YouVersion लोगो
खोज आइकन

Aposel 6

6
Osep tirere osep arang lumorwo ma titongo ngangon
1Alo ari osep ka aitno lisak dagar ke Yesus tires tipolou pula. Osep Yuda ina leklou ka tiwai pelengon Grik tingurngur ke osep Yuda ina ka tiwai pelengon Hibru urok elio. Tiwai langane. “Aitno limi kro kesua oklou aling aling umolua osep ka inarak ngangon isuk boto e umolua limem apmang sasap batne langane kovok.” 2Osep songotno orwo ka Yesus ila aposel tiklingen osep tingurngur deka tivai omon la ke osep ka pula keniye ka aitno lisak dagar ke Yesus tiwaiki time ma tiduni pulu. Deka isak keniye time e osep aposel tiwai ke isak langane. “Oklou aling aling limem bokongon imanapapra Ida Tapolngon ila pelengon ke osep. Langka imosongon limem bokongon ma imotongo ngangon ke osep elio langare itau kovok. 3Ma umerere sudo arang lumorwo ma tiplau bokongon ane. Umerere osep ka osep leklou tiwai urok elio isuk isuk itau e Ano Itau plau isak e tile omur itau. Deka ma imakar bokongon tonari ke isak. 4E ke oklou aling aling imi ma imoboko langka imawai itau ke Ida Tapolngon e imanapapra ila pelengon ke osep.”
5Osep keniye tiklingen osep aposel urok pelengon deka aitno lisak itau ine. Deka tirere gute Stiven ka aitno dagar lokono ke Yesus e Ano Itau plau iye itau. E tirere Filip e Prokorus e Nikanor e Timon e Parmenas e Nikolas. Nikolas iye gute Grik ina ka ila armok batne Antiok ka oglou iye due osep Yuda ina inarak apu deka iye neklep ke isak. 6Osep tirere osep lumorwo yagos deka tipaur isak tipolou ke osep aposel amtarsak. Deka osep aposel tiwai itau ke Ida Tapolngon deka limsak duru kai isak.
Osep soulu bitna tikis gute Stiven
7Alo ari Ida Tapolngon ila pelengon pakes lila e osep pula ka tidong ke Jerusalem aitno lisak la dagar ke Yesus. Deka osep ka aitno lisak dagar ke Yesus tires tipolou pula. E silang osep loulou ina pula aitno lisak la dagar ke Yesus. 8Ari Ida Tapolngon ila makaingan dong ke Stiven e ila arit due. Deka Stiven due elio arit ina pula airavu ke osep. 9Ari osep leklou tipara pulu pelengon kap Stiven. Osep tonari isak osep ka tidong ke osep Yuda ina urok duningen ina ninu ka angaine osep Friman ina. Osep ane kap osep Sairini ina e osep Aleksandria ina e osep Silisia ina e osep Esia ina tipara pulu pelengon kap Stiven.#6.9 Osep tisir duningen ina ninu ane angaine osep Friman ina kesua osep ka tiduni pulu are isak osep ka oglou isak wokboi nating. E mase tipolou fri. 10Osep tonari tipara pulu pelengon kap Stiven e tikaranga timole kovok. Stiven ila pelengon mole urok pelengon kesua Ano Itau due aitno deka iye ile omur itau. 11Deka osep tonari tibisi urok elio e tisruk osep leklou aitno lisak ma tiwaiki tisin elio vri ke Stiven. Tiwai langane. “Imeklingen gute ane wai soulu lokono ke Moses e ke Ida Tapolngon.” 12Osep tonari tisruk osep pula e osep ngongle e osep ka tile itau ke Moses ila sogongon aitno lisak deka aitno lisak soulu lokono ke Stiven. Deka tikis iye dagar e tipaur iye la ke osep kaunsil ina amtarsak. 13Deka tidue osep leklou ka isak osep yakngan ina e tiyakyak e tisin elio vri ke Stiven. Tiwai langane. “Oklou aling aling gute ane wai soulu ke Ida Tapolngon ila ninu e ke Moses ila sogongon blang. 14Imeklingen iye wai langane. ‘Ma Yesus ka Nasaret ina dar Ida Tapolngon ila ninu ane e ma iye kar ite apu oku ina ka kasip udo apu ka oglou Moses kar isak ke ite.’” 15Tisin elio vri ke iye langane deka osep kaunsil ina amtarsak tinekek dagar ke gute tonari. Deka tipalem Stiven bitna eriar langka ensel bitna.

अहिले सेलेक्ट गरिएको:

Aposel 6: ANT

हाइलाइट

शेयर गर्नुहोस्

कपी गर्नुहोस्

None

तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्

Aposel 6 को लागि भिडियो