Populaire Bijbelverzen uit ᤗᤢᤁᤠ 8

Deel

ᤁᤖ ᤏᤢᤒᤠ ᤂᤠᤶᤔᤥ ᤔᤰᤁᤧᤎᤠᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤏᤢᤒᤠ ᤏᤢ ᤛᤣᤛᤣ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤔᤧᤈᤥᤰ॥ ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰᤁᤡᤴ ᤔᤧᤄᤧᤵᤛᤢᤖ ᤏᤡᤱᤘᤠ᤹ᤀᤥ ᤔᤧᤕᤢᤰᤂᤢ ᤜᤧᤰᤁᤩᤠᤱ ᤏᤠᤛᤡ ᤔᤧᤎ᤺ᤳᤋᤢᤀᤠᤱ ᤁᤢᤈᤠ᤹ ᤔᤧᤓᤳᤇᤢᤖᤥ॥”

ᤜᤧᤰᤁᤩᤠᤱ ᤋᤡᤱᤃᤪᤣᤰ ᤁᤧᤗᤡᤱᤒᤠ ᤂᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤐᤠ᤺ᤴᤈᤠᤰ ᤁᤧᤄᤧᤶᤒᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤔᤧᤈᤥᤰ. ᤁᤖ ᤏᤡᤱᤛᤠᤶ. ᤕᤠᤱᤛᤠᤁᤢᤴᤎᤣ ᤏᤢ ᤁᤴ ᤜᤡᤱᤔᤴᤒᤠ ᤕᤠᤶᤍᤠᤍᤠᤒᤠ ᤐᤠ᤺ᤴᤏᤡᤸᤗᤧ ᤂᤧᤱᤜᤠ᤹ ᤛᤢ᤺ᤵᤋᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤁᤢᤈᤠ᤹ ᤑᤶᤔᤠ ᤔᤧᤴᤇᤢᤰᤋᤢᤴᤗᤥ॥

ᤜᤧᤰᤁᤩᤠᤱ ᤗᤢᤱᤄᤠᤖᤠᤰᤁᤥ ᤔᤰᤁᤧᤎᤠᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤐᤠ᤺ᤴᤈᤠᤰᤁᤡᤴ ᤁᤧᤄᤧᤶᤒᤠᤀᤠᤱ ᤁᤧᤛ᤺ᤵᤐᤠᤖ ᤁᤧᤍᤠ᤺ᤰᤐᤠᤛᤡᤖᤥ. ᤁᤖ ᤂᤧᤱᤜᤠ᤹ᤖᤧ ᤏᤛᤠᤴ ᤔᤧᤈᤥᤃᤢ ᤔᤧᤃᤳᤋᤢᤒᤠᤴ ᤋᤢᤰᤂᤣ ᤗᤠᤰᤂᤣ ᤋᤠ᤺ᤸᤗᤧ ᤔᤧᤗᤧᤖᤢ ᤔᤧᤍᤣᤛᤢ. ᤌᤣᤀᤠᤱᤓᤧᤸᤗᤧ ᤐᤠ᤺ᤴᤈᤠᤰᤁᤡᤴ ᤂᤢᤏᤡ᤹ ᤗᤢᤱᤔᤠ᤹ ᤛᤡᤃᤠᤱ ᤔᤧᤱᤃᤧᤳᤋᤣ ᤘᤕᤧᤖᤥ॥

ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤛᤠ᤺ᤴᤏᤡᤴ ᤀᤠᤳᤋᤥ ᤘᤠ᤹ᤒᤣ᥅” ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤃᤡᤛᤧᤖ ᤂᤢᤏᤡ᤹ ᤕᤱᤔᤠ ᤁᤧᤖᤧᤀᤠᤱ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤔᤣ᤺ᤴ ᤁᤱᤃ ᤀᤠᤰᤋᤱᤒᤠ ᤔᤏᤠᤏᤧᤒᤣ᥅ ᤂᤢᤏᤧ᤹ ᤀᤡᤱᤈᤠᤱ ᤐᤡᤖᤢᤛᤡᤸᤗᤧ ᤛᤢᤖᤡᤳ ᤁᤣᤈᤱᤅᤡᤴ ᤏᤢ ᤘᤠᤓᤧᤸᤗᤧᤱᤅᤡᤸᤗᤧᤀᤠᤱ ᤂᤧᤵᤛᤢᤱᤃ᥄”

