Gola - 2019 LIB (NT) Drama

Gola New Testament Translation and Literacy Project © Bible Society in Liberia, 2019.

Eɓìèmàŋjɛ̀wɛ̀ tɛɛ̀, wo Jisɛ̀ naŋ jààmè anyùùŋ nyaŋ maŋ tàta màŋ sùà wɔŋ fùɔ̀ŋ Galaliìɔ. Wò naŋ wa yèwè ko Jùdià esaɓù kɛ̀ anyùùŋ gbèègbèè aŋ Juùù nyaŋ yaà wa kààmè e ɗewe wèè auŋ jìwà. E teengaà wa naàŋ gbɛ̀ɛ̀ wèè wɔŋ ɗàà gè aŋ Juùù nyaŋ wɔŋ yèɔ àŋ nyaaŋ nyààŋ wɔŋ Ɗàà Maŋ Vààyà Saaŋ màŋ wɔŋ haì. Kpeiŋ aŋ wùìyà Jisɛ̀ nyaŋ nauŋ woò nyààŋ, “Yewà wɔŋ fuɔŋ wɛɛ̀ŋ muŋ ka ko Jùdià, wèè kɛ̀ anyùùŋ màŋjɛ̀wɛ̀um nyàŋ aŋ yɛmɛ̀ ke nyɛ̀nɛŋ mɔɛ̀ŋ. Yèè nyààŋ e gò tɛɛwɛ̀ wèè wò nyùùŋ wo nyɛ̀ɛ̀nɛ̀ŋ è nɛ̀ɛŋ wò nyɛnɛŋ lɛ̀ sèè wò mɔnɔŋ wèè anyùùŋ nyaŋ aŋ niŋ nyìmàŋ. Weètii nyɛnɛ̀ŋ anyùùŋ nyaŋ gbiŋ e ɗuunyaàŋ aŋ nyìmàŋ e yèɛ mùŋ yaà nyinie lɛ̀.” Aŋ wùìyà Jisɛ̀ nyaŋ nyiŋ pɛɛ aŋ gòuŋ wa haawè.
Wo Jisɛ̀ naŋ nyiŋ fasàì wààŋ, “Ke ɗɔ̀ɔ̀ kàa miɛ̀ŋ kòò kè hàì. Kɛɛ e teenga gbiŋ è yaà tɛ̀ɛ̀ e weèiŋ. Anyùùŋ nyaŋ e ɗuunyaàŋ kuwà èsaɓù bà wèè aiŋ wùàŋ. Kɛɛ àŋ naim wùɔ̀ŋ esaɓù kɛ̀, mìŋ woà nyiìŋ kɛ̀ maŋ keì nyɛ̀nɛŋ nyiŋ màŋ maŋ fè tɛ̀ɛ̀. Nyɛ̀iŋ kɔ̀àaìŋ wɔŋ ɗaaà diɛŋ. Miŋ fè kɔ̀ɔ̀yɛ̀ wɔ̀ŋ ɗaa wɛɛ̀ŋ diɛŋ, esaɓù kɛ̀ ke ɗɔ̀ɔ̀ kàa miɛ̀ŋ kòò kè hàì.” Wo Jisɛ̀ naŋ nyiŋ wa tɛɛ̀ woò yèè wò naŋ jòò jɛ̀wɛ̀ ko Galaliì.

