Lukas 21

Tug Pujntsuag Tso Nyaj

(Malakaus 12:41-44)

1Yexus tsaa qhovmuag saib, Nwg pum cov tuabneeg npluanuj taabtom tso puab tej nyaj rua huv lub thawv tso nyaj kws nyob huv lub Tuamtsev, 2hab Nwg pum ib tug pujntsuag pluag-pluag taabtom tso ob lub nyuas txaj toog lab miv-miv rua huv. 3Yexus has tas, “Kuv qha rua mej tas, tug pujntsuag kws pluag-pluag nuav tso ntau dlua lwmtug huv tuabsi. 4Ruaqhov lwmtug muab tej kws seem ntawm puab txuj kev npluanuj xwb; tabsis tug puj nuav txawm yog nwg tub pluag npaum le ntawd los nwg tseem muab taagnrho qhov nyaj kws yug nwg txujsa tuaj tso.”

Yexus Has Txug Lub Tuamtsev Yuav Puamtsuaj

(Mathais 24:1-2; Malakaus 13:1-2)

5Cov thwjtim qeeleej sisthaam txug lub Tuamtsev hab qhuas qhov kws luas muab tej pobzeb zoo-zoonkauj lug ua, hab tej khoom kws luas coj tuaj fij rua Vaajtswv. Yexus has tas, 6“Tej kws mej pum nuav, yuav muaj ib lub sijhawm, tej txhibzeb kws luas muab tib ib lub tshooj ib lub ntawd, txhua lub yuav pluam nyag nyob nyag taag huv tuabsi.”

Kev Txomnyem Hab Kev Tsimtxom

(Mathais 24:3-14; Malakaus 13:3-13)

7Puab nug Yexus has tas, “Xwbfwb, thaus twg maamle muaj tej nuav? Hab yuav muaj dlaabtsi tshwm lug qha rua peb paub tas tub txug lub sijhawm kws muaj tej ntawd lawm?”

8Yexus has tas, “Mej yuavtsum ceevfaaj, tsi xob ca leejtwg ntxag tau mej yuamkev. Yuav muaj ntau leej tuaj ntawm Kuv lub npe tuaj has rua mej tas, ‘Kuv yog Nwg!’ hab ‘Lub sijhawm tub lug txug lawm!’ Tabsis mej tsi xob caum puab moog. 9Thaus mej nov txug kev tsuv kev rog hab kev ntxeev teb ntxeev chaw, mej tsi xob ntshai. Yeej yuav xub muaj tej ntawd uantej, tabsis tsi tau txhais has tas tub txug lub sijhawm kawg lawm.”

10Yexus has tas, “Ib lub tebchaws yuav sawv tawmtsaam ib lub tebchaws; ib tsaav tuabneeg yuav sawv tawmtsaam ib tsaav tuabneeg. 11Yuav muaj aav qeeg luj heev, yuav muaj kev tshaib kev nqhes, hab yuav muaj ntau yaam mob kis moog thoobplawg txhua qhov; yuav muaj tej yaam txawv-txawv hab txaus ntshai tshwm sau nruabntug.

12“Tabsis uantej kws yuav muaj tej ntawd, yuav muaj tuabneeg nteg mej hab tsimtxom mej; puab yuav coj mej moog has plaub huv tej tsev saablaaj hab muab mej kaw rua huv tej tsev lojcuj, puab yuav coj mej moog cuag tej vaajntxwv hab tej numtswv, vim Kuv. 13Thaus ntawd yog lub sijhawm kws zoo rua mej qha Txuj Moo Zoo. 14Mej tsi xob txhawj uantej has tas mej yuav tivthaiv mej tugkheej lecaag, 15ruaqhov Kuv yuav pub tej lug teb hab tswvyim rua mej kuas mej cov yeebncuab yuav tsi muaj cuabkaav teb taug mej lossis tawmtsaam tau mej. #Lukas 12:11-12 16Mej nam mej txiv, mej tej kwvtij, tej neejtsaa hab tej phoojywg yuav muab mej coj moog cob rua tej numtswv, hab luas yuav muab mej qeeleej tua povtseg. 17Txhua tug yuav ntxub mej vim mej yog cov kws ntseeg Kuv. 18Tabsis txawm yog ib txuj nyuas plaubhau sau mej lub taubhau los yuav tsi pluj moog. 19Qhov kws mej sawv khovkho ntawd, mej yuav tau txujsa.