ᤜᤧᤰᤁᤩᤠᤱ ᤗᤠᤶᤔᤥ ᤔᤰᤁᤧᤎᤠ᤺ᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ ᤐᤠ᤺ᤴᤈᤠᤰ ᤁᤧᤄᤧᤶᤒᤠ ᤔᤏᤠᤛᤡᤖᤥ॥ ᤔᤠᤑᤧᤴᤛᤠᤶᤔᤡᤴ ᤋᤠᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤥᤗᤠᤶ ᤐᤠ᤺ᤴᤈᤠᤰᤁᤡᤴ ᤗ᤺ᤳᤋᤢ ᤋᤣ᤹ᤖᤢ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤛᤠᤴ ᤆᤥ᤺ᤰᤔᤠ ᤔᤧᤱᤄᤥᤛᤢᤴᤏᤠᤱ ᤛᤧᤴᤗᤵ ᤂᤥᤔᤠ ᤔᤧᤴᤇᤢᤰᤋᤢᤴᤗᤥ॥

“ᤀᤠᤸᤗ ᤔᤧᤴᤎᤠ᤺ᤵᤔᤏᤠᤒᤠ ᤁᤠᤰ ᤆᤡᤃᤰᤘᤠᤜᤠ᤹ ᤀᤥ᤺ᤳᤋᤡᤀᤥ ᤏᤡᤔᤧᤎᤠᤵ ᤜᤧᤰᤁᤩᤠᤱ ᤛᤡᤒᤡ᤹ᤒᤠ ᤐᤠ᤺ᤴᤜᤠ᤹ ᤁᤧᤖᤧᤰ ᤁᤢᤛᤡᤱ ᤏᤡ᤺ᤳᤋᤧᤳᤗᤥ॥

ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧᤀᤠᤱ ᤀᤡᤱᤃᤠ᤹ ᤆᤡᤱᤛᤡᤱᤔᤠ ᤔᤧᤛᤢᤰᤁᤠᤴ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤁᤢᤃᤡᤔᤠᤸᤗᤧ ᤕᤰᤂᤧᤖ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤜᤒᤳ ᤑᤴᤇᤡᤱᤗᤥ॥ ᤂᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤂᤢᤏᤧ᤹ ᤛᤢᤛᤢᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤡᤔᤥ ᤘᤣ᤺ᤳᤋᤧᤒᤠ ᤐᤠ᤺ᤴᤏᤡᤴ ᤕᤧᤛᤢᤴ ᤆᤧᤰᤋᤢᤖᤥ॥ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤔᤠᤔᤢᤀᤣ. ᤂᤧᤏᤧ᤹ ᤏᤛᤠᤴ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤁᤧᤘᤣ᤺ᤳᤋᤧᤀᤠᤱ ᤁᤧᤘᤠ᤹ᤖᤥ॥ ᤀᤠᤸᤗ ᤏᤢᤖᤡᤰᤁᤠᤱ ᤐᤣᤃᤧ᤹ᤀᤥ॥”

ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤒᤣᤀᤠᤱ ᤕᤧᤛᤢᤴ ᤔᤧᤓᤥ᤺ᤰᤂᤢᤖ ᤀᤰᤂᤣ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤜᤢᤶᤔᤠ ᤛᤡᤔᤠ ᤀᤡᤋᤡᤃᤧᤖᤥ॥” ᤜᤧᤰᤁᤩᤠᤱ ᤕᤧᤛᤢᤴ ᤐᤥᤃᤧᤀᤠᤱ ᤂᤧᤴ ᤛᤢᤖᤡᤳ ᤁᤣᤈᤱᤅᤡᤴ ᤏᤢ ᤘᤠᤓᤧᤸᤗᤧᤱᤅᤡᤴ ᤑᤧ᤺ᤰᤋᤢ॥ ᤜᤧᤰᤁᤩᤠᤱ ᤛᤢᤖᤡᤳ ᤁᤣᤈᤱᤅᤡᤴ ᤜᤢᤔᤠ ᤆᤰᤌᤠᤛᤢ ᤜᤧᤰᤁᤩᤠᤱ ᤘᤠᤓᤧᤸᤗᤧᤱᤅᤡᤴᤏᤠᤱ ᤆᤡᤈᤡ ᤕᤧᤶᤕᤧᤶ ᤗ᤹ᤖᤧᤖᤥ॥