Matìyò 10
10
Yeso tɔm mə̀mə̀nənùg ìghum chɔ̀b ibe
(Mag 3:13-19; Lug 6:12-16)
1Yeso ya tɔŋi ìmbi mə̀mə̀nənùg mbe ìghum chɔ̀b ibe, nàʼ ika inɔb gha mbe kamni izwighi tibɔ̀ŋ chì inga bəd, bə̀ ghù aku aghɔn ajìm. 2Tikum bədtɔm Kristo mbe ìghum chɔ̀b ibe ya: Ìwi mbègtog ya Sayimùn we ne mbe kàrà ane Pità tì ifi məd Andrò, tì Jem fɔrɔ Jɔn ne ya bɔn ìmbi Zebedì 3tì Filib tì Bàtòlomìyò tì Tòmas fɔrɔ Matìyò ne ya wə̀dtag tì Jem ŋwan Afòs tì Tàdiyòs 4tì Sayimùn we ne ya Zilɔ̀d#10:4 Zilɔ̀d ya wə̀d ne zìyè atog ane anug. fɔrɔ Judàs Ikarìyɔ̀d we ne ya fḛ Yeso.
Àfàʼì ne bədtɔm Kristo mbe ìghum chɔ̀b ibe fàʼi
(Mag 6:7-13; Lug 9:1-6)
5Yeso ya chà bədtɔm mbe ìghum chɔ̀b ibe nàʼ tikə inɔb gha, “Imbə̀ʼ mbə̰ gho awən inga iben bəd mbe ne kayi mə̀Ju fɔrɔ inga iben məSàmarìyà. 6Mbə̀ gho yaʼ abə mə̀Izre ne yaʼi icheg njə̀g ne fə nimi. 7Icheg ne mbə̰ mbe ghò, mbə̀ nye chètè gha, ‹Anug ìfɔ̀n ikaŋ fə tinde.› 8Mbə̀ ghuyə ighɔn, zwèmni iwu bəd, ghù bəd ne ghɔ̰̀ àwàrikə̀m bə̀ kàmni izwighi tibɔ̀ŋ chì inga bəd. Mə fə nàʼ ika gho̰ inən ako, ane, mbə̀ bə fàʼ abə bəd ako. 9Imbə̀ʼ mbə̰ nyimi awən ikab mɔ̀ʼɔ inga ìmbən ìbàn ka; kə̀ àkə gol kə̀ silibà kə̀ kopà. 10Imbə̀ʼ mbə̰ niŋə awən àbàn ndwi kə̀ ndwi ndəŋ kə̀ itami ndəŋ kə̀ ìmbàŋì. Ze kòʼ gha bəd ya nàʼà ighi mbe ne wə̀d àfàʼì kòʼi ni bèrì ibo.
11Aben ne mbə̀ nyi inga, kə̀ àkə àze kyen kyen kə̀ àze kwa kwa, mbə̀ kəbə wə̀d ne tì mbə̰ chughi ibo inga achan anene pè ane aneg ne mbə̰ mbe dùwə̀ inga aben ze. 12Mbə̰ mə̀ nyi inga achan ze, mbə̀ chaʼra bəd ne yaʼi inga achan gha, ‹Ŋwiye ziye àbɔrɔ̀bɔd igun inən.› 13Bəd ne yaʼi inga achan ze mə̀ niŋ awən, àbɔrɔ̀bɔd biri yaʼ inga achan ze. Àmə chəyi mbi niŋi awən, àbɔrɔ̀bɔd ze biri bə̀ndì yeʼe inən. 14Àmə chəyi wə̀d mɔ̀ʼɔ niŋi awən kə̀ bə̀ zug anug ze ne mbə̰ mbe ghà, anyumə̀ ne mbə̰ mbe dùwə̀ inga achan ze kə̀ inga asiŋi ze, mbə̀ kutə agwi chì ane ìmbən ighog. 15Mə gha tesiʼ inən gha, igun aneg ze ne Ŋwiye biri sɔb isaʼi, wì biri dìgrì igun bəd a Sodòm bə̀ dìgrì igun bəd a Gòmorà chè icheg ne wì biri dìgrì igun bəd inga asiŋi ze ne to̰ awɔb ìwən ikən.”
