Matiə 13
13
Bi jal sokpaakɛ n nɛnanɩ Thãgbaa fãgadaar doo tɔ̃tʋ̃ɔ pa
(Mar 4:1–9; Lu 8:4–8)
1Ga wiilera Jeju kɔɔ the cʋɔrɔ a too mɩɩr nɔɔra, 2dɩ tibil jɔjʋɔ gbɛbɩ pʋɔraa a der, dɩ gɛr gɩ dɩ jʋʋn a too gboroona, sɩ dɩ tibil jɔɔle too mɩɩr nɔ nʋɔra.#Lu 5:1–3 3Dɩ a mɩɩ wɛr thɩmɩa jɔɔ na sokpaa.
A so warɛ ayɩ: 4Bi jaldaar gɩ, a the da‐n jal be. Dɩ mɔna a‐n jalnɩ, yɛ̃ bi jire hʋɛra, dɩ ˈlominə pɔ ʋʋl. 5Yɛ ji wo bokanana, ka thɩ nʋʋn na jɔrnaˈ, a phu dapaara kɔrɔ, gɩdonɩ ga jɩɩ mʋʋ a hulõəˈ. 6Dɩ ɔbɔɔkɛ wire phanɩ, dɩ ɩtʋɛ hẽ, gɩ ɔ̃ˈɔlɔnɛ a khi, gɩdonɩ ga yɩ nɛ gɔ paaraˈ. 7Yɛ ji wo ka uu hanɩ, dɩ uu ɩɩr a sɩlã gɩ. 8Yɛ ji thɩ bʋɔra a phu a bɩ̃, bi bɩɛl n bɩnɛ dɩɩ hana be tamaa, ɩkha kpalãther, ɩkha kpelẽ yʋɔr. 9Ntɛɛkɛ hananɩ nũu, dɔ a na‐n pɛ nũu.
Gɩrɛ dɔnɩ kɩrʋ dɩ Jeju gba sokpaa da‐n mɩɩna tɩbɩla
(Mar 4:10–12; Lu 8:9–10)
10Dɩ kpãkpãadara tɔr pɔ Jejura a bulee: Mɔ̃gɩdo dɩ fa‐n mɩɩna wɩ sokpaa? 11Dɩ birse wi: Nɛr Thãgba kɔɔ ha nɩ jɛ thɩ̃ gbulsɔɔkɛ dɔnɩ ƴũ fãgadaar doda, sɩ we wer Thãgba na ha waˈ. 12Gɩdonɩ ʋrɛɛkɛ hananɩ thɩ̃ɛ, Thãgba na bire na haa na dɛbɩrɔ, dɩ na hana gɩ dɩ ga jɩɩ jɔr; sɩ ʋrɛɛkɛ na hananɩ thɩ̃aˈ, Thãgba na tiirəərerakɛ phubi gɩrɛɛkɛra a hananɩ.#Mat 25:29; Mar 4:25; Lu 8:18; 19:26 13Gɛr dɔ kɩrʋ dɩ ma‐n mɩɩna wɩ sokpaa; gɩdonɩ wɩ‐n hɩɩnɛ sɩ wa yɩ ga, wɩ‐n pɛ nũu sɩ wa‐n nɩaˈ, dɩ wa jɩ kɩrʋ dakha ga. 14Dɩ awɩdara Thãgbaa bobon Ejaɩ kɔɔ mɩɩ thakɛ ayɩ:
“Na‐n nɩɛrɛ wer bɔɔbɔɔ na anɩ nũ,
sɩ na jɩ kɩrʋ kpɩɩrakaˈ.
Na‐n hɩɩnɛ wer bɔɔbɔɔ na anɩ yi,
sɩ na yɩ gɩ kpɩɩrakaˈ.#Eja 6:9–10
15Gɩdonɩ tɩbɩlaakɛɛ ha debire a dibi;
wɩ sɔbɩrɛ awɩ nũ ka,
a khaan dakha awɩ yi,
anaa ga hor wa yɩ gɛr na awɩ yi,
a na nɩɛ na awɩ nũ,
a na jɩna kɩrʋ na awɩ bɩ̃,
a na kɛr na bir mar,
dɩ mɛr Thãgba na kpɛɛ wɩ.”