Yexus Has Txug Lub Nroog Yeluxalees Yuav Puamtsuaj

(Mathais 24:15-21; Malakaus 13:14-19)

20“Thaus mej pum tej tubrog tuaj vij lub nroog Yeluxalees, tes mej yuav paub tas tsi ntev lub nroog ntawd yuav raug puamtsuaj. 21Thaus ntawd cov tuabneeg kws nyob huv xeev Yudas, yuavtsum tsiv moog rua peg tej roob; cov kws nyob huv nroog cale tsiv tawm, hab cov kws nyob peg tej yaajsaab, tsi xob tsiv moog rua huv nroog. 22Ruaqhov lub sijhawm ntawd yog ‘Sijhawm Rautxim,’ kuas tav lawvle txhua nqai kws tau sau ca rua huv Vaajtswv tej Lug lawm. #Hauxe 9:7 23Lub sijhawm ntawd tej quaspuj kws suab mivnyuas hab tej quaspuj kws muaj mivnyuas mog noj mig yuav txomnyem kawg nkaus le! Lub tebchaws nuav yuav raug kev txomnyem kawg nkaus le, hab Vaajtswv yuav rautxim rua cov tuabneeg nuav. 24Ibtxha yuav tuag rua nav ntaaj nav rag, hab ibtxha yuav raug nteg moog kaw rua txhua lub tebchaws; hab Lwmtsaav Tuabneeg yuav tuaj tsuj lub nroog Yeluxalees moog txug rua nub kws taag puab lub sijhawm.

Tuabneeg Leejtub Yuav Lug

(Mathais 24:29-31; Malakaus 13:24-27)

25“Thaus ntawd yuav muaj tej cim tshwm rua sau lub nub, lub hli, hab tej nubqub. Txhua lub tebchaws huv nplajteb nuav yuav txomnyem heev, hab yuav ntshai txug tej suab dlej havtxwv kws ndlaas hab nphau. #Yaxaya 13:10; Exek 32:7; Yau 2:31; Tshwm 6:12-13 26Tej tuabneeg yuav cale tsausmuag vim txuj kev ntshai hab togntsoov seb yuav muaj dlaabtsi lug raug lub nplajteb nuav, ruaqhov tej kws muaj fwjchim sau nruabntug yuav uazug koog. 27Thaus ntawd suavdlawg yuav pum Tuabneeg Leejtub tshwm sau cov fuab lug, nrug Nwg lub fwjchim hab tug tshwjchim kws ci ntsaa-ab. #Dani 7:13; Tshwm 1:7 28Thaus kws tseem taabtom pib muaj tej nuav, mej cale sawvntsug hab tsaa taubhau, ruaqhov mej txuj kev cawmdlim tub lug ze lawm.”

Kawm Txug Tsob Txiv Ncuavpas

(Mathais 24:32-35; Malakaus 13:28-31)

29Yexus has zaaj lug pevtxwv nuav rua puab noog: “Mej sim saib tsob txiv ncuavpas hab txhua yaam ntoo. 30Thaus mej pum tej ntoo ntawd pib hlaav nplooj, mej paub tas tub yuav txug lub caij ntuj kub. 31Ib yaam nkaus le ntawd, thaus mej pum tej ntawd tshwmsim, mej yuav paub tas Vaajtswv lub Tebchaws tub lug ze lawm.

32“Ncuntsoov tas txhua yaam nuav yuav tshwmsim uantej cov tuabneeg tam nuav tuag taag. 33Lub ntuj hab lub nplajteb yuav pluj moog, tabsis Kuv tej lug qha yuav tsi pluj hlo le.

Yuavtsum Ceevfaaj

34“Mej yuavtsum ceevfaaj, tsi xob ca mej lub sab qaug rua kev noj kev haus, hab najnub txhawjxeeb txug mej lub neej, nyobtsaam nub ntawd cale lug txug rua thaus mej tsi ncu ceevfaaj 35zoo ib yaam le rooj yej. Ruaqhov nub ntawd yuav lug raug rua txhua leej txhua tug kws nyob thoobplawg huv lub nplajteb nuav. 36Ncuntsoov ceevfaaj zuv tog txhua lub sijhawm, najnub thov Vaajtswv paab kuas mej muaj peevxwm nyaj taug txhua yaam kws yuav muaj lug nuav, hab moog sawv taug ntawm Tuabneeg Leejtub lub xubndlag.”

37Yexus najnub qha huv lub Tuamtsev, tabsis thaus tsausntuj Nwg moog pw peg lub Roob Txiv Ntoo-Roj. #Lukas 19:47 38Txhua taagkig, tej tuabneeg suavdlawg sawvntxuv moog noog Yexus qhuabqha huv lub Tuamtsev.

Nu geselecteerd:

Lukas 21: HNJ2022

Markering

Kopiëren