San Mateo 15
15
Köo xáa súvi na ya kúni Ndioxi, ndisaa ichí ya xa̱a súvi xií va na kua xáa súvi na
(Mr. 7:1-23)
1Saa ndi̱xaa sava nda fariseo xiꞌin nda maestro, nda sínaꞌa ley Ndioxi, nda ke̱e ñuu Jerusalén. Ndi̱xaa nda ndákan tuꞌun nda Jesús, káchi nda saa:
2―¿Ndachu köo káñuꞌu nda ítaꞌan xiꞌin un ya si̱naꞌa xii sikua yo xinaꞌa? Saa chi köo ndóo ndaꞌa nda xíxi nda tá kuꞌva íyo ya ndi̱kaꞌan xii yo ―káchi nda ikán xiꞌin Jesús.
3Saa ndi̱kuiin Jesús, káꞌan ra xiꞌin nda:
―Saa tu ndóꞌo̱ va, ¿ndachu köo káñuꞌu ndo ley Ndioxi ya íyo ndaꞌa ndo? Ta vaꞌa ka xáa súvi ni ka ndo ichí ya si̱ndoo xii ndo xinaꞌa. 4Chi Ndioxi ndi̱kaꞌan ra: “Xaa toꞌo ndo iva ndo xiꞌin siꞌí ndo” ta “xíniñuꞌu kuvi ndiꞌi na távi chiꞌña iva án siꞌí na”, káchi ra. 5Ta ndóꞌo̱ káꞌan ndo, vaꞌa kaꞌan iin taa xiꞌin iva ra án siꞌí ra, kachi ra saa: “Küvi chindee taꞌan i xiꞌin ndo, saa chi ñaꞌa ya ndíkani ini i taxi i ndaꞌa ndo ta xa ndi̱soko ndiꞌi i ya nuu Ndioxi”, káchi ndo. 6Ta xaꞌa ya káꞌan ndo saa xiꞌin iva ndo án siꞌi ndo, ya küvi chindee ka ndo na, xaꞌa ya ñaa, ta köo íkan ndo ya kúni Ndioxi. Síndoo ndaꞌa ndo ya, ndisaa taꞌan ichí ya si̱ndoo xii ndo xinaꞌa va kua ndíkun ndo. 7¡Ndóꞌo̱ uvi ini ku ndo! Ndaa ni ndixa ndi̱kaꞌan ndoso ra Isaías xaꞌa ndo tá ndi̱kaꞌan ra, káchi ra saa:
8“Na ivi yóꞌó, ta nuu yuꞌu kuiti va na ínuu ya káꞌan na, xáa toꞌo na yeꞌe.
Sundi nima na, ta íyo xika ni va ya nuu i.
9Ya uun xáa toꞌo na yeꞌe,
chi sínaꞌa na naꞌa ichí ya ndíkani ini mií na,
ta köo sínaꞌa ñaꞌa na xaꞌa ya káꞌan i xiꞌin na”,
káchi Ndioxi xiꞌin ra Isaías ta̱a ra xinaꞌa ―káchi Jesús xiꞌin nda fariseo tin nda sínaꞌa ley Ndioxi.
10Saa ka̱na Jesús ndiꞌi naꞌa, ta ndi̱kaꞌan ra xiꞌin na, káchi ra saa:
―Kuni soꞌo ndo, ta kundaa ini ndo ya kaꞌan i xiꞌin ndo. 11Ñaꞌa ya xíxi na án ya xáxi naꞌa ta kuakiꞌvi ya yuꞌu na, ta köo xáa yakua ya na nuu Ndioxi. Ya xáa yakua na nuu Ndioxi, ku tuꞌun väꞌa ya kána koo yuꞌu na ―káchi Jesús xiꞌin na.
12Saa ku̱yati nda ítaꞌan xiꞌin ra nuu ra, ndi̱kaꞌan nda xiꞌin ra:
―¿Án ku̱ndaa ini un ndi̱saa ni nda fariseo xaꞌa tuꞌun ya ndi̱kaꞌan un xiꞌin nda? ―káchi nda xiꞌin Jesús.
