Kaba for CAR - ACATBA; 2020  Drama (NT)

Goe tə̂ a, Jeju unn kutu pa tar kə njê-njaje goe tə̂ kə gusu-tar. N̂-pa nan: «Marə dingaw dda ndɔɔ binyə. Nila ndoko n̂-guku nɛ̂n dɔɛ̂. Nuru buwa mə ər tə̂ mba kore nɛ̂n maann-binyə le. N̂-dda marə lo-kisi taar mba kaa nɛ̂n ndɔɔ le. Goe tə̂ a, ninya ndɔɔ le ji marə njê-kula binyəje tə̂ a, naw mba tə̂. Tee kar kuja kandə binyə tə̂ le a, nula nje-kula laa rɔ njê-kula binyəje tə̂ le karə dula kə əngɛɛ̂n darɛ̂. A njê-kulaje le uwɛ̂je undɛ̂je ngaâ tubbɛ̂je arə n̂-təl jia baa. Nje-ndɔɔ le ula marə nje-kula laa a, njê-kulaje le undaje dɔɛ̂ ngaâ tajɛ̂je. Nje-ndɔɔ le təl ula marɛ̂ bbay a, njê-kulaje le tɔlɛ̂je. N̂-təl nula marɛ̂je banya bbay a, njê-kulaje le tundaje marɛ̂je, tɔlje marɛ̂je. Ngonnɛ̂ kə̂ dingaw kə̂ n̂-ndike nya kâra baa ngaa â nayn. Nulɛ̂ to dɔbɔyn dəw rɔ njê-kulaje tə̂ le, mba n̂-pa nan: ‹Bbo ngonnəm a, dâ bbəəlje.› A njê-ddaje kula binyə le paje horo naan tə̂ nan: ‹Nje-kuwa nɛ̂n-ndubba le â nəənn. Ə-ddeeje arəje n-tɔlɛ̂je jarəje nɛ̂n-ndubba le təl to ləje!› Yeenn ngaâ duruje dɔ ngonn tə̂ le n̂-tɔlɛ̂je ngaâ n̂-ndɔruje niinnɛ̂ n̂-teeje nɛ̂n mə ndɔɔ tə̂ le kə ddang. Ddi â nje-ndɔɔ le a dda wa? Nâ ddee tɔl njê-ddaje kula binyə le ta nâ kinya ndɔɔ le ji marə dəwje tə̂ kə̂ dang. Ə-turaje tar kə̂ Makəturu lə Lubba pa nəənn ang wa? Makəturu le nan:
‹Ər kə̂ njê-kɔsu kəyje mbətəje le,
ddee to singa gɔl kəy kə̂ dungu nangə̂.
To nɛ̂n kə̂ in bbeê lə Əbbə-dəwje
ngaâ to nɛ̂n-mɔri kəmje tə̂.› »
Mbayje lə njê-poloje Lubba aw sangəje ddəw ta kuwa Jeju le, mba n̂-gərəje to dede â Jeju aw pa gusu-tar nəənn ɔju dɔde. A n̂-bbəəlje dəwje kə̂ banya le ngaâ dinyɛ̂je a dɔtuje.

Dulaje marə Parijinyɛje kə marə dəwje kə̂ eeje mə mbɔn-naan tə̂ lə Erodə Antipas rɔ Jeju tə̂ karə n̂-nɛɛ̂nje ddəw tar tə̂ kə̂ tɛɛ̂ tə̂. N̂-ddee n̂-paje darəje Jeju le nan: «Nje-nɛ̂n-tɔju, n-gərə to aw pa tar kə̂ tɔkɔrɔ, aw tɔju ddəw lə Lubba ddəw tar tə̂ kə̂ tɔkɔrɔ. Aw bbəəl kəm dəw ang ddəm dəw kə̂ bo wase dəw kə̂ tɛn kara osoi tə̂ ang. Ə-pa arəje joo: Ndu arəje ddəw karə juka lambo jarə tɔkə mbay kə̂ Rɔm wase ta kuka ang wa? Ta juka wase juka ang wa?»
A Jeju gərə to tar kə̂ məde tə̂ to dang kə tar kə̂ tade tə̂ ngaâ pa arəde nan: «Aw nanʼmje mba ddi wa? Ə-ddeeje kə marə kandə narɛ kâra arəmje moo.» N̂-ddeeje kə marə kandə narɛ darɛ̂je ngaâ n̂-dujude nan: «Əndaji dɔ dəw kə makəturu kə̂ n̂-dda kandə narɛ tə̂ nəənn toje to le nan wa?» Dilɛ̂je tə̂ nan: «To lə tɔkə mbay kə̂ Rɔm.» Yeenn ngaâ Jeju pa arəde nan: «Arəje tɔkə mbay kə̂ Rɔm nɛ̂n kə̂ to lə tɔkə mbay kə̂ Rɔm, a arəje Lubba nɛ̂n kə̂ to lə Lubba.» Tar laa le dum dɔ dəwje kə̂ ddeeje ta nɛɛ̂n le.

