ 28Fɛɛ mɔ lɛ mi bɔtɛyi minkǝ utsyuǝ saa kee loobe usionko nya wɔɔkɛ wǝ ɔkɔɛɛ, ókpo wǝ lǝ wǝ utu kǝmiǝ koko. 29Nyaso lǝ fǝ kodiani eto dinǝmi ǝǝtǝ nkǝ dufǝ lǝ lebua ǝsuǝǝ, lǝkǝ ni ato akpe. Ɛlɛkɛ itǝ fǝ bǝ nyansǝ fǝ ǝsuǝ eto lekpa ditsyuǝ enso bǝ befi fǝ utidi ǝmǝ kenke bato bakpe lǝ utemanlo kǝmiǝ. 30Nya lǝ fǝ kodiani ǝǝtǝ fǝǝyifo lebuaa, la ko ato akpe. Ɛlɛkǝ itǝ fǝ eso bǝ nyansǝ fǝ ǝsuǝ eto lekpa lɔni enso bǝ fǝ utidi ǝmǝ kenke dufǝ lǝ utemanlo kǝmiǝ.

Yesu Áte Asa Itsyi Lǝ Kusǝnini Ku Kusiǝnini Ǝsuǝ.

31“Bátɛyi bǝnkǝ, ‘Utsyuǝ saa ke lɔɔni wǝ usiǝǝ, ele bǝ utǝ wǝ kukue nkǝ ɔ́ni wǝ.’ 32Fɛɛ nlɛ mi bɔtɛyi minkǝ, lǝ osani utsyuǝ áni wǝ usiǝ, nya yanyɛ lǝ disenkpo ǝsuǝ esoo, osani ǝmǝ dítǝ usio ǝmǝ lekpo kusǝ. Nya dimanyɛ lǝ osani wǝ ke luufi usio ǝmǝ tsya ákpo kusiǝ.

Yesu Áte Asa Itsyi Lǝ Asakpadikpadi Ǝsuǝ.

33“Kɔɔ bɛnɔ tsya bátɛyi betidi bǝnkǝ, ‘Mankpadi asa esi etudi kɛnyɛ lǝ nnya ǝsuǝ. Bomu yifo lǝ ntamu bo faka fǝtǝ Bonamute ǝsuǝ.’ 34Fɛɛ mɔmɔɔ, nlɛ mi bɔtɛyi minkǝ mankpadi asa ǝtsyǝ kɛnyɛ saa. Mankpadi asa nnya nkpe kato itsyise Onanto eto lekankpomɛ ni mfó. 35Mankpadi asa nnya nkpe lǝ kasɔ tsya itsyise Onanto eto akpa eto kǝtǝkɔ ini. Nya mankpadi Yerusalem, itsyise mfó ni baka eto Oka wǝ ni Ǝsuǝalenyǝ Kenke eto umǝ nɛ. 36Mankpadi fǝ disi tsya itsyise ǝmbǝ ǝsuǝale foofo fǝ disi eto sɛwɔni eto lɛ ɔni buyifo uflubi lee ona. 37Tǝ lǝ mi ee lǝ iyifo ee, nya lǝ mi oowo lǝ iyifo oowo ete. Lesa bamba sa enso nyamfo eto bɔtɛyii, etsyi lǝ olontidi ǝmǝ ɔflɔ.

Yesu Áte Bo Nkǝ Boantisǝ Oko.

38“Bɛnɔ bátɛyi bǝnkǝ, ‘Bafo dinǝmi lǝ dinǝmi eto kɛnyɛ, nya lɛnyi lǝ lɛnyi eto kɛnyɛ.’ 39Fɛɛ mɔmɔɔ, mɔ lɛ mi bɔtɛyi minkǝ, mantisǝ fǝ ɔyimitsyuǝ eto kabua ka úyifo eto oko. Lǝ utsyuǝ ásɔ fǝ lǝ kodianitosii, tsyi nkonse tsya ǝtǝ wǝ. 40Nya lǝ utsyuǝ aala nkǝ woasama fǝ lǝ ofo fǝ awu katoo, wuninsǝ fǝ kafia tsya ǝtǝ wǝ. 41Nko ke lǝ ǝsuǝalenyǝ eto utsyuǝ anyikǝ fǝ okpe nkǝ tsyi wǝ bikǝ lǝ bɛyɛ disunkpo lɔnii, yɛnko wǝ nnya ǝnuǝ. 42Lǝ utsyuǝ atɔ fǝ lesatsyuǝ, fi ni ǝtǝ wǝ. Nya lǝ utsyuǝ tsya atɔ nkǝ dia lesa ǝtǝ wǝ, dia ni ǝtǝ wǝ.

Yesu Áte Bo Nkǝ Bola Bo Balo.

43“Bɛnɔ bátɛyi bǝnkǝ, ‘La fǝ bayɛtsyuǝ lǝ ekisi fǝ olo!’ 44Fɛɛ mɔmɔɔ, nlɛ mi bɔtɛyi minkǝ bela mi balo lǝ beto ola lǝ mba leekisi mi eto disi. 45Bǝ lǝ befiani Onanto wǝ nkpe kato eto bebi tinti. Itsyise wǝ lǝǝtǝ kofe laafa kǝtǝ betidi bua ku mba leeyifo kasɛɛ kenke tsyɛtsyɛɛtsyɛ. Nya ɔsɔmi tsya laani kǝtǝ betidi ba leeyifo kasɛɛ ku mba leenyifo kasɛɛ ta. 46Lǝ betidi ba laala mi ete mi tsya laalaa, nte kayofofo ka Onanto luutǝ mi. Nko ke te mba laafo umǝnko kula tsya leeyifo nɛ. 47Nya lǝ mi bayɛtsyuǝ mate ete biǝsiǝsǝǝ, nyalɛ bienyifo tɔ kulesa nǝ eto ani ele bǝ basɔ mi. Mamfokanɔfɔ tsya eyifo nko ke. 48Bomuu, bɛflɔ fe kase mi Anto wǝ nkpe kato lɛflɔ seka.

Nu geselecteerd:

MATEO 5: LIP

Markering

Deel

Kopiëren