Aŋ wùìyà Jisɛ̀ nyaŋ naŋ kɔ̀ wɔŋ ɗaaà diɛŋ, yèè eɓìèmàŋjɛ̀wɛ̀ ngàà wo Jisɛ̀ wuŋ pɛɛ naŋ kɔ̀ wɔŋ ɗaaà diɛŋ. Wò naŋ wa kɔ̀ wɔŋ kùàŋ wùŋ mauŋ, yèè wo gò wa nyɛ̀nɛ̀ŋ wèè ànyùùŋ auŋ jààèjii. Anyùùŋ gbèègbèè aŋ Juùù nyaŋ yaà wa yɛ̀ɛ̀mɛ̀ wo Jisɛ̀ dòmaŋ yèè àŋ naŋ kùùnò dàwè anyùùŋ nyaŋ wɔŋ ɗaaà sùà nyààŋ, “Kòò wo felaa dàà gbɔ̀ɔ wii wò yaà?”
Anyùùŋ nyaŋ e faaàŋ sùà yaà wa kpaane kpaane maŋ wɛɛwɛɛ suà nyiŋ bi e fèemàŋ e nyaàiŋ dè wò Jisɛ̀. Anyùùŋ nyaŋ bà nyiŋ yaà wa woo nyààŋ, “Wo Jisɛ̀ yaà wo nyùùŋ tɔ̀ɔ̀nyaàŋ,” kɛɛ aŋ bà nyiŋ yaà woo nyààŋ, “Kpele, wò yaà tùùya sùà anyùùŋ nyaŋ gbiŋ.” Kɛɛ anyùùŋ nyaŋ gò wa wòò è kiiuŋ gèngèè esaɓù kɛ̀, àŋ duɔŋ wa anyùùŋ gbèègbèè aŋ Juùù nyaŋ.
Nààŋ maŋ ɗɔɔ màŋ wèè wɔŋ ɗaaà naŋ wa naàŋ hàì tɛɛ wèè wɔŋ jùà, wo Jisɛ̀ naŋ kɔ̀ ko Saaŋ Zòòlò Dayài yèè wò naŋ tɔ̀ɔ̀tù anyùùŋ nyaŋ kàa. È naŋ wa fòònò anyùùŋ gbèègbèè aŋ Juùù nyaŋ zimgbe wèè e ɗewe kiiɛ̀ wò yaà wa kàà sùà anyùùŋ nyaŋ lɛ̀, yèè àŋ naŋ dawè nyààŋ, “Dièsɔa wo felaa wɛɛ̀ naŋ nyɛ̀nɛ̀ŋ wò naŋ nyìmè maŋ keì mɛɛ̀ŋ gbiŋ fèemàŋ tɛ̀ɛ̀, tiŋ zà kòò wò kɔ̀ wa è kàa dìì wèè wo miŋ gbeè?”
Yèè wo Jisɛ̀ naŋ nyiŋ fasàì wààŋ, “E yèɛ mìŋ kaà lɛ e fè kè nyɛ̀nɛ̀ŋ miàŋ bi, kɛɛ è yewe wo Dayà sìwè, wo yèɔ naim tùɔ̀ŋ wɔ. Sèè wo nyùùŋ gbiŋ mɔnɔŋ wèè wo kaikpɔ nyɛ̀nɛ̀ŋ e yèɛ wo Dayà manaŋ wo nyɛ̀nɛ̀ŋ lɛ, wò do naŋ nyìmè sèè mààŋ e yèɛ mìŋ kaà lɛ è yewe wo Dayà sìwè ɔ̀ɔ̀ è yewe e gààŋ miàŋ biɔ̀ sùà. Sèè mìŋ mɔnɔŋ weè wèè ka gbòà wèè ka jòòwò miàŋ bi, mìŋ henàŋ gbòò e gààŋ miàŋ biɛ̀ sùà. Kɛɛ mìŋ manaŋ ka dɛ̀ɛ̀kɛ̀ wo nyùnɔ̀ɔŋ naim tùɔ̀ŋ wɔ. Esaɓùɛ lɛɛ̀ mìŋ woà e tɔɔɓaaà yèè e fè tòa. È yaà tɔɔɓaa kɛ̀ wo Mòòze naiŋ wa kìɛ̀ŋ maŋ sàwà Dayà maŋ. Kɛɛ nyɛ̀iŋ nààŋ bà gbiŋ fè miŋ jɔ̀ɔ̀lɔ̀ dìì è tɔ̀ɔ̀nyaàŋ sùà. Sèè nìŋ jɔɔlɔ̀ miìŋ weè dìì, kɛ̀ wèè kiìŋ nìŋ yaà kààmè ɗewe wèè naim jìwà?”
Anyùùŋ nyaŋ e faaàŋ sùà naŋ fasàì nyààŋ, “Mùŋ naŋ sààŋ ke gbòà! Kiìŋ naum nyɛ̀nɛ̀ŋ mùŋ naŋ gongò kɛ̀ wo nyùùŋ bà manaŋ wèè woum jìwà?”
Wo Jisɛ̀ naŋ nyiŋ woò wààŋ, “Mìŋ naŋ nyɛ̀nɛ̀ŋ e tòmò e kèè mèè guùŋ, yèè è naŋ wa fòònò nyɛ̀iŋ nààŋ gbiŋ. Nìŋ jaa wo felaajɔa ke kpùa ke Ɗɔ̀ɔ̀ Zòòlò aŋ Juùù nyaŋ diɛŋ màànààŋ nɔŋ wo Mòòze naiŋ wa woò wààŋ niŋ nyɛ̀nɛ̀ŋ lɛ. Kɛɛ wo Mòòze nààŋ gò wa tɔ̀ɔ̀tù è kèè kè kpùà jàa bi. Aŋ nèwàènèweiŋ nyàŋ naŋ tɔ̀ɔ̀tù ke nyɛ̀nɛŋ bi, yèè nìŋ jaa pɛɛ aŋ jɔ̀àfelaaiŋ nyàŋ kpùa ke Ɗɔ̀ɔ̀ Zòòlò aŋ Juùù nyaŋ diɛŋ. Sèè wo jɔ̀àfelaa nɔ̀ŋ ke kpùà jàa ke Ɗɔ̀ɔ̀ Zòòlò aŋ Juùù nyaŋ diɛŋ wèè niŋ go nàŋ pɔ̀ɔ̀ ke sàwà Mòòzeɛ̀, kɛ̀ wèè kiìŋ nìŋ naim tùù sìwè e fòfoo mìŋ naŋ sùngò wo nyùùŋ bà ke ɗɔ̀ɔ̀ guùŋ bi bà diɛŋ miàŋ pɛɛ? Ɓɔ̀ mùŋ gbaì wò nyùùŋ wèè èsàɓù è nɛ̀ɛŋ wò naŋ nyɛ̀nɛ̀ŋ è naŋ tèènè è bàa lɛ̀, kɛɛ gbàì wò nyùùŋ wèè e yèɛ wò naŋ nyɛ̀nɛ̀ŋ è yaà tɔ̀ɔ̀nyaàŋ lɛ.”

