Lukas 15

Tug Yaaj Kws Pluj Lawm

(Mathais 18:12-14)

1Muaj ib nub thaus cov tuabneeg sau se hab cov tuabneeg txhum tuaj noog Yexus qha, 2cov Falixais hab cov xwbfwb kws qha Kevcai txawm ywg has tas, “Tug txivneej nuav txaistog cov tuabneeg txhum hab nrug puab noj mov uake!” #Lukas 5:29-30 3Yogle ntawd, Yexus txhaj has ib zaaj lug pevtxwv rua puab noog has tas:

4“Pevxaam has tas ib tug ntawm mej cov nuav muaj ibpuas tug yaaj tabsis ib tug cale pluj lawm, tug tswv yaaj yuav ua lecaag? Nwg yeej yuav tso cuajcaum-cuaj tug yaaj rua tom tshaav zaub, hab moog nrhav kuas tau tug yaaj kws pluj lawm. 5Thaus nwg nrhav tau lawm, nwg yuav zoosab heev hab muab tsaws hlo rua sau xubpwg 6kwv rov lug tsev. Tes nwg txawm hu nwg tej phoojywg hab tej kwvtij zejzog tuaj uake hab has rua puab tas, ‘Mej cale nrug kuv zoosab, ruaqhov kuv tub moog nrhav tau kuv tug yaaj kws pluj lawm!’ 7Ib yaam nkaus le ntawd, Kuv qha rua mej has tas, thaus ib tug tuabneeg txhum tso nwg tej kev txhum tseg, mas sau ntuj ceebtsheej yuav muaj kev zoosab rua nwg heev dlua le cuajcaum-cuaj tug tuabneeg ncaajnceeg kws puab tsi cheemtsum yuav tso puab tej kev txhum tseg.

Npib Nyaj Kws Pluj Lawm

8“Lossis pevxaam has tas muaj ib tug quaspuj muaj kaum lub npib nyaj tabsis ib lub cale pluj lawm. Tug quaspuj ntawd yuav ua lecaag? Nwg yeej yuav taws teeb, cheb txhuanrho nwg lub tsev, hab ua tuabzoo tshawb nrhav txhua qhov chaw kuas tau lub npib nyaj ntawd. 9Thaus nwg nrhav tau lawm, nwg txawm hu nwg tej phoojywg hab tej tuabneeg zejzog tuaj uake hab has rua puab tas, ‘Mej cale nrug kuv zoosab, kuv tub nrhav tau kuv npib nyaj kws pluj lawm!’ 10Ib yaam nkaus le ntawd, Kuv qha rua mej has tas, thaus ib tug tuabneeg txhum tso nwg tej kev txhum tseg, mas Vaajtswv cov timtswv ceebtsheej yuav zoosab kawg nkaus.”

Tug Tub Kws Pluj Lawm

11Yexus has ntxiv has tas, “Muaj ib leejtxiv kws muaj ob tug tub. 12Tug tub yau has rua nwg txiv has tas, ‘Txiv, thov koj muab tej teejtug kws yog kuv feem lug rua kuv.’ Yogle ntawd, leejtxiv txhaj muab nwg tej teejtug lug faib rua nwg ob tug tub.

13“Nub puav tomqaab ntawd, tes tug tub yau txawm muab nwg tej teejtug muag hab nqaa cov nyaj ntawd tsiv moog rua lwm lub tebchaws kws dleb-dleb, hab muab nwg tej nyaj ntawd siv ua-dlog ua-dlig taag. 14Tomqaab nwg muab nwg tej nyaj siv taag lawm, txawm muaj kev tshaib nqhes thoobplawg lub tebchaws, tabsis nwg yeej tsi tshuav dlaabtsi le lawm. 15Yogle ntawd, nwg txhaj moog thov ua zug rua ntawm ib tug txivneej kws yog pejxeem huv lub nroog ntawd, tug yawm ntawd txhaj khaiv nwg moog yug npua tom teb. 16Nwg xaav noj cov plhaub taum kws cov npua taabtom noj ntawd kuas tsau plaab, tabsis tsi muaj leejtwg yuav muab rua nwg noj le.

