Text: © United Bible Societies 1978 Audio: ℗ 2011 Hosanna

Mano - 1978 Edition (NT)

Mann New Testament © Bible Society in Liberia, 1978.

“Kà ka yɛ́lɛ kɛ ka dìè píé ka zì yɛɓo lɛ́ à gbɛ̃̀ɛ̃̀ lɛ Wálà‐wɔ̃̀ mɔ̀ɔ kɛ̀ mia nyìɛ mɔ̀, kɛɛ mia ó ka gɛ̃̀ɛ mɔ́ɔ̀ wɔ̃̀ mɔ̀. Ká wɔ̃́ nì e kéa kɛ̀á mia nyìɛ mɔ̀ɔ, ka Dàa lɛ́ e lɛ̀ía lɛ̀ɛ́ ló ka fɔ́nɔ́ nɔɔ̀ à wɛ̃́ĩ̀.
“À mɔ́ɔ̀ wɔ̃̀ mɔ̀ɔ, yé ɓaà pɛ nɔ mia lɛ́ pɛ wá o kɛ̀lɛ̀ɛ lɛ̀ɛ, yékɛ̀ í i dìè zɔ̃̀ɔ̃̀ à nɔɔ̀ yí, lɛ̀ zí míá ò o dìè wɛlɛ lia ò kɛ̀ à ká Zúù‐mìà zì Wálà‐kà wì, ɛ̃́ɛ̃́ lɛ̀ zí ò kɛ̀á zi ɓɛ̀lɛ̀ĩ̀‐fĩ̀ã̀ píéa lɛ́ ɓe. Óò kɛ̀ kíli kɛ mia ó o tɔ́ li. Wánà‐wɔ̃̀ lɛ́ m̀ gèe ka lɛ̀ɛ ɓɛ. Waà nyɛ o fɔ́nɔ́ sì à kɛ̀ kíli mɔ́ɔ̀ wɔ̃̀ mɔ̀. Kɛɛ yé ɓaà pɛ nɔ mi lɛ́ pɛ wá à kɛ̀lɛ̀ɛ lɛ̀ɛ, yékɛ̀ ɓá tó i kɔ̀ gbiè é wɔ̃́ lɛ́ i kɔ̀ yiè lɛ à kɛpìàa yí dɔ. É kɛ̀á kília, i zì pɛ‐nɔ‐kɔ̀ e kília lɛ́ɛ̀ lo kɛɛ̀ e bĩ̀ĩĩ̀ zɛ̀ ká. Tó i Dàa lɛ́ è wɔ̃́ lɛ́ ɓà kɛ̀ bĩ̀ĩ̀ káa gɛ̃̀ɛ, lɛ́ɛ̀ lo i fɔ́nɔ́ nɔɔ̀ à wɛ̃́ĩ̀.


