Tharu, Dangaura: Dangaura Tharu (New Testament)

Dangaura Tharu

तबदोस्र शैतान येशूक परीक्षा लिह कैक पवित्र आत्‍मा येशूह उजार ठाउँम लैगिल। उ ठाउँम येशू चालीस दिन चालीस रातसम कुछु फे नैखैलकओर्से उहाँह महा कर्रसे भुँख लग्‍लन। उहब्‍याला शैतान उहाँकठे आक कहल, “अप्‍न जाट्‌टीसे परमेश्‍वरक छावा हुइटी कलसे, यी पत्‍थ्रह ‘रोटी होजा’ कैक आज्ञा दी।”
येशू जवाफ देल, “धर्मशास्‍त्रम असिक लिखल बा, ‘मनै खैना चिजले केल नैबच्‍ट, तर परमेश्‍वरक मुहसे निक्रल् हरेक वचनले बच्‍ठ।’”
तबदोस्र शैतान येशूह पवित्र सहर यरूशलेमम लैगिल् ओ मन्‍दिरक टुप्‍पम लैजाक कहल, “यदि अप्‍न जाट्‌टीसे परमेश्‍वरक छावा हुइटी कलसे, यिहाँसे फन्की, काकरकि धर्मशास्‍त्रम असिक लिखल बा,

‘परमेश्‍वर आपन स्‍वर्गदूतन अह्रैहीँ
ओ टुँहार पौली पत्थ्रम नैठोक्‍याई कैक,
हुँक्र आपन हाँठले टुँहीन ठाम्‍डरहीँ।’”

येशू कल, “धर्मशास्‍त्रम असिक लिखल बा, ‘टैँ परमप्रभु आपन परमेश्‍वरक परीक्षा जिन करस।’”
फेदोस्र शैतान येशूह ढ्‍याङ पर्वत्‍वम लैजाक संसारक सब राज्‍य ओ उहिँमक चमक देखैटी कहल, “महीह दण्‍डवत् कर्बी कलसे, यी सब अप्‍नह देहम।”
येशू ओहीह कल, “शैतान, यिहाँसे दूर भाग! धर्मशास्‍त्रम लिखल बा, ‘टैँ परमप्रभु आपन परमेश्‍वरह केल दण्‍डवत् करस ओ उहाँक केल सेवा करस।’”
तब शैतान येशूह छोर्क गैल्, तबदोस्र स्‍वर्गदूतहुँक्र आक उहाँक सेवा कर्ल।


यूहन्‍ना पक्राउ पर्ल कैक सुन्‍ल त येशू गालील क्षेत्रम गैल। उहाँ नासरत छोर्क कफर्नहुम सहरम जाक बैठलग्‍ल। कफर्नहुम सहर गालील समुद्रक लग्‍घ जबूलून ओ नप्‍तालीन्‍हक ठाउँम पर। असिक यशैया अगमवक्तक ब्‍वालल् वचन पूरा ह्‍वाए आइल:

“जबूलूनक मनै, नप्‍तालीक मनै,
समुद्रम जैना डगरीक आसपासक मनै,
यर्दन लद्‍यक उपारीक मनै,
ओ गालील क्षेत्रक गैरयहूदी मनै,
अन्‍धकारम रहुइयन भारी ज्‍योति देख्‍नेबाट।
मृत्‍युक अन्‍धकारम रहुइयन्‍हक लाग
एकठो भारी ज्‍योति चम्‍कनेबा।”

उहब्‍यालासे प्रचार कर्टी येशू कहलग्‍ल, “आपन-आपन पापी मन परिवर्तन कैक परमेश्‍वरकठे घुमो, काकरकि स्‍वर्गक राज्‍य लग्‍घ आस्‍याकल।”


एक दिन येशू गालील समुद्रक किनार-किनार न्याङ्‌गबेर दुइठो जलहारीन जाल ख्‍यालट्‍ देख्‍ल। हुँक्र पत्रुस कैजिना सिमोन ओ हुँकहार भैया अन्‍द्रियास रलह। येशू हुँकन कल, “म्‍वार पाछ लागो, मै टुँहन मनैन बझैना जलहारी बनैम।” अत्रा सुन्‍टीकि हुँक्र आपन जाल छोरछार्क उहाँक पाछ लग्‍ल।
उहाँसे जैटीजैटी येशू जब्‍दियक दुइ भाइ छावन, याकूब ओ हुँकहार भैया यूहन्‍नह, भेँटैल। हुँक्र आपन बाबकसँग लाऊम बैठ्‌क जाल टङ्‌ग्रटलह। येशू हुँकन फे बलैल। तबहेँ हुँक्र आपन बाबह लाऊम छोर्क उहाँक पाछ लग्‍ल।


तबदोस्र येशू ठाउँ-ठाउँक सभाघरम जाक मनैन सिखैटी, स्‍वर्गक राज्‍यक बारेम खुशीक खबर प्रचार कर्टी ओ हरेक किसिमक रोग बेरामसे मनैन चोखैटि सारा गालील क्षेत्रम घुम्‍ल। असिक उहाँक असल कामक बयान सिरिया देशभर फैलगिलन। मनै सब किसिमक रोग-व्‍याथा रहल बेरम्‍हेन उहाँकठे अन्‍ल। उहाँ भूत लागल, मृगीरोग लागल ओ प्‍यारालाइस रोग लागल सब मनैन चोखैल। असिक उहाँक पाछ भारी भीड लग्‍लन। उ मनै गालील क्षेत्रक, डेकापोलिसक, यरूशलेम सहरक, यहूदिया क्षेत्रक ओ यर्दन लद्‍यक उपारीक रलह।

Luister naar मत्ती 4