मत्ती 5
5
येशूका सेर्पा मु़चु़लाई पोप्चङडला लु़म्ला बेट्मिडिम
(लूका ६:२०-२६)
1कोलाम सेर्पा मु़चु़ खोम्सिक्पा येशूका ल्वाम्डिमा पोप्चङडला लक्साका गन्मिडी। मेसिन्डा उनी सीसिपामिम वो रोम्डी। 2येशूका उनी सीसिपामिमलाई आरे र्वाक्तो सीमु चो़म्मिडी:
3“न-गोलाम माम्चु़नीकु ख्लो़सी माल्पामिम जिनुङमा सो़,
हेङालोने पाह्री-किब्दी मेर्मिमकामङा सो़।
4न-गोडा ख्रापामिम जिनुङमा सो़,
हेङालोने माम्चु़नीका मेर्मिमकु न-भ्रसिबेन्मी।#यशै ६१:२
5याक्के दु़म्पामिम जिनुङमा सो़,
हेङालोने सुबु मेर्मिमकाम दु़म।#भज ३७:११
6माम्चु़नीकु जो़पा खारीकाम लागि क्रु़म-कोरा सिपामिम जिनुङमा सो़,
हेङालोने माम्चु़नीका मेर्मिमकु गो तिम्सिबेट्मी।#यशै ५५:१-२
7न-थो़मनुङमामिम जिनुङमा सो़,
हेङालोने मेर्मिमडला माम्चु़नीका न-थो़म रेम्बोमी।
8सेपा न-गोकाममिम जिनुङमा सो़,
हेङालोने मेर्मिमका माम्चु़नीलाई ल्वामी।#भज २४:३-४
9न-थो़म घ्रो़म्बेट्पामिम जिनुङमा सो़,
हेङालोने मेर्मिम माम्चु़नीकु चो़-चु़सु़ र्वाला सो़सिमी।
10माम्चु़नीकु जो़पा खारी बोमिमिमका
उनी थो़मतेर्ला सो़सिक्पामिम जिनुङमा सो़,
हेङालोने पाह्री-किब्दी मेर्मिमकामङा सो़।#१ पत्र ३:१४
11“गानी आमा सीसिपा दु़म्निमका मु़चु़मिमका डक्साका जेमी, मा इनी थो़मतेर्मी, मेम्मा इनीमा दुथाम खोत्ले मेजो़पा ल्वा जेसाका लिमा थेन्मी, गानी ने जिनुङमा सो़।#१ पत्र ४:१४ 12इनी न-भ्रसिबेट्निमा छो़म गेर्सिद्वानी, हेङालोने पाह्रीला गानी डोक्पु पुरस्कार ल्वानी। माकेम माम्चु़नीलाम-जेपामिमलाई वो मेर्मिमका आरेसाकाङा उनी थो़मतेर्साम्डिम बाइडा।#२ इति ३६:१६; थु़र्मा ७:५२
यो नुङ ओलकु दुथाममिम सीसि
(मर्कूस ९:५०; लूका १४:३४-३५; ११:३३)
13“गानी सुबुडाम यो होप्माम सो़#५:१३ योका पोमु-डुमु भ्रबेडु़ मा फिमेबेडु़, मेम्साकाङा गानी वो मु़चु़मिमलाई छु़ल बेबेट्पा मेएँ, जो़पालाम सीपा दु़म्मु बासी।, लावो योड्डा यो मेलु़ माला मेरामलाई हामका यो लु़पा दु़म्बेन्मु चाप्सु़ मा? मेराम ने हाम ना हामकाम दु़म। मेम्मा घ्रोमिमा मु़चु़मिमका धेम्मी।#मर्क ९:५०
14“गानी सु़म्दिसेरडाम ओल होप्माम सो़। पोप्चङडला बनेबेम्मा शहर सु़का वो थमु मेचाम्मी।#यूह ८:१२; ९:५ 15सु़का वो धिप्री चामिमा खचाका चु़प्साका मेजु़ल्मी, लावो नेमगोनो बाट्पा खोत्लेका ल्वामिनु़ र्वाक्साका बोर्सोडला जु़ल्मी।#मर्क ४:२१; लूक ८:१६; ११:३३ 16मेम्साकाङा इनीमा जो़पा खारीमिम झ्वामिनु़मा मु़चु़मिमका ल्वामिनु़। मेम्मा पाह्रीलाम इनीमा पापकु नङ खोत्लेका कोमिनु़।#१ पत्र २:१२