“Í sɛ̀nɛ ɓoáa, yékɛ̀ ɓá ɓo lɛ̀ míá ò o dìè wɛlɛ lia, lɛ́ ò sɛ̀nɛ ɓo. Óò nàà ó dɔ o gã̀ mɔ̀ Zúù‐mìà zì Wálà‐kà wì, ɛ̃́ɛ̃́ zi ɓɛ̀lɛ̀ĩ̀‐fĩ̀ã̀ soũ yí píé, tó wáà sɛ̀nɛ ɓò. Óò à kɛ̀ kíli, kɛɛ mia ó o gɛ̃̀. Wánà‐wɔ̃̀ lɛ́ m̀ gèe ka lɛ̀ɛ ɓɛ. Waà nyɛ o fɔ́nɔ́ sì à kɛ̀ kíli mɔ́ɔ̀ wɔ̃̀ mɔ̀. Kɛɛ yé ɓaà dɔ í sɛ̀nɛ ɓoa, ì lo i píé kɛ́ì, í ká lé gbɛ̃̀ i bĩ̀ĩ̀, í sɛ̀nɛ ɓo i Dàa lɛ́ lɛ e bĩ̀ĩ̀pìàa lɛ̀ɛ. Yé aà kɛ kília, i Dàa lɛ́ è wɔ̃́ lɛ́ ɓà kɛ̀ bĩ̀ĩ̀ káa gɛ̃̀ɛ, lɛ́ɛ̀ lo i fɔ́nɔ́ nɔɔ̀ à wɛ̃́ĩ̀.
“Yé kaà kɛ sɛ̀nɛ ɓopìàa, yékɛ̀ ká wéé lɛ́ à yí wá à mɔ̀ɔ gèe nɔ́ ɓɔ̀ɔ sóló tótó le, lɛ̀ zí mia lɛ́ òó Wálà dɔɔ ò kɛ̀ à káa lɛ́ ɓe. Óò gɛ̃̀ ɓɔ̀ɔ kélɛ̀ Wálà lɛ́ɛ̀ lo wà sɛ̀nɛ‐ɓo‐wè maà yé waà sɛ̀nɛ ɓo gbèĩa ká. Yékɛ̀ ká kɛ lɛ̀ o lɛ́ ɓe. Ka Dàa lɛ́ɛ̀ pɛ lɛ́ lɛ ka mɔ̀ ká sɔ̀lɔ̀ ɓoa dɔ, kɛ bɛ̃̀ɛ̃ ká tĩã́ à pɛ̃́ɛ̃̀ à mɔ̀. À mɔ́ɔ̀ wɔ̃̀ mɔ̀ɔ, zi lɛ́ lɛ ka mɔ̀ ká sɛ̀nɛ ɓo à káa, gɛ̃̀ e ké.
‘Ko Dàa lɛ́ i lɛ̀ía,
i tɔ́ è kɛ tɔ́ lɛ́ lɛ mia séĩ́ lɛ̀ɛ tɔ́ yiè káa ká.
I zì tò‐mia‐là è nu.
Wɔ̃́ lɛ́ ɓà nàà à káa, è kɛ tã́ã̀ zèe lɛ̀ zí à kɛɛ̀ lɛ à ká lɛ̀ía lɛ́ ɓe.
Ì léɓèlè lɛ́ lɛ ko mɔ̀ kó sɔ̀lɔ̀ ɓoa, nɔ ko lɛ̀ɛ pɛ́nɛɛ.
Ì kã́ wɔ̃́ yɔɔ lɛ́ kɔaà kɛɛ mɔ̀, ɓá káá tã́ã̀, lɛ̀ zí kò kãá wɔ̃́
yɔɔ lɛ́ mia ò kɛ̀ ko káa mɔ̀, kɔ́áà kàà à ká tã́ã̀a lɛ́ ɓe.
Yékɛ̀ í nu ko ká lɛ̀ lɛ́ mia yí‐dã́‐wɔ̃̀ lɛ yía mɔ̀.
Kɛɛ ì ko la Kɛ‐pɛ̀ Yɔɔ kɛ‐mìa kɛ̀lɛ̀.’
“Yé kaà kã́ wɔ̃́ yɔɔ lɛ́ mia ò kɛ̀ ka káa mɔ̀, lɛ́ kaà káá tã́ã̀a, ka lɛ̀í Dàà lɛ́ɛ̀ lo kã́ã̀ ka zìa mɔ̀, tó a káá tã́ã̀. Kɛɛ yé kàá kã́ wɔ̃́ yɔɔ lɛ́ mia ò kɛ̀ ka káa mɔ̀, kɛ ká káá ka píé yía, ka Dàa lɛ̀ɛ́ ló kã́ã̀ ka zìa mɔ̀, kɛ á káá tã́ã̀.

“Yé kaà kɛ ka sṹũ yía, yékɛ̀ ká yolo kṹ, lɛ̀ zí mia lɛ́ ò o dìè wɛlɛ lia ò kɛ̀áa lɛ́ ɓe. Óò o wɛlɛ sìè kɛ mia ó o yí dɔ kélɛ̀ o o sṹũ yí. Wánà‐wɔ̃̀ lɛ́ m̀ gèe ka lɛ̀ɛ ɓɛ. Waà nyɛ o fɔ́nɔ́ sì à kɛ̀ kíli mɔ́ɔ̀ wɔ̃̀ mɔ̀. Kɛɛ yé ɓie ɓaà kɛ i sṹũ yía, ì i wɛlɛ pɛ́lɛ́, í i wĩĩ́ dùò, yékɛ̀ mia gbɛɛ ó i kɛ̀ sṹũ yí míní sí. I Dàa lɛ́ lɛ e bĩ̀ĩ̀pìàa lɛ́ nɔ́ è lo à yí dɔɔ̀ɔ. Tó i Dàa lɛ́ è wɔ̃́ lɛ́ ɓà kɛ̀ bĩ̀ĩ̀ káa gɛ̃̀ɛ, lɛ́ɛ̀ lo i fɔ́nɔ́ nɔɔ̀ à wɛ̃́ĩ̀.


