Populaire Bijbelverzen uit Jɔn 14

Deel

Amo yage bochare-zuru mo a pa abam. Ko ye amo tete nyem mo a kwei a pa abam. Amo na lage a pa abam bochare-zuru kolo to, logo baŋa nɔɔna nam yeiri ko dwoŋi. Á yé pa se á bochara taa maga. Á nam yé ta‑á jege lwia de.

Yezu ma ta ded‑o o we, “Amo mo ye chwoŋa kam, de chega kam, de ŋwea kam. Nɔɔn-nɔɔno bá wane o vo a Kwo wom tei ye o wo dɛ amo baŋa o vo.

Yezu laam ma ta o we, “Á yé pa á bochara taa maga. Ta‑á jege-na wo-dedoa de Wɛ, se á ke á wo-dedoa de amo de.

Ko daare se Zeinnu wom laam mo ba abam tei. Wonto mo ye Wɛ Sin-laao kom, a Kwo Wɛ na wó toŋe‑o se o ba amo yere ŋwaane to. Wonto wó ta wonnu maama taane jase o bere abam. O maa wó pa se á guli kolo maama amo na maŋe a ta a bere abam to gula.

Nɔɔno wolo maama na sɛ amo nia yam ye o toŋe o tɔge-ya to mo ye wolo na swoi amo to. Amo Kwo Wɛ wó taa jege wolo na swoi amo to swono. Amo de nam wó taa swoi‑o, ye a kwori a pa o lɔre amo wo na ye tei to.”

Amo nam wó ta de a Kwo wom se o pa abam Zeinnu wodwoŋi. Wonto wó taa wo abam tei ne se ko taa vei wuu. Wonto mo ye Wɛ Sin-laao kom. O maa ye chega tu. Nɔɔna balo kugu jei na wo logo baŋa ne to nam ware ba sɛ‑o, kolo ŋwaane ba ware ba na‑o, ye ba ta yeiri‑o de. Ko daare abam nam yei‑o, kolo ŋwaane o me de abam, ye o lage o taa wo á bochara ne mo.

Amo wó ke kolo maama abam na wó lwoori amo yere ŋwaane to, se ko pa a Kwo Wɛ na zula amo ŋwaane. Abam na wó lwoori woŋo kolo maama amo yere ŋwaane to, amo wó ke-ko a pa abam.

Abam ná swoi amo, á wó toŋe á tɔge a nia yam.

A Kwo wom sɔŋɔ ne, di daga da dedɛ. A nam lage a vo da a kwɛ jei mo a pa abam. Ko ya ná dae chega, a ya bá ta konto de abam.

Amo ná vei a kwɛ jei sem a ti a pa abam, a laam wó jwoori a ba a ja abam se á tɔge á vo á ta‑á wo amo na wo mɛ to.

Tomas ma ta ded‑o o we, “Amo tu, debam yeiri nmo na lage n vo mɛ to. Dé nam wó ke tɛ mo dé lɔre ka chwoŋa?”