San Mateo 14
14
Ndi̱xiꞌi ra Juan ra síkuchi naꞌa
(Mr. 6:14-29; Lc. 9:7-9)
1Suvi mií tiempo ikán xi̱ni soꞌo ra Herodes xaꞌa ndiꞌi ya vaꞌa íkan Jesús. Ta ra Herodes ikán ku rey ra xáꞌnda chiñu nuu na ñuu estado Galilea. 2Saa ndi̱kaꞌan ra xiꞌin nda xáa chiñu nuu ra, káchi ra saa:
―Ra Jesús yóꞌó ku ra Juan, ra si̱kuchi naꞌa, ra xa̱ꞌni i yachi, ta ndi̱taku ra vitin, yakan vaꞌa kúu mií ra ndee íkan ra yatuꞌun yóꞌó ―káchi ra Herodes.
3Chi suvi mií ra Herodes ikán ku ra xa̱ꞌnda chiñu ya ti̱in na ra Juan, ka̱tun na ra xiꞌin cadena, saa ki̱ꞌin na ra chi̱kaa na veꞌe kàà. Xaꞌa ya ndi̱kaꞌan ra xiꞌin ra Herodes, ya väꞌa íkan ra xiꞌin yá Herodías, yá xanu ra, yá síꞌi ra ñani ra, ra Felipe. 4Saa chi xa yachi vi ndi̱kaꞌan ra Juan xiꞌin ra ya väꞌa ndi̱kan ra, xaꞌa ya ndi̱kiꞌin ra yá síꞌi ñani ra ―káchi ra. 5Ku̱ni ra Herodes kaꞌni ra, ra Juan, ta köo ndi̱kuchiñu ra ikán ra saa, xaꞌa ya íꞌvi ra nuu naꞌa, saa chi ndiꞌi na káꞌan xaꞌa ra Juan ya kúu ra profeta, ra káꞌan ndoso tuꞌun yuꞌu Ndioxi. 6Saa ti̱ndaa iin kivi ta xa̱kin mií ra Herodes viko veꞌe ra, xaꞌa ya xínu ra kuiya ra. Ñaa ti̱xaꞌa mií yá kuâán loꞌo seꞌe mií yá Herodías ikán nuu ndiꞌi mií na ndóo viko ikán, ta ndee ni ku̱too mií ra Herodes ndá kuꞌva ti̱xaꞌa yá. 7Xaꞌa ya ikán kua ki̱ndoo ra xiꞌin yá taxi ndiꞌi ra ñaꞌa ndaꞌa yá, ndá ka mií ya ndúku yá nuu ra ta taxi ndiꞌi ra ya ndaꞌa yá, káchi ra. 8Saa chi̱kaa siꞌí yá yuꞌu yá, káchi yá saa:
―Kúni i chikaa un xiní ra Juan, ra síkuchi naꞌa ini iin koꞌo taxi un ndaꞌa i ―káchi yá xiꞌin ra.
9Saa ku̱chiꞌña ni ini ra rey, ta xaꞌa ya xa ki̱ndoo ra taxi ra ya ndaꞌa yá nuu ndiꞌi na ndóo xiꞌin ra nuu mesa ikán, xaꞌa ya ikán kua xa̱ꞌnda ra chiñu ya taxi na xiní ra Juan ndaꞌa yá. 10Saa ka̱na koo nda xáa chiñu nuu ra, ndi̱xaꞌan nda ini veꞌe kàà nuu ndíkaa ra Juan, xa̱ꞌnda nda sukun ra. 11Saa chi̱kaa nda xiní ra ini iin koꞌo níꞌi nda xa̱a nda ta̱xi nda ndaꞌa yá loꞌo ikán. Ta yá ikán ki̱ꞌin ya ta̱xi yá ndaꞌa siꞌí yá.
12Saa ndi̱xaa nda ítaꞌan xiꞌin ra Juan veꞌe kàà, ndi̱kiꞌin nda ikin kuñu ra kuaꞌan xiꞌin nda sinduxin nda. Sindiꞌi ikán saa ndi̱xaꞌan nda ndi̱tuꞌun nda xiꞌin Jesús, xaꞌa ya ndo̱ꞌo ra Juan.
