Luk 10
10
Jizɔs atind ayɛghɛnɛv anav iti-atar ghu puwɛ ahar
1Jizɔs atsuwa ayɛghɛnɛv anav vɛru iti-atar ghu puwɛ ahar#10.1 Iti-atar ghu puwɛ ahar Akaa angɛrɛn agen vɛ angɛr ati atar ghɛ puwɛ abur avo ahar-ahar atind avo kɔ ghi ishi hanamɔ ahiye utaan ghɛ ahiye amban ɛru akan aza mɔ. 2Akaa ghɛ avo na, “Usunda ungu tsɛng kpa iyɔr asundanɛv amba gha. Ram ghu Aonz uwun ikɔrɔ, hin asoor asundanɛv kɔ ikɔr. 3Za, fɔn na mɛ gwe ghi itindin un ɛn iyɔng kɔ anyam amba mɔ. 4Ka tengnɛn inarigh gha, kas ikpa uzende gha, ka tengnɛn akov ahar gha. Ka tiren ghi ihang ukaan ghi iyɔr gha.
5“Hanamɔ itumbɛ ingine unɔrun, umahe, kaan na, ‘Makun aru han itumbɛ ingin.’ 6Ɔ ɛn ɔr angwe ungwen aker makun unɔrun ɔr hun aru ghɛ makun; aru ɔr ungwen ghɛshiya un ghu makun gha, makun uwon asan ghu un. 7Sengnen hɔ ghi itumbɛ ingin vɛ ɔz un mɔ yan maan uyɔr ungun vɛ yɔr un mɔ, ɔr utom akuma mɛnɛn una. Ka zenden dangdang gha.
8“Hanamɔ achiya utaan ungwen unɔrun sɛ vɛ ɔz un yan ukwagh ungwen vɛ na un. 9Kos awenɛv, ɔɔr avo na, ‘Utorov unav Aonz ukpember han ghɛ avo.’ 10Hanamɔ achiya utaan ungwen unɔrun sɛ vɛ venda un mɔ, duwen kɔ ahang ukaan na, 11‘Kas ihind ingiyen utar uwon ghi os kan avor aas, utɛsɛn ikav na, ghi tumbwe un utogh. Fɔn na Utorov unav Aonz uva kpember han ghu un.’ 12Mɛ kaa un na ihɔ ijiri Aonz ahɛmba inan ahiye ungumɔ ichan ihɛmba utar sodom.
13“Ghɛshiya ghu un gha, iyɔr Korasin ghɛ iyɔr Betsada! Itiyo ikaa ɔ ɛn akaa akondon iyɔr angan mɛ ɛr han ghu un, mɛ ɛr kɔ utar Tayi ghɛ Sidon hin vɛ gɛma asɛma avo ghi itsɔ, hin vɛ wa ikuse vɛ ish mtom itogh, utɛsɛn na vɛ de akaa abe avo. 14Aonz akɔr, ishon ghu Tayi ghɛ Sidon ihɔ ijiri ahɛmba un. 15Un iyɔr Kapanum, ɔ ɛnɛn na urun ghi itughun kɔ isa? Inga, Aonz azɔr un ugban kɔ uzu.”
16Jizɔs akaa ayɛghɛnɛv anav na, “Ɔr ungwen amgba un sa amgbam. Ɔr ungwen avenda un sa avendam. Ɔr ungwen avendam sa avenda ɔr ungwen atindim.”
17Ne ayɛghɛnɛv anav iti-atar ghu puwɛ ahar vɛru ihiren, ishighan tsɛng vɛ akaa ghu un na, “Uwun kas ajingɛjing abev vɛ aduwe kɔ ghi iyɔr, mɔ ghi tah itiye iyow.”
18Akaa ghɛ avo na, “Mɛ ɛn Ijɔv iduwe kɔisa igba ɛn ku uriyam. 19Mɛ na un ikɔw ungwen ɔ nyaren iyɔ ghɛ ayoz, ghɛ ikɔw ungwen ahɛmba ikɔw ajɔvɔ, ukwagh abe ɛr un gha. 20Kpa, aka ashiyan un na ajingɛjing abev amgba un gha, kpa ka shiyan un na atiye iyon vɛ angɛr kɔ ghɛ Aonz.”
21Ukpɛ ungumɔ, kashiya Jizɔs shisha kɔ Ajingɛjing una Aonz, akaa na, “Utir, Aonz Uwun kɔisa ghɛ kan inya! Mɛ sigha uwɛ, ɛn uyɛr urɛhɛ ungun kɔ amban vɛ abugh ase ghɛ amban vɛ fɔ ukwagh, ta utagh kɔ myem ararɛv. Ukɔng Utir, kɛ awa isima uwow ne ɔ ɛr.
22“Akaa amem utir uwam awam ghu uvo. Ɔr afɔn utu Uwan gha sa Utir, ɔr afɔn utu Utir gha sa Uwan, ghɛ kɔ amban Uwan atsuwa na atagh avo un.”