16Sɩ gɩ da nar, gɩdonɩ ner n yɩ gɛr dɩ nɩ nɩ gɛr dakha.#Lu 10:23–24 17Sobɔr mɩ so nar, Thãgbaa bobona na tɩɩ sarasɔ jɔɔjɔɔ kɔɔ ƴaalɛ wɩ yɩ gɩrɛɛkɛra nɩ‐n yɩnɩ gɩrɛ, sɩ wa kɔɔ yɩ ga, wɩ nɩɛna dakha gɩrɛɛkɛra nɩ‐n nɩɛnɩ gɩrɛ, sɩ wa kɔɔ nɩ ga.
Kɩɛr Jeju mɩɛ bi jal sokpaa kɩr
(Mar 4:13–20; Lu 8:11–15)
18Dɩ gɛr gɩ nɛrɛ, nɩ pɛ nũu gɩrɛ dɔnɩ bi jal sokpaa kɩrra. 19Ʋrɛ n nɩɛnɛnɩ ƴũ fãgadaarɩ dɩ thɩmɩɩ sɩ aa‐n jɩ kɩrʋaˈ, ɔr hʋɔn hʋ nʋɔ ka be kɔɔ jalnɩ, dɩɩ do Satã n pʋɔn, dɩ tiir beele kɔɔ jalanɩ ɔɔ hara. 20Ʋkha wo n ho boka thɩɩ ka be jalnɩ, a‐n nɩɛrɛ Thãgbaa so dɩ tu dapaara na daʋ, 21sɩ aa‐n sɩ gar dɩɩ yɩ nɛ gɔ paar ɔɔ hara ga, bɔɔ gbe a‐n pər gar dɩbara; dɩ ɔbɔɔkɛ nɩwɛ na kpoore n danɩ, dɩɩ do Thãgbaa soolera dɔ nɔɔ dɩɩ do dapaara a faarɛ ha pɛrɛ. 22Ʋkha n nɩɛ Thãgbaa so sɩ dɩɩ do a hʋrɛ ka uu hanɩ sɩ be jallɔ, sɩ dɛr bɔɔraakɛra na lẽle thɩ̃ kpɩɛr fifiləle, gele n ɩrɛ dɩɩ sɩlã Thãgbaa so dɩ ga‐n puno na se bəˈ. 23Ʋrɛ n nɩɛnɛnɩ Thãgbaa so dɩ jɩ kɩrʋ, ɔr hʋɔn thɩ bʋɔ ka be kɔɔ jalnɩ dɩɩ do a‐n ser be: Bi bɩɛl n ser tamaa, ʋ kpalãther, ʋ kpelẽ yʋɔr.
Yaya sokpaa
24Dɩ a so warɛ sokpa kpɩɩ wo ayɩ: Ƴũ fãgadaarɩ dɩ gɩ hʋrɛ kuunikɛ jalanɩ jʋ bi bʋɔ ɔɔ lɔɔ. 25Sɩ ɔbɔɔkɛ tɩbɩla n daarnɩ, ɔɔ lãlaardaar pɔr a jal yaya a pɛr jɔraale sa kɔ̃. 26Dɩ ɔbɔɔkɛ jɔ phuni a ɩ̃ a pemi dɩ ga‐n bɩ̃, wɩ yɩrɛ dakha yaya. 27Dɩ cɔdaar kuuni thɔ̃daarsɔ pɔ a bulee: Kɔ̃tɩn, ga do jʋ bi bɔɩ fɩ jal afɩ lɔaa? Sɩ ka yayasɔɔkɛ the le? 28Dɩ birse wi: Lãlaardaar cʋɛ thɩ̃ɛɛle. Dɩ thɔ̃dara bulee, dɩ fɩ‐n ƴaalɛ sɩ jala phɩrɛ yayasɔra ya? 29Dɩ birse wi: Kpei, a nɩ yɩ nɩ phɩrɛ yaya, na phɩɩrnanɛ jʋ bɔɩ. 30Nɩ sɛ gar, gɩ gbɛbɩ gɩ khɔ̃ bɩɛlbɩɛl, phaphapha gɩ dana jʋ kha bɔɔ. Dɩ a jʋ kha bɔɔ dã, gɛr ma sor jʋ khara: Nɩ kɔɔ phɩrɛ yaya ɓo a le gɩ dera gbulona gbulona wɩ thii, sa kha jɔ a uro ɩ̃ thʋna.