Yeso gha bəd biri chɔʼ ibɔʼì ighog abə bədtɔm
(Mag 13:9-13; Lug 10:4-12)
16Yeso ya chè imbìghè gha, “Mbə̀ nḛ, mə̀ ya anìŋ chà awən isəg icheg njə̀g inga fìghàra abə ìfɔn. Mbə̀ ya we awən icheg jo, se bɔ̀tɔ icheg mə̀bupə. 17Mbə̀ ya we awən tì bəd imbə̀ʼ icheg ne mbi biri gwì awən ghò nàʼ abə bəd ne sàʼa aben. Mbi biri ywiri awən inga ìmbɔb məchamì Ŋwiye. 18Mbi biri sùŋì awən ghò imbìghè abə mə̀gɔbnà fɔrɔ imbìghè abə məfɔn imbə̀ʼ amə. Àze biri ghì gha mbə̀ bere apan ni ghà ikən chɔm inɔb bə̀ fɔrɔ abə bəd mbe ne kayi mə̀Ju. 19Anyumə̀ ne mbi gwi awən, imbə̀ʼ mbə̰ nwìʼe awən ìwən nyɔd imbə̀ʼ anug ne mbə̀ biri ghà, kə̀ imbə̀ʼ icheg ne mbə̀ biri ghàm. Nyùmə̀ we mə̀ kòʼ, Ŋwiye biri ghì gha mbə̀ kyeri anug ni ghà 20imbə̀ʼ icheg ne kayi mbə̰ biri ghàm mbə̰ mbə̰. À ya Azwighi ìwən Mbaʼ biri chè anjìm inən ghàm.
21Wə̀d biri fen ìwi ifi gha mbe zweti. Mbaʼ biri fen ìwi ŋwan gha mbe zweti. Bɔn biri ghì tìkàtog abə ìmbɔb mə̀mbaʼ bə̀ ghì tìkàtog abə ìmbɔb mbì ngɔb, ghì gha mbe zweti awɔb. 22Bəd məjìm biri pàb awən imbə̀ʼ amə, si ya gha, wə̀d ne nyìʼi ghò pè ane ìnwḭ, Ŋwiye biri pumni aməd. 23Anyumə̀ ne mbe chɔ̀ʼɔ ìmbən ibɔʼì ighog inga asiŋi mɔ̀ʼɔ, mbə̀ noro awən ghò inga asiŋi ndəŋ. Mə gha tesiʼ inən gha, Ŋwan Wə̀d biri ywiri yeʼe ne chəyi mbə̀ kiri gho inga isiŋi ijìm inga Izre.
24Chəyi àmə̀nənùg che wə̀d we ne chwìte inug ibo. Chəyi ŋwan àfàʼì bə chè mbaʼ àfàʼì məd. 25Ze kòʼ gha àmə̀nənùg yaʼ icheg wə̀d ne chwìte inug ibo. Ze bə̀ kòʼ gha ŋwan àfàʼì bə yaʼ icheg mbaʼ àfàʼì məd. Mbi mə̀ kàrì mbaʼ inga inəbi ane Bezebɔ̀b,#10:25Bezebɔ̀b ya ikum ndəŋ ne mbe kàrà Sàtàn. nji mbi biri bə kàrì bəd inga inəbi məd ane ikum ni bə chè.”
Wə̀d ne bəd beri ni bɔ
(Lug 12:2-7)
26Yeso ya chè imbìghè gha, “Ane, imbə̀ʼ mbə̰ bɔ awən bəd mbe ne chɔ̀ʼɔ ìmbən ibɔʼì ighog. Chəyi aghi mɔ̀ʼɔ ne mbi kubri ne chəyi mbi biri fìʼì kə̀ ne mbi nəmbi ne chəyi bəd biri kyeri. 27Inug mbe ne mə ghà inən ne tì yaʼi məyi mba mba, mbə̀ chete isəg ijìm zug. Inug mbe ne mə̀ jiti jiti ghà inən, mbə̀ təm igun idɔm nəb chètì abə bəd. 28Imbə̀ʼ mbə̰ bɔ awən bəd mbe ne zwète nyàmnyɔd ne chəyi tì mbi zweti azwighi. Mbə̀ bɔ yaʼ Məd we ne tì wì nìmni nyàmnyɔd bə̀ nìmni azwighi inga asiŋi ichə. 29Imbə̀ʼ bəd ya fḛ̀ tèghubàʼ tibe ane iki ikab kwa kwa? Tesiʼ ya gha, àmə chəyi ìwən Mbaʼ bḛ, chəyi fi imɔʼ biri fen aseg. 30Ka bèyi nyɔ̀ŋì te ne yaʼi igun ìmbən itog, Ŋwiye fə taŋ tijìm. 31Ane, imbə̀ʼ mbə̰ bɔ awən. Mbə̰ ya ighi àka inun ne che tèghubàʼ nɔʼ nɔʼ!”