Anyùùŋ nyaŋ bà nyiŋ yewe wa ko Jùlusɛ̀làm nyaŋ yaà wa wòò e kèè wo Jisɛ̀ nyààŋ, “Wɛɛ̀ nààŋ fè wò felaaà ànyùùŋ gbèègbèè àŋ Juùù nyaŋ yaà kààmè ɗewe wèè aŋ jìwà wɔ? Wuŋ wɛɛ̀ kià, wò yaà gbùùyè koɓɛ̀ anyùùŋ nyaŋ gbiŋ wèè auŋ kumiàŋ, yèè wo nyùùŋ kòò wò gbìɛìŋ pɛɛ wɔ̀ŋ mààŋdàwè. Tɔɔɓaa ɓàà wɛɛ̀ wò wɛ̀i ɓɛ̀nɛ̀ŋ nɔ̀ŋ wo yèɔ anyùùŋ gbèègbèè aŋ Juùù nyaŋ naŋ haawè kɛ̀ wo Dayà naŋ tàeɗùù wèè wo joeyè e ɗuunyaàŋ wɔ? Kɛɛ diè tɛɛ̀ naŋ ɓɛ̀nɛ̀ŋ kààiŋ? Wo nyùùŋ gbiŋ wo nyimààŋ kɛ̀ kòò wò Tàèɗùù Dayàa wò do nàŋ yèwè, kɛɛ èiŋ nyìmàŋ kɛ̀ kòò wo felaa wɛɛ̀ wò yewe.”
Nààŋ wo Jisɛ̀ yaà wa kàà sùà anyùùŋ nyaŋ ko Saaŋ Zòòlò Dayài, wò naŋ gbòò ke miè gbee sùà yèè wò naŋ woò wààŋ, “Nàŋ gongò kɛ̀ nàim kaikpɔ nyìmàŋ yèè nàŋ nyìmàŋ kɛ̀ kòò mìŋ yewe? Miŋ gò hnàŋ è gààŋ miàŋ biɛ̀ sùà! Wo nyùnɔ̀ɔŋ naim tùɔ̀ŋ wɔ wò yaà wo nyùùŋ tɔ̀ɔ̀nyaàŋ, yèè niŋ nyimààuŋ. Kɛɛ kà nyìmàŋ wo yèɔ naim tùɔ̀ŋ wɔ, esaɓù kɛ̀ mìŋ yewe ko nɛ̀ɛ̀uŋ niìŋ.”
Anyùùŋ nyaŋ bà nyiŋ manaŋ wa auŋ kùwà ko fɛɛ̀feìŋ. Kɛɛ wo nyùùŋ gbiŋ gòuŋ wa mɛnlɛ̀ɛ̀ŋ, esaɓù kɛ̀ e tèèngà fàauŋ nɛ̀ kòò è hàì wa. Anyuùŋ zimgbe e faaàŋ sùà naŋ wa kɛ̀ɛ̀nɛ̀ŋ e hààwe wo Jisɛ̀ ko sùà yèè àŋ naŋ woò nyààŋ, “Sèè wo yèɔ wo Dayà naŋ tàeɗùù wèè wo joeyè e ɗuunyaàŋ wɔ wò hnàŋ, tɔɔɓaa wo naàŋ nyɛ̀nɛ̀ŋ màŋ kèè mèè màŋ do nìàŋ màŋ yè maŋ wò felaa wɛɛ̀ naŋ nyɛ̀nɛ̀ŋ maŋ!”

