Aghul - 2005 IBT (Luke) Drama

Ӏиса, ачадина Ерихун агъа шагьурдиди, гӀаттвей хьуная шагьурдин куьчабуригӀас. Ге шагьурдиъ ахьуная Закай агъа са девлетлу инсан, налукар завал аркьаттарин хӀаф. Гис ппара Ӏайи агвас кканди ахьуная Ӏиса, Ге фишттинф ичугвас, амма уч джикъеф идехӀела, халкьдигӀас аргвай хьуна адава гис Ӏиса. Ге гьуккай гьайчӀуна удигьди, алгъучӀуная тутун кӀуранил, учис Ӏиса агвас гисагьас гьаттверегуна. Ӏисайи, ге мукьуйигьди гьучарукьугуна, вартт хъуттурфуна, пуная:
– Закай! ТегӀди алайчӀв! ЯгӀа Зун вахъди ушуна ккандея.
ТегӀди алайчӀуна, шатти кьабул акьуная ги Ӏиса. Ӏиса гихъай ушухӀела, джаллабури чаб чиппигӀди агъай хьуная:
– Гьеге гунагьар кея инсандин хулади ушуне Ӏиса?!
Ӏисайин удигь гъузуна, Закая пуная:
– Е ХӀаф, зе девлетин са пай, зун касибарис есе. Нагагь зун гьинас хьунара Ӏемалар акьуна, алтухъди гъушунахаб, зун тис якьутти ппара есе.
Ӏисайи пуная гис:
– ЯгӀа ме хал Аллагьди ухӀуне, ме хулан эесси Ибригьим суман хъугъухӀела. Инсандин КӀиркӀ мич адинаф э, гӀачагулунаттихъас руцас, ге балайиккес ккеттивас.

Ӏиса Ерусалимдин багулив фахӀела, халкьди фикир аркьай хьуная Аллагьдин Паччагьвел хьасе пуна. ДехӀела, Ӏисайи Учил юркӀв алийинаттарис ахъакьуная мисала:
– Девлетлу тухумдиас са инсан хӀезур хьуная вес варха хӀуькуматтиди паччагьвел учин ттуранихъди акьуна, хаб адес. Уч вестти, унахъуна учин йицӀу лукӀус, гьерттис йина суьре килав арсуран манатаринна, пуная ги лукӀарис: «Магьа, зун хаб верегунас, са кардигӀ гӀихьуна муфиӀет кеттив ле пулукес». Ге хӀуькуматтиъ ая инсанарис, кканвей хьуна адава ге. Ге ушухаб, гин кьабахъай гьикуная гебури чиппин инсанар пас: «Гикес че паччагь хьуна ккандава час». Учикес паччагь хьуна адегуна, унахъас акьуная ги учи пул е лукӀарис, фидегьен гебури къазалмиш акьучин ягӀархьас гьете пулулди. Садпе лукӀу, адина пуная гис: «Зе хӀаф, ве суьре килав арсуран пул, зун йицӀутти алтухъ акьуне». Паччагьди пуная гис: «Вун зе идже лукӀ э! Ле са бицӀи кардиъ зафас ваал эхӀттибар акьас хьухӀела, зун ваалди йицӀу шагьурдин хӀавел ирцӀандея». Ӏудпетти адина пуная гис: «Зе хӀаф, ве суьре килав арсуран пул, зун гӀифутти алтухъ акьуне». Паччагьди гис пуная: «Ваалдира ирцӀандея зун гӀифу шагьурдин хӀавел». Хьибудпетти адина пуная: «Магьа, зе хӀаф, ве суьре килав арсуран манатар. ЯгълукъигӀ гӀикӀуна атунауйи зун ме пул, вагьас гучӀай, вун ппара Ӏае инсан идехӀела; веф даваф вун гъуланхӀела, вун дузуф, вун уцахӀела». Паччагьди пуная гис: «Ле вун пе гафарихъас, зун ве диван акьасе, Ӏа лукӀ. Вас ягӀай уйи зун, зе гаф хӀекь аркьа инсан идеф, зеф даваф зун гъуланф идеф, зун дузунаф зун уцаф идеф. Фас ихьундава вун ле пул ккасттиъ? Зун адегуна, алтухъди гъушанас хьаси зафас зе пул!» Паччагьди пуная учин инсанарис: «Мифас фаттивуна, фачи ле арсуран манатар, те йицӀутти алтухъ акьуттилди». Гебури паччагьдис пуная: «Е хӀаф, ппай тихъ йицӀутти ппара хъаду?» Паччагьди гебурис джуваб йиная: «Зун чвас агъая: йинаф гъушанас вере инсандис хъара ппара есе, йинаф гъушанас деве инсандифас, аяфра фаттивасе. Закес паччагь хьуна дакканди айуйи зе душманар, файдина зе удигьди, йуькӀ».