13Saa ndi̱kuiin ra ndi̱kaꞌan ra xiꞌin nda, káchi ra:
Ndiꞌi itun kuiꞌi, itun köo ndi̱chiꞌi Iva i Ndioxi ra íyo nuu ndivi, ta tuꞌun ndiꞌi ra nu, nda tioꞌo nu tava ra. 14Täa soꞌo ndo ya káꞌan nda fariseo. Chi nda ikán ra tá íin na kuáa̱ saa íin nda. Chi tá iin ra kuáa̱ ná kundaka ra inka ra kuáa̱ kuꞌun xiꞌin ra, ta uvi saa nda koyo yavi ―káchi Jesús xiꞌin na.
15Saa ndi̱kaꞌan ra Pedro, káchi ra saa:
―Ndituꞌun loꞌo un xiꞌin nde unkua kúni kachi tuꞌun ndíchi yóꞌó ―káchi ra xiꞌin Jesús.
16Saa ndi̱kaꞌan Jesús xiꞌin ra, káchi ra saa:
―¿Án saa tu ndóꞌo̱ va, án köo ndi̱kundaa tu ini ndóꞌo̱ va ya ndi̱kaꞌan i xiꞌin ndo? 17¿Án köo kúndaa ini ndo? Ndiꞌi ya xíxi naꞌa án ya xáxi na ta chí yuꞌu na kuakee ya, saa xáa ya tixin na. Sindiꞌi saa kána koo ya xíta ya nuu táta na. 18Sundi tuꞌun väꞌa kána koo yuꞌu naꞌa, ta chí nima na kána koo ya. Ta ya yóꞌó ku ya ndása yakua na nuu Ndioxi. 19Saa chi ya väꞌa ndíkani ini na ta chí nima na kána koo ya. Ta ya ikán kua chíndaꞌa na kaꞌni na ndìì, án ya kaka sii na xiꞌin taꞌan na, saa tu ya kuakiꞌvi na kuâán xiꞌin taꞌan na, xiꞌin ndiꞌi ka ya kini íkan na, saa tu ya síkuiꞌna na tin ya káꞌan vata na xiꞌin ya kánaꞌa na xaꞌa inka naꞌa. 20Ndiꞌi ya yóꞌó ku ya ndása yakua naꞌa nuu Ndioxi, sundi ya köo ndóo ndaꞌa na kuxi na, ta köo ndása yakua ya na nuu Ndioxi ―káchi Jesús.
Ñaꞌa yá inka ñuu yá köo kúu judío kándixa yá Jesús
(Mr. 7:24-30)
21Saa ke̱e Jesús, ta ndi̱kiꞌin ra kuaꞌan ra inka ñaꞌñu yati ñuu Tiro xiꞌin Sidón. 22Ta iin ñaꞌa yá kúu seꞌe sikua na Canaán, süvi yá judío ku yá, ta vitin íyo yá inka ñaꞌñu náni Sirofenicia yati ñuu Tiro xiꞌin Sidón. Saa ndi̱xaa yá nuu Jesús ndee ni ndee ndi̱kaꞌan yá xiꞌin ra, káchi yá saa:
―¡Tata, seꞌe sikua ra David! ¡Kundaꞌvi ini un kuni un yeꞌe, ta chindee un yeꞌe xiꞌin seꞌe i! Ndee ni ndee ndóꞌó seꞌe síꞌi loꞌo i, tachi nduvaꞌa ki̱ꞌin yá ―káchi yá xiꞌin ra.
23Ta nda iin tuꞌun köo ndi̱kuiin Jesús yuꞌu yá. Saa ku̱yati nda ítaꞌan xiꞌin ra xáku ndaꞌvi nda nuu ra, káchi nda saa:
―Tata, kaꞌan xiꞌin yá ná kuꞌun yá, saa chi ndee ni ndáꞌi yá vaxi yá sata yo ―káchi nda xiꞌin ra.
24Ñaa ndi̱kuiin Jesús, káchi ra saa:
―Ndisaa nuu na ñuu Israel ti̱ꞌvi Ndioxi yeꞌe vaxi i, saa chi na ikán ta tá íin levo kiti nda̱ñuꞌu, saa íin na ―káchi ra xiꞌin nda.
25Saa ku̱yati yá nuu Jesús si̱kusiti yá nuu ra, káchi yá saa:
―¡Tata, chindee un yeꞌe! ―káchi yá xiꞌin ra.
26Saa ndi̱kaꞌan Jesús xiꞌin yá, káchi ra saa:
―Küvi kindaa yo xíta vaꞌa yuꞌu seꞌe yo, ta taxi yo ya kuxi tina ―káchi ra xiꞌin yá.