मोशाकु डु़म्ला होङङा रेथिड्डा ख्रीष्ट योम्डिम
(लूका १६:१७)
17“मोशाकु डु़म्ला लोवो माम्चु़नीलाम-जेपामिमका र्वाम्डिम सिजेमलाई लोवो हाम ना हामकाम दु़म्बेड्डा गो योङडोम र्वाक्साका गानी मेमिम्सिट्नी, लावो गो ने ओर्मिम ल्वा खोत्ले रेन्थिमु लागि योङडोम सो़। 18आच्छाङा गो गानीलाई र्वाङु, सुबु नुङ धामु मेदाममिमसम्म माम्चु़नीकु डु़म्लागोडाम कोले वो मेदाम। मेम्मा डु़म्लाका र्वाक्ताम खोत्ले ल्वा होङङा मेरोक्थिथु़मसम्म मेरामकाम कोले याक्के बिन्दु ङा लोवो मेराम मेदाम।#लूक १६:१७ 19मेम्मिमका उहेमका ओर्मिमगोडाम कोले याक्के ल्वा हाम होङङा वो मेलु़, मा वाङमिमलाई वो मेमङा बेबेडु़मी पाह्री-किब्दीडा मेराम मु़चु़ खोत्लेडाम याक्के दु़म। लावो उहेमका ओर्मिम डु़म्लाका र्वामिम होम्साका बु़, मा वाङमिमलाई वो मेमङा बोमु सीडु़मी, पाह्री-किब्दीडा मेराम मु़चु़ डोक्पु दु़म। 20हेङालोने गो गानीलाई र्वाङु, डु़म्लाका र्वामिम ल्वा डु़म्ला सीपा पातु़म्री नुङ फरिसीमिमडाम वो जो़होमका मेबेनिवा माला आछाङा गानी पाह्री-किब्दीडा हुमु मेल्वानी।
छोक्चो मेबोमु र्वाक्साका येशूका सीट्मिडिम
21“माके-माकेम मु़चु़मिमलाई माम्चु़नीकु सिजेमका आरे र्वाक्ताम ने गानी थो़न्निम बु, ‘मु़चु़ मेसेडा, मा उहेमका मु़चु़ सेडु़, मेरामका देन्दे ल्वासु़।’#प्रस २०:१३; व्य ५:१७ 22लावो गो गानीलाई र्वाङु, गानी कोङनिमनुङ छोक्चो बेन्नी माला देन्दे ल्वापा मु़चु़ दु़म्नी। कोङनिमलाई गानी ‘ओइबु’ र्वानी माला डोक्पु अदालतका#५:२२ माम्चु़नीङा नियाबेपा दु़म्पा अदालत। गानीलाई देन्दे ग्वाक्पा मु़चु़ दु़म्नी। मेम्मा कोङनिमलाई गानी वाइतो बेट्नी माला खादीगोयु़म मुगोडा घ्रु़पा मु़चु़ दु़म्नी।
23“मेम्मिमका कोङनिमका इनीमा कोर्थो़लाम मेजो़पा बु़डु़म ल्वा सो़रनेमडाम सासेन्खोपडला सासेड्डा लनिलो मिम्ल्याट्नी माला, 24सासेन्मु इनी ग्वा-ग्वा सासेन्खोप फार्डाङा पार्जो़ल्नी। मेम्मा लक्साका मेराम मु़चु़नुङ इनीमा न-थो़म घ्रो़म्बेट्नी। मेकोतिमा रोक्नीमा माम्चु़नीलाई इनीमा ग्वा-ग्वा ग्वाक्नी।