Ге мисалара ахъакьуна, Ӏиса учӀуная рекъуьъ Ерусалимдиди вес. Элеун сувал але Вифагина Вифани агъа хӀураригьди гьучарукьагуна, Ӏисайи гьикуная Учин ученикаригӀас Ӏу инсан, пуна:
– Ях гьоте хьес гьучадаркуна хӀуриди. ХӀуригӀди гӀачавере усагӀ чвас агвасе хъерт йирхӀуна дагин къемч, мехӀелдис са инсанна алдекьунаф. Хъатуна, фаша те мич. Нагагь чвафас гьина хьунара хабар гъушучин: «Фас хъартафе чун ле?» – пуна, чун уп: «ХӀаттис, Ӏисайис герекдея ме къемч». Ученикар гич ушугуна, джалла Ӏисайи пегъилди хьуная: Къемч хъартагуна, къемчун эесси хабар гъушуная гебурифас: «Фас хъартаф э чун ме къемч?» Гебури пуная: «Ӏисайис герекдея ме къемч». Файдина къемч Ӏисайилди, алчихьуна къемчул чиппин къунджара, алихьуная гебури Ӏиса къемчул. Ӏиса вегуна, гебури чиппин кунар аккихьай хьуная Ге вере рекъуькк. Ӏиса Элеун сувалас алаверегуна, джалла Гин ученикари шатти гьавайикес шукур аркьай хьуная Аллагьдис, кӀилди чиппис агу Ӏеламатарихъас. Гебури агъай хьуная:
– Шукур хьурай Аллагьдин ттур фацуна вея Паччагьдис! Заварил – инсанаринна Аллагьдин арайиъ маслихӀет, Вас тегӀриф э завариъ.
ХалкьдигӀас са Ӏу фарисеяри пуная Ӏисайис:
– МегӀелим, буӀ уп Ве ученикарис!
– Зун чвас агъая, – пуная фарисеярис Ӏисайи, – гебур буӀучин, гъванари гьараяр аркьай пасе. Ерусалимдигьди багу хьегуна, Ӏиса Ӏешуна ге шагьурдихъас, пуная:
– Агь Ерусалим! Гьеме ягъа хьунара вун гъавурдиъ архьучин, фи ккандеячин вас маслихӀет хьас! Амма ве уларис агвасттава ге маслихӀет. Хьасе мишттин вахттар, ве душманари акьуна джалла багварихъас ругун гунтӀар, ихьасе вун арайиъ, алзиянасе ваал джалла багварихъас. Душманари вун аккетасе, ве инсанар кӀина ккедихьасе, ве къутт къуттул алми атасттава, вас ягӀардахьухӀела Аллагь ваалди аде вахтт.

Хаб, Аллагьдин хулан хӀеятиди ачушуна, Ӏисайи адикай хьуная кӀилди гисаъ ариш вариш аркьая инсанар, гебурис агъай:
– Гирами китабариъ ликӀиная: «Зе хал, дуьгӀебур хура хал э», чун микес къачагъарин муг акьуная!
Ӏисайи гьер ягъа Аллагьдин гаф ягӀар аркьай хьуная инсанарис Аллагьдин хулаъ. ХӀа маллабурис, Ӏелимарис, халкьдин улиъ ая инсанарис кӀес кканди ахьуная Ӏиса. Фиркьайчира ягӀай хьуна адава гебурис, Ӏисайихъай гьемишанди халкь авехӀела, Гин гьер гафунил юркӀв алийина.

Luisteren Лука 19