27Saa ndi̱kaꞌan yá xiꞌin ra, káchi yá saa:
―Saa ndixa va Tata, ta nda ni tina ta xíxi rí ñaꞌa ya kóyo ndoso tixin mesa xitoꞌo ri ―káchi yá xiꞌin ra.
28Ñaa ndi̱kaꞌan Jesús xiꞌin yá, káchi ra saa:
―Nana, ndixa ni kándixa un yeꞌe. Ta xaꞌa ya ñaa xaa súvi i ya ndúku un nuu i ―káchi ra xiꞌin yá.
Ta mi hora ikán ndu̱vaꞌa yá loꞌo seꞌe yá.
Kuaꞌa ni na kúꞌvi síndaꞌa Jesús
29Saa ke̱e Jesús ñaꞌñu ikán, ta ndi̱xaa ra yuꞌu nduta ñûꞌu Galilea, ndi̱xaa ra nda̱a ra nuu iin xiki, saa ndi̱kunduꞌu ra. 30Ñaa ndi̱xaa kuaꞌa ni naꞌa nuu ra, ndáka na, na ndu̱chiꞌña küvi kaka, tin na köo ndaꞌa xiꞌin na kuáa̱ xiꞌin na meꞌme, saa tu na ndee ni ndee ndóꞌo xiꞌin kueꞌe. Ndi̱xaa na nuu ra, ta si̱ndaꞌa ra na. 31Saa ndi̱kanda ni ini na xi̱ni ñaꞌa na xaꞌa ya xi̱ni na xa̱á vaꞌa xíka na köo ndikuvi kaka, ta na kuáa̱ ndi̱xuna nuu na, na meꞌme xa̱á vaꞌa káꞌan na, saa xa̱á na xáa kaꞌnu ndiꞌi na Ndioxi, ra xáa káꞌnu na Israel.
Ta̱xi Jesús xi̱xi kumi mil taa
(Mr. 8:1-10)
32Saa ka̱na Jesús nda ítaꞌan xiꞌin ra, ta ndi̱kaꞌan ra xiꞌin nda, káchi ra saa:
―Kúndaꞌvi ni ini i xíni i na yóꞌó, saa chi xa íyo uni kivi ndóo na xiꞌin i ta ni köo ñaꞌa kuxi na. Ta küvi tiꞌvi i na kuꞌun na xiꞌin soko, koto ka kuvi ndiuu na ichí ―káchi ra xiꞌin nda.
33Saa ndi̱kuiin nda, káꞌan nda xiꞌin ra:
―¿Ta míí kiꞌin nde ñaꞌa taxi nde kuxi na? Iku yuyu mií kua, ta yaꞌa ni kuaꞌa ku na ―káchi nda xiꞌin ra.
34Saa ndi̱ndakan tuꞌun ra nda, káchi ra saa:
―Ndisaa ku xita vaꞌa ndíso ndo? ―káchi ra.
Saa ndi̱kuiin nda, káꞌan nda:
―Uxa ku xita vaꞌa xiꞌin uvi ndaa tiaka vali ―káchi nda xiꞌin ra.
35Saa xa̱ꞌnda ra chiñu ya ndikundoo ndiꞌi na nuu ñuꞌú. 36Ñaa ti̱in ra uxa xita vaꞌa xiꞌin tiaka ikán, ta ta̱xi ra tixaꞌvi ndaꞌa Ndioxi. Saa ta̱ꞌvi ra xita vaꞌa ikán xiꞌin kiti tiaka vali. Ñaa ta̱xi ra ya ndaꞌa nda ítaꞌan xiꞌin ra, ndi̱taꞌvi nda ikán ya xiꞌin na. 37Xi̱xi ndiꞌi na ndakua ndi̱xaa tixin na. Tá ndiꞌi ndi̱kuiso nda ñaꞌa ya ndi̱ndoo, ta si̱kutu nda uxa tika xiꞌin ya ndi̱ndoo, tá si̱ndiꞌi na xi̱xi na. 38Ta kúu na iin kuꞌva kumi mil taa nda xi̱xi, ta siin ku ná ñaꞌa xiꞌin na vali.
39Saa nda̱i ra naꞌa ta nda̱a ra barco kuaꞌan ra inka ñaꞌñu náni Magdala.
अहिले सेलेक्ट गरिएको:
San Mateo 15: xta
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Active: ©Wycliffe Bible Translators, Inc. All rights reserved.
