San Mateo 17

So̱ꞌo̱ ni̱ xa̱a̱ a̱ kii̱ꞌ ni̱ na̱ndu̱u̱ nda̱tu̱nꞌ va̱ nuu̱ꞌ Jesús, te̱ ni̱ yiꞌe̱ tu̱ toto̱ a̱

(Mr. 9:2-13; Lc. 9:28-36)

1Iñu̱ taꞌan kivi̱ꞌ ni̱ xkaꞌndi̱a̱, te̱ ni̱ na̱ka̱ Jesús Pedro xiinꞌ Jacobo xiinꞌ Juan, ña̱ni̱ ra̱, te̱ kuaꞌa̱n siinꞌ a̱ xiinꞌ ra̱ i̱i̱n tindu̱ꞌ sukun. 2Te̱ ni̱ xi̱ni̱ te̱ ja̱a̱nꞌ ña̱ ni̱ na̱ndu̱u̱ nda̱tu̱nꞌ va̱ a̱. Te̱ nuu̱ꞌ a̱ ndii ni̱ yiꞌe̱ a̱ nde̱e̱ naa ñu̱ꞌu̱, te̱ toto̱ a̱ ndii, ni̱ na̱ndu̱u̱ ya̱a̱ a̱ nde̱e̱ yiꞌé vi̱ꞌ a̱. 3I̱kanꞌ te̱ ni̱ xi̱ni̱ ra̱ ña̱ ni̱ tuvi̱ Elías xiinꞌ Moisés, te̱ ndatuꞌunꞌ ra̱ xiinꞌ a̱. 4I̱kanꞌ te̱ ni̱ kaꞌa̱n Pedro xiinꞌ Jesús ndii:

―Va̱ꞌa̱ ña̱ kua̱xi̱ ndu̱ yoꞌoꞌ, tákuiꞌe. Naaꞌ kuní u̱nꞌ ndii, ka̱sa̱ꞌa̱ ndu̱ uni̱ taꞌan ti̱a̱ꞌvaꞌ yoꞌoꞌ. I̱i̱n a̱ ku̱nduꞌu̱ꞌ yoꞌó, te̱ i̱i̱n a̱ ku̱nduꞌu̱ꞌ Moisés, te̱ i̱i̱n a̱ ku̱nduꞌu̱ꞌ Elías ―ni̱ kachi̱ ra̱.

5Kaꞌán ka̱ Pedro ña̱ ja̱a̱nꞌ iinꞌ ra̱, te̱ i̱i̱n ni̱ ti̱saꞌví ti̱o̱ꞌ i̱i̱n viko̱ꞌ yiꞌé va̱ sa̱kuuꞌ ra̱. Te̱ te̱i̱n viko̱ꞌ ja̱a̱nꞌ ni̱ kaꞌa̱n i̱i̱n tachi̱ꞌ yu̱ꞌuꞌ ndii:

―Ña̱ ñaa̱ꞌ nduuꞌ siꞌe̱ mani̱ꞌ i̱, te̱ va̱ꞌa̱ va̱ kuni i̱ xini ña̱ꞌaꞌ i̱. Ku̱ni̱ so̱ꞌo̱ ndo̱ꞌ ña̱ kaꞌán a̱ xiinꞌ ndo̱ꞌ ―ni̱ kachi̱ a̱.

6Kii̱ꞌ ni̱ xi̱ni̱ so̱ꞌo̱ te̱ nda̱ꞌaꞌ xaꞌa̱ꞌ a̱ ja̱a̱nꞌ ña̱ ja̱a̱nꞌ ndii, i̱i̱n ni̱ xi̱ku̱ndiee̱ ndi̱e̱e̱ꞌ ra̱ nde̱e̱ nuu̱ꞌ ñu̱ꞌuꞌ, te̱ ni̱ yi̱ꞌvi xa̱va̱ꞌa̱ ra̱. 7Te̱ ni̱ ku̱ya̱ti̱n Jesús miiꞌ ndieeꞌ ra̱, te̱ ni̱ tondi̱a̱ nda̱ꞌaꞌ ña̱ꞌaꞌ a̱ kaꞌán a̱ xiinꞌ ra̱ ndii:

―Kuän yiꞌvi ndo̱ꞌ, ndo̱koo̱ ndo̱ꞌ ―ni̱ kachi̱ a̱.