Nààŋ aŋ Fɛlosiì nyaŋ naŋ kòmò e yèɛ anyùùŋ nyaŋ yaà wa woo lɛ̀ e nyaàiŋ dè wo Jisɛ̀, nyiŋ yèè aŋ kànà sìèfèìŋ zòòlo nyàŋ naŋ tùɔ̀ŋ anyuùŋ tùnìàŋ ke saaŋ zòòlò Dayà nyaŋ bà wèè aŋ kùwà wo Jisɛ̀. Kɛɛ wo Jisɛ̀ naŋ nyiŋ wa woò wààŋ, “Mìŋ doiŋ nàŋ nɔ̀ŋ e tɛɛ wèè e teenga jɔa kpàa bà, eɓìèmàŋjɛ̀wɛ̀ mìŋ do nàŋ kɛ̀ɛ̀ koɓɛ̀ wo nyùnɔ̀ɔŋ naim tùɔ̀ŋ wɔ. Nìŋ doim nàŋ kamè, kɛɛ niŋ nàim yɛmɛ̀. Niŋ fè ɓɛ̀nɛ̀ŋ kà kòɓɛ̀i mìŋ yaà kɔɔyɛ̀ lɛ̀.”
Anyùùŋ gbèègbèè aŋ Juùù nyaŋ bà nyiŋ naŋ dàwè nyiŋ bi fèemàŋ nyààŋ, “Kòò wò do nàŋ kɔ̀ e yèɛ sèè è kamàuŋ e naàuŋ yɛmɛ̀? Ɓàà wò do nàŋ kɔ̀ wɔŋ fuɔŋ joo bà sùà ko yèi anyuùŋ wi nyàŋ bà joà lɛ anyuùŋ gbòà Guliì mie nyàŋ tɛɛ wèè wo nyiŋ kàà e ɗèwè e Guliì mieɛ̀ gbòa? Kiìŋ wò yaà kààmè ɗewe wèè wo wi woò kɛ̀, è douŋ nàŋ kamè kɛɛ e naàùŋ yɛmɛ̀? Wèè kiìŋ wààŋ e naàìŋ ɓɛ̀nɛ̀ŋ kà koɓɛ̀i wò do nàŋ nɔ̀ŋ lɛ?”

Ke ɗɔɔ dìàmaŋ gbeeɛ̀ diɛŋ nààŋ anyùùŋ nyaŋ naŋ kpɛ̀ɛ̀yɛ̀ wɔŋ ɗaa geɔ̀, wo Jisɛ̀ naŋ sie yèè wò naŋ gbòò ke miè gbee sùà wò naŋ woò wààŋ, “Wo nyùnɔ̀ɔŋ gbiŋ nɔ̀ŋ ke jòòmàì sùà wɔ, wo hnàŋ ko nɛ̀ɛ̀ŋ miìŋ yèè mìŋ doum nàŋ kìɛ̀ŋ e wùìyè maŋ tìà. Yèè wo nyùnɔ̀ɔŋ gbiŋ haawàìm wɔ, nààŋ wɔŋ fɛ̀ì Dayàa naŋ woò lɛ, ‘E wùìyè nyiiŋ gèe douŋ nàŋ fòlò ko sùà.’ ” Wo Jisɛ̀ yaà wa wòò e kèè wo Jìnàŋ Dayàa, wo yèɔ wò hewa nàŋ kìɛ̀ŋ koɓɛ̀ wo nyùnɔ̀ɔŋ gbiŋ nauŋ haawè wɔ. Wo Jìnàŋ wo Kanaà Dayà kòò wò nɔ̀ŋ wa kìɛuŋ kòɓɛ̀ wò nyùùŋ gbiŋ, nààŋ wo Jisɛ̀ kòò wò nɔ̀ŋ wa jòòwouŋ wèè wò Dayà wouŋ kìɛ̀ŋ è dɛ̀ɛ̀kɛ.