Marə Sadusinyɛje ddeeje rɔ Jeju tə̂. Sadusinyɛje le paje nan dəwje kə̂ oyje a ndolje ang. N̂-dujuje Jeju nan: «Nje-nɛ̂n-tɔju, Mɔyijə unn ndu arəje makəturu tə̂ nan: ‹Bbo dingaw uju kə dɛnɛ̂n laa ang ngaâ oy inyɛ̂, a bbo ngokɔn dingaw le to a, maji karə n̂-taa dɛnɛ̂n le nuju nɛ̂n ngannje narə ngokɔɛ̂n kə̂ oy le.› Ləw, marə ngakɔn-naanje eeje siri. Ne kə̂ n̂-to dərə n̂-taa dɛnɛ̂n ngaâ nuju saa ngonn ang, a noy. Nje-goe kə̂ to joo ləde taa dɛnɛ̂n le ngaâ uju saa ang, a oy tɔ. Mota ləde ta dɛnɛ̂n le, a tokə baann bbay. Aw nɛ̂n kə goe goe arə dede kə̂ siri le dujuje ang, a doyje tɔyn. Goe tə̂ a, dɛnɛ̂n le kara oy tɔ. Ndɔ ndol lə dəwje kə̂ oyje kə̂ dâ ndolje tɔyn a, nân horode tə̂, a to nje-dɛnɛ̂n le wa? Mba dede siri tɔyn njaa n̂-taaje dɛnɛ̂n le.» Jeju ilade tə̂ nan: «Ə-ndəəmje ddəw, mba ə-gərəje Makəturu lə Lubba ang ddəm tar singa-mɔngu lə Lubba ang ddəm. Ndɔ kə̂ dəwje kə̂ oyje ndolje a, dingaw a taa dɛnɛ̂n ang ddəm dɛnɛ̂n a taa ngaw ang ddəm. Dâ kisije tokə anjəje kə̂ darâ. Tar kə̂ ɔju dɔ ndol lə dəwje kə̂ oyje le, ə-turaje tar kə̂ makəturu tə̂ lə Mɔyijə le ang wa? Lubba pa arə Mɔyijə mbɔr bər-kam tə̂ kə̂ aw ɔn puru pa nan: ‹M-to Lubba lə Abaraham, Lubba lə Ijakə, Lubba lə Jakobbo.› Lubba to Lubba lə dəwje kə̂ oyje ang, n̂-to Lubba lə dəwje kə̂ isije kəm baa. Yeenn a, ə-ndəəmje ddəw njaa nyɔm.»