“Yékɛ̀ ká dɔ‐pɔ̀ɔ̀ yàlà bɛ̀i ka dìè lɛ̀ɛ kpóṹ là zèe. Pɛ‐sìè‐pɛ̀ wà kàkpa óò pɛ sìè zèe. Ɛ́ɛ̃́ kã̀ã‐mìà óò ká lé wi zèe, tó wáà kã̀ã ɓò. Kɛɛ kà dɔ‐pɔ̀ɔ̀ yàlà bɛ̀i ka dìè lɛ̀ɛ Wálà‐pà. Pɛ‐sìè‐pɛ̀ wà kàkpa òó pɛ sìè yi, ɛ̃́ɛ̃́ kã̀ã‐mìà òó ká lé wí yi, kɛ ó kã̀ã ɓo. Ƃii lɛ̀ lɛ́ kà dɔ‐pɔ̀ɔ̀ lɛ yía, ka zò lɛ̀ɛ́ wɛ̀lɛ̀ à lɛ̀ mɔ̀.


“Nyìɛ lɛ nábò ká gbĩ‐kpàla mɔ́ɔ̀ wɔ̃̀ mɔ̀. À mɔ́ɔ̀ wɔ̃̀ mɔ̀ɔ, i nyìɛ é kɛ̀á zéĩ́‐zèĩ̀a, i gbĩ‐kpàla lɛ̀ séĩ́ lɛ́ɛ̀ lo paà lɛ̀ fɔ̀nɔɔ̀ɔ ká. Kɛɛ é kɛ̀á i nyìɛ lɛ ɓílí‐ɓìlìa, i gbĩ‐kpàla lɛ̀ séĩ́ lɛ́ɛ̀ lo kɛɛ̀ bĩ́ bà. À mɔ́ɔ̀ wɔ̃̀ mɔ̀ɔ, yé lɛ̀‐fɔ̀nɔ‐kɔ̀ lɛ́ e i yía, lɛ bĩ́ tii káa, zi sùu kpɛɛ̀ lɛ́ bĩ́ e kília míì lɛ mɔṹ à ká ké.


