Matəw 16
16
Ba Farasay nə ba Saduse ghayn kwi Yeso aghəy ayere anó
1 #
Mat 12.38; Luk 11.16 Ba Farasay nə ba Saduse moʼ ŋu abú Yeso kaba izweʼe uŋwən. Anigə mbə ghayn abú uŋwən kwi, u aghəy ayere anó noʼ iti kwi Nwiye naʼa ikay abú uŋwən. 2Yeso ywiri kwi, “Amaʼazənə injaʼ mbə chig mbən ghayn kwi, ‘usin mbi boŋ damugə inyi azobo yə baŋa.’ 3Amaʼazənə isəg kyiʼi, mbən ghayn kwi, ‘Imbəŋ yi choʼo, inyi azobo yə baŋa kaba ifid.’ Asɨmə cha mbən kyay umugə itoʼoro unwini mbənə umi du akinine. 4#Mat 12.39; Luk 11.29Umbən ba akinine mbə aghəy unó iboŋ cha imə zi fiŋ inyo Nwiye, mbən yə kaba kwi aghəy ayere anó, cha ayere anó moʼ ami ighəy chigə akə zənə yə aghəy abú Jona.” Amaʼazənə Yeso ghayn nigə, yə sayn úŋwən noʼ ŋu ma.
Uchere da afuro ba Farasay nə ba Sadusi
5Amaʼazənə mə məŋə-anó wu pey anjin animini zi, bə zən kwi mbə́ nyaba inum ingəŋ. 6#Luk 12.1Yeso ghayn abú úŋwən kwi, “Mbən num azom da afuro ba Farasay foro ba Sadusi.”
7Mbə mə ghayn anó zəŋ akaʼa uma kwi, “U yə ghayn ney damugə cha mba di num ngwa ingəŋ moʼ.”
8Yeso kyayn anó zənə mbə́ mə́ ghayn, anigə yə ghayn kwi, “Ijən ibeni fiŋ yə kweʼe! Mbən mə ghayn damugə cha mbən num ngwən ingəŋ da ngiya? 9#Mat 14.17-21Cha umbən utəw di si sayn uma? Cha mbən kono ubimi ingəŋ itɨŋ mbənə nu mə jəyi ichuʼ anóm itɨŋ? Mbən fere ikəg tənə tə́ buʼe tə sugi usaŋ səʼe? 10#Mat 15.34-38Kə cha mbən kono ubimi ingəŋ sambigə mbənə mə́ jəyi ichuʼ ba kyugə awu? Mbən fere ikəg tənə tə́ buʼe tə́ sugi usaŋ səʼe? 11Asɨmə ngiya ghəy kwi ka mbən kyay ngwən kwi cha amə inayn aŋu inen amə da ingəŋ? Asɨmə mbən num azom da afuro ba Farasay foro ba Sadusi.” 12Amaʼazənə yə ghayn nigə, utəw ma zayn kwi cha umə ghayn ma abú úŋwən da afuro zənə amə aghəy ingəŋ koʼo, u yə ghayn amə da unó mbənə ba Farasay nə ba Sadusi mə itey.
Pita ghayn kwi Yeso mə wa ŋunə Nwiye zoʼo
13Amaʼazənə Yeso ŋu aba abey Kayisariya Filipi, yə biri abú mbə məŋə-anó ma kwi, “Ba mə ghayn kwi Ŋwə̂ Wa mə ngwa?”
14 #
Mat 14.1, 2; Mak 6.14, 15; Luk 9.7, 8 Mbə́ ywiri kwi, “Ba moʼ mbə ghayn kwi, ngwə mə Jon ŋunə yə mə nanaʼ une, uchini ghayn kwi ngwə mə Elayija, uchini ghayn kwi ngwə mə Yeremiya kə wa ukən Nwiye moʼ.”
15Yə biri abú úŋwən kwi, “Amə umbə, mbən si ghayn kwi amə ngwa?”
16 #
Jon 6.68, 69 Sayimon Pita ywiri kwi, “Ngwə mə wa ŋunə Nwiye zoʼo, Ŋwə̂ Nwiye ŋunə umə ikay.”
17Yeso ghayn abú uŋwən kwi, “Nwiye zi aborobod igun nigə Pita ŋwə̂ Jon, damugə akə ma wa inyoŋ atəw u tey anó zəŋ inigə, amə uŋu mbaʼ ŋunə umə azobo u tey inigə. 18Anigə ayə ghayn inigə Pita kwi, ngwə mə ukob anigə igun ukob awu ayə chim uŋu ufere nu kaba iwu chama imi iniy ufere wu. 19#Mat 18.18; Jon 20.23Ayi naʼa afiʼi na akə anó ufon aneŋ azobo inigə. Anó zənə ngwə tono igun isəg Nwiye yi ton aneŋ azobo, anó zənə ngwə beni igun isəg Nwiye yi beni aney azobo.” 20Amaʼazənə yə ghayn nigə, yə chere mbə məŋə-anó ma kwi ka ughayn ma abú wa moʼ kwi uŋwən mə wa ŋunə Nwiye zoʼo.
Yeso ghayn mugə umi zəw ingəʼ iku
21Iti Amaʼazənə Pita toʼoro wa ŋunə amə Yeso, Yeso ghayn abú mbə məŋə-anó ma kwi, “i yi ŋu á Yerusanem pey yi tana zənə ingəʼ ubugə ba kyayn mbənə umə ungɨŋ abey, ubugə ba kyayn mbənə umə́ faʼa ambəŋ Nwiye, ubugə mbə taʼa ba akə unoʼo. Umbi zwere aŋu asɨmə igun unəy ta Nwiye yi zəmə aŋu.”
22Pita num uŋwən usəne ŋu iyad uni inayn abú uŋwən ghayn kwi, “Ka Nwiye beni ma, Asɨyisəg! Ka ukudu unó ŋunə du ma inigə.”
23Yeso gha ma ghayn abú Pita kwi, “Noʼo ayə inyi iyad Satan! Ngwə yə kənə inyi inji, damugə cha iji kono di noʼo ma abú Nwiye, Asɨmə yə noʼ abú wa inyoŋ atəw.”
24 #
Mat 10.38; Luk 14.27 Anigə Yeso ghayn abú mbə məŋə-anó ma kwi, “Wa moʼ mə kaba izaʼa aboʼo inyi, uton unó moʼ mbənə nyə̂ inyo ma mə kaba, beʼe azad abaʼaray niŋe inyi injim. 25#Mat 10.39; Luk 17.33; Jon 12.25Damugə wa moʼ ŋunə umə kaba ijəg itəni yi sam itəni wu, wa ŋunə u sam itəni ma da aŋu uyi jəg itəni wu. 26Injim zənə wa mi jəg ighara umbə mə ni isəg ujum anigə isam itəni ma amə ngiya? Kə amə ngiya amə ghəy wa naʼ ikoboro itəni ma awu? 27#Mat 25.31; Rom 2.6Ŋwə̂ Wa yi zaʼa nə mbə angəd ma mə ikay zənə mbaʼ naʼa abú uŋwən. U yi pey yi choʼo afaʼa wa feyn feyn akə ji zənə yə faʼa. 28A yə ghayn asiʼ inen kwi, ba moʼ mbə akəŋ nu cha umi ku pey amaʼazənə umi zən Ŋwə̂ Wa u zaʼa nu ufon.”
अहिले सेलेक्ट गरिएको:
Matəw 16: NGI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2023 CABTAL