Marə nje-gərə-Ndu oo tar ləde le, a gərə to tar kə̂ Jeju ilade tə̂ to kə dɔgɔlɛ̂ ngaâ ddee rɔ Jeju tə̂ ngɔsi duje nan: «Ndu kə̂ dda â ngəng uta kəseje tɔyn wa?» Jeju ilɛ̂ tə̂ nan: «Ndu kə̂ ngəng uta kəseje nan: ‹See ngann Ijarayɛlje, ooje! Əbbə-dəwje kə̂ to Lubba ləje â to Əbbə-dəwje kâra baa. Maji karə ə-ndiki Əbbə-dəwje Lubba ləi kə məi tɔyn kə kəwn ləi tɔyn kə kəjə ləi tɔyn kə singai tɔyn.› Ndu kə̂ to joo laa â nəənn: ‹Ə-ndiki nje-mari tokə da-rɔi njaa.› Marə ndu kə̂ ngəng uta yeje kə̂ joo nəənn goto.»
Nje-gərə-Ndu le pa arə Jeju nan: «Maji nya, Nje-nɛ̂n-tɔju! Tar kə̂ tɔkɔrɔ â ə-pa nəənn. Əbbə-dəwje â to Lubba kâra baa, marə Lubba dang goto. Maji karə dəw kâra kâra ndiki Lubba kə məɛ̂ tɔyn kə kəjə laa tɔyn kə singɛ̂ tɔyn. Maji karə n̂-ndiki nje-marɛ̂ tokə da-rɔɛ̂ njaa. Yeenn maji uta nɛ̂n-poloje kə̂ ta ro kə nɛ̂n-karə-baaje dang dang.» Jeju oo a, tar kə̂ nje-kɔru gəl Ndu le ilɛ̂ tə̂ le to tar kəm-karɛ. Yeenn ngaâ n̂-pa narɛ̂ nan: «Ee ngɔsi baa kə Bbe-kɔn lə Lubba ngaa.» Goe tə̂ a, dəw tay duje tar ang ngaa.

Jeju aw tɔju nɛ̂n mə kəy-polo Lubba tə̂ lə Jiipije a, duju tar nan: «Njê-gərəje-Ndu a kasəje ta pa nan Kristə le to ngonn lə Dabbiti tokə baânn wa? Dabbiti njaa kara, kar tə̂ kə̂ Ndil-mə-nda dduse, pa nan:
‹Əbbə-dəwje Lubba pa arə Əbbəmje nan:
Ə-ddee isi dɔ ji-kɔləm tə̂
ndərəng ta mungu njê-baanje ləi kɔ gɔli tə̂.›
Dabbiti njaa kara bbar Kristə le to Əbbeeje. Yeenn a, Kristə le a to ngonnɛ̂ tɔ bbay tokə baânn wa?» Dəwje nya aw ooje tar laa le kə rɔ-nəəl.

Jeju pa mə nɛ̂n-tɔjuje tə̂ laa nan: «Aaje rɔse rɔ njê-gərəje-Ndu tə̂, mba n̂-ndikije ta kula kubbu kə̂ ngal bba ta nja nɛ̂n. N̂-ndikije karə dəwje ddade lapiya natâ. N̂-ndikije nɛ̂n-kisije kə̂ to kete mə kəy mbɔn-naan tə̂ ddəm ta nɛ̂n-kusa tə̂ ddəm. A daw taaje nɛ̂nje lə dɛnɛ̂n-ndubbaje tɔyn jide tə̂, daw dujuje Lubba darə kure əw mba kəm dəwje. Mba yeenn bba sariya kə̂ dɔde tə̂ a ngəng nya kuta lə kəsə dəwje.»

Goe tə̂ a, Jeju turu kəmɛ̂ kə nɛ̂n tə̂ kə̂ daw dila nɛ̂n-karə-baa məɛ tə̂, naw noo nɛ̂n kə̂ dəwje aw ilaje. Njê-nɛ̂n-kingaje aw ilaje narɛ tokə bo. Marə dɛnɛ̂n-ndubba kə̂ to nje-ndoo ddee ila ngann kandə narɛ joo kə̂ kɔrɛ̂ boy ang. Yeenn ngaâ Jeju bbar njê-njaje goe tə̂, pa arəde nan: «M-pa tar kə̂ tɔkɔrɔ marəse: Dɛnɛ̂n-ndubba kə̂ to nje-ndoo nəənn ila nɛ̂n bo uta dəwje tɔyn. Mba kəsə dəwje tɔyn, narɛ kə̂ dooje nɛ̂n ta dda nɛ̂n ang â dilaje. A ne, bbay narɛ kə̂ nayn ta karə n̂-ngəm nɛ̂n rɔɛ̂ njaa nila.»

Luister naar Markə 12