17“Thaus nwg pum nwg tugkheej zoole ntawd lawm, nwg txhaj has tas, ‘Taagnrho kuv txiv cov tubzug puavleej muaj noj seem noj so, uacaag kuv ho tshaib plaab tshuav tuag nyob rua ntawm nuav! 18Kuv yuav sawvtseeg rov moog cuag kuv txiv hab has rua nwg tas, “Txiv, kuv tau ua txhum rua Vaajtswv hab tau ua txhum rua koj lawm. 19Kuv tsi tsimnyog kws yuav ua koj tug tub ntxiv lawm; thov koj suav kuv ib yaam le kuv yog koj ib tug tubzug xwb.” ’ 20Tes nwg txawm sawvtseeg taug kev rov moog cuag nwg txiv.

“Thaus nwg tseem nyob hov dleb kws tsi tau txug tsev, nwg txiv txawm pum nwg; nwg txiv hlub nwg kawg nkaus, nwg txiv txawm dlha loo moog hab puag nkaus nwg hab nwj kag nwg. 21Tug tub has rua leejtxiv tas, ‘Txiv, kuv tau ua txhum rua Vaajtswv hab tau ua txhum rua koj lawm. Kuv tsi tsimnyog ua koj tug tub ntxiv lawm.’ 22Tabsis leejtxiv has rua nwg cov tubqhe tas, ‘Mej cale kawgkag nqaa lub tsho ntev kws zoo tshaajplawg tuaj rua nwg naav. Muab lub nplhaib rua nwg coj hab muab khau rua nwg rau. 23Moog muab tug xyuas nyuj kws rog-rog coj lug tua ua ib rooj mov rua suavdlawg noj ua kev zoosab! 24Ruaqhov kuv tug tub nuav tub tuag lawm tabsis nwgnuav rov cajsa lawm; nwg tub pluj lawm tabsis nwgnuav rov nrhav tau lawm.’ Tes suavdlawg txawm pib nojhaus ua kev zoosab.

25“Lub sijhawm ntawd tug tub hlub tseem nyob tom teb. Thaus nwg rov tom teb lug yuav txug tsev, nwg nov tej suab raaj suab nkauj nogncaas hab suab seevcev huv tsev tuaj. 26Yogle ntawd, nwg txhaj hu ib tug tubqhe tuaj hab nug has tas, ‘Puab ua dlaabtsi huv tsev?’ 27Tug tubqhe ntawd teb tas, ‘Koj tug kwv rovqaab lug lawm. Koj txiv tau muab tug xyuas nyuj kws rog-rog lug tua noj, ruaqhov koj tug kwv rov lug, nwg tseem nojqaab nyobzoo.’

28“Tug tijlaug chim heev, nwg txhajle tsi kaam moog rua huv tsev. Yogle ntawd, nwg txiv txhaj tawm tuaj thov kuas nwg moog huv tsev. 29Nwg teb nwg txiv has tas, ‘Txiv, koj puas pum, kuv tau ua num rua koj yaam le ib tug qhev lug txug taav nuav, kuv yeej tsi tau tawv koj ib zag le. Koj tub tsi pub ib nyuas yaam dlaabtsi rua kuv. Txawm yog ib tug nyuas mivnyuas tshis xwb los koj tub tsi muab rua kuv tua ua ib pluag noj ua kev zoosab nrug kuv tej phoojywg le! 30Tabsis koj tug nyuas tub nuav coj koj tej cuabtxhaj cuabtaam moog phob phuamlaam nrug tej namndlav taag, thaus nwg rovqaab lug tsev, koj tseem muab tug mivnyuas nyuj rog-rog tua rua nwg noj hab!’

31“Leejtxiv teb tas, ‘Mivtub 'e, koj yeej ibtxwm nrug kuv nyob, hab txhua yaam kws kuv muaj puavleej yog koj le. 32Yeej tsimnyog kws peb ua ib rooj mov noj hab zoosab, vim koj tug kwv nuav tub tuag lawm tabsis nwgnuav rov cajsa lawm, nwg tub pluj lawm tabsis nwgnuav rov nrhav tau lawm.’ ”

Nu geselecteerd:

Lukas 15: HNJ2022

Markering

Kopiëren