Táxi Jesús xíxi uꞌun mil taa
(Mr. 6:30-44; Lc. 9:10-17; Jn. 6:1-14)
13Tá ku̱ndaa ini Jesús ya ndo̱ꞌo ra Juan, saa ke̱e ra kuaꞌan ra xiꞌin itun barco iin ñaꞌñu nuu köo nda iin naꞌa. Saa ku̱ndaa ini naꞌa ya kuaꞌan ra, ñaa ke̱e na ndíkun na kuaꞌan na sata ra chí nuu ñuꞌú. 14Tá nu̱u ra sata barco saa xi̱ni ra iin chútu ndaa naꞌa, ñaa ku̱ndaꞌvi ni ini ra xi̱ni ra na, saa si̱ndaꞌa ra ndiꞌi na kúꞌvi ndáka naꞌa kuaꞌan xiꞌin na. 15Saa xa kuaꞌan kú xikuáa ni, ñaa ndi̱xaa nda ítaꞌan xiꞌin Jesús nuu ra, káꞌan nda xiꞌin ra, káchi nda saa:
―Tata, xa xikuáa ni kua, ta ni naꞌa köo yóꞌó, ¿án vaꞌa ná ndai un na, ta tiꞌvi un ndiꞌi na yóꞌó, kuꞌun na ndá ñuu vali ñúꞌu yati ya nduku na ndá sata na ñaꞌa kuxi na? ―káchi nda xiꞌin ra.
16Saa ndi̱kuiin Jesús, káchi ra saa:
―Köo xíniñuꞌu na kuꞌun na nduku na ya kuxi na. Vaꞌa taxi mií ndo ná kuxi na ―káchi ra xiꞌin nda.
17Saa ndi̱kaꞌan nda xiꞌin ra, káchi nda saa:
―Tata, ni köo kuaꞌa ku ñaꞌa ndíso nde, ndisaa loꞌo uꞌun ku xita vaꞌa, ta uvi ku tiaka va ―káchi nda xiꞌin ra.
18Saa ndi̱kaꞌan Jesús xiꞌin nda:
―Vaꞌa, taxi ndo ya ndaꞌa i ―káchi ra.
19Ñaa ndi̱kaꞌan ra xiꞌin na, ya ndikundoo na nuu iku kuii. Saa ti̱in ra uꞌun xita vaꞌa ikán xiꞌin uvi saa tiaka, ta nda̱niꞌi nuu ra nuu ndivi ta̱xi ra ndi̱xaꞌvi ndaꞌa Ndioxi, saa ta̱ꞌvi ra ya ta̱xi ra ya ndaꞌa nda ítaꞌan xiꞌin ra, ta nda ikán ndi̱taꞌvi ya xiꞌin naꞌa. 20Ta xi̱xi ndiꞌi na ndakua ndi̱xaa ini na. Saa ndi̱ndoo kuaꞌa ka mií xita vaꞌa ikán, ndi̱kuiso nda ítaꞌan xiꞌin Jesús ya chi̱vaꞌa nda ini itun tika, uxi uvi ka ku nu si̱kutu nda xiꞌin ya. 21Ta ndiꞌi na xi̱xi, kúu na iin kuꞌva uꞌun mil ndisaa nda taa, ta siin ku ná ñaꞌa xiꞌin na vali.
