Wambeela 7
7
Odha wa mahinje majinji
1 Nabwiya ahiira wa Nowe: <<Ovolowe mmwanddeyani weevo ni anaawo aatene a vaade vaawo. Gihoona wi weevo weeka oli owogoowa mwa athu aatene a mudhidhi olena. 2Waathukule aneenyama misawo dhaatedhene. Wa aneenyama ookuthiwa#7.2 Wahikala aneenyama ookuthiwa mukutho ni oohukuthiwa. Moone Levitiku 11. waathukule atanu nabiili apogo ni atanu nabiili a mukolo. Nde dhili dhootadhiwa othukulege biili-biili ya pogo ni ya mukolo. 3Balame othukule tanu nabiili dha pogo ni dha mukolo, misawo dhaatedhene. Ndala aneenyama ni balame dhinoodha dhilogoleleye wi dhikale musogolo mwiilaboni ya vati. 4Sowi yavira malabo matanu nameenddi, ginoodha gimurubwihe muzongwe mwiilaboni malabo makumi mannayi, mutana ni mahiyu. Gineere gitolose dhaatedhene dhipaddusiliimi>>.
5Nowe ahiirana dhaatedhene wona Nabwiya dhamulamuleliiye. 6Aganna yaaka mazana matanu nammohi (600) veva mahinje fadhiliiwa mwiilaboni. 7Nowe ahivolowa mmwanddeyani vamohi ni mwihiyanaaye, anaaye ni ahiyaniiwa wi ehifwanyiwe mahinje. 8Wa aneenyama ootadhiwa ni oohutadhiwa, balame ni dhowaabadha, dhaatedhene dha misawo-misawo, 9dhahidha ovolowa biili-biili dhapogo ni dhamukolo, okala ni Nowe mmwanddeyani mwemo, wona mwemo Mulugu amulamuleliiye Nowe. 10Vano nlabo na neetanu na biili mahinje majinji yahidha mwiilaboni.
11Yahidha mahinje yaakwanaga malabo kumi namatanu nameenddi a mweeri wa nabiili, Nowe aganna yaaka mazana matanu nammohi (600). Aneedduuddu a mahinje aatene a vati yahipula, misiwo dha mahinje oodhulu dhahithuleya. 12Ahirubwa muzongwe moolibana ni elabo malabo makumi mannayi, mutana ni mahiyu. 13Nlabo nendde nadhiile mahinje, Nowe ahivolowa mmwanddeyani vamohi ni mwihiyanaaye, anaaye, Semu, Kami, ni Zhafeti ni ahiyaniiwa araaru. 14Yahivolowa mmwanddeyani teto aneenyama oofuwiwa a misawo-misawo, a mukokolani, owaabadha, balame ni dhaatedhene dhinna mompelo. 15Wa dheegumi dhaatedhene, dhahivolowa biili-biili okala vamohi ni Nowe. 16Dhaali dhapogo ni dhamukolo mwa misawo dhaatedhene, wona Mulugu mwamulamuleliiye. Voomariha Nabwiya ahifuga musiwo.
17Malabo makumi mannayi, vadhiile mahinje mwiilaboni, mahinje alene yaheenjedhedheya, mwanddeya wahambeela ogwela, ohiya theya. 18Mahinje yeenjedhedheyagave mwiilaboni, mwanddeya weedda vadhulu viwa. 19Yahidhaala, ohuruwedha mwaango dhaatedhene ofiyedha dhootaamesesa. 20Egamalile ohuruwedha, yaheenjedhedheya meeturu matanu nameenddi vadhulu va mwaango.
21Malabo alene yahikwa aneenyama aatene a mwiilaboni ya vati, oofuwiwa, a mukokolani, balame, ni dha makwedda dhimohi. Yahikwa teto athu aatene. 22Dhahikwa dhoovuma dhaatedhene mwiilaboni ya vati. 23Ndala ahitolosa dhigumi dhaatedhene dhaali mwiilaboni: athu, aneenyama, dhowaabadha vamohi ni balame. Nowe yeeka davuluwile ni alene yanniiyena mmwanddeyani. 24Mahinje yahihuruwedha elabo ya vati ofiyedha malabo zana ni makumi matanu (150).
Nu geselecteerd:
Wambeela 7: tke
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2015, Wycliffe Bible Translators, Inc. All rights reserved.