25“गानीलाई मुद्दा फिक्पा मु़चु़का अदालतडा लमु ङादोङा मेरामनुङ इनी न-थो़म घ्रो़म्बेट्नी। मेम मेबेनिवा माला गानीलाई मुद्दा फिक्पाका निया बेपा मु़चु़काडा लनी। मेकोतिमा गुका प्रहरीकु ल्वाडा ग्वानिमा प्रहरीका गानीलाई झ्यालखानडा चनी। 26आच्छाङा गो गानीलाई र्वाङु, मेकोतिलो गानीलाई सोबेट्निम खउलुङकाम को पैसाङा वो मेसोक्सोथु़मसम्म गानी मेलामका लुमु मेल्वानी।
नाम्सु़रु़ मेबेनी र्वाक्साका येशूका सीट्मिडिम
27“‘नाम्सु़रु़ मेबे’#प्रस २०:१४; व्य ५:१८ र्वाक्पा माम्चु़नीकु सिजेम ने गानी थो़न्निम बु। 28लावो गो गानीलाई र्वाङु, उहेम मु़चु़का कोङनिम मेसेमनुङ अम्पा नका रेप्डु़, मेरामका उ न-गोडा मे मेसेमनुङ ङादोङा नाम्सु़रु़ बु़। 29मेम्मिमका इनी जो़पलाममिम मिक्सीका गानीलाई छु़ल बेबेनी माला, मेरामलाई थाट्निमा घ्रोनी। खोत्ले इनी मिरो़मङा खादीगोयु़ घ्रोमिमिमडाम ने इनी मिरो़मकु कोले अंग मान्थिङा बुमु इनीमा लागि जो़पा दु़म।#मत्ती १८:९; मर्क ९:४७ 30इनी जो़प ल्वाका गानीलाई छु़ल बेबेनी माला, मेरामलाई क्रिप्निमा घ्रोनी। खोत्ले इनी मिरो़मङा खादीगोयु़ घ्रोमिमिमडाम ने इनी मिरो़मकु कोले अंग मान्थिङा बुमु इनीमा लागि जो़पा दु़म।#मत्ती १८:८; मर्क ९:४३
वोचु़-मोचु़ डिन्मेबोमुकु दुथाम येशूकु सीसि
(मत्ती १९:९; मर्कूस १०:११-१२; लूका १६:१८)
31“माम्चु़नीकु डु़म्लाका आरे र्वाक्ताम गानी थो़न्निम बु, ‘उहेमका उ नाइमे डिडु़, मेरामका डित्तोम र्वाक्पा कागज र्याक्नु़मा उ नाइमेलाई ग्वाकु़नु़।’#व्य २४:१-४; मत्ती १९:७; मर्क १०:४ 32लावो गो र्वाङु, इनी नाइमेका नाम्सु़रु़ मेबेथु़मसम्म गानी गुलाई मेडिट्नी वो। गानी गुलाई डिट्नी माला कोङनिमका वाङमिमकु नाइमेलाई लालीकुन्दा बु़लो नाम्सु़रु़ बु़मिम होङङा गुलाई वो गानी नाम्सु़रु़ बेबेनिमिम दु़म।#मत्ती १९:९; मर्क १०:११-१२; १ कोर ७:१०-११
कसम मेपेनी र्वाक्साका येशूका सीट्मिडिम
33“माके-माकेम मु़चु़मिमलाई आरे र्वाक्मा ने गानी थो़न्निम बु, ‘मेरेन्थिनामिम ससि मेबे, लावो मिप्रङमानुङ ससि#५:३३ ससि र्वाक्मा चक्थो़ दु़म्पा ल्वाकु दुथाम बेउ र्वाक्साका जेम्मा लावो कसम र्वाक्मा ने ङादो दु़स्ताम ल्वा नुङ चक्थो़ दु़म्पा ल्वाकु दुथामिम सो़। बेन्नाम होङङा बे।’#लेवी १९:१२; गन्ती ३०:२; व्य २३:२१ 34लावो गो गानीलाई र्वाङु, हाङकाम वो कसम मेपेनी। पाह्री नङ सो़साका कसम मेपेनी, हेङालोने मेराम माम्चु़नीकु गन्खोप सो़।#५:३४ माम्चु़नीका साखाम थो़मु गन्मिमिम गन्खोप सो़।