8Te̱ kii̱ꞌ ni̱ nda̱ni̱ꞌi̱ ra̱ nuu̱ꞌ ra̱ ndii, nï̱ xi̱ni̱ ka̱ ra̱ nde̱e̱ i̱i̱n te̱ yivi̱ꞌ. Ndee i̱i̱n nda̱a̱ꞌ mi̱iꞌ Jesús kui̱ti̱ꞌ ni̱ xi̱ni̱ ra̱.

9Te̱ kii̱ꞌ ni̱ na̱kaa̱ꞌ a̱ xiinꞌ ra̱ tindu̱ꞌ ja̱a̱nꞌ ndii, ni̱ kaꞌa̱n chuunꞌ a̱ xiinꞌ ra̱ ndii:

―Käꞌa̱n ndo̱ꞌ xiinꞌ nde̱e̱ i̱i̱n ne̱ yivi̱ꞌ xaꞌa̱ꞌ ña̱ ni̱ sa̱tuví Ndiosí nuu̱ꞌ ndo̱ꞌ kaa̱ꞌ. Nde̱e̱ kii̱ꞌ na̱ti̱a̱ku̱ tu̱ku̱u̱ yuꞌu̱, ña̱ nduuꞌ tu̱ te̱ yivi̱ꞌ, te̱ sa̱kanꞌ vi̱ꞌ ku̱vi̱ kaꞌa̱n ndo̱ꞌ xaꞌa̱ꞌ a̱ ―ni̱ kachi̱ a̱.

10Te̱ ni̱ nda̱tuꞌu̱nꞌ ra̱ Jesús ndii:

―¿Ndichun na kaꞌán te̱ saniaꞌá tu̱ꞌu̱n nde̱iꞌ Ndiosí ña̱ xi̱ꞌna̱ ka̱ Elías ki̱xi̱n, te̱ sa̱kanꞌ vi̱ꞌ ki̱xi̱n ña̱ sa̱kakú ne̱ yivi̱ꞌ? ―ni̱ kachi̱ ra̱ xiinꞌ a̱.

11Te̱ ni̱ kaꞌa̱n a̱ xiinꞌ ra̱ ndii:

―Ña̱ ndi̱xa̱ nduuꞌ a̱ ndii, xi̱ꞌna̱ ka̱ Elías ki̱xi̱n te̱ sa̱kooꞌ tu̱ꞌva̱ ra̱ sa̱kuuꞌ ña̱ yoo. 12Ndisu̱ kaꞌán yuꞌu̱ xiinꞌ ndo̱ꞌ ña̱ xa̱ ni̱ ki̱xi̱n Elías ja̱a̱nꞌ, te̱ nï̱ na̱ku̱ni̱ ña̱ꞌaꞌ ni̱a̱, te̱ ni̱ xa̱a̱ ni̱a̱ sa̱a̱ ka̱ ni̱ kuni̱ ni̱a̱ xiinꞌ ra̱. Te̱ niiꞌ sa̱kanꞌ sa̱ndoꞌoꞌ tu̱ ni̱a̱ yuꞌu̱, ña̱ nduuꞌ tu̱ te̱ yivi̱ꞌ ―ni̱ kachi̱ a̱ xiinꞌ ra̱.

13I̱kanꞌ te̱ ni̱ ku̱nda̱ni̱ te̱ nda̱ꞌaꞌ xaꞌa̱ꞌ a̱ ja̱a̱nꞌ ña̱ xaꞌa̱ꞌ Juan, te̱ ni̱ sa̱kuchiꞌ ne̱ yivi̱ꞌ kuenta Ndiosí, kaꞌán a̱.