Seneve thɩr bi sokpaakɛ n nɛnanɩ mɔ̃ Thãgbaa fãgadaar dora khonɩ dɩ ga‐n pɛr
(Mar 4:30–32; Lu 13:18–19)
31Dɩ Jeju so warɛ sokpa kpɩɩ wo ayɩ: Ƴũ fãgadaarɩ dɩ gɩ hʋrɛ seneve bireekɛ kuun kɔɔ gbanɩ a jal ɔɔ lɔɔ. 32Thɩr bireekɛ ˈlunoni a jɔ be fɛʋ gɩ, sɩ ɔbɔɔkɛ a phuni pɩ, a‐n kɔ̃tɩnɛ dɩ jɔ thɩr bii fɛʋ dɩ ɩ̃ dɩ do thɩrʋ, dɩ ˈlominə n pɔ a na tɛl ɔɔ jɛ̃sɔra.
Tabɩ sokpaa
(Lu 13:20–21)
33Dɩ a so warɛ sokpa kpɩɩ wo ayɩ: Ƴũ fãgadaarɩ dɩ gɩ hʋrɛ tabɩɩrɩkɛ khɛr kɔɔ gbanɩ a mʋʋ buru mɩ̃ nyɔ̃kpõ khaa yẽtherra, phaphapha dɩ buru mɩ̃ boloola fɛʋ bʋ̃.
Gɩrɛ dɔnɩ kɩrʋ dɩ Jeju gba sokpaa da‐n mɩɩna tɩbɩla
(Mar 4:33–34)
34Gelesɔ fɛʋ sokpaa Jeju kɔɔ mɩɩna tibil jɔɔle. Aa‐n kɔɔ mɩɩna wɩ saagado sokpaa gaaga; 35dɩ mɛ̃ gɩrɛ Thãgbaa bobon kɔɔ mɩɩnɩ na dã oti gɩ sor:
“Sokpaasɔ, mɛr Thãgba na‐n mɩɩna.
Ma mɩɩrɛ thɩ̃ɛsɔɔkɛ kɔɔ keranɩ kɛkɛkɛ a fʋna thɩ̃ ti bɔɔ.”#Khɩ 78:2
Kɩɛr Jeju mɩɛ yaya sokpaa kɩr
36Agɩpɩ Jeju faarɛ tibil jɔɔle sa lõ cʋɔrɔ, dɩ ɔɔ kpãkpãadara tɔr pʋɔraa sa sʋʋraa: Mɩɛnɛ sɩ yayaakɛra hanɩ lɔɔ sokpa kɩr. 37Dɩ birse wi: Ʋrɛɛkɛ jalanɩ jʋ bi bʋɔɔle, mɛr tibili Bikuun gɩ. 38Lɩɛ dʋɔn tɩbɩla fɛʋ thɩɩraakɛ. Jʋ bi bɔɩ dʋɔn ƴũ fãgadaarɩ dɩɩ bɩsãsɔ; sɩ yaya dʋɔn puu cʋʋ hɩ̃daarɩ bɩsãsɔ. 39Lãlaardaarɩkɛ jalanɩ, Satã gɩ. Dɩ jʋ kha bɔɔ dʋɔn thɩɩkɛɛ pɩ bɔ. Jʋ khadara dʋɔn Thãgbaa thɔ̃thɔ̃daar thusɔ. 40Dɩ mɔ̃ wa khɩɩnɩ yaya a na thii, mɛ̃ ga ha thɩɩkɛɛ pɩ bɔ dakha. 41Mɛ̃ mɛr tibili Bikuun na thɔ̃ ɩ̃ thɔ̃thɔ̃daar thusɔ, dɩ wa tiir ɩ̃ fãgadaarɩ dɩra wɩrɛ fɛʋʋkɛ n cʋɛnɩ tɩbɩla dɩ wa‐n bara, na wɩrɛ n cʋɛnɩ sopugo, 42a na dʋʋrna wɩ dɔɔraakɛ jʋɔnɔnɩ dɩɩ ka bɩnɔ na faa, ka wa bɩnɩ wa‐n yɩrna nyɩma. 43Liir dɩphã tɩɩ sarasɔ na‐n carã awɩ Thɩ fãgadaarɩ dɩra mɔ̃ wire n caranɩ. Ntɛɛkɛ hananɩ nũu dɩ nɩna, dɔ a na‐n pɛ nũu.
Lẽle thɩ̃ɛɛkɛ keranɩɩ sokpaa
44Ƴũ fãgadaarɩ dɩ, gɩ hʋrɛ lẽle thɩ̃ɛɛkɛ keranɩ lɔɔ. Dɩ tibilikɛ yɛ gɩnɩ, a‐n kerore sɩ dɩ jal na daʋ, dɩ dolõ thɩ̃ɛ fɛʋʋkɛ a hananɩ dɩ thena lɩɛɛle.