23Jizɔs agɛma kɔ ayɛghɛnɛv anav aram ghɛ avo kɔ avɛraves akaa na, “Umbun ikɔr shisha ungwen ghu ɛn akaa angan umbun ghi ɛnɛn man. 24Mɛ kaa un na aramenɛv ɛchi Aonz tsɛng ghɛ ator vɛ ker na vɛ ɛn akaa angan kpa vɛ ɛn gha, vɛ ker na atogh avo amgba akaa angan kpa vɛ amgba gha.”
Ɔr Samariya akɔr ishon
25Ihɔ igen ɔr ufɔn mɛnna una Mosis shisha itire ikaren Jizɔs ne apine un mpine na. “Ɔr utɛsɛn, kine mɛ ɛr ta mkor umuwa utserene?”
26Jizɔs arumun na, “Kine vɛ angɛr kɔ mɛnna? Ɔ ɔɔr aa nana?”
27Ɔr hun arumun Jizɔs na, “ ‘Kashiya uwɛ ghɛ Aonz Uwun uwow ghɛ isima iyow umem, umuwa uwow umem, ikɔw iyow umem mfɔ uwow umem,’ ” ghɛ “ ‘Ghɛshiya uwɛ ghɛ ɔr ungwen akpember ghu uwɛ ɛn ki iyɔr iyow.’ ”
28Jizɔs arumun una, “Ungwe jing, ɛr mɔ hin utser.”
29Ɔr hun aru na atɛs ukwagh ufɔn na un angwe jing, ne apine Jizɔs na, “Kɛ ana ne angwe ɔr ungwen akpember ghu mwe?”
30Jizɔs arumun un na; “Ɔr ugen ahiye uzend kɔ Jerusalɛm ghi zan kɔ Jɛriko, ne ayiv ghɛ itoworov vɛ chir un ihang. Vɛ hoor un akond vɛ gbire un, ashi ukpon.
31“Ɔr ipɛɛn una Aonz#10.31 Ɔr ipɛɛn una Aonz Ɔr ipɛɛn una Aonz anayi unagh kɔ Aonz itɔ iyɔr kɔ itumbɛ Aonz kɔ Jerusalɛm. aru izan hɔ ihang hun mɔ a ɛn ɔr ungumɔ agbir hɔ inya akar upav ayov. 32Ɔr kɔ itum Lɛvi, ava ɛn ghɛ ana akar ihang upav ugen.
33“Kpa ɔr Samariya, mɔ aru kɔ ghu uzend, ava ɛnɛn ɔr hun mɔ, ishon ikɔr un ghu ɔr ungumɔ. 34Aza kɔr ɔr hun amir makurem ahaa masɔrum ɛn ki ichi akang atsar kɔ avav ɔr hun. Atɛng un urakum una aza na kɔ uzendɛv amba tsan mɔ, na a ɛnɛnyi ghɛ ana. 35Usov usen mɔ atɛng inarigh ikin ghi kuma ukimbin ahɔ utom ahar ana ɔr ɛrɛn utuwɛr ungumɔ akaa ghu un na, ‘Ikin ghi ikpend ɛr mɛ vayi mɔ mɛ va mɛ na ikin isoor mɔ.’
36“Jizɔs apine, hanagen kɛ ana kɔ avo atar amban angwe ɔr ungwen akpember hɔ ɔr ungwen ayiv vɛ gbire un mɔ?”
37Ɔr ufɔn mɛnna una Mosis arumun na, “Ɔr ungwen ishon ikɔr un ghu un mɔ.”
Ne Jizɔs akaa na, “Za ɛr mɔ.”
Jizɔs aza kɔ itumbɛ Mata ghu Mɛri
38Mɔ Jizɔs ghɛ ayɛghɛnɛv anav vɛ azayi ishi ghɛ uzend kɔ Jerusalɛm mɔ, vɛ abiyen hɔ ahiye ugen ukwas ugen ungwen vɛ atayi na Mata a ɔz un ujin kɔ itumbɛ ina. 39Aru uwanomgban ukwas ungwen vɛ tayi na Mɛri, atɛma hɔ inya kpembere hɔ ikpar avoro Uwun, ghi mgban itɛsɛn ina. 40Kpa Mata abɛr atogh gha ɛchi uyor ungun aru iyɔrun mɔ. Ava kɔ ghu Jizɔs akaa na, “Uwun, uwa iko na uwanas ukwas avondum mwe tson ghɛ utom ɔ ɛrɛn gha? Kaa un hin ava wam uvogh.”
41Kpa Uwun arumun “Mata, Mata uvihin isima shigh uzan iyɔr ghɛ akaa tsɛng. 42Kpa ukwagh umɔm ne angwe itiyo ikaa. Mɛri achuwa ukwagh ungwen ahɛmba ishiyan, ɔr abe ahonz gha.”
अहिले सेलेक्ट गरिएको:
Luk 10: UTA
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©️2024 Luke Initiative for Scripture Translation