So̱ꞌo̱ ni̱ xa̱a̱ a̱ kii̱ꞌ ni̱ sa̱ndaꞌa Jesús i̱i̱n te̱ sa̱va̱, te̱ naá ña̱ ndi̱va̱ꞌa̱ nimá

(Mr. 9:14-29; Lc. 9:37-43)

14Te̱ kii̱ꞌ ni̱ xaa̱ Jesús xiinꞌ te̱ ja̱a̱nꞌ miiꞌ ndieeꞌ ne̱ yivi̱ꞌ kuaꞌa̱ꞌ yaꞌa̱ ndii, ni̱ ku̱ya̱ti̱n i̱i̱n te̱ yivi̱ꞌ, te̱ ni̱ xi̱kuii̱n xitiꞌ ra̱ nuu̱ꞌ a̱ kaꞌán ra̱ ndii:

15―Tákuiꞌe, sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ tiaa̱ siꞌe̱ i̱, sa̱kanꞌ ña̱ ña̱ ndi̱va̱ꞌa̱ naá nimá ra̱, te̱ xaꞌni̱ꞌ iꞌiꞌ ña̱ꞌaꞌ a̱, te̱ sandoꞌoꞌ xa̱va̱ꞌa̱ ña̱ꞌaꞌ a̱. Te̱ kiꞌinꞌ i̱chiꞌ nduva ra̱ nuu̱ꞌ ñuꞌu̱, te̱ kiꞌinꞌ tu̱ i̱chiꞌ namaꞌ ra̱ nuu̱ꞌ ti̱kui. 16Te̱ xa̱ ni̱ ki̱xi̱n ndi̱a̱ka̱ ña̱ꞌaꞌ i̱ nuu̱ꞌ te̱ nda̱ꞌaꞌ xaꞌa̱ꞌ u̱nꞌ, ndisu̱ nï̱ ku̱vi̱ sa̱ndaꞌa ña̱ꞌaꞌ ra̱ ―ni̱ kachi̱ ra̱.

17Sa̱kanꞌ te̱ ni̱ kaꞌa̱n a̱ xiinꞌ ne̱ yivi̱ꞌ ja̱a̱nꞌ ndii:

―¡Ne̱ ï̱ni̱ xini Ndiosí nduuꞌ ndoꞌó, ne̱ ndieeꞌ i̱i̱n yivi̱ꞌ vi̱ti̱n, te̱ ne̱ ni̱a̱ꞌa nduuꞌ tu̱ ndo̱ꞌ! ¿Sa̱a̱ ka̱ vi̱ꞌ taꞌan ka̱ kivi̱ꞌ ko̱o̱ i̱ xiinꞌ ndo̱ꞌ? Te̱, ¿sa̱a̱ ka̱ vi̱ꞌ taꞌan ka̱ kivi̱ꞌ ku̱ndi̱e̱ni i̱ ña̱ xaaꞌ ndo̱ꞌ? Ni̱a̱ꞌa̱ ndo̱ꞌ yoꞌoꞌ xiinꞌ te̱ sa̱va̱ ñaa̱ꞌ ―ni̱ kachi̱ a̱.

18I̱kanꞌ te̱ ni̱ kaꞌa̱n ndi̱e̱eꞌ Jesús xiinꞌ ña̱ ndi̱va̱ꞌa̱ ja̱a̱nꞌ te̱ ni̱ ke̱ta̱ a̱ nimá te̱ sa̱va̱ ja̱a̱nꞌ. Te̱ nde̱e̱ kii̱ꞌ sa̱kanꞌ ndii, ni̱ nda̱ꞌa̱ xa̱chiꞌ ra̱. 19Te̱ ni̱ ku̱ya̱ti̱n siinꞌ te̱ nda̱ꞌaꞌ xaꞌa̱ꞌ a̱ nuu̱ꞌ a̱, te̱ ni̱ nda̱tuꞌu̱nꞌ ña̱ꞌaꞌ ra̱ ndii:

―¿Ndichun na nï̱ ku̱vi̱ xta̱ꞌniꞌ ndu̱ ña̱ ndi̱va̱ꞌa̱ ja̱a̱nꞌ? ―ni̱ kachi̱ ra̱.