#याक ५:१२; यशै ६६:१; मत्ती २३:२२ 35सुबु नङ सो़साका वो कसम मेपेनी, मेराम ने माम्चु़नीकु खेल जु़ल्खोप सो़। यरूशलेम नङ सो़साका वो कसम मेपेनी, मेराम खोत्लेडाम डोक्पु हपकु#५:३५ माम्चु़नी शहर सो़।#यशै ६६:१; भज ४८:२ 36इनी त्वाकु बुइ सो़साका कसम मेपेनी, हेङालोने इनीमा बुइडाम कोरिप सेम वो बुबुयाम लोवो केकेम लोवो बनेबोमु गानी मेचाम्नी। 37आच्छाङा माला आच्छाङा र्वाक्नी। मेएँ माला मेएँ कोङङा र्वाक्नी। ओरामडाम हापा ल्वा ने मुनाङकु डोक्पुलामका रो।
सु़डला वो छोक्चो मेहान्मु र्वाक्साका येशूका सीट्मिडिम
(लूका ६:२९-३०)
38“मोशाकु डु़म्लाका आरे र्वाक्ताम गानी थो़न्निम बु, ‘कोलेका इनी मिक्सी पियु़डु़ माला, गानी वो मेरामकु मिक्सी पिन्साट्नी, मा इनी लि आल्साट्नी माला, गानी वो उ लि आल्नी।’#प्रस २१:२४; लेवी २४:२०; व्य १९:२१ 39लावो गो गानीलाई र्वाङु, गानीलाई मेजो़पा बेपा मु़चु़डला छोक्चो मेहाट्नी। कोङनिमका इनी जो़पलाममिम फोसु़डा याल्नी माला कोङमीलाममिम फोसु़डा वो देन्साट्नी। 40कोङनिमका इनी माक्ते लमु लागि मुद्दा ग्वानी माला मेरामलाई इनी हुम-ये वो ग्वान्सोट्नी। 41कोङनिमका गानीलाई को माइलसम्म गुनुङ लाम्दी बेट्नी माला नक माइलसम्मङा गुनुङ लक्नी। 42गानीनुङ हाम-हुम बिपामिमलाई ग्वाक्नी, मा गानीनुङ जेर बिपामिमलाई मेग्वाक्पा न मेबेनी।
स्वाक्चिमोलाई रिखाम बोमु
(लूका ६:२७-२८,३२-३६)
43“‘इनी साउखोरेलाई रिखाम बेनी मा इनी स्वाक्चिमोलाई रिखाम मेबेनी’#लेवी १९:१८ र्वाक्पा गानी थो़न्निम बु। 44लावो गो गानीलाई र्वाङु, इनी स्वाक्चिमोलाई रिखाम बेनी, मा इनी थो़मतेर्साक्पामिमकाम लागि सो़म्दी बेनी, 45मेम बेसाका गानी पाह्रीला बाट्पा पापकु चो़मिम दु़म्नी। गुमीका जो़पा नुङ मेजो़पा मु़चु़ निफिकाम लागि नेप्सुङ ओम्बेन्मी मा माम्चु़नीकु ङादोडा जो़पा नुङ मेजो़पा खारी बेपा मु़चु़ निफिकाडा व थु़र्मी। 46गानीलाई रिखाम बेपालाई कोङङा रिखाम बोनी माला गानी हाम पुरस्कार ल्वानी मा? कर फक्पा मेजो़पा मु़चु़मिमका वो मेमङा बोमी। 47इनी ङोप्सो़मिमनुङ कोङङा गानी सेवो सानिम बुनी माला वाङमिमडाम गानी हाम जो़पा बेन्नी मा? माम्चु़नीडा थो़रमेलु़पामिमका वो मेमङा बोमी। 48मेम्मिमका पाह्रीला बाट्पा इनी पाप होङङा गानी वो खोत्ले खारी जो़पा बेनी।”#लेवी १९:२; व्य १८:१३
अहिले सेलेक्ट गरिएको:
मत्ती 5: THUL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© Wycliffe Bible Translators, Inc. All rights reserved.