Dɛ bi sokpaa
45Ƴũ fãgadaarɩ dɩ wo, gɩ hʋrɛ ƴaƴabɩdaarɩkɛ hanɩ dɛ ƴaallɔ. 46Dɩ ɔbɔɔkɛ a yɩnɩ dɛ bireekɛ khiinoni the nʋɔ ka, a‐n jaal dɩ dolõ thɩ̃ɛ fɛʋʋkɛ a hananɩ dɩ thena dɛ bireele.
Thʋ̃ pher sokpaa
47Ƴũ fãgadaarɩ dɩ wo, gɩ hʋrɛ thʋ̃ pherdaakɛ wɩ dʋnanɩ lanyʋɔnna, dɩɩ fʋ thʋ̃ caar dɩɩdɩɩ. 48Dɩ ɔbɔɔkɛ gɩ hini, thʋ̃ pherdara n hallɛ thena gẽgerena, sa too a phiir gɩrɛ bʋɔnɔnɩ a pɛ daʋ#13:48 Daʋ Gɛr dɔ kpɛ̃jɩ̃ɛɛkɛ Juifisɔ n pɛrnɩ thʋma., sa dʋʋrna gɩrɛ na bʋɔnɔnaˈ a faa. 49Mɛ̃ ga ha thɩɩkɛɛ pɩ bɔ. Thãgbaa thɔ̃thɔ̃daar thusɔ na ɩna na lee tɩɩ puusɔ tɩɩ sarasɔɔ thɩ̃thɩɩn, 50sɩ na dʋʋrna wɩ dɔɔraakɛ jʋɔnɔnɩ dɩɩ ka a na faa, ka wa bɩnɩ wa‐n yɩrna nyɩma.
51Nɩ jɩrɛ kɩrʋ gɩrɛsɔra fɛʋ dɩphã gaa? Dɩ wɩ tu: Ɔɔ, sɩ jɩrɛ kɩrʋ.
52Dɩ a so warɛ ayɩ: Gɛr gɩ jɔfʋ dɩɩrdaar wo jɔfʋ dɩɩrdaarɩkɛ ˈlɛnɩ dɩɩrɛɛkɛ dɔnɩ ƴũ fãgadaar doda, a hor cɔdaar kuunikɛ n tenɩ ɔɔ lẽle thɩna thɩ̃ phana na thɩ̃ tɩna.
Jeju ha Najarɛtɩ ka dʋɔdara na‐n pɩɛnɩ haaraˈ
(Mar 6:1–6; Lu 4:16–30)
53Ɔbɔɔkɛ Jeju mɩɩnɩ ga sokpasɔɔkɛ pɩ, gɛr a ɩɩrɔ le a jal. 54Dɩ a kɛrrɛ bir kɔ̃ ɔɔ dʋɔ, a ma da‐n dɩɩr tɩbɩla thɩ̃ɛ Juifisɔɔ Thãgba fʋɔr cɔra, dɩ mɛ̃ nʋɔ kpaa wɩ dɩ wa‐n so ayɩ: Ka kpɛsɛ caakɛ na nɔ kpaa thɩ̃ caakɛ a‐n cʋʋnɩ the? 55Ga do ɔr dʋɔn thɩr khaadaarɩ bikuunaa? Ga do ɔɔ nɩ wɩ‐n we Marɩaa? Dɩ ga do Jakɩ, na Jojɛfɩ, na Sɩmɔ̃, na Juudi dɔ ɔɔ õkuunsɔaa? 56Dɩ ɔɔ õkhɛrsɔ fɛʋ wo na ha kha na sɛrɛaa? Dɩ ka a yɩ gelesɔra fɛʋ? 57Dɩ mɛ̃ wɩ beesuu. Dɩ Jeju so warɛ ayɩ: Paar fɛʋ Thãgbaa bobon na‐n ˈlee cʋrɛ, saagado ɔɔ dʋɔ na ɔɔ cɔ gaaga.#Jã 4:44 58Dɩ aa‐n cʋʋ le nɔ kpaa thɩ̃ɛ jɔaˈ, gɩdonɩ wa‐n pɩɛ haaraˈ.
अहिले सेलेक्ट गरिएको:
Matiə 13: LOBIRI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Society of Burkino Faso 1985.