20Te̱ ni̱ kaꞌa̱n Jesús xiinꞌ ra̱ ndii:

―Xaꞌa̱ꞌ ka̱ sie va̱ i̱ni̱ ndo̱ꞌ xini ndo̱ꞌ Ndiosí. Sa̱kanꞌ na ña̱ nda̱ku kaꞌán i̱ xiinꞌ ndo̱ꞌ ña̱ naaꞌ sa̱kanꞌ te̱ i̱ni̱ ndo̱ꞌ xini ndo̱ꞌ Ndiosí tee̱ꞌ lulu maꞌá kui̱ti̱ꞌ, nde̱e̱ naa lulu i̱i̱n ndi̱kinꞌ mostaza ndii, ku̱vi̱ kaꞌa̱n ndo̱ꞌ xiinꞌ i̱kuꞌ kaa̱ꞌ ndii: “Kuan ke̱ta̱ miiꞌ iinꞌ u̱nꞌ ñaa̱ꞌ, te̱ kuꞌu̱n u̱nꞌ kui̱i̱n u̱nꞌ kaa̱ꞌ”, te̱ na̱ma̱ a̱ miiꞌ iinꞌ a̱. Te̱ kö̱o̱ꞌ nde̱e̱ i̱i̱n ña̱ kü̱vi̱ sa̱a̱ ndo̱ꞌ. 21Ndisu̱ ña̱ ndi̱va̱ꞌa̱ naa ña̱ kaa̱ꞌ ndii, kuní a̱ ña̱ kaꞌa̱n va̱ e̱ꞌ xiinꞌ Ndiosí, te̱ kuní tu̱ a̱ ña̱ ko̱o̱ ndi̱ti̱a̱ e̱ꞌ, te̱ ku̱vi̱ xta̱ꞌniꞌ e̱ꞌ ña̱ kaa̱ꞌ ―ni̱ kachi̱ a̱.

Tu̱ku̱ ni̱ kaꞌán Jesús xaꞌa̱ꞌ ña̱ ku̱ndo̱ꞌo̱ a̱ te̱ ku̱vi̱ a̱

(Mr. 9:30-32; Lc. 9:43-45)

22Te̱ kii̱ꞌ xikaꞌ Jesús xiinꞌ te̱ nda̱ꞌaꞌ xaꞌa̱ꞌ a̱ nuu̱ꞌ ñu̱ꞌuꞌ Galilea ndii, ni̱ kaꞌa̱n a̱ xiinꞌ ra̱ ndii:

―Yuꞌu̱, ña̱ nduuꞌ tu̱ te̱ yivi̱ꞌ ndii, sa̱na̱kuaꞌa ne̱ yivi̱ꞌ yuꞌu̱ nda̱ꞌaꞌ te̱ yivi̱ꞌ, 23te̱ ka̱ꞌni̱ꞌ ra̱ yuꞌu̱. Ndisu̱ kivi̱ꞌ ña̱ uni̱ te̱ na̱ti̱a̱ku̱ i̱ ―ni̱ kachi̱ a̱.

Te̱ ni̱ ku̱suchiꞌ xa̱va̱ꞌa̱ i̱ni̱ sa̱kuuꞌ te̱ ja̱a̱nꞌ.