Anug ni bḛ kə̀ ni ton Kristo
(Lug 12:8-9)
32Yeso ya chè imbìghè gha, “Wə̀d ne bḛ imbìghè abə bəd gha zìye kyèri amə, mə biri bə bḛ imbìghè abə ìmə Mbaʼ we ne yaʼi ikaŋ àbɔ̀ŋɔ gha mə kyèri aməd. 33Àsi wə̀d ne to̰ yi imbìghè abə bəd gha chəyi zìye kyeri amə, mə biri bə to̰ amə imbìghè abə ìmə Mbaʼ we ne yaʼi ikaŋ àbɔ̀ŋɔ gha chəyi mə̀ bə kyèri aməd.”
Yeso yèʼe ni gha bəd chɔb, kayi ni gha bəd chughi ane àbɔrɔ̀bɔd
(Lug 12:51-53; 14:26-27)
34Yeso ya chè imbìghè gha, “Imbə̀ʼ mbə̰ kɔndɔ awən gha mə fə yeʼe ni zì àbɔrɔ̀bɔd igun isəg. Chəyi mə̀ ya yeʼe ni zì àbɔrɔ̀bɔd igun isəg. Mə ya yeʼe yaʼ ni gha bəd chɔb. 35Mə ya yeʼe ni ghì gha,
‹ŋwan mbaŋà gɔŋ atog abə mbaʼ məd,
ŋwan àyi gɔŋ atog abə ngɔb məd,
fɔrɔ ni gha, iweg ŋwan gɔŋ atog abə ngɔb inɔm məd.
36Bəd ìpàb wə̀d biri yaʼ bəd inga nəb məd.›#10:36 Asiŋi àŋwàʼrì azo̰ yaʼ icheg ne ze yaʼi inga Àŋwàʼrì Mikà 7:6
37Wə̀d ne kɔ̀ŋi ìwi mbaʼ kə̀ ìwi ngɔb chè amə, chəyi tengàŋ kòʼi ni yaʼ àmə àmə̀nənùg. Wə̀d ne kɔ̀ŋi ìwi ŋwan mbaŋà kə̀ ìwi ŋwan àyi chè amə, chəyi tengàŋ kòʼi ni yaʼ àmə àmə̀nənùg. 38Wə̀d ne chəyi wì bèʼi àzi azed abaʼri bèni abɔ̀ʼ inum, chəyi tengàŋ kòʼi ni yaʼ àmə àmə̀nənùg. 39Wə̀d ne kə̀bi ni nɔ̀ŋì ìwi ìtḛ̀ biri sam ìtḛ̀ we. Wə̀d ne sami ìwi ìtḛ̀ imbə̀ʼ amə, tengàŋ biri jəg ìtḛ̀ we.”
Anug imbə̀ʼ chùd
(Mag 9:41)
40“Wə̀d ne niŋi awən, tengàŋ fə bə̀ niŋ amə. Wə̀d ne niŋi amə, tengàŋ fə bə̀ niŋ wə̀d we ne tɔmi amə. 41Wə̀d ne niŋi wə̀dkə̀n Ŋwiye imbə̀ʼ icheg ne məd ya wə̀dkə̀n Ŋwiye, tengàŋ biri niŋ chùd wə̀dkə̀n Ŋwiye. Wə̀d ne niŋi wə̀d ne ghìyə̀ inug ne təmi kòʼ imbə̀ʼ icheg ne məd we ghìyə̀ inug ne təmi kòʼ, tengàŋ biri niŋ chùd wə̀d ne ghìyə̀ inug ne təmi kòʼ. 42Wə̀d ne nàʼi ka bèyi toʼ mənib abə ŋwan kwa kwa mɔ̀ʼɔ abɔ̀ʼ mbo̰ imbə̀ʼ icheg ne à ya àmə àmə̀nənùg, mə ghà tesiʼ inən gha, chəyi wì biri nim ìzi chùd.”
अहिले सेलेक्ट गरिएको:
Matìyò 10: MBTP
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2019 CABTAL