Nààŋ anyùùŋ nyaŋ naŋ kòmò wo Jisɛ̀ naŋ tɛɛ̀ woò, aŋ bà nyiŋ naŋ woò nyààŋ, “Tɔɔɓaa wo felaa wɛɛ̀ nàŋ yaà wo Wɛ̀ijìɔ.”
Aŋ bà nyiŋ naŋ woò nyààŋ, “Wuŋ nàŋ yaà wo yèɔ wo Dayà naŋ tàeɗùù wèè wo joeyè e ɗuunyaàŋ wɔ.”
Kɛɛ aŋ bà nyiŋ naŋ dawè nyààŋ, “Tɔɔɓaa wo yèɔ wo Dayà naŋ tàeɗùù wèè wo joeyè e ɗuunyaàŋ wɔ ɓɛ̀nɛ̀ŋ yèwà ko Galaliì? Wɔŋ fɛ̀ì Dayàa naŋ woò wààŋ wo Tàèɗùù Dayàa do nàŋ fòlò ke kpòò Kanaà Dèèweɛ̀ sùà. Yèè wò do nàŋ nɔ̀ŋ kùmiauŋ ko jàwà Dèèweì àŋ nyaaŋ ko Bɛfilehɛɛ̀ŋ lɛ.” Yèè e kpàànè kpaane naŋ wa sɛ̀ɛ̀ anyùùŋ nyaŋ e tɛɛ e nyaàiŋ dè wo Jisɛ̀. Anyùùŋ nyaŋ bà nyiŋ e faaàŋ sùà manaŋ wa auŋ kùwà, kɛɛ wo nyùùŋ gbiŋ gòuŋ wa mɛnlɛ̀ɛ̀ŋ.

Nààŋ anyuùŋ tùnìàŋ ke Saaŋ Zòòlò Dayàa naŋ kɛ̀ɛ̀ maŋjɛ̀wɛ koɓɛ̀ anyùùŋ nyaŋ naŋ nyiŋ wa tùɔ̀ŋ nyaŋ, aŋ kànà sìèfèìŋ zòòlo nyàŋ yèè aŋ Fɛlosiì nyaŋ naŋ nyiŋ dawè nyààŋ, “Wèè kiìŋ niŋ gò hìàŋ wò Jisɛ̀?”
Anyuùŋ tùnìàŋ ke Saaŋ Zòòloɛ̀ naŋ nyiŋ fasàì nyààŋ, “Wo nyùùŋ gbiŋ kòò wò wòò wa màŋ keì maŋ wo felaa wɛɛ̀ naŋ woò maŋ!”
Aŋ Fɛlosiì nyaŋ naŋ nyiŋ dawè nyààŋ, “Niŋ gò haawè kɛ̀ wò naiŋ tuuyè nyɛ̀iŋ pɛɛ? Anyùùŋ gbèègbèè aŋ Juùù nyaŋ bà guùŋ pɛɛ ɔ̀ɔ̀ aŋ Fɛlosiì nyaŋ gò hààwè wò felaa wɛɛ̀. Anyùùŋ nyaŋ e dììɛ diɛŋ aŋ nyimààŋ màŋ Sàwà Dayà maŋ, weètii wo Dayà do nyiŋ nàŋ nimilà.”
Wo Nìkɔ̀dimɔ̀ yaà wa ko fɛɛ̀feìŋ ke ɗɔɔ yii. Wò yaà wa wo bàuŋbà ke gbòò aŋ màmànkùmɛ̀ŋ fuɔŋ nyàŋ sùà, yèè wuŋ naŋ wa kɔ̀ koɓɛ̀ Jisɛ̀i e tèèngà guùŋ bà e dùùm. Wo Nìkɔ̀dimɔ̀ naŋ nyiŋ woò wààŋ, “Ke Sàwà wiɛ̀ gò wi gè nyààŋ diɛŋ wèè eiŋ jèè wò nyùùŋ è keì paŋgàà è komo e yèɛ wò kuwa wo woò lɛ ɔ̀ɔ̀ paŋgàà è nyɛnɛŋ maŋ nɔnɔŋ tùaŋ wèè e nyìmàŋ e yèɛ wò naŋ nyɛ̀nɛ̀ŋ lɛ.”
Yèè aŋ màmàŋkùmɛŋ nyàŋ naŋ fasàì nyààŋ, “Nìkɔ̀dimɔ̀, muàŋ pɛɛ mùŋ yewe ko Galaliì? Kɛ̀ kpɛnɛ̀ŋ weè wɔŋ fɛ̀ì Dayàa. Yèè mùŋ do naŋ nyìmè kɛ̀ wo wɛ̀ijì gbiŋ wo naàŋ yèwè kò Galaliì.”

[ Eɓìèmàŋjɛ̀wɛ̀ tii, wo bà guùŋ gbiŋ naŋ kɔ̀ ko gboouŋ noo.

Luisteren Jɔ̀ɔŋ 7