Kaꞌán Jesús xaꞌa̱ꞌ xu̱ꞌunꞌ xaniꞌ xaꞌa̱ꞌ yu̱kunꞌ kaꞌnuꞌ

24Te̱ kii̱ꞌ ni̱ xa̱a̱ Jesús xiinꞌ te̱ nda̱ꞌaꞌ xaꞌa̱ꞌ a̱ ñu̱u̱ Capernaum ndii, ni̱ ku̱ya̱ti̱n te̱ kendiaa̱ꞌ yaꞌviꞌ xu̱ꞌunꞌ xaniꞌ xaꞌa̱ꞌ yu̱kunꞌ kaꞌnuꞌ nuu̱ꞌ Pedro, te̱ ni̱ nda̱tuꞌu̱nꞌ ña̱ꞌaꞌ ra̱ ndii:

―¿Ñáá chaꞌvi̱ te̱ saniaꞌá ndoꞌó xu̱ꞌunꞌ xaniꞌ xaꞌa̱ꞌ yu̱kunꞌ? ―ni̱ kachi̱ ra̱.

25Te̱ ni̱ na̱kui̱i̱n Pedro ndii:

―Uun, chaꞌvi̱ ra̱ ―ni̱ kachi̱ ra̱.

Te̱ kii̱ꞌ ni̱ nda̱ꞌni̱ Pedro vi̱ꞌe̱ ndii, xi̱ꞌna̱ ka̱ Jesús ni̱ nda̱tuꞌu̱nꞌ ña̱ꞌaꞌ kaꞌán a̱ ndii:

―¿Sa̱a̱ tuu yoꞌó, Simón? Sa̱kuuꞌ rey i̱i̱n yivi̱ꞌ ndii, ¿yo̱o̱ nduuꞌ ne̱ chaꞌvi̱ ña̱ꞌaꞌ xu̱ꞌunꞌ xaniꞌ? ¿Ñáá ne̱ ñu̱u̱ ra̱, uun ne̱ tukuꞌ, ne̱ ndieeꞌ ñu̱u̱ ra̱? ―ni̱ kachi̱ a̱.

26Te̱ ni̱ na̱kui̱i̱n Pedro ndii:

―Ne̱ tukuꞌ, ne̱ ndieeꞌ ñu̱u̱ ra̱ ―ni̱ kachi̱ ra̱.

Te̱ ni̱ kaꞌa̱n ka̱ Jesús xiinꞌ ra̱ ndii:

―Sa̱kanꞌ na kuiiꞌ ne̱ ñu̱u̱ ra̱ ja̱a̱nꞌ ndii, nde̱e̱ sie chäꞌvi̱ ña̱ꞌaꞌ ni̱a̱. 27Ndisu̱ xaꞌa̱ꞌ ña̱ küní sa̱na̱saáꞌ e̱ꞌ te̱ kendiaa̱ꞌ yaꞌviꞌ ja̱a̱nꞌ ndii, kuaꞌan mi̱ni̱, te̱ sko̱ꞌniꞌ u̱nꞌ tiku u̱nꞌ, te̱ ti̱a̱kaꞌ nu̱uꞌ tiꞌ xta̱ꞌniꞌ u̱nꞌ ndii, ku̱ni̱ u̱nꞌ naá i̱i̱n xu̱ꞌunꞌ yu̱ꞌuꞌ riꞌ kii̱ꞌ nu̱niaꞌ u̱nꞌ u̱n. Na̱ꞌi̱n u̱nꞌ, te̱ cha̱ꞌvi̱ u̱nꞌ te̱ kendiaa̱ꞌ yaꞌviꞌ xu̱ꞌunꞌ xaniꞌ xaꞌa̱ꞌ yu̱kunꞌ ja̱a̱nꞌ xaꞌa̱ꞌ yoꞌó xiinꞌ xaꞌa̱ꞌ yuꞌu̱ ―ni̱ kachi̱ a̱ xiinꞌ ra̱.

Nu geselecteerd:

San Mateo 17: miy

Markering

Deel

Kopiëren