Xíka Jesús nuu tikuii
(Mr. 6:45-52; Jn. 6:15-21)
22Saa xa̱ꞌnda Jesús chiñu nuu nda ítaꞌan xiꞌin ra, ya ndaa nda sata barco ndikunuu nda kuꞌun nda, yaꞌa nda inka ñaꞌñu yuꞌu nduta ñûꞌu, ñaa ndi̱ndoo mií ra ndái ra naꞌa. 23Tá ndiꞌi nda̱i ra na, saa nda̱a ra nuu xiki kaꞌan ra xiꞌin Ndioxi. Ikán íyo iindaa mií ra káꞌan ra xiꞌin Ndioxi nda tá ku̱ñuu. 24Ta ku̱xika itun barco ikán kuaꞌan nu maꞌñu nduta ñûꞌu. Ta köo kúvi ka kuꞌun nu, chi mi ñaꞌñu nuu kuaꞌan nda kua ndee ni káni tachi nuu nu, saa ndíkuita ni nuu tikuii xiꞌin nu, ta ndee ni ndíkuiko nu ini rá. 25Tá xa kuaꞌan kúni tuvi, saa ku̱yati Jesús xíka ra nuu nduta ñûꞌu ndi̱xaa ra. 26Saa xi̱ni ñaꞌa nda ítaꞌan xiꞌin ra vaxi ra nuu nduta ñûꞌu, ta köo ndi̱kuni nda ra, ñaa ndi̱ndiꞌvi ni nda, saa ndi̱ndaꞌi koꞌo nda, káchi nda saa:
―¡Vai, ya naꞌa ku ya! ―káchi nda.
27Saa kama ni ndi̱kaꞌan Jesús xiꞌin nda, káchi ra saa:
―¡Kündiꞌi ini ndo, chi yeꞌe va ku i, ku ïꞌvi ndo! ―káchi ra xiꞌin nda.
28Saa ndi̱kaꞌan ra Pedro, káchi ra saa:
―Tata, tá tu ndixa yóꞌo̱ ku un, ta kaꞌnda un chiñu ná kaka i nuu rá xaa i nuu un ―káchi ra.
29Saa ndi̱kaꞌan Jesús xiꞌin ra Pedro, káchi ra:
―Vaꞌa, naꞌa ―káchi ra xiꞌin ra.
Saa nu̱u ra Pedro sata barco, ta xa̱á ra xíka xaꞌa ra kuaꞌan ra nuu tikuii ndikitaꞌan ra xiꞌin Jesús. 30Saa tá xi̱ni ra ndee ni xíka tachi, ta ñaa ndi̱ndiꞌvi ni ra, ñaa xaá sáꞌvi ra kuaꞌan ra ini tikuii, ta iin ndi̱ndaꞌi koꞌo ra, káchi ra saa:
―¡Tata, sikaku un yeꞌe! ―káchi ra xiꞌin Jesús.
31Saa ndi̱xaa Jesús si̱kaa ndaꞌa ra nuu ra Pedro, ñaa ti̱in ra ndaꞌa ra, saa ndi̱kaꞌan ra xiꞌin ra, káchi ra saa:
―¿Ndachu ndaku ni ini un, köo xíin un kandixa un yeꞌe? ¡Ndá xaꞌa kua ndi̱xika uvi ini un! ―káchi Jesús xiꞌin ra.
32Saa tá nda̱a uvi saa nda sata itun barco, ta ndikun si̱yaa tachi. 33Ñaa si̱kusiti ndiꞌi nda ndóso sata barco ikán xáa kaꞌnu nda Jesús, saa ndi̱kaꞌan nda xiꞌin ra, káchi nda:
―¡Ya ndixa ni kua kúu un Seꞌe Ndioxi! ―káchi nda xiꞌin ra.
Síndaꞌa Jesús na kúꞌvi ndóo ñuu Genesaret
(Mr. 6:53-56)
34Saa ndi̱yaꞌa nda nduta ñûꞌu ta ndi̱xaa nda inka ñaꞌñu yuꞌu rá ñuu Genesaret ta ikán nu̱u nda sata barco. 35Tá ndi̱kuni na ñuu ikán Jesús, ñaa xa̱ta na tuꞌun xaꞌa ra, ndiꞌi ni kuu ñuu ya ndóꞌni yati ku̱ndaa ini na xaꞌa ra, saa ndáka na ndiꞌi na kúꞌvi ndi̱xaa xiꞌin na nuu Jesús. 36Xíkan na ya mani nuu ra ya ná taxi ra tiin ndaa na án nda loꞌo yuꞌu toto ra, ta ndiꞌi mií na ti̱in ndaa ñaꞌa, ndu̱vaꞌa ndiꞌi na.
अहिले सेलेक्ट गरिएको:
San Mateo 14: xta
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Active: ©Wycliffe Bible Translators, Inc. All rights reserved.