“Mi nɔ́ɔ fé lɛ̀ɛ́ bɛ̀i kɛɛ̀ lùò ká mia wũ‐là‐mìà pèèlɛ lɛ̀ɛ e kíe ká. É kɛ̀á kília, mi doó‐mì lɔ̀ lɛ́ɛ̀ lo nyɛɛ̀ à mɔ̀, tó mi doó‐mì lɔ̀ áà kpɔ̀ à mɔ̀. Lɛ́ɛ̀ lo kɛɛ̀ wánà zɛ̀ mi doó lɛ̀ɛ, tó à nyìɛ e fɔ̃́ mi yé e tóa yí. Ìí bɛ̀i kɛɛ̀ Wálà là lùò ká, tó ɓáà kɛ̀ zeĩ́ pɛlèe là lùò ká.
“À mɔ́ɔ̀ wɔ̃̀ mɔ̀ɔ, ḿm̀ gèe ka lɛ̀ɛ, yékɛ̀ ká kɛ zò‐gɔ̃́ zɛ̀ léɓèlè lɛ́ kà lo à ɓèlè, ɛ̃́ɛ̃́ pɛ́ kà lo à miì kɛ ká kɛ ɓe, ɛ̃́ɛ̃́ sɔ lɛ́ kà lo à naà ká dà ka gbĩ‐kpàla mɔ̀ɔ mɔ́ɔ̀ wɔ̃̀ mɔ̀. Kéa, kɛ̀ɓe wá dóo kpànazɛ̀ é dieá léɓèlè là? Ɛ́ɛ̃́ gbĩ‐kpàla bɛ̃̀ɛ̃ wá kpànazɛ̀ é dieá sɔ là? Kà mɔ̀ɔ̀ vɔ̀ lɛ́ ò dìè lɛ̀ía gɛ̃̀. Òó ɓu taa bɛ̃̀ɛ̃ kɛ ó gèe óò à kã, kɛ ó dùò gbã́ã́ lɛ̀í. É kɛ bɛ̃̀ɛ̃ kília, ka Dàa lɛ́ e lɛ̀ía, lɛ́ɛ̀ léɓèlè nɔ o lɛ̀ɛ. Ka wá kpànazɛ̀ é dieá o là? Yé ka dò aà e zò gɔ̃́ e zì kɛ̀ɓe wɛ̃́ĩ̀a, zò‐gɔ̃́ lɛ́ɛ̀ lo à kɛɛ̀, kɛ é yìì ɓéĩ́ ɓo fɛ̃̀ɛ̃̀?
“Zéniía, mɛ́ e kɛ lɛ́ kà ka zò gɔ̃ sɔ lɛ́ kà nàà ká dàa, mɔ́ɔ̀ wɔ̃̀ ká? Sùu nì lɛ́ è kɛ̀ áà e bĩ̀ luúa, zi lɛ́ ò fàa à káa, kà gɛ̃̀. Òó yɛɓo kɛ, ɛ̃́ɛ̃́ òó sɔ kɛ o dìè lɛ̀ɛ. Kà tó ḿ gèe ka lɛ̀ɛ, Sɔ́lómɔ̀ e kɛ mi kpànazɛ̀ kpó‐kpó ká, ɛ̃́ɛ̃́ sɔ yiè yiè e kɛ à kɛ̀lɛ̀. Kɛɛ sɔ nì e kília lɛ̀ɛ́ gbaa kɛ sɛ̀, é dieá sùu bĩ́ e kéa doó fèle là. Wálà lɛ́ è sɔ yèlè sùu nì mɔ̀ɔ. Sùu e kília lɛ pɛ́nɛɛ ɓe luú, kɛɛ yé tòò aà kɛɛ, óò lo à káà tíè. Yé mɔṹ lɛ kília, zi sùu kpɛɛ̀ lɛ́ è lo sɔ yèlèá ka yee ka mɔ̀ ké. Ka zì zò‐dɔ̀à‐mɔ̀ lɛ dóo nyɔ̀nɔ́ kpó‐kpó ɓo. À mɔ́ɔ̀ wɔ̃̀ mɔ̀ɔ, yékɛ̀ ká ka zò gɔ̃́, káà gèè kélɛ̀, ‘Mɛ́ kò lo à ɓèlè,’ ɛ̃́ɛ̃́ ‘Mɛ́ kò lo à miì?’ Ɛ́ɛ̃́ ‘Kóò lo sɔ gɛ̃̀ɛ̃̀ mɛ́ kó dà ko mɔ̀?’ Ƃii mia lɛ́ òó Wálà dɔɔ, pɔɔ̀ séĩ́ nì e kília wɔ̃̀ diè lɛ o zò ká. Ka lɛ̀í Dàà lɛ́ɛ̀ à yí dɔ kélɛ̀ lɛ ka mɔ̀ ká pɛ séĩ́ nì e kília sɔ̀lɔ̀ ɓo. Kɛɛ pɛ lɛ́ lɛ à mɔ̀ à wɔ̃̀ é die ka zò ká, é dieá pɛ séĩ́ làa, lɛ́ e kélɛ̀, Wálà zì tò‐mia‐là, wà wɔ̃́ lɛ́ à nàà mia ó kɛɛ. Yé aà kɛ kília, lɛ́ɛ̀ lo pɔɔ̀ séĩ́ nì e kília nɔɔ̀ ka lɛ̀ɛ. À mɔ́ɔ̀ wɔ̃̀ mɔ̀ɔ, yékɛ̀ ká ka zò gɔ̃́ tòò mɔ́ɔ̀ wɔ̃̀ mɔ̀. Ƃii tòò zì zò‐gɔ̃́ bɛ̀iì lɛ à mɔ̀. Lúó séĩ́ zì wɔ̃́ nyɔ́ɔ̀ɔ lɛ ɓe. À mɔ́ɔ̀ wɔ̃̀ mɔ̀ɔ, ye wá ka mɔ̀ kɛɛ ká lúó dò zì là kpɔ́.

Luister naar